Judiocunaca 14 de nisán punllapimi cada huata Pascua fiestata yarin carca. Shina rurashpami Jehová Dios paicunata Egipto llactapi esclavo cashcamanda salvashpa, carasha nishca alpaguman pushashcata yarinajurca. Huata 33​pica Jesusca paipa apostolcunahuanmi Jerusalén llactapi shuj huasi jahuapi Pascua punllata yarirca. Pascua micuita tucuchishca jipami Jesusca: “Ciertopachami cangunataca nini, cangunapuramanda shujmi ñucataca traicionashpa japichigrihuan” nirca. Shina nijpimi apostolcunaca manllarishpa: “Señor Jesús ¿ñucachu traicionagrijupani?” nishpa tapunajurca. Chaimi Jesusca: ‘Cangunapuramandaca shujmanmi tanda pedazota cugrini, paimi traicionahuanga’ nirca. Shina nishca jipallami Jesusca Judas Iscariote runaman tandata cararca. Chaimi Judasca jatarishpa Ilujshishpa rirca.

Chai jipallami Jesusca shuj mañaita rurashpa, paihuan quidashca apostolcunaman tandata chaupishpa cararca. Jesusca: “Japishpa micupaichi. Cai tandaguca ñuca cuerposhnami can” nirca. Chai jipaca copatapash japishpami, Taita Diosta mañashpa: “Tucuicuna, cai copamanda ufiapaichi. Porque caica ñuca yahuar cuendami can. Ashtaca gentecuna paicunapa pecadocunamanda perdonai tucuchunmi, ñuca yahuarta jichagrini”. Cangunami ñucahuan jahua cielopi mandagringuichi. Caitaca cada huatami rurashpa catina canguichi nirca. Jesusta ali catijcunaca cunan punllacunapipashmi indi huashajushca jipa Jesús Huañushca Punllata yaringapaj cada huatami tandanajun.

 Chai jipami Jesuspa discipulocunaca, paicunapuramanda pi ashtahuan importante cashcata rimarinajurca. Chaimi Jesusca: “Cangunapurapi mayorlla cajcunaca, ashtahuan jovenshnami cana can. Shinallata, ñaupaman pushajcunapash shujcunata sirvijcunashnami cana can” nirca.

Jesusca: ‘Ñuca Taita ñucaman imata villashcatapash tucuitami cangunaman ña villarcani. Cangunaca ñuca juyashca amigocunami canguichi’. Ñucaca ñallami ñuca Taitapaman tigrasha. Cangunaca cai alpapimi quidanguichi. “Imashinami ñucaca cangunata juyashcani, shinallatami cangunapash caishuj chaishuj juyarina canguichi. Chaita ricushpami tucui gentecuna ñucapa discipulocuna cashcata yachanga” nirca.

Ultimopica Jesusca paipa discipulocunata cuidachunmi Jehovata mañarca. Shinallata paicunapura ayudarishpa, tranquilo aliguta causachun. Shinallata Jehová Diospa shutipash santificado cachun nishpami mañarca. Chai jipaca Jesuspash, paipa apostolcunapash Jehová Diosman candashpami llujshirca. Jesusta japina horasca ñami chayamujurca.