LECCIÓN 21
Ali villaigucunataca ¿imashinata predicanajupanchi?
Jehová Diosca paipa Gobiernohuanmi cai alpapi tiashca tucuilla llaquicunata tucuchinga. Jehová Dios chaita ruranataca tucui gentecunamanmi villangapaj munapanchi. Jesusca paipa catijcunapash cai ali villaitaca tucui gentecunaman villachunmi munarca (Mateo 28:19, 20). Jesús mandashcata cazungapaca ¿imatata testigo de Jehovacunaca ruranajun?
1. Mateo 24:14pi shimicunaca ¿imashinata cunanbi pactarijun?
Jesusca, “Taita Diospa Gobiernomanda ali villaicunatapash, tucui llactapi gentecuna uyachunmi, mundo enteropi predicanajunga” nircami (Mateo 24:14). Jesús mandashcataca cushijushpami testigo de Jehovacunaca pactachipanchi. Diospa Gobiernomanda cai ali villaigucunataca mundo enteropimi, mil yali idiomacunapi predicanchi. Cai mingashcata pactachingapaca, aliguta organizarishpa predicangapami esforzaripanchi. Jehová Dios ayudajpillami cai mandashcataca pactachinajupanchi.
2. Gentecunaman predicangapaca ¿imatata ruranchi?
Gentecuna tiaj pushtucunapi predicangapami esforzaripanchi. Primer siglopi cristianocunashnami ‘huasin huasin rishpa’ predicanchi (Hechos 5:42). Huasin huasin predicashpami millon yali gentecunaman cada huata predicai ushapashcanchi. Pero gentecunata huasipi na tupashcamandami callecunapi o shuj shuj pushtucunapipash predicanchi. Ñucanchicunaca Jehová Diosmanda, paipa nishcacunamandapash tucuilla gentecunaman parlangapami siempre esforzaripanchi.
3. ¿Picunallata ali villaigucunata predicana responsabilidadtaca charin?
Ciertopacha cristianocunami ali villaigucunata predicana responsabilidata charin. Ñucanchicunaca tucui shungumi cai mandashcata pactachingapaj esforzarinchi. Gentecuna salvarichun munaimandami cai ali villaicunata predicangapaj ninanda esforzarinchi (1 Timoteo 4:16, liipangui). Y predicashcamanda pagachunga na shuyapanchichu. Porque Bibliapica, “gratismi chasquircanguichi y gratismi cuna canguichi” nijunmi (Mateo 10:7, 8). Jehová Diosta adorangapaj munaimanda, paita cushichingapaj munaimandami gentecuna na uyajpipash predicashpa catinchi.
ASHTAHUAN YACHAJUPASHUNCHI
Cunanga mundo enteropi predicangapaj testigo de Jehovacuna imata ruranajujta, shinallata Jehová Dios paicunata imashna ayudajujtapashmi yachajugripanchi.
Mundo enteropimi predicanchi: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia.
4. Tucuicunaman predicangapami esforzarinchi
Testigo de Jehovacunaca tucui ladopi caj gentecunaman ali villaigucunata predicangapami ninanda empeñarinchi. VIDEOTA ricushpa, cai tapuita contestapangui:
-
Testigo de Jehovacuna predicangapaj ninanda esforzarijta ricushpaca ¿imatata pensapangui?
Mateo 22:39 y Romanos 10:13manda 15caman liishpa, cai tapuicunata contestapangui:
-
Predicangapaj esforzarishpaca ¿imashinata gentecunata juyashcataca ricuchinchi?
-
Ali villaicunata predicanajuj gentecunamandaca ¿imatata Jehová Diosca yuyan? (Versículo 15ta ricupangui).
5. Ñucanchica Taita Diosta ayudajcunallami canchi
Ashtaca experienciacunata ricushpami Jehová Dios predicacionbi ayudajushcata cuenta japinchi. Por ejemplo, Nueva Zelanda llactapica Paul shuti Testigomi huasin huasin predicajushpa shuj señoraguhuan parlai callarirca. Justo chai punllapachami chai señoraguca Taita Diostaca shutipi ayudahuai nishpa mañajushcarca. Chai señoraguca pipash paita visitachunmi Jehová Diostaca mañashca carca. Shina mañashca quimsa horas jipallami Paulca chai señoraguman predicangapaj chayarca.
1 Corintios 3:9ta liishpa, cai tapuita contestapangui:
-
Huauqui Paulpa experienciata uyashpaca ¿predicacionbi Jehová Dios ayudajushcatachu ricupanchi?
Hechos 1:8ta liishpa, cai tapuita contestapangui:
-
Predicangapaca ¿imamandata Jehová Diospa ayudataca minishtipanchi?
¿Yachaparcanguichu?
Chaupi semana tandanajuicunapica imashina predicanatami yachajupanchi. Reuniongunapi shina yachachijta ricushpaca ¿quiquinga imatata pensapangui?
6. Taita Dios mingashcatami pactachipanchi
Primer siglopica Jesuspa catijcunapa contracunami ama predicashpa catichun ninanda jarcanajurca. Chai tiempopi huauquicunaca “legalmente ali villaicunata” villachingapami predicaciondaca tucui shunguhuan difindinajurca (Filipenses 1:7). Cunan punllacunapipashmi testigo de Jehovacunaca chaitallata rurapanchi. a
Hechos 5:27manda 42caman liishpa, cai tapuita contestapangui:
-
Predicanataca ¿imamandata na saquipashun? (Versículo 29, 38 y 39ta ricupangui).
HUAQUINGUNACA, “Testigo de Jehovacunaca ¿imamandata huasin huasin predicashpa purin?” nishpami tapuchita ushan.
-
Pipash shina tapuchijpica ¿imashinata contestapanguiman?
YARINGAPAJ
Jesusca ali villaigucunataca tucui llactacunapi villachichunmi paipa catijcunamanga mandarca. Chaita pactachi ushachunga Jehová Diosmi paita sirvijcunata ayudajun.
¿Imatata yachajupashcanchi?
-
Ali villaigucunata mundo enteropi predicangapaca ¿imacunatallata ruranajupanchi?
-
Predicashpaca ¿shujcunatapash juyashcatachu ricuchipanchi?
-
Ali villaigucunata predicanaca ¿cushilla sintirichunllu ayudan?
CAITAPASH RICUPAI
Testigo de Jehovacuna shuj shuj llactacunapi imashina predican cashcata ricupai.
Apashpa rinalla cochecunahuanmi jatun llactacunapi villachin: París llactapi (5:11)
¿Imashinata testigo de Jehovacunaca shuj llactamanda pacajushpa llujshishca gentecunaman predicai ushashca?
Tiempo completopi sirvijushcamanda shuj panigu imashina cushilla sintiri ushashcata ricupai.
Testigo de Jehovacuna juiciocunata ganashpa ali villaigucunata legalmente villachi ushashcata ricupai.
a Taita Diosmi predicanataca mingashca. Chaimandami testigo de Jehovacunaca predicangapaj permisota autoridadcuna cuchunga na minishtinchichu.
Cai temacunata ashtahuan liipai
GENTECUNAPA TAPUICUNA
Testigo de Jehovacunaca ¿imashinata Bibliamandaca yachachinchi?
Testigo de Jehovacunahuan Bibliamanda yachajujushpaca quiquin charishca Bibliatallatami utilizaita ushapangui. Bibliamanda yachajujushpaca quiquinba familiata o pitapash invitaita ushapanguillami.
