Ninan Manllanai Tamia jipaca, Noepa churicunaca paicunapa huarmihuanga tauca huahuacunatami charirca. Shinami paicunapa familia mirajpi Jehová mandashcashna shuj shuj pushtucunapi causangapaj rirca.

Shinapash huaquin familiacunaca Jehová Diosta na cazushpami cashna ninajurca: “Jacuchi, shuj llactata shayachishunchi. Cielocaman chayajta shuj jatun jatun torretapash shayachishunchi. Shinami famosocunapacha tucushun”.

 Paicuna imata rurangapaj munanajushcataca Jehová Diosca na alicachircachu. Chaimandami ama shina rurashpa catichun jarcarca. ¿Imashina jarcashcata yachanguichu? Na yashcapimi shuj shuj idiomacunapi gentecunataca parlachirca. Chaimandami paicunapura imata parlajushcata na intindishpa chai torretaca ñana rurashpa catirca. Chai llactapi Jehová Dios gentecuna parlashca idiomata pandachishcamandami Babel shutita churarca. Shinami gentecunaca Babel llactamanda shuj llactacunaman causangapaj rirca. Shinapash maiman rishpapash paicunaca nalicunata rurashpami catirca. Quiquinga ¿imatata yuyapangui? ¿Pipash Jehová Diosta juyajca tiarcaracha? Chaitaca cati capitulopimi yachajushun.