1.  Importante Babilonia Llactaca ¿picunata can?

2.  Mesiasca ¿imahorata shamuna carca?

3.  Yahuarta utilizashpa trataj tratamientocuna

4.  Separarina

5.  Shuj shuj fiestacuna

6.  Contagioso unguicuna

7.  Negociocunamanda y juiciocunamanda

 1. Importante Babilonia Llactaca ¿picunata can?

‘Importante Babilonia Llacta’ nishpaca panda religiongunamandami parlanajupanchi (Apocalipsis 17:5). ¿Imamandata shina nipanchi? Cai quimsa razongunata ricupashunchi.

• Mundo enteropimi can. Importante Babilonia Llacta nishcaca “ashtaca ashtaca gentecunata, llactacunata” mandashpami tiajun. Shinallata cai alpapi ‘tiaj jatun mandajcunatapashmi mandajun’ (Apocalipsis 17:15, 18).

• Cai alpapi shuj gobierno o ninan charij organizacionga na canllu. Bibliapi nishcashnaca, Importante Babilonia Llacta tucuchishca jipaca cai alpapi “tiaj jatun mandajcuna” y shinallata negociocuna o “jatujcunaca” tiashpami catinga (Apocalipsis 18:9, 15).

• Jehová Diostami nalipi quedachin. Importante Babilonia Llactataca “huainayaj huarmi o prostituta” nishpami Bibliapica nin. ¿Imashpashi shina nin? Porque paica chariyangapaj munaimandaca cai alpapi gobiernocunataca tucuipipachami apoyan (Apocalipsis 17:1, 2). Shinallata mundo enteromanda gentecunataca umachishpami charin. Paipa culpamandami ashtaca ashtaca gentecuna huañushca (Apocalipsis 18:23, 24).

Lección 13 yuyai 6man tigrangapaj

 2. Mesiasca ¿imahorata shamuna carca?

Bibliapica Mesías shamungacamanga 69 semanacunami yalinara can nircami (Daniel 9:25, TNM, liingui).

• 69 semanacunaca ¿imahorata callarirca? 455 a.e.c. (antes de nuestra era) huatapimi callarirca. Chai huatapica Rey Nehemiasmi Jerusalén llactata alichi callarirca (Daniel 9:25, TNM; Nehemías 2:1, 5-8).

• 69 semanacunaca ¿mashna tiemposhi can? Bibliapa huaquin profeciacunapica, shuj punlla nishpaca shuj huata cashcatami ricuchin (Números 14:34; Ezequiel 4:6). Chaimi Bibliapi shuj semana nijujpica 7 huatacunami can. Shinaca, cai profeciapi parlashca 69 semanacunaca, 483 huatacunami can (69 multiplicado por 7).

• 69 semanacunaca ¿imahorata tucurirca? Rey Nehemías Jerusalén llactata alichingapaj chayashca huatamanda 483 huatacunata cuentashpaca, huata 29manmi chayapanchi. a Chai huatapi Jesús bautizarishpami Mesías tucurca (Lucas 3:1, 2, 21, 22).

Lección 15 yuyai 5man tigrangapaj

 3. Yahuarta utilizashpa trataj tratamientocuna

Huaquin tratamientocunapica pacientepa propio yahuartallatami utilizan. Pero cristianocunapaca na tucui tratamientocunachu ali can. Por ejemplo, donación de sangretaca na rurapanchichu. O jipaman shuj operacionbi utilizachun nishpa ñucanchi yahuarta alichichunga na cunchichu (Deuteronomio 15:23).

Shinapash huaquin tratamientocunataca chasqui ushanchimi. Por ejemplo, examen de sangre, hemodiálisis, hemodilución, máquina de recuperación de sangre, máquina de circulación extracorpórea (o bomba de derivación cardiopulmonar) nishcacunami tian. Shinapash nara operarishpallata, imapash examengunata nara rurashpallata o imapash tratamientota nara agllashpallatami cada cristiano paipa yahuarta imashina utilizanata decidina can. Cai tratamientocunataca cada doctormi diferenteta ruran. Chaimi paicunapa yahuarta doctorcuna imashina utilizagrinajushcataca cada cristiano ali ali investigana can. Cashna tapurinami ayudanga:

• Ñuca cuerpomanda asha yahuarta llujchishpa, jipallaguman ñucapa cuerpomanllata tigrachijpica ¿ñuca concienciapica ñuca yahuarllata cashcatachu sintigrini? ¿Yahuarta “alpapi talina” nishcataca pactachijunimi nita ushaimanllu? (Deuteronomio 12:23, 24).

• Shuj operacionbi cashpa, ñucapa yahuarta llujchishpa imapash jambicunahuan chapushpa cutin ñuca cuerpopillata churajpica ¿ñuca concienciapica alicha sintiri ushasha?

Lección 39 yuyai 3man tigrangapaj

 4. Separarina

Bibliapica cusahuarmicuna separarina cashcataca na nijunllu. Shinallata pipash separarishpa cutin cazarangapaj libre cashcataca na nijunllu (1 Corintios 7:10, 11). Shinapash huaquin cristianocunaca cai situacionguna ricurijpimi separarinata decidishca:

• Familiata mantiningapaj na munajpi: Cusa paipa familiata na mantiningapaj munaimandami ni culquiguta, ni minishtirishca cosasgucunatapash na cun (1 Timoteo 5:8).

• Macashpa ninanda maltratajpi: Ninanda maltratajpica cusapa o huarmipa salud o causaipashmi peligropi caita ushan (Gálatas 5:19-21).

• Jehová Diosta ama sirvichun ninanda jarcajpi: Huaquinbica cusa o huarmimi Jehovata ama sirvichun o paipa mandashcacunata ama cazuchun ninanda jarcan (Hechos 5:29).

Lección 42 yuyai 3man tigrangapaj

  5. Shuj shuj fiestacuna

Cristianocunaca Jehová Dios na gushtashca fiestacunapica na participanchichu. Pero cada unomi Bibliahuan yachachishca conciencia ima nijta catishpa participanata o na participanata decidina can. Huaquin ejemplocunata ricupashunchi:

• Pipash “Feliz Navidad” o “Feliz año nuevo” nijpi. Shina nijpica “Pagui” nita ushanguimi. Pero chai persona ashtahuan yachangapaj munajpica, imamanda chai fiestata quiquin na rurajtami explicaita ushapangui.

• Na Testigo cusa o huarmi imapash fiesta tiajpi paipa familiacunahuan micungapaj invitajpi. Quiquinba conciencia chai fiestaman richun saquijpica, nara rishpallatami ‘imapash panda costumbrecunata ruranajujpica na participashachu’ nishpa quiquinba cusa o huarmiman ali ali explicana capangui.

• Imapash fiestacuna tiajpi quiquinba jefe imagutapash carangapaj o ashtahuan pagangapaj munajpi. Chaitaca ¿japinallachu capanchi? Cashna tapurinami aliguta decidichun ayudanga: “Cai regalota japijpica ¿fiestapi participajujtachu ñuca jefeca pensanga? o ¿ali trabajashcamanda agradecingapallachu caitaca carahuajun?”.

• Fiesta tiaj tiempopipacha pipash shuj regalota carajpi. Regalota carajujca cashnami nita ushanman: “Cai fiestapi na participajtaca yachanmi. Pero masqui caiguta carangapami munapani” nishpa. Talvez carangapaj munaimandallami caraita ushanman. Pero chai fiestapi participachun munaimanda o quiquin imata rurajta ricungapalla carajujpica ¿imatata rurai ushapangui? Chaita japinata o na japinataca aligutami pensarina capangui. Imata decidishpapash, Jehovapa ñaupapi ali ricuringapaj y ñucanchi concienciapipash ali sintiringapami munapanchi (Hechos 23:1).

Lección 44 yuyai 1man tigrangapaj

 6. Contagioso unguicuna

Gentecunata juyaimandami imapash contagioso unguita charishpaca, shujcunaman ama contagiangapaj cuidadota charinchi. Contagioso unguita charishpa o contagioso unguita charinshnallata sintishpapashmi chaitaca rurana capanchi. Caitaca “canba projimotaca quiquin juyarinshnallatami juyana cangui” nishca mandamientota pactachingapami rurapanchi (Romanos 13:8-10).

Cai mandamientotaca ¿imashinata pactachi ushapanchi? Imapash contagioso unguita charishpaca pitapash saludagrijushpaca ugllashpa o maquita cushpaca na saludanachu capanchi. Pipash paipa familiata cuidangapaj munaimandami contagioso unguita charijta yachashpaca, paipa huasimanga talvez na invitapanga. Chaimandaca na risintirinachu capanchi. Shinallata nara bautizarishpallatami imapash contagioso unguita charishpaca, ancianocunapa coordinador huauquimanmi villana can. Shinami chaishuj bautizarigrinajuj huauquipanicunatapash na peligropi churashun. Imapash contagioso unguita punda charishca cashpa o charishcatashnalla sintishpaca, pihuanbash cazarangapaj nara purishpallatami shuj examen de sangreta rurana can. Caita rurangapaj esforzarishpami ‘na ñucanchipa beneficiotalla mascashpa sino shujcunapa beneficiotapash mascanajushcata’ ricuchipanchi (Filipenses 2:4).

Lección 56 yuyai 2man tigrangapaj

 7. Negociocunamanda y juiciocunamanda

Imapash negociocunata ruragrijushpa o culquita mañachigrijushpapash cristianopura cashpapash, ama imapash problema tiachunmi shuj contratota rurana can (Jeremías 32:9-12). Shinapash negociocunamanda o culquimanda parlashpaca cristianocunaca talvez imapash problemacunatami charinga. Shina pasajpica uchalla arreglangapami problemata charijpuralla aliguman parlashpa, tranquilo arreglangapaj esforzarina can.

Shinapash culquita shuhuashcamanda o yangamanda juchachijpi o shuj jatun problemacuna tiajpica ¿imashinata arreglana can? (Mateo 18:15-17, liipangui). Jesusca imapash jatun problemacuna tiajpi arreglangapaca, caitami rurana canguichi nircami.

1. Imapash problemacuna tiajpica paipuralla arreglaringapami esforzarina can (verso 15​ta ricupangui).

2. Shina rurajpipash chai problema na arreglarijpica, congregacionmanda espiritualmente shinlli shuj o ishcai huauquipanicunata cumbachunmi mañaita ushapangui (verso 16​ta ricupangui).

3. Caita rurajpipash chai problema ñana arreglarijpica huauqui ancianocunamanmi villaita ushapangui (verso 17​ta ricupangui).

Ñucanchi huauquipanicunataca na juiciocunaman apanachu capanchi. Si shina ruranchica, Jehová Diosta y congregaciondapashmi nalipi quedachishun (1 Corintios 6:1-8). Shinapash huaquin casoscunapica leyta utilizashpa arreglanami tucun. Por ejemplo divorciomanda, huahuacunapa custodiamanda, pensión alimenticiamanda, liquidación de seguromanda, testamentocunamanda o quiebrapi urmashcamandami juiciomanga rita ushan. Shinaca cai problemacunata arreglagrijushpa leyta utilizashpa arreglashpaca Bibliapa mandashcacunata na cazujushcataca na ricuchinajunchichu.

Shinallata shuj cristiano imapash violacionmanda, huahuacunata abusashcamanda, macashcamanda, shuhuashcamanda o pitapash huañuchishcamanda denunciashpaca Bibliapa mandashcata na cazujushcataca na ricuchijunllu.

Lección 56 yuyai 3man tigrangapaj