LECCIÓN 38
Ñucanchi causaiguta ninanda valichipashunchi
Causaiguta charishcamandami ashtaca ashtaca cosascunata rurashpa cushilla yalita ushapanchi. Llaquicunata charishpapash ashtaca ali cosascunata rurashpami cushilla causaita ushapanchi. Causaiguta carashcamandaca ¿imashinata Jehová Dioshuan agradecido cashcata ricuchi ushapanchi? Shinallata ¿imamandata agradecishcataca ricuchina capanchi?
1. Ñucanchi causaigutaca ¿imamandata ninanda valichina capanchi?
Causaitaca Jehová Diosmi shuj regalogutashna carashca. Chaimandami ninanda valichina capanchi. Paimi animalcunaman, plantacunaman y gentecunamanbash causaiguta carashca (Salmo 36:9). Jehová Diosca ‘samaita, causaita, tucuitami gentecunamanga caramujun’ (Hechos 17:25, 28). Jehová Diosca ñucanchicuna cushilla causachun munaimandami tucuita caramujun (Hechos 14:17, liipangui).
2. Ñucanchicunaman causaiguta Jehová Dios carashcamandaca ¿imashinata agradecishcataca ricuchi ushapanchi?
Ñucanchicunataca ñucanchi mamapa vijsagupi formarijushca horasmandapachami Jehová Diosca ña cuidajushca. Caita ali yachaimandami Jehová Diosman shuj oracionguta rurajushpaca, Rey Davidca cashna nirca: Ñuca mamapa vijsapi “muyushna chaira viñai callarijujpipash, canga ricujushcanguimi” nishpa (Salmo 139:16). Quiquinba causaiguca Jehová Diospaca ninan valishcami can (Mateo 10:29-31, liipangui). Pipash shujcunata huañuchijpi o pipash suicidarijpica Jehová Diosca ninandami llaquirin (Éxodo 20:13). a Shinallata, ñucanchi causaita yangamanda peligropi churashpa o shujcunapa causaitapash peligropi churajpica, Jehová Diosca ninandami llaquirin. Pero ñucanchi causaiguta cuidashpa y shujcunapa causaigutapash cuidashpaca, Jehová Dios carashca causaiguta ninanda valichishcatami ricuchipashun.
ASHTAHUAN YACHAJUPASHUNCHI
Cunanga causaita ninanda valichishcata imashina ricuchi ushashcatami yachajugripanchi.
3. Quiquinba saludta cuidapai
Cristianocunaca Jehová Dios munashcashna causangapaj y paipa munaitalla pactachishpa causangapami decidipashcanchi. Chaita ruranaca, ñucanchi cuerpota shuj sacrificiotashna Jehová Diosman cujunshnami can. Chaimandami ñucanchi cuerpotaca cuidana capanchi. Romanos 12:1 y 2ta liishpa, cai tapuicunata contestapangui:
-
¿Imamandata quiquinba saludtaca cuidana capangui?
-
¿Imashinata quiquinba saludtaca cuidaita ushapangui?
4. Quiquinba causaita y shujcunapa causaitapash cuidapai
Bibliapica ñucanchi causaita peligropi churaj cosascunamanda caruyachunmi consejan. Ñucanchi causaiguta imacunapilla cuidana cashcata yachangapaca, cai cati VIDEOTA ricupai.
Proverbios 22:3ta liishpa, cai tapuicunata contestapangui:
-
Quiquinba huasigupi ama imapash peligro tiachunga ¿imacunatallata ruraita ushapangui?
-
Trabajopi ama imapash peligro tiachunga ¿imashinashi ayudaita ushapangui?
-
Imagutapash pugllajushpa ama imapash peligro tiachunga ¿imatata rurai ushapangui?
-
Carrota manejajushpa quiquinba causaita y shujcunapa causaitapash ama peligropi churangapaca ¿imatata rurana capangui?
5. Nara nacirishca huahuagupa causaitapashmi respetana capanchi
Rey Davidca causaita Jehová Dios imashina ricujtami escribirca. Shinallata nara nacirishca huahuagu vijsa ucupi imashina viñajujta Jehová ricujujtapashmi nirca. Salmo 139:13manda 17caman liishpa, cai tapuicunata contestapangui:
-
Jehová Diospaca ¿imahorasmandata causaica tiai callarin? ¿Nacirishca horasmanda o vijsayu quidashca horasmanda?
Punda tiempopi israelitacunaman Jehová Dios cushca leypica, vijsayu huarmigucunata y nara nacirishca huahuagucunatapash cuidana cashcatami nijurca. Éxodo 21:22 y 23ta TNM Bibliapi liishpa, cai tapuicunata contestapangui:
-
Nara nacirishca huahuaguta pipash por accidente huañuchijpica ¿imashinata Jehová Diosca sintirin carca?
-
Cutin nara nacirishca huahuaguta pipash a propósito huañuchijpica ¿Jehová Diosca imashinashi sintiringa? b
-
Taita Dios shina pensashcamandaca ¿quiquinga imatata yuyapangui?
Causaita ninanda valichij huarmigupashmi ‘abortashpallami cai problemataca arreglai ushani’ nishpa pensarita ushan. Isaías 41:10ta liishpa, cai tapuicunata contestapangui:
-
Pipash abortachun nishpa atichijujpica ¿pipa ayudatata chai huarmiguca mañana can? ¿Imamandashi shina rurana can?
HUAQUINGUNACA, “Abortanata o na abortanataca cada unomi decidina derechota charinchi. Ñucanchi cuerpohuan imata ruranataca ñucanchillatami ricuna canchi” ninmi.
-
Vijsayu huarmigupa causaita y nara nacirishca huahuagupa causaitapash Jehová Dios ninanda valichijtaca ¿cripanguichu? ¿Imamandata chaita cripangui?
YARINGAPAJ
Causaica Jehová Dios carashca regalomi can. Bibliapica ñucanchi causaiguta y shujcunapa causaigutapash respetana, cuidana, valichina cashcatami yachachin.
¿Imatata yachajupashcanchi?
-
Gentecunapa causaiguta Jehová Dios ninanda valichijtaca ¿imamandata yachapanchi?
-
Pipash suicidarijpi o pitapash a propósito huañuchijpica ¿imashinashi Jehová Diosca sintirin?
-
Causaiguta charishcamandaca ¿imashinata sintiripangui?
CAITAPASH RICUPAI
Ñucanchicunaman shuj regalotashna causaiguta carashcamandaca ¿imashinata Jehová Diosta agradici ushapanchi?
Shuj huarmigu paipa huahuaguta abortashca cajpipash ¿Jehová Diosca perdonangacha?
“Abortanamandaca Bibliapica ¿imatata yachachin?” (jw.org paginapi ricupangui)
Peligroso pugllaicunamanda Jehová Dios imata pensajta ricupai.
“Peligroso pugllaicunapi participanaca ¿alichu can?” (Rijcharipaichi revista, 8 de octubre de 2000)
Pipash suicidaringapaj munajujpica ¿imashinata Bibliapa consejocunaca ayudaita ushan?
a Shungupi ninanda llaquilla cajcunamandaca, Jehová Diosca ninandami preocuparin (Salmo 34:18). Jehová Diosca shuj persona ima razongunamanda suicidaringapaj munashcataca ali alimi yachan. Chaimi paica ayudangapaca listo can. Paipa consejocuna imashina ayudajta ricungapaca, cai leccionbi “Caitapash ricupai” nishca partepi, “Na causangapaj munashpa, huañungapaj munajpica ¿Bibliaca ayudaita ushangacha?” nishca temata ricupangui.
b Jehovata nara rijsishca tiempopi picuna shuj huahuaguta abortanata decidishca cashpapash ñana culparijunachu can. Jehová Diosca paicunata perdonangapaj dispuestomi can. Caimanda ashtahuan yachangapaca, cai leccionbi “Caitapash ricupai” nishca partepi, “Abortanamandaca Bibliapica ¿imatata yachachin?” nishca temata ricupangui.
Cai temacunata ashtahuan liipai
GENTECUNAPA TAPUICUNA
Testigo de Jehovacunaca ¿imashinata Bibliamandaca yachachinchi?
Testigo de Jehovacunahuan Bibliamanda yachajujushpaca quiquin charishca Bibliatallatami utilizaita ushapangui. Bibliamanda yachajujushpaca quiquinba familiata o pitapash invitaita ushapanguillami.
