Dauda jariguca Sierra Leona llactamanda shuj uchilla pueblopimi viñarca. Huahuagu cajpi pai imasha pasashcatami parlan: “Shuj viajeca ñucapa familiacunami shuj vecinocunahuan alpamanda problemata charirca. Ishcandi familiacunallatami cai alpaca ñucapami can nishpa fiñanajunajurca. Chai problemata arreglangapa nishpami shuj brujota cayachun cachashcarca. Brujoca cangunamanda shujca shamuichi nishpa cayajpimi shuj jarigu quimirirca chaimi paitaca yura telahuan taparca. Shina tapashca jipaca shuj espejotami curca. Chaimi paica chai espejopica yura entero churajushca, jatun, yura uma rucugu quimirimujtami ricujuni nircami. Chaimi paica ninanda sudashpa chujchui callarirca”.

“Chai espejopica ñuca abuelitotami ricujushcarca. Chaimi paica ninanda manllarishpa, ‘ñucata na crishpaca cangunallata cai espejoman quimirishpa ricuichiyari’ nishpa caparirca. Pero como tucuicunallata manllarishca carcanchi pipash na ricungapaj quimirircanchichu. Chaimi chai jariguta calmachingapaj nishpa brujoca huaquin plantacunahuan jambi yacuta rurashpa, paitaca chai yacuhuan fucurca”.

“Ñuca abuelo espejopi ricurishpami ‘cai alpaca cangunapami can’ nishcarca. Y ñuca abuelitamanga ‘chai alpapi tarpunguichilla’ nishcarcami. Chaita uyashpami chaishuj familiaca chai decisiondaca respetarca. Shinami alpamanda problemaca arreglarirca”.

África llactacunapi cashna experienciacunata uyanaca normalmi can. Chai llactacunapi y shuj llactacunapipash, pipash huañujpica paipa alma shuj ladopi causangapaj rijtami crin. Shinallata chai almacunaca gentecunata cuidashpami causan nishpapashmi crin. Pero ¿chaica ciertochu can? Huañushca jipaca ¿ciertopachachu imapash causashpa catinra? Na cierto cajpica ¿imamandata huañushca jipaca alma causashpa catin nin? Cai tapuicunapa respuestata yachanaca importantepachami can. Ñucanchi causaita cuidachunbashmi ayudanga.