Jardín de Edenmanda llujshishca jipaca Adán y Evaca tauca huahuacunatami charirca. Paicunapa punda churica Cainmi carca. Paica frutacunata, verduracunata, granocunatami tarpun carca. Jipa churica Abelmi carca. Paica llamacunata michijmi carca.

Shuj punllaca, Caín y Abelca Taita Diosman shuj ofrendata cararca. Diosman shuj ofrendata ruranaca ¿ima cajta yachanguichu? Shuj valishca regalota caranamandapash yali valishcami can. Jehová Diosca Abelpa carashca ofrendatami alicachirca. Shinapash Cainba carashca ofrendataca na alicachircachu. Chaimi Cainga ninanda culirarca. Chaimandami Jehová Diosca paitaca shina culira catishpaca imapash nalitami rurangui nishpa advirtirca. Shina nijpipash Cainga na cazurcachu.

 Chai jipallami Cainga Abeltaca “jacu pambaman” nirca. Ña paicunalla chaipi cashpaca, Cainga paipa huauquita huañuchishpami saquirca. Shina rurashcamandaca Jehová Diosca ¿imatata rurarca? Caindaca paipa familiapaman cutinga ama tigramuchunmi caru caruman cachashpa castigarca.

¿Imatata caimandaca yachajunchi? Imata rurajushpapash ñucanchi munashcashna na llujshijpica talvez culiranchiman. Shinapash yapata culirajushcata cuenta japishpaca o pipash yapatami culirajungui nijpica uchallami cambiana capanchi. Shina rurashpallami culira mishachunga na saquishun.

Abelca tucui shunguhuan Jehová Diosta juyaimandami tucuipi cazurca. Chaitaca Jehová Diosca na cunganllu. Chaimandami cai alpata shuj juyailla paraisoguta rurashpaca Abel runaguta causachinga.