1, 2. a) Shuj regalota carajpica ¿imamandata agradicinguiman? b) Jehová Diosca imatata tucuimanda yali carashca?

QUIQUINGA ¿imapash valishca regalota chasquishcanguichu? Shuj regalota carajpica cushillami sintiringui. Shinapash, regalocunaca ashtaca culquipa randishcamandallaca na ashtahuan valinllu. Imatapash minishtijushcatapacha carajpicarin cushijushpami agradicishun.

² Jehová Diosca ñucanchimanga tamiata, indita, granocunata, tucui ima minishtishcatami caran. Shinapash chai tucui carashcacunamanda yalica, paipa Churipa causaitami cushca. Cai capitulopica, ñucanchi para siempre causai ushachun, Jehová paipa Churita cachamushcatami yachajushun (Mateo 20:28, liipangui). Shinami Jehová Diosca tucuicunata ninanda juyashcata ricuchishca.

3. ¿Imamandata tucui gentecuna huañun?

³ Jehová Diosca gentecunata juchamanda, huañuimanda salvangapaca paipa Churitami cachamurca (Efesios 1:7). Imamanda salvachun minishtishcata yachangapaca jardín de Edenbi ima tucushcata yachajushun. Ñucanchi punda taitamamacunaca Adán, Evami carca. Paicunaca Taita Diosta na cazuimandami juchayucuna tucushpa huañurca. Tucui ñucanchicunapash Adanba, Evapa huahuacuna caimandami juchayucuna cashpa huañunchi. (Página 210​pi nota 9​ta ricupangui.)

4. ¿Adanga imashina causaitata charirca?

 ⁴ Jehová Dios Adanda rurashpaca jucha illajtami rurarca. Adanga paipa yuyaipipash, cuerpopipash jucha illajmi carca. Chaimandami ima horapash na irquiyana, na rucuyana, na huañuna carca. Pai rurashcamandaca Jehová Diosca Adandaca churitashnami ricun carca (Lucas 3:38). Chaimandami Jehová Diosca Adanhuanga cutin cutin parlan carca. Shinami imata rurana cashcatapash Adanmanga ali intindichirca. Shinallata Adán gushtashca trabajotami curca (Génesis 1:28-30; 2:16, 17).

5. Diosca, Adandaca “paishnalla rijchajtami rurarca” nishpaca ¿imatata ningapaj munan?

⁵ Taita Diosca, Adandaca “paishnalla rijchajtami rurarca” (Génesis 1:27). Jehová Dios Adanda rurashpaca paishnalla juyaj, ali yuyaita charij, tucuita ali ruraj cachunmi rurarca. Adanga shuj animal shinaca na carcachu. Animalcunaca ima ali cajta, ima na ali cajtaca na yachanllu. Shinapash Adandaca ima ali cajta, ima nali cajta paillata agllachunmi Jehová Diosca rurarca. Diosta cazushpaca, para siempremi Adanga paraíso Alpagupi causanman carca.

6. a) Adán na cazushcamandaca ¿imata tucurca? b) Ñucanchica ¿imata tucunchi?

⁶ Adanga, Diosta na cazuimandami juchayu tucushpa, huañuna tucurca. Chaimandami Jehovahuan nali carca. Jucha illaj causaita, paraíso Alpapi para siempre causaitapash chingachirca (Génesis 3:17-19). Adanbash, Evapash paicunallata Taita Diosta na cazuimandami para siempre causaita ñana charirca. Chaimandami Bibliapica nin: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa (Romanos 5:12). Shinaca Adán na cazuimandami paipash, ñucanchipash juchayu tucungapaj ‘jatui tucushca’ cuenda canchi. Chaimandami  juchayu canchi, huañuitapash huañunchi (Romanos 7:14). ¿Ñucanchica salvari ushanchichu? Ari, salvari ushanchimi.

7, 8. Pitapash salvanaca ¿imata can?

⁷ Pitapash salvanaca ¿imata can? Caita intindingapaca ishcai yuyaicunata ricushun. Punda yuyai: Pitapash secuestrashpa apajpica ashtaca culquita pagashpami salvai usharin. Jipa yuyai: Shuj huagra, ajeno chagraman yalishpa dañujpica animalpa dueñoca, dañushca mashna cajpipash chaitallatami pagana can.

⁸ Taita Diosta na cazushpa Adán tucuicunata huañuiman apashcamandaca, gentecunata salvaitaca gentepuramandaca ni pipash na salvai ushanllu. Shinapash Jehová Diosca juchamanda, huañuimanda salvangapami munarca. Ñucanchicunata salvangapaj Jehová Dios imata ruragrijujta, imashina ayudajtapash ricushun.

9. Ñucanchita salvangapaca ¿imata minishtirirca?

⁹ Adán na cazushpaca jucha illaj causaitami chingachirca. Chai causaita cutin charingapaca juchayucuna caimandaca gentecunaca imatapash na rurai ushashcachu (Salmo 49:7, 8). Ñucanchita salvangapaca pipash jucha illaj causaita cushpami salvaita ushana carca. Bibliapica ninmi: ‘Tucuicunata quishpichingapami, paillata japi tucushpa huañurca’ nishpa (1 Timoteo 2:6). Shinaca ñucanchita quishpichingapaca Adanba jucha illaj causaitashnami minishtirirca.

10. Gentecunata salvangapaca ¿imatata Jehová Diosca rurarca?

¹⁰ Gentecunata salvangapaca ¿imatata Jehová Diosca rurarca? Paipa punda rurashca, juyashca Churitami cai Alpaman cachamurca. Paica Jesusmi can (1 Juan 4:9, 10). Jesusca Jehovatapash, jahua pachapi causaitapash saquishpami cai  Alpaman shamuna carca (Filipenses 2:7). Jehovami jahua cielomanda Jesustaca cai Alpaman cachamurca. Shinami Jesusca cai Alpapi jucha illaj nacirirca (Lucas 1:35).

11. ¿Imashinata Jesusca tucui gentecunata salvagrijurca?

¹¹ Jehovata Adán na cazuimandami gentecunaca jucha illaj causaita chingachirca. Shinaca pipash gentecunata huañuimanda salvai ¿ushanachu carca? (Romanos 5:19, liipangui.) Ari, Jesusmi tucuicunata salvangapaj paipa jucha illaj causaita curca (1 Corintios 15:45). Shinami Adanba juchamanda tucuicunata salvarca (1 Corintios 15:21, 22).

12. ¿Imamandata Jesusca llaquinaita sufrina carca?

¹² Bibliapica Jesús nara huañushpallata llaquinaita sufrishcatami ricuchin. Llaquinaita macashpa, shuj racu caspipi clavashpa ninanda padicichishpami huañuchirca (Juan 19:1, 30; Hechos 10:39). ¿Imamandata Jesusca sufrina carca? Diabloca nishcarcami: Llaquipi cashpaca ni pipash na Taita Diostaca cazungachu nishpa. Shinapash, Jesusca llaquicunata aguantashpa, ninanda sufrishpapash Taita Diosta tucuipi cazui ushashcatami ricuchirca. Jesús cazushcata ricushpaca Jehová Diosca ninandami cushijurianga (Proverbios 27:11. Página 213​pi nota 15​ta ricupangui).

13. Jehová Diosca ¿imashinata ñucanchita salvarca?

¹³ Jehová Diosca ¿imashinata ñucanchita salvarca? Jesuspa jucha illaj causaita cushpami ñucanchita salvarca. Huata 33​pi 14 de nisán punllapimi, Jehová Diosca paipa Churita huañuchichun saquirca (Hebreos 10:10). Quimsa punlla jipaca Jesustaca jahua cielopi causachunmi Jehová Diosca causachirca. Chai jipami Jesusca jahua pachapi tiajuj, Taita Diospa ñaupajpi ñucanchimanda paipa jucha illaj causaita cushcata ricuchirca (Hebreos 9:24). Shinami Jesusca dibita pagashpa cuenda ñucanchitaca juchamanda, huañuimandapash salvarca (Efesios 1:7, liipangui).

14, 15. Ñucanchi juchacunata perdonachunga ¿imatata rurana canchi?

¹⁴ Jesús huañushcamandami ñucanchica ashtaca bendiciongunata charinchi. Cunanbi, shamuj punllacunapipash ima bendicionguna tianata ricushun.

¹⁵ Ñucanchi juchacunaca perdonashcami canga. Juchayucuna caimandami alita ruranaca shinlli can. Tucuicunami imatapash nishpa, imatapash rurashpa pandarinchi (Colosenses 1:13, 14). Ñucanchi juchacuna perdonashca cachunga ¿imatata rurana canchi? Nalicunata rurashcamandami tucui shungu arripintirishpa Jehovata perdonahuai nishpa mañana canchi. Shinallata ñucanchi juchacunata perdonanatapash confianami canchi (1 Juan 1:8, 9).

16. Ali concienciata charingapaca ¿imatata rurana capanchi?

¹⁶ Ali concienciatami charishun. Ñucanchi concienciapi nali sintirishpaca, Dios cusha nishca causaita na chasquishachu yashpami, imapapash na valishca shina sintirishun. Chai yuyaicuna mishachunga na saquinachu canchi. Jehovata perdonahuai nishpa mañajpica paica ñucanchi mañashcacunata uyashpami perdonanga (Hebreos 9:13, 14). Ñucanchi problemacunata, nali munaicunata charishpaca Jehová Diosca paiman villachunmi munan (Hebreos 4:14-16). Shina rurashpami Jehovahuan tranquilo cushilla sintirishun.

17. Jesús huañushcamandaca ¿ima bendiciongunatata chasquishun?

¹⁷ Para siempre causaitami chasquishun. Juchaca huañushpa chingagrinatami cun. Cutin Jesusmandaca causaita causagrinatami Taita Diosca caran (Romanos 6:23). Jesús ñucanchita salvangapaj huañushcamandami para siempre ungüicunapash illaj, cushilla causaita ushashun (Apocalipsis 21:3, 4). Shinapash chai bendiciongunata chasquingapaca ¿imatata rurana canchi?

18. Jehová Dios ñucanchita juyashcataca ¿imashinata yachanchi?

¹⁸ Pipash shuj juyailla regalota carajpica ninandami cushijunguiman, Jesús ñucanchita salvangapaj huañushpaca tucuimanda yali valishca regalota carashca cuendami can. Chaimandami Jehovataca ninanda agradicina canchi. Juan 3:16​pica ninmi: “Taita Diosca, cai pachapi causajcunata ninanda juyashpami, paipaj shujlla Churita caramurca” nishpa. Jehová Diosca ñucanchita juyaimandami paipa Churi Jesusta cachamurca. Shinallata ñucanchita juyaimandami Jesusca ñucanchimanda huañurca (Juan 15:13). Chaimandami Jehovapash, Jesuspash ñucanchita juyashcata crina canchi (Gálatas 2:20, NM).

19, 20. a) Jehovapa amigo cangapaca ¿imatata rurana capanchi? b) Jesús huañushcata agradicingapaca ¿imatata rurana capanchi?

¹⁹ Jehová Dios ñucanchita juyashcata yachashpa, paipa amigo tucungapaca ¿imatata rurana cangui? Pitapash juyangapaca ali rijsinami cangui. Juan 17:3​pica ninmi: Taita Diostaca alimi rijsina cangui nishpa. Shina rijsishpallami Jehovataca ashtahuan juyangui. Shinallata paipa mandashcacunata cazushpami paipa amigo tucui ushangui. Shinaca Jehovamanda Bibliapi yachajushpa catingui (1 Juan 5:3).

²⁰ Jesús ñucanchimanda huañushcata agradicishun. Bibliapica ninmi: “Diospaj Churita maijambash crishpaca, causaita causagrinatami charin” nishpa (Juan 3:36). ¿Imashinata Jesuspi feta charishcata ricuchishun? Jesús imata rurachun mandashcatami ñucanchipash rurana canchi (Juan 13:15). Na shimihuanllaca feta charinimi ninachu canchi. Jesuspi feta charishcataca ñucanchi causaipimi ricuchina canchi. Santiago 2:17​pica ninmi: ‘Crij cashcapash, alita ruranacunata na rurashcamandaca, pai crishcapash huañushcashnami tucushca’ nishpa.

21, 22. a) Jesús Huañushcata Yarina tandanajuimanga ¿imamandata cada huata rina capanchi? b) Capítulo 6, 7​pica ¿imatata yachajugrinchi?

 ²¹ Jesús Huañushcata Yarina tandanajuiman ripangui. Jesús nara huañushpallatami nirca, ñuca huañushcata yarinami canguichi nishpa. Chaimandami cada huata Jesús huañushcataca yarinchi. Chaitami Bibliapica nin: ‘Jesús huañushcata yaringapaj’ tandanajui nishpa (1 Corintios 11:20; Mateo 26:26-28). Jesusca paipa jucha illaj causaita cushpa, ñucanchita salvashcataca na cungachun munanllu. Chaimandami Jesusca nirca: “Ñucata yarishpa, cashnata rurashpa catinguichilla” nishpa (Lucas 22:19, liipangui). Jesús Huañushcata Yaringapaj tandanajuiman rishpaca, Jehovapash Jesuspash ñucanchita ninanda juyashpa salvashcatami yarinajunchi. (Página 214​pi nota 16​ta ricupangui.)

²² Jehová Diosca paipa Churita huañuchun cachamushpami tucuimanda yali valishca regalota carashca (2 Corintios 9:14, 15). Jesús paipa causaita cushcamandaca huañushcacunapashmi shuj esperanzata charin. Chaitaca capítulo 6, 7​pimi ashtahuan yachajushun.