1, 2. a) Jehovata mañanaca ¿imamandata shuj jatun bendición can? b) ¿Imamandata Bibliapi nishca shina mañana capanchi?

JEHOVÁ DIOSCA jahua cielota, cai Alpata rurajmi can. Jehová Dios cai Alpata ricujpica, gentecunaca paramupi tejamanda asha yacu shutujunshnallami ricurin (Salmo 115:15; Isaías 40:15). Alpa jahuapi tucui imacunalla tiashcacunahuan ñucanchita chimbapurashpa ricujpi, paramupi asha yacushna cajpipash Salmo 145:18, 19​pica ninmi: ‘Mandaj Diosca, tucui yuyaihuan paita mañajcunata ayudangapaca ladopimi. Paita manllajcuna, imata munashcataca pactachingami. Paicuna caparishpa mañashcatapash uyashpa quishpichingami’ nishpa. Tucuita Ruraj Diosmi ñucanchi mañaicunata uyashpa, ayudangapaj munan. Chai bendiciondami tucuicunaman cushca.

² Shinapash, Jehová Diosca pai munashcashna mañajpillami ñucanchi mañaicunataca uyanga. Shinaca ¿imashinata mañana canchi? Bibliapi ima nijta yachajushun.

3. ¿Imamandata Jehovata mañana capangui?

³ Jehová Diosca paita mañachunmi munan. ¿Imashinata chaita yachanchi? Filipenses 4:6, 7​ta liipai. Cai textopi ima nijushcata pensaripai. Tucuita Ruraj Diosmi quiquin ali cachun munan. Quiquin imashina sintirishcata, ima llaquicunata charishcatapash paiman villachunmi munan.

4. Jehovapa ali amigo tucungapaca ¿imatata rurana capangui?

⁴ Jehovata mañanami paihuan ali amigo cachun ayudan.  Imashinami imata pensashcata, imamanda preocuparishcata, imashina sintirishcata shuj amigoman cutin cutin parlashpaca ashtahuan ali amigo tucungui. Shinallatami Jehovahuanbash can. Paica Bibliapimi imata pensashcata, imashina sintirishcata, shamuj punllacunapi imata ruragrijushcatapash villan. Quiquinbash shungu ucupi imata charishcataca Jehovaman villanallami cangui. Shinami paihuan ali amigo tucushpa catingui (Santiago 4:8).

5. ¿Tucuicunapa mañashcatachu Jehová Diosca uyan?

⁵ Jehová Diosca ¿tucuicunapa mañaicunatachu uyan? Na. Na tucuicunata uyanllu. Profeta Isaiaspa punllacunapica Jehová Diosca nircami: ‘Cangunapa maquica huañuchishcamandami yahuarsapa can. Chaimandami ninanda mañanajujpipash napacha uyashachu’ nishpa (Isaías 1:15). Ñucanchipash na yaipi cashpa, imapash nalicunata rurajpica Jehová Diosca ñucanchi mañaicunataca na uyangachu.

6. a) ¿Imamandata feta charinaca minishtirishcapacha can? b) ¿Imashinata feta charishcataca ricuchi ushapangui?

 ⁶ Jehová ñucanchi mañashcacunata uyachunga paipi feta charinami minishtirin (Marcos 11:24). Apóstol Pabloca nircami: ‘Crishpallami Taita Diostaca cushichinchi. Taita Diospaman quimiringapaca, pai tiajtaca crinapachami. Paita mascashpa causajcunaman aliguta caranatapash crinapachami’ can nishpa (Hebreos 11:6). Shinapash feta charinimi ninallaca na canllu. Feta charishcata ricuchingapaca Jehovapa mandashcacunatami cada punlla cazuna canchi (Santiago 2:17, liipangui).

7. a) ¿Imamandata humildadhuan, respetohuan mañana canchi? b) ¿Imashinata tucui shunguhuan mañajushcataca ricuchi ushanchi?

⁷ Jehovata mañajushpaca humildadhuan, respetohuanmi mañana canchi. ¿Imamandata shina mañana canchi? Yuyapai, shuj reyhuan o shuj presidentehuan parlajushpaca ¿nachu respetohuan parlanchiman? Jehová Dioscarin paicunatapash ashtahuan yali Tucui Ushaita charij Diosmi can. Chaimandami Jehovata mañajushpaca humildadhuan, respetohuan mañana canchi (Génesis 17:1; Salmo 138:6). Shinallata tucui shunguhuan mañashpa, na chaitallata chaitallata nijunachu canchi (Mateo 6:7, 8).

8. Jehovata mañashca jipaca ¿imatata rurana capanchi?

⁸ Jehová Diosta mañashca jipaca, imata mañashcata pactachingapaj esforzarinami canchi. Shuj ejemplota ricushun, cada punlla imata minishtishcata mañashpaca, Jehová tucuita yanga carachunga na shuyanachu canchi. Ñucanchicunapash imagupi cashpapash shinllita trabajanami canchi (Mateo 6:11; 2 Tesalonicenses 3:10). Shinallata, imapash nali ruraicunata saquingapaj Jehovata mañajushpaca ñucanchipash nali ruraicunamanda caruyanami canchi (Colosenses 3:5). Cunanga, Diosta imashina mañanamanda huaquin tapuicunata yachajushun.

9. ¿Pitata mañana canchi? Juan 14:6​pica ¿imatata mañanamandaca yachachin?

⁹ ¿Pitata mañana canchi? Jesús paipa catijcunata mañachun yachachijushpaca, “jahua pachapi tiajuj ñucanchi Taitalla” nishpa mañachunmi yachachirca (Mateo 6:9). Shinallata nircami: “Ñucallami ñan cani. Na llullashpa villajmi cani. Causaita causagrinata carajpashmi cani. Ñuca Taitapajman ñuca na pushajpica, pipash na paillata chayai ushanllu” nishpa (Juan 14:6). Chaimandami, ñucanchica Jehová Diosta mañana canchi. Shinapash Jesuspa shutipi mañanaca ¿imatata ningapaj munan? Ñucanchi mañashcacunata Jehová uyachunga, Jehová Dios paipa Churi Jesusta cai Alpaman cachamushcataca na cunganachu canchi. Imashinami ña yachajurcanchi, ñucanchitaca Jesusmi huañuimanda, juchamandapash salvarca (Juan 3:16; Romanos 5:12). Shinallata Jehovami, Jesustaca Sumo Sacerdote cachun, Juez cachunbash agllarca (Juan 5:22; Hebreos 6:20).

10. ¿Cungurishpallachu mañana canchi? ¿Imata nipangui?

¹⁰ ¿Cungurishpallachu mañana canchi? Na. Jehová Diosca ñucanchi mañajushpa cungurishca, tiarishca o shayanman mañachunga na ninllu. Bibliapica ninmi, Jehová Diostaca maquita vichai churashpa, cungurishpa, imashina cashpapash respetohuan mañanallami can nishpa (Nehemías 8:6; Daniel 6:10). Ñucanchi mañajujpica cungurishcata, shayajujta, tiajujtaca Jehová Diosca na ricujunllu. Ima munaihuan ñucanchi mañajujtami ricun. Shinaca maipi cashpapash punlla o tuta, shinllita parlashpa, shungu ucupilla cashpapash mañanallami canchi. Ñucanchi mañaita ni pi na uyajpipash, Jehová Dios uyajtaca tucui shunguhuanmi crina canchi (Nehemías 2:1-6).

11. ¿Imacunamandallata Jehovataca mañai ushanchi?

¹¹ ¿Imacunamandallata mañana canchi? Jehová  munashcashna mañajushpaca imacunamandapash mañanallami canchi. Bibliapica ninmi: “Pai munashcashna ñucanchi imaguta mañajujtapash, Diosca uyanllami” nishpa (1 Juan 5:14). Cada uno ¿imata minishtishcata mañanallachu canchi? Ari. Jehovata mañajushpaca shuj ali amigohuan parlajuj cuendami parlana canchi. Jehovamanga ñucanchi imata pensashcata, ñucanchi shungupi ima yuyaicuna tiashcatapash villanallami canchi (Salmo 62:8). Tucuita ali rurashpa catingapaj paipa espíritu santota cushpa ayudachunbash mañanallami canchi (Lucas 11:13). Shinallata, imata ruragrijushpapash ali yuyaita cushpa ayudachun mañaita ushanchimi (Santiago 1:5). Ñucanchi juchacunata perdonachun nishpapash mañanallami canchi (Efesios 1:3, 7). Ashtahuanbash, ñucanchi familiacunamanda, congregacionbi huauquipanicunamanda, tucuicunamanda mañanallami canchi (Hechos 12:5; Colosenses 4:12).

12. Mañajushpaca ¿imatata pundapi mañana capanchi?

¹² Mañajushpaca ¿imatata pundapi mañana canchi? Jehovapa munai pactarichun nishpami mañana canchi. Ñucanchimanda imatalla rurashcatapash tucui shunguhuanmi agradicina canchi (1 Crónicas 29:10-13). Jesús cai Alpapi cashpa imashina mañanata yachachishcamandami, ñucanchipash shinallata mañanchi (Mateo 6:9-13, liipangui). Jesusca nircami, mañanajushpaca Diospa shuti alicachishca cachun, santo, ima mapapash illaj cachunmi pundapica mañana canguichi. Chai jipaca Diospa Reino uchalla shamushpa cai Alpapi Taita Diospa munai pactarichunmi mañana canguichi. Chaicunamanda mañashca jipami, ñucanchi imata minishtishcatapash mañanalla canchi nishpa. Ñucanchi mañajushpa Jehovapa munaita pundapi churashpaca ñucanchi causaipi ima ashtahuan importante cashcatami ricuchishun.

13. Mañajushpaca ¿mashna tiempotata parana canchi?

 ¹³ Mañajushpaca ¿mashna tiempotata parana canchi? Jehovata mañajushpa mashna tiempota paranataca Bibliapica na nijunllu. Imamanda mañagrijushpapash mashnata paranataca ñucanchillatami ricuna canchi. Por ejemplo micungapaca ashalla shimicunata nishpachari mañangui. Shinapash Jehovata pagui nishpa, imapash llaquicunamanda ayudahuai nishpa mañajushpaca unaitami  paranchi (1 Samuel 1:12, 15). Jesuspa punllacunapi gentecunashnaca na cangapaj munanchichu. Paicunaca shujcuna ricuchunllami mañashpaca unaita paran carca (Lucas 20:46, 47). Shina mañaicunataca Jehová Diosca na alicachinllu. Tucui shunguhuan mañashcatami Jehová Diosca alicachishpa uyan.

14. ¿Mashna viajeta mañana canchi? ¿Imata Diosmanda yachajunchi?

¹⁴ ¿Mashna viajeta mañana canchi? Jehová Diosca cutin cutin paita mañachunmi munan. Bibliapica ninmi: “Rijchariashpa Diosta mañaichi”, “na cungashpami mañajunalla canguichi”, “mañanataca na saquinachu canguichi” nishpa (Mateo 26:41; Romanos 12:12; 1 Tesalonicenses 5:17). Jehová  Diosca ñucanchi mañashcacunata uyashpa ayudangapami munan. Ñucanchita juyashcamanda, ima minishtishcata carashcamandaca cada punllami agradicina canchi. Shinallata llaqui japijpi, imatapash ali rurangapaj, llaquicunata aguantashpa catingapapash mañanallami canchi. Jehovata mañai ushaimandaca cushijushpami mañariana canchi.

15. ¿Imamandata “amén” o shina cachun nina canchi?

¹⁵ ¿Imamandata mañaita tucuchishpaca “amén” o shina cachun nina canchi? Shina nishpaca tucui shunguhuan mañajushcata, imata mañashcapash pactarichun munashcatami ricuchinchi (Salmo 41:13). Bibliapica ninmi huauquipanicunahuan mañanajushpa, upalla o shinllita “shina cachun” nishpaca, mañashcacuna pactarichun ninajunchimi nishpa (1 Crónicas 16:36; 1 Corintios 14:16).

16. Ñucanchi mañashcataca ¿ciertopachachu Jehová Diosca uyan?

¹⁶ Ñucanchi mañashcataca ¿ciertopachachu Jehová Diosca uyan? Ari, uyanmi. Bibliapica ninmi: “Mañanajujtaca, canmi uyajungui” nishpa (Salmo 65:2). Tucui shunguhuan ashtaca millón gentecuna mañashcataca Jehová Diosca uyashpa, imashinapash contestanmi.

17. Jehová Diosca ¿imashinata ñucanchi mañashcacunata contestan?

¹⁷ Jehová Diosca angelcunahuan, paita sirvijcunahuanmi ñucanchi mañashcataca contestan (Hebreos 1:13, 14). Ashtaca gentecunami Bibliata ali intindingapaj Diosta mañashca, chai jipallami testigo de Jehovacuna paicunataca visitangapaj chayashca. Bibliapica yachachinmi, ali villaicunata cai Alpapi villachunga angelcunapashmi ricurianajun nishpa (Apocalipsis 14:6, liipangui). Huaquinbica ima llaquimandapash o imata minishtishpapash Jehovata mañajpica, huauquipanicunahuanmi  ñucanchi mañashcacunata contestan (Proverbios 12:25; Santiago 2:16).

18. Ñucanchi mañashcacunataca ¿imashinata Jehová Diosca contestan?

¹⁸ Jehová Diosca paipa espíritu santohuanbashmi ñucanchi mañashcacunata contestan. Imapash problemacunamanda Jehovata mañajpica, paipa espíritu santohuanmi ayudan (2 Corintios 4:7). Ñucanchi imata ruranata agllangapaj Jehovata mañajpica, Bibliapi consejocunahuanmi ali agllachun ayudanga. Shinallata Bibliata liijushpaca shuj ali textotami tari ushanchi. Tandanajuicunapipash imatapash uyangapaj minishtijushcatapachami pipash comentan. O congregacionmanda shuj anciano huauquimi Bibliamanda shuj ali yuyaita ñucanchiman ricuchin (Gálatas 6:1).

19. ¿Imatata huaquinbica tapuri ushanchi?

¹⁹ Huaquinbica ¿imamandashi Jehová Diosca ñuca mañashcataca na uyan? nishpachari tapurinchi. Jehová Diosca ñucanchi mañashcacunata ima hora contestanataca alimi yachan. Paica ñucanchicuna ima ayudata minishtijujtapash ricujunmi. Shinapash ñucanchicuna tucui shunguhuan mañajushcata, paipi feta charishcata ricuchingapaca mañarianami canchi (Lucas 11:5-10). Shinallata huaquinbica na yashcapimi Jehová Diosca ñucanchi mañashcacunata uyashpa tigrachin. Por ejemplo, imapash llaqui pasajpi Jehovata mañajpica, chai problemataca na chai rato anchuchinllu. Shinapash chai problemata aguantashpa catichunmi ayudanga (Isaías 40:29, liipangui).

20. ¿Imamandata Jehová Diostaca cutin cutin mañariana canchi?

²⁰ Jehová Diosta mañanaca shuj jatun bendicionmi can. Chaimandami, ñucanchi mañashcacunata pai uyanataca tucui shunguhuan crina canchi (Salmo 145:18). Shinallata Jehovata tucui shunguhuan cutin cutin mañashpaca paihuan ashtahuan ali amigomi tucushun.