LECCIÓN 11
Abrahanga shinlli feta charishcatami ricuchirca
Abrahanga paipa churi Isaactaca Jehová Diosta tucui shunguhuan juyachun, Jehová Dios imacunatalla ruranapi confiachunbashmi yachachirca. Shinapash Isaac casi 25 huatacunata charijpimi Jehová Diosca Abrahandaca shinlli, na pactachi ushanalla ruraitami mandarca. ¿Imata rurachunda mandarca?
Taita Diosca Abrahandaca: “Por favor, can ninanda juyashca único churi Isaacta apashpa, Moria shuti pushtuman ri. Chaipica Isaactaca rupachishca ofrendatashna ñucaman cuna cahuangui” nircami. Jehová Dios imamanda shina mandashcata na yachashpapash Abrahanga tucuitami cazurca.
Shina mandajpimi Abrahanga ali horata jatarishpa paita sirvij ishcai runacunatapash, paipa churi Isaactapash pushashpa rirca. Quimsa punllacunata ña rinajujpimi urcucuna carupi ricuri callarirca. Chaipimi Abrahanga paita sirvijcunataca caipi shuyaichilla, ñuca churiguhuanga shuj animalta rupachishpa Taita Diosman carangapami rinajunchi nirca. Abrahanga paipa churi Isaacmanmi yamdata apachirca. Cutin paica shuj cuchillota apashpami rirca. Chaimi Isaacca paipa taitataca: “Taita Diosman rupachishca ofrendata carangapaj llamaguca ¿maipita can?” nishpami tapurca. Chaimi Abrahanga: ‘Ñuca churigulla, Taita Diosman rupachishpa carangapaj ofrendataca, Taita Diosllatami shuj llamaguta caranga’ nircami.
Moria urcuman ña chayashpaca Abrahanga shuj altartami rurarca. Chaipimi Isaactaca maquitapash, chaquitapash huatashpa chai altar jahuapi churarca.
Abrahán Isaacta ña huañuchigrijujpimi, Jehovapa shuj angelca cielomandaca: “Huambragutaca ama huañuchichu. Ama imatapash ruraichu. Cunanmi ñucata can tucui shunguhuan respetaimanda ñucata cazushcataca yachani. Porque canba único churiguta ñucaman carangapaca dispuestomi cashcangui” nircami. Chai jipallami Abrahanga shuj jari llamagu cachocunapi liarishca shayajujta ricurca. Shina ricushpami Abrahanga, paipa churipa randica chai jari llamaguta japishpa Diosman cushpa tucuillata rupachirca.
Chai punllamandami Jehová Diosca Abrahanga ñuca amigomi can nirca. ¿Imamanda shina nishcata yachapanguichu? Jehová Dios mandashcata na ali intindishpapash Abrahanga tucuita cazushcamandami shina nirca.
Jehová Diosca Abrahanmanga cashnami nirca: “Canba huahuamandami cielopi estrellacunashna ashtaca ashtacatapacha miranga”. Shina nishpaca Abrahanba miraicunamanda tucui cazuj gentecunata Jehová Dios bendicianatami nijurca.
“Taita Diosca cai mundopi gentecunata ninanda juyashpami, paipa único Churiguta cachamurca. Paipa Churipi crishcata ricuchijcunaca ama shujllapash tucuchi tucuchun, sino para siempre causachunmi paipa Churitaca cachamurca” (Juan 3:16).
