Zacarías shuti sacerdotepa huarmica Elizabet shutimi carca. Paicunaca Jerusalén llacta ladopimi causarca. Jerusalén llactapa jatun pircacunata cutin shayachishcamandaca ñami 400 huatacuna yalishca carca. Zacarías Elizabet huarmiguhuan ashtaca huatacunata cazarashca cashpapash huahuacunataca na charircachu. Shuj punllaca Zacarías Diospa templo huasiman yaicushpa altarpi inciensota cushnichijujpimi ángel Gabriel ñapash ricurirca. Zacarías paita ricushpa ninanda manllarijpimi ángel Gabrielca: ‘Zacarías ama manllarichu’. Jehovami cai ali villaita villachun cachamuhuarca. ‘Canba huarmi Elizabetca shuj jari huahuagutami ungunga. Chai huahuagutaca, Juan shutita’ churangui. Paitami Jehová Diosca paipa munaita pactachichun agllashca nirca. Shina nijpimi Zacariasca: “Shina pasanataca ¿imashinata yachashayari? Ñuca y ñuca huarmigupash ñamari mayorllagucuna capanchi” nirca. Chaimi ángel Gabrielca: ‘Taita Diosca ñucatami canhuan parlashpa cai ali villaicunata villachun cachamuhuashca. Shinapash ñuca villashca shimicunata na crimandami, cai shimicuna pactaringacaman na parlaita ushagringui’ nirca.

Zacariasca Diospa templo huasimanda na ucha llujshimurcachu. Unaita parashpa llujshijpimi canllapi gentecunaca ima pasashcata yachangapaj munanajurca. Shinapash Zacariasca na parlaita usharcachu chaimi maquicunahuanlla señasta rurashpa villajurca. Chaimi shuj jatun milagrota Zacarías ricushcata gentecunaca cuenta japirca.

Jipamanga chai ángel villashcashnami Elizabetca vijsayu quedashpa shuj jari huahuaguta ungurca. Chaimi Elizabetpa familiacuna, amigocunapash ninanda cushijushpa huahuaguta ricungapaj shamunajurca. Elizabetca: Juan shutitami churagrini nirca. Shina nijpimi paicunaca: ‘Canba familiapica shujllapash chashna shutica na tianllu’. ‘Cai huahuagutaca, paipa taitatashna Zacariasta shutichishun’ nirca. Shinapash Zacariasca shuj tabla caspiguta mañashpa “paica Juan shutimi capan” nishpa escribirca. Shina escribishca jipallami Zacariasca cutin parlai usharca. Shina pasashcata Judea llactapi tucui causajcuna yachaj chayashpami: “Chai huahuagu viñashpaca, ¿imatashi ruranga?” ninajurca.

Taita Dios paipa espíritu santota cujpi, chai huahuagupa taita Zacariasca nirca: ‘Jehová Diosca alabai tucushca cachun. Porque paica paipa llactata llaquishpami paicunataca salvashca. Paita sirvij Davidpa familiamanda shuj Salvadortami ñucanchipaman  cachamushca. Ñuca huahualla, canga jahua cielopi Taita Diospa profetami tucungui. Paipa ñangunata listo charichunga candami, Jehová Diosca paita ñaupashpa richun cachanga’ nirca.

Elizabetpa prima Mariapashmi shinallata shuj milagrota charishcarca.Chaitaca cati capitulopimi yachajushun.