Rey Acabca Jezreel llactapi paipa mandana huasimandami, Nabot shuti runapa uvas tarpushca alpata ricushpa shayajurca. Rey Acabca, Nabotpa alpatami randingapaj munajurca, pero Nabotca na jatungapaj munarcachu. Porque Jehová Dios cushca leypica taitacuna herenciashca alpacunataca na jatunachu carca. Chaimandami Nabot runaguca na jaturca. Shinapash Nabot nishcataca rey Acab ¿respetarcacha? Na respetarcachu. Chaimandami rey Acabca ninanda culirashpa maimanbash na llujshishpa, micuitapash na micungapaj munajurca.

Rey Acabpa huarmica Jezabelmi carca. Paica millai, nali reinami carca. Jezabelca Acabmanga: ‘Canga Israel llactata jatun mandajmi cangui’. Can tucui munashcatami chari ushangui. ‘Nabot runapa uvas tarpushca alpataca, ñucami canman cusha’ nircami. Chaimi cartacunata escribishpa llactata ñaupaman pushajcunaman cacharca. Chai cartapica yangata juchachishpami: Nabotca Diostami nalicachishpa rimashca, chaimandami paitaca rumihuan pigashpa huañuchina canguichi nirca. Chaimi ñaupaman pushajcunaca Jezabel huarmi mandashcashnallata rurarca. Chai jipaca Jezabel huarmica Acabmanga: ‘Nabot runapa uvas tarpushca alpataca japigrilla. Nabotca ñami huañushca’ nircami.

Jezabel huarmica Nabot runagutallaca na huañuchishca carcachu. Jehová Diosta sirvij ashtaca gentecunatapashmi yangata juchachishpa huañuchirca. Shinallata Jezabelca yanga rurashca dioscunata adorashpa, shuj nali cosascunatapashmi rurashpa causan carca. Jezabel huarmipa tucui nali ruraicunata ricushpaca ¿imatata Jehová Diosca ruragrijurca?

Acab runa huañushca jipaca paipa churi Jehoram runami mandai callarirca. Chai punllacunapimi Jehová Diosca Jezabelta, paipa familiatapash llaquichichun Jehú runaguta cacharca.

Jehú runaguca paipa carretapimi Jezabel causaj Jezreel llactaman rirca. Jehoram runapashmi paipa carretapi Jehú runaguhuan parlangapaj rirca. Ñanbi tuparishpaca Jehoram runaguca: ¿Ñucanchipuramandaca alichu canchi? nishpa tapurca. Chaimi Jehú runaguca: Canba mama Jezabel nalicunatalla rurajujpica maitashi casilla ali causaica tiangayari nirca. Shina nijpimi Jehoram  runaca paipa carretata tigrachishpa rigrijurca. Chaimi Jehuca shuj flechahuan Jehoram runata huañuchirca.

Jipaca Jezabel huarmipa huasimanmi Jehuca rirca. Chaita yachashpami, Jezabel huarmica aliguta arreglarishpa ventanamanda chapajurca. Jehú chayajpica Jezabel huarmica nalimanmi saludarca. Jezabelta ricushpaca chai huarmipa sirvijcunataca Jehuca cashnami caparirca: “Chai huarmita ucu alpaman shitamuichi” nishpa. Shinami ventanamanda shitajpi chai huarmica huañurca.

Chai jipaca Jehú runaguca Acab runapa 70 churicunatami huañuchirca. Shinallata chai llactapi Baal diosta adorachunbash ñana saquircachu. Chaicunata ricushpaca ¿imatata yuyangui? Jehová Diosca tucuitami yachan. Shinallata Jehová Diosca nalita rurajcunata ima hora castiganataca alimi yachan.