Lección 3
Rahabca Jehová Diospimi confiarca
Canaán llactapi, Jericó pueblopi cashcanchiman. Chaipi gentecuna Jehovata na adorajpipash Rahab shuti huarmiguca chai gentecunashnaca na canllu.
Rahabca uchillamandapachami Jehová Diosmanda uyarca. Rahabca yacharcami Jehovapa ayudahuan Moisés mar Rojota chaquichishpa israelitacunata Egipto llactamanda llujchishcata, israelitacuna contracunata mishachun Jehová ayudashcatapash. Cunanga israelitacuna Jericó puebloman yaicugrinajujtapashmi Rahabca yachaj chayan.
Jehovapi confiashcamandami Rahabca ishcai israelitacunata ayudarca
Shuj tutaca ishcai israelitacunami Jericó pueblota pacalla chapangapaj yaicushpa Rahabpa huasiman chayan. Rahabca paicunata mingachinmi. Chai tutallatami Jericó pueblota Mandajca yachaj chayan, ishcai israelitacuna Rahabpa huasipi cajta. Chaimandami chai runacunata mascagrichun cachan. ¿Imatashi Rahabca ruranga? Chai israelitacunataca terrazaman vitsiachishpami pacan. Paicunata mascangapaj shamujcunataca Rahabca ninmi: “Pacalla chapangapaj yaicumushca runacunaca ñami rirca. Uchalla catishpaca paicunata japigringuichimi” nishpa. Rahabca ¿imamandashi chai israelitacunataca pacarca?... Paica Jehovapimi crirca. Chaimandami ali yacharca israelitacuna Canaán llactata mishachun Jehová ayudanata.
Pacalla chapangapaj yaicumushca runacunaca Rahabtaca ninmi, Jericó pueblota llaquichijui horasca quiquinbash quiquinba huasi ucupuracunapash salvaringuichimi. Salvaringapaca ¿imatata Rahabca rurana can?... Pacalla chapangapaj yaicumushca runacunaca ninmi: “Puca cabiata ventanapi huarcui. Quiquinba huasi ucupuracunatapash canba huasipi tandachi” nishpa. Chaita rurai nishcataca Rahabca cazurcami. ¿Jipaman ima pasashcata parlachun munanguimanllu?...
Rahabta, paipa huasi ucupuracunatapash Jehovami salvarca
Huaquin punllacuna jipaca, israelitacunaca tauca viajemi Jericó pueblota muyun. 6 punllacunataca punllapi shuj viajellami upalla muyun. Cutin 7 punllapica chai punllallatami 7 viajeta muyun. Muyui tucuchishcandi gulpicuna ninandapacha caparijpimi, Jehová Diosca Jericó pueblo muyundipi tiaj jatun pircacunata urmachin. ¿Rahabpa huasitapashchu urmachirca? Ventanapi puca cabia huarcuriajushcamandami chai huasitaca na urmachirca. Dibujota ricui, ¿ventanapi cabia huarcuriajujta ricunguichu?... Chaimandami Rahabpash paipa huasi ucupuracunapash salvarirca.
Rahabca Jehovata cazuimandami salvarirca ¿nachu?... Jehová Dios imatalla rurashcata uyashpami Rahabca Jehovapi confiai callarirca. Paitapash Dios cuidanataca yacharcami. Canbashmi Jehovamanda yachajujungui. ¿Rahab shina canbash Jehovata cazunguicha?... Ari, cazunguimi.
