Espiritucunaca ¿huañushca gentecunapa espirituchu can?
Espiritucunaca tianmi. Shinallata ali espiritucuna, nali espiritucunapashmi tian. Pero chai espiritucunaca ¿huañushca gentecunapa espirituchu can?
Na, huañushca gentecunapa espirituca na canllu. Ashtaca gentecunaca, pipash huañujpica paicunapa espirituca shuj ladocunapi causashpa catingapami rin nin. Pero chaica na ciertochu can. ¿Imamandata shina nipanchi? Porque Bibliapimi chaitaca yachachijun. Ashtahuanbash Jehová Dios gentecunata rurashcamandaca, huañushca jipa imapacha pasajtaca alimi yachan (2 Timoteo 3:16).
Adanga alpamandami rurashca can. Chaimi huañushpaca alpamanllata tigrarca
Imashinami Bibliapica nin Taita Diosca, Adandaca ‘ñutu alpamandami rurarca’ (Génesis 2:7). Shinallata jardín de Edenbi causachunmi churarca. Si Adán Taita Diospa mandashcacunata cazushcajpica, paica cunangaman causajumanrami carca. Pero Adanga Taita Diosta na cazurcachu. Chaimandami Jehová Diosca Adanmanga cashna nirca: “Canga, chai alpamanda japishpami rurai tucurcangui. Ñutu alpami cangui, ñutu alpallatami tigrangui nircami” (Génesis 3:19).
Shinaca Jehová Dios Adanda nara rurajpica, Adanga ¿maipita carca? Adanga ni maipi na causajurcachu. Paica nara tiarcachu. Adanda ñutu alpamanllata tigrangui nishpaca, pai huañuna cashcatami Jehová Diosca nijurca. Shinapash Adán huañushpaca shuj espirituca na tucurcachu. O maipipash causashpa catingapaca na rircachu. Adán huañushpaca, paipa causaica chaipimi tucurirca. Huañuica causai ñana tiajtami ricuchin.
Pero tucui huañushca gentecunahuanga ¿imata pasashca? Paicuna huañushpaca ¿tiashpa catinrachu? Cai tapuicunapa respuestataca Bibliapimi taripanchi.
Tanto gentecuna como animalcunami huañushpaca “chai pushtumanllata rin. Tucuicunallatami, ñutu alpamanda rurashca. Tucuicunallatami, ñutu alpaman tigranga” (Eclesiastés 3:20).
“Huañushcacunaca, imatapash na yachanllu” (Eclesiastés 9:5).
“Paicunapaj juyaipash, fiñaipash, imata cashpapash ñucapaj cashcanman yashpa munajushcapash, ñami tucurirca” (Eclesiastés 9:6).
“Can rina Seolpica [o pambana pushtupica], imata ruranapash, imata yarijunapash, imata yachajunapash, ali yachaipash na tianllu” (Eclesiastés 9:10).
“Paicunapaj samai anchurijpica, alpallatami tigran. Imata yarijushcapash, chai punllallatami tucurin” (Salmo 146:4).
Causaj gentecunallami imacunatapash rurai ushan
Cai textocunapi nijushcata crinaca talvez shinllimi canga. Pero caipi yuyapai, ashtaca llactacunapica familiata mantiningapaca cusacunami trabajan. Chaimi cusa huañujpica, paipa familiaca ashtaca llaquicunata chimbapurana tucun. Huaquinbica culquigu illaimandaca micunagu illami quedan. Shinapirami nali gentecunapash llaquichin. Shinaca, huañushca cusapa espíritu causashpa catijujpica ¿imamandata paipa familiataca ñana mantinin o nali gentecunamandapash cuidan? Cai textocunapi nishcashnaca, huañushcacunaca ñana imatapash rurashpa catinllu. Pitapash na ayudaita ushan. Bibliaca cabaltami yachachijun (Salmo 115:17).
Huañushcacunaca pitapash ayudaita o cuidaitaca ñana ushanllu
Shinaca huañushcacuna ¿nunca más ñana causarina cashcatachu ningapaj munan? Na, na chaita ningapaj munanllu. Cati temacunapimi huañushcacuna cutin causarinamanda yachajugripanchi. Pero imashinami ña ricuparcanchi, huañushcacunaca quiquin imatalla rurajujtaca na yachanllu. Paicunaca ricuita, uyaita, parlaita, pitapash ayudaita o llaquichitapash ñana ushanllu (Eclesiastés 9:4; Isaías 26:14).
