PARTE 5
Noepa punllacunapica ¿picunata Diosta cazurca?
Noepa tiempopi gentecunaca jatun nalicunatami rurarca. Génesis 6:5
Adán Eva huahuacunata charijpica ashtaca gentecunami cai Alpapica mirarca. Jipaca shuj angelcunapashmi Diablota catishpa Diosta na cazurca.
Paicunaca cai Alpapi huarmicunahuan cazarangapa munashpami, gentecuna shina tucushpa jahua pachamanda shamurca. Paicunaca millai, tucuicunata yali shinlli churicunatami charirca.
Cai Alpapica nali gentecunallami jundarca. Bibliapi nishca shinaca, cai Alpapi ‘causajcunaca jatun nalicunami’ carca. Nalita ruranatallami tucui horas yarinajurca.
Noeca Diosta cazushpami arcata rurarca. Génesis 6:13, 14, 18, 19, 22
Noeca alimi carca. Jehová Diosca Noemanga villarcami shinllita tamiachishpami nali gentecunataca tucuchigrini nishpa.
Noetaca mandarcami yacupi huambuna jatun caja arcata rurai nishpa. Chaipimi Noeca paipa familiata, tucui laya animalcunata yaicuchina carca.
Shinllita tamiagrinmi nishpa villajpica, gentecunaca na uyarcachu. Huaquingunaca asirca, shujcunaca ninandami fiñarirca.
Arcata ña rurai tucuchishpaca, Noeca animalcunata arca ucuman churarcami.
