Satanaspash, demoniocunapash ¿imamandata gentecunataca llullacunahuan umachinajun? Paicunaca paicunapa parte tucushpa, paicunata adorachunmi munan. Paicunapa llullacunata crishpa Jehová Dios na gushtashca cosascunata rurachunmi munan. Chai ruraicunaca huañushcacunamanda parlaj costumbrecunami can.

Familiamanda pipash huañujpica, ninanda llaquiyashpa huacanaca normalmi can. Por ejemplo, Jesuspa amigo Lázaro huañujpica, ‘Jesuspashmi huacarca’ (Juan 11:35).

Huañushcacunamandaca, mundo enteropica shuj shuj costumbrecunami tian. Huaquin costumbrecunaca Taita Diospa yachachishcacunahuanga na en contra canllu. Shina cashpapash huaquin costumbrecunaca huañushcacuna causashpa catijta, causaj gentecunata cuidajtapashmi yachachin. Huaquin gentecunaca huañushcacunapa alma ama llaquilla sintirichun nishpami veloriocunapi yanga costumbrecunata ruran, huañushcacunata misachin o responsocunataiman cachan. Pero “huañushcacunaca, imatapash na yachanllu”. Cai costumbrecunata catij gentecunaca Satanaspa llullacunatami ruranajun (Eclesiastés 9:5).

Huañushcacunata ayudana cashcata crimandami shuj shuj costumbrecuna tiai callarishca. Chai costumbrecunata rurajpica causaj gentecunataca na llaquichingachu nishpapashmi crin. Por ejemplo, huaquin llactacunapica 40 punllacuna jipa o shuj huata jipami shuj huañushca aliguta samai ushachun nishpa ashtaca micunacunata rurashpa fiestata ruran. Paicunaca espiritucuna causajuj pushtuman aliguta chayachun nishpami shina ruran. Cutin shuj ladocunapica huañushcacunamanmi micunacunata caran.

Cashna costumbrecunata ruraimandami gentecunaca Satanaspa llullacunapi urmanajun. Demoniocunapa yachachishca costumbrecunata ñucanchicunapash rurachunga ¿Jehová Diosca munanlla? Na, na munanllu (2 Corintios 6:14-18).

Jehová Diosta sirvijcunaca Satanaspa llullacunata apoyaj costumbrecunapica na participanllu. Chaipa randica, causajuj gentecunata juyaihuan ayudangapaj, animangapami esforzarin. Jehová Diosta sirvijcunaca huañushcacunata solo Jehová Dioslla ayudai ushashcataca alimi yachan (Job 14:14, 15).

Huaquin gentecunaca brujocunata utilizashpa o paicunapachami demoniocunahuan parlan. Cai ruraicunami espiritismo can. Shinallata brujuchinacuna, magiata ruranacuna, maquita liinacuna, huañushcacunahuan parlanacunapash espiritismomi can.

Bibliapica cai ruraicunamanda parlashpaca, cashnami nin: “Cangunapurapica, [...] yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu. Yumbu canata, yachaj canata, ayacunata mañaj canata, huañushcacunata tapuj canata yachajuj runapash na tianachu. Imatapash chashna nalicunata ruranaca, Mandaj Diospaj ñaupajpica millanayaimi”can ninmi (Deuteronomio 18:​10-12).

Jehová Diosca ¿imamandata Satanaspa nali ruraicunamanda cuidarichun shina advirtin?

Ñucanchipa alipallatami shina ruran. Jehová Diosca espiritismopi chapurichunga na munanllu. Paica shuj juyaj, gentecunamanda preocuparij Diosmi can. Ashtahuanbash demoniocunapa ruraicunapi chapurijpi gentecuna ninanda sufrijtaca alimi yachan.

Brasil llactamanda Nilda huarmiguca brujami carca. Paitaca demoniocuna ninanda llaquichishpa, na tranquila saquircachu. Paica ninmi: “Demoniocunaca, ñucata controlashpami ninanda llaquichihuarca. Shinallata ñuca yuyaicunapipash molestai callarihuarca. Chaimi hospitalcunapi internai tucurcani. Demoniocunaca ñuca saludtaca ninandami afectarca. Chaimandami ali sintiringapaj munaimandaca calmantecunata ufiai callarircani. Shinallata tabacota fumanata, tragota ufianatapashmi callarircani. Ashtaca huatacunatami shina causarcani” nin.

Tiempo jipaca Nildaca Jehovapa, paita sirvij Testigocunapa ayudahuanmi demoniocunamanda caruyai usharca. Cunanbica paica cushilla, tranquilo, sanomi causan. Paica: “Ayacunahuan ricuna cosascunapica nimamanda na chapurinachu canguichi” nishpami consejarca.