Baal diosmanda villajcunahuan ima tucushcata Jezabel yachaj chayashpaca ninandami culirarca. Chaimi Eliasman villachun cacharca: Baalta catijcunata huañuchishca shinami canbash cayapaca huañugringui nishpa. Chaimi Eliasca ninanda manllarishpa chaquishca pambapi pacajugrishpa Jehovata cashna mañarca: Jehová “Dioslla, caicamanllami causangapaj munani. Ñuca causaita quichuhuailla” nishpa. Shina shaijushca cashpami shuj jatun yura ucupi puñushpa quedarca.

Chaipimi Jehovapa shuj angelca Eliasta rijchachishpa alillaguta nirca: “Jatarishpa micui” nishpa. ‘Shina nijpimi Eliasca ñapash ricushpa paipa uma ladopi cusashca shuj tortillata, yacu tiajujtapash ricurca. Chaita micushpa, ufiashpami paica cutin puñurca’. Chashna puñujujpimi chai angelca cutin tigramushpa nirca: ‘Jatarishpa micui, can riña ñanga’ faltanrami nishpa. ‘Shina nijpimi jatarishpa micurca, yacutapash ufiarca. Chai micunata micushpa, ña shinlli tucushpami 40 punllata, 40 tutata Taita Diospa Horeb urcuman chaquilla rijurca. Ña chaipi cashpami paica, shuj jatun utujuman yaicushpa chaipi pacarirca’. Chaipimi Jehová Diosca, Eliasta cai shimicunata nirca: “Elías ¿imatata caipica rurajungui?” nishpa. Chaita uyashpami Eliasca nirca: ‘Israelitacunaca, canhuan ari ninajushcatapash, canba altarcunatapash shitashpami saquishca. Canmanda villajcunatapashmi espadahuan huañuchishca. Shinallatami ñucatapash huañuchingapaj mascanajun’ nishpa.

Jehová Diosca Eliastaca nircami: ‘Canllaman Ilujshishpa shayari’ nishpa. Chaimi ‘ninan huaira ñapash shamurca. Chai jipaca, alpa mamami chujchurca. Cutin chai jipaca, ninami ricurirca’. Chai jipallami alillaguta huaira huacajujta uyarca. Chaita Elías uyashpami, pai jahualla churajushcahuan ñavita quilparishpa, canllaman Ilujshishpa chai utuju pungupi shayarirca. Elías chaipi shayajujpimi, cashna nij uyarirca: “Elías, ¿imatata caipica rurajungui?” nishpa. Chaita uyashpami Eliasca nirca: “Chai villajpuramandaca, ñucallami puchushcani” nishpa. Shinapash Jehová Diosca nircami: Na canlla canguichu, ñucata sirvijcunaca canchis huaranga runacunami Israelpi tianra nishpa. Shinallata canba jipaca Eliseomi ñucamanda villaj profeta tucunga nishpa villagri nircami. Shina nijpimi Eliasca Jehovata cazushpa ñapash villagrirca. Imatata yuyangui, ¿Jehová Diosta cazujpica candapash ayudangacha? Ari ayudangami. Cunanga na tamiashca chaquishca tiempopi ima pasashcata yachajushun.