1-3. a) Proverbios 13:20​ta intindichipai. b) ¿Imamandata aliguta ricushpa amigocunataca agllana capanchi?

 ¿SHUJ uchilla huahuagu paipa taitamamata imashina ricujujta ricupashcanguichu? Nara parlai ushashpapash ricushpa, uyashpami imatapash ña yachajujun. Viñashpacarin, na cuenta japishpapashmi paipa taitamama imashina cajta cati callarin. Jatungunapashmi pihuanbash ashtaca tiempota yalishpaca, paicuna imata pensashcata, imata rurashcata cati callarinchilla.

² Proverbios 13:20​pica yachachinmi, ‘alipacha yachajushcacunahuan tandanajujca alipacha yachajushcami canga’ nishpa. Pihuanbash ali llevarishpa, paita alicachishpacarin, ashtahuanmi pai imata rurajta catinchilla.

³ Gentecunaca amigocunata catishpami alita cashpa, o nalita cashpapash ruranchilla. Proverbios 13:20​pica ninbashmi: ‘Shinlli shungucunahuan tandanajujca, ninandami llaquichi tucunga’ nishpa. Ñucanchi amigocuna Jehovata juyashpaca, Jehovata cazushpa catichunmi ayudanga. Ali amigocunata agllangapaca, paipa amigocuna cachun picunata Jehová Dios agllajta ricupashun.

4. a) ¿Imamandata Jehovapa amigo canaca shuj jatun bendición can? b) Jehová Diosca ¿imamandata Abrahandaca ñuca amigomi can nirca?

⁴ Tucuita Mandaj Jehová Diosca, ñucanchipash paipa amigo cachunmi munan. Paita juyajcunata, paipi crijcunatami paipa amigocuna cachun aliguta agllan. Chaimandami paipa amigo canaca, shuj jatun bendición can. Abrahanda yaripashun. Paica siempremi Taita Diospa munaita rurangapaj munarca. Cutin cutinmi feta charishcata, paita cazushcata ricuchirca. Shuj punllacarin, Jehová Diosca ‘causachingapaj ushaita charinmi yashpami’ paipa churi Isaactaca huañuchishpa Jehovaman cungapaj munarca (Hebreos 11:17-19; Génesis 22:1, 2, 9-13). Shinlli feta charijpi, paita cazujpimi Jehová Diosca nirca, Abrahanga ‘ñucapa ali cumba’ o ñuca amigomi can nishpa (Isaías 41:8; Santiago 2:21-23).

5. Jehová Diosca ¿imatata paipa amigocunamandaca yuyan? Paicuna ¿imata rurachunda munan?

⁵ Jehová Diosca, paipa amigocunataca ninandami alicachin. Paipa amigocunapash nunca na paitaca saquingapaj munanllu (Salmo 37:28, liipangui). Jehovata juyaimandami, paimandaca na caruyan, cazunbash. Bibliapica ninmi, Jehovata cazujcunaca Jehovapa ali amigocunami can nishpa (Proverbios 3:32). Paipa amigocunataca, paita adorachun, ima ratopipash paita mañachunmi invitan (Salmo 15:1-5).

6. ¿Imashinata Jesusta juyashcata ricuchipanchi?

⁶ Jesusca nircami: “Ñucata juyashpaca, ñuca villashca shimicunata pactachingami. Paitaca, ñuca Taitapash juyangami” nishpa (Juan 14:23). Shinaca, Jehovapa amigo cangapaca, Jesustapash juyashpami  Jesús mandashcashna ali villaicunata villachina, yachachina capanchi (Mateo 28:19, 20; Juan 14:15, 21). Jesusta juyaimandami paipa chaquita catipanchi (1 Pedro 2:21). Imata rurashpa, imata parlashpapash paipa Churipa chaquita catingapaj esforzarijujta ricushpaca, Jehová Diosca ninandami cushijun.

7. Ñucanchi amigocunaca ¿imamandata Jehovapa amigocuna cana can?

⁷ Jehovapa amigocunaca, feta charishcata, paita nunca na saquishcata, cazushcata, Jesustapash juyashcatami ricuchin. Ñucanchipash ¿chashna amigocunatachu agllapanchi? Ñucanchi amigocuna Jesuspa chaquita catishpa, Diospa Reinomanda yachachingapaj esforzarishpaca, ñucanchicuna imapipash mejorachun, Jehovata cazushpa catichunmi ayudanga.

8. Ruthuan Noemihuan ali amigacuna cashcamandaca ¿imatata ashtahuan alicachipangui?

⁸ Bibliapica ali amigocuna tiashcatami parlan. Rutmanda paipa suedra Noemimanda parlapashun. Paicunaca shuj shuj llactacunamandami carca. Noemica tauca huatacunahuanmi Rutpaca mayor carca. Shinapash Jehovata juyaimandami ali amigacuna tucurca. Moab llactata saquishpa Israelman Noemí tigragrijujpica, Rutca nimamanda na separaringapaj munashpami nirca: “Cambaj llactapash, ñuca llactami canga. Cambaj Taita Diospash, ñuca Taita Diosmi canga” nishpa (Rut 1:14, 16). Rutca Noemita tucui shunguhuan llaquimandami, Israel llactapica shinllita trabajashpa Noemitaca mantinirca. Noemipash Rutta ninanda juyaimandami  ali consejocunata cun carca. Rut chai consejocunata pactachishcamandami, jipamanga ishcandillata tauca bendiciongunata charirca (Rut 3:6).

9. Davidhuan Jonatanhuan ali amigocuna cashcamandaca ¿imatata ashtahuan alicachipangui?

⁹ Davidpash Jonatanbash Jehovata ali sirvij amigocunami carca. Jonatanga casi 30 huatacunahuanmi Davidpaca mayor carca. Paimi rey Saulpa catica Israel llactata mandana carca (2 Samuel 5:4). Shinapash, rey Saulpa cati mandachun, Davidta Jehová agllashcata yachashpaca, na envidiajurcachu, na jarcaicunata churarcachu. Chaipa randica, imapi cashpapash Davidta ayudangapami esforzarirca. Shuj punllacarin, paipa causaitapash peligropi churashpami Jonatanga, Jehovapi confiachun Davidtaca animarca (1 Samuel 23:16, 17). Davidpash Jonatanba ali amigo caimandami, canba familiataca cuidajushami nirca. Chai nishcataca Jonatán huañushca jipapashmi pactachirca (1 Samuel 18:1; 20:15-17, 30-34; 2 Samuel 9:1-7).

10. Quimsa hebreo joven amigocunamandaca ¿imatata yachajupangui?

¹⁰ Sadracta, Mesacta, Abednegotaca uchillagucuna cajpillatami, Jerusalenmanda Babiloniaman prezo aparca. Chai quimsa hebreo amigocunaca paicunapa familiamanda carupi cashpapash, Jehovata cazushpa catingapami randimanda ayudarirca. Ña jatunguna cajpicarin, orohuan rurashca imagenba ñaupajpi cumurichunmi rey Nabucodonosorca mandarca. Shinapash paicunaca nircami: ‘Ñucanchica canba dioscunataca na sirvishunllu. Can rurachishpa shayachishcatapash, napacha alicachishunllu’ nishpa. Shinlli  pruebacunapi cashpapashmi, quimsandi amigocunaca Jehovata cazurca (Daniel 1:1-17; 3:12, 16-28).

11. ¿Imashinata Pablopash Timoteopash ali amigocuna tucurca?

¹¹ Apóstol Pablo Timoteota rijsishpaca, Jehovata juyaj joven cashcata, huauquipanicunapi tucui shunguhuan preocuparij cashcatami ricurca. Chaimandami Timoteotaca, shuj ladocunapi huauquipanicunatapash ayudachun yachachirca (Hechos 16:1-8; 17:10-14). Timoteo ninanda esforzarijta ricushpami Pabloca nirca: ‘Ali villaita ñuca villajujpica, paipashmi ñucahuan villajurca’ nishpa. Huauquipanicunata Timoteo llaquishpa cuidanataca Pabloca seguromi carca. Jehovata ali sirvishpa catingapaj esforzarishpami, Pablopash Timoteopash ali amigocuna tucurca (Filipenses 2:20-22; 1 Corintios 4:17).

12, 13. a) ¿Imamandata congregacionbipash ali ricushpa amigocunataca agllana capanchi? b) ¿Imamandata apóstol Pabloca paipa tiempopi huauquipanicunata consejashpa advirtirca?

¹² Congregacionbica ñucanchi huauquipanicunapa ali ejemplota catishpami, Jehovata cazushpa catingapaj randimanda ayudari ushapanchi (Romanos 1:11, 12, liipangui). Tauca llactacunamandami capanchi. Shinapash, congregacionbipashmi amigocunataca aliguta ricushpa agllana capanchi. Huaquingunaca mushujcunami can. Cutin shujcunaca, tauca huatacunatami Jehovata sirvinajun. Imashinami frutacunaca tiempohuan fucun, shinallatami huaquingunapash Jehová Diosman ashtahuan quimiringapaca tiempota minishtin. Chaimandami juyaita, pacienciata ricuchishpa amigocunatapash  siempre aliguta agllana capanchi (Romanos 14:1; 15:1; Hebreos 5:12–6:3).

¹³ Huaquinbica imapash jatun problema congregacionbi ricurijpimi, cuidadota charina capanchi. Tal vez shuj huauqui o shuj panimi imapash nalita rurashpa, o quejarishpalla parlashpa congregaciondaca llaquichijun. Chashna problemacunaca, apostolcunapa tiempopipashmi tiarca. Huaquingunacarin, Jesuspa yachachishcacunataca, na chasquingapaj munanllu carca. Chaimandami apóstol Pabloca cashna  nishpa advirtirca: “Na pandachi tucunachu canguichi. ‘Nalicunahuan tandanajujpica, canguna ali causajujtapash pandachishpami chingachinga’” nishpa (1 Corintios 15:12, 33, MTQI ). Paipa ashtahuan ali amigocunata aliguta agllachunmi, Pabloca Timoteota consejarca. Ñucanchipash aliguta ricushpami amigocunataca agllana capanchi (2 Timoteo 2:20-22, liipangui).

14. ¿Imamandata amigocunataca aliguta ricushpa agllana capanchi?

¹⁴ Ñucanchicunaca Jehová Diospa amigo canata ninanda alicachishpami, paipa amigo cashpa catingapaj esforzarina capanchi. Chaimandami Jehovamanda caruyachij o ñucanchi feta chiriyachij amigocunataca na agllapanchi. Pensaripashun. Shuj esponjata mapa yacupi churajpica, limpio yacuca na llujshingachu. Shinallata, nali amigocunata charishpaca, alita ruraitaca na ushashunllu. Chaimandami amigocunataca, aliguta ricushpa agllana capanchi (1 Corintios 5:6; 2 Tesalonicenses 3:6, 7, 14).

15. Congregacionbi ali amigocunata charingapaca ¿imatata rurai ushapangui?

¹⁵ Congregacionbica Jehovata tucui shunguhuan juyaj huauquipanicunami tian. Paicunami quiquinba ali amigocuna caita ushan (Salmo 133:1). Quiquinba edadta charij, o quiquinba llactamanda amigocunatallaca na mascanachu capangui. Yaripashun, Jonatanga tauca huatacunahuanmi Davidpaca mayor carca. Rutpash tauca huatacunahuanmi Noemipaca jipa carca. Bibliapica ninmi, tucui laya huauquipanicunata juyashpa paicunahuan llevarichi nishpa. ‘Tucuicunatami’ juyana capanchi (1 Pedro 2: 17, liipangui; 2 Corintios 6:13, NM ). Jehová Diospa ejemplota ashtahuan catingapaj esforzarijpica, taucacunami quiquinba amigocuna cangapaj munanga.

16, 17. Congregacionbi pipash llaquichijpica ¿imatata na rurana capanchi?

¹⁶ Familia ucupica cada unomi shuj shuj yuyaicunata charinchi, shuj shuj canchi. Congregacionbipash shinallatami capanchi. Shuj shuj caimandami shujcunamandapash tauca cosascunata yachajuita ushapanchi. Shinapash huaquinbica, shuj shuj caimandami fiñarishpa, panda intindirishpa llaquirinchi, nanarinchipash (Proverbios 12:18).

¹⁷ Shinaca ¿chai problemacunamandallachu desanimarina o congregacionmanda caruyana capanchi? Na. Risintirishca, nanarishca cashpapash congregacionmandaca na caruyanachu capanchi. Jehová Diosca na ñucanchitaca llaquichishcachu. Paimi causaitapash, tucuita ñucanchimanga cushca. Chaimandami paitaca juyashpa na saquina capanchi (Apocalipsis [Revelación] 4:11). Ñucanchi fe shinlli cashpa catichunmi, Jehová Diosca huauquipanicunata carashca (Hebreos 13:17). Paita agradicishpaca, na risintirishca cashcamandallachu congregacionmanda caruyana capanchi (Salmo 119:165, liipangui).

18. a) Huauquipanicunahuan ali llevaringapaca ¿imata minishtirin? b) ¿Imamandata perdonana capanchi?

¹⁸ Huauquipanicunata juyaimandami, paicunahuan ali llevaringapaj munapanchi. Jehová Diosca  ñucanchicuna juchayu cajtaca intindinmi. Ñucanchicunapash shujcuna juchayu cajtaca intindinami capanchi (Proverbios 17:9; 1 Pedro 4:8). Tucuicunami pandarinchi. Shinapash juyarishpami randimanda perdonarita ushanchi (Efesios 4:32). Huauquipanicunata juyashpaca, imapash uchilla cosasgutaca na jatun problemaman tigrachishunllu. Pipash llaquichijpica, cungaitapash na ushashpami fiñarinchi, risintirinchi. Shinapash culirashpa, risintirishpaca ñucanchillatami llaquilla, na chaicaman purinajushun. Cutin pipash llaquichijpi perdonashpaca, tranquilo, alimi sintirinchi. Huauquipanicunahuanbash alimi llevarinchi. Ashtahuanbachaca Jehovahuanmi ali amigo cashpa catinchi (Mateo 6:14, 15; Lucas 17:3, 4; Romanos 14:19).

19. ¿Pihuanda ñana tandanajuna capanchi, parlaitallapash ñana parlana capanchi?

¹⁹ Familia ucupica, juyarishpami tucuicunallata ali causangapaj esforzarinchi. Shinapash pensaripai, ayudangapaj munajpipash shuj churica na cazushcahuan yalingapaj munashcanman. Chaimi tal vez paillata huasimanda rin o taitallata huasimanda ri nin. Congregacionbipash shinallatami pasaita ushan. Huaquingunaca congregaciondapash llaquichishpami, Jehová Dios nalicachishcata rurashpa catingapaj munan. yudangapaj munajpipash, paipa ruraicunahuanmi congregacionbi ñana cangapaj munashcata ricuchin. Shinami tal vez paillata congregacionmanda caruyan, o congregacionmanda expulsai  tucun. Shina pasajpica, Bibliapica mandanmi, paihuanga ñana tandanajunachu canguichi, paihuanga parlaitallapash ñana parlanachu canguichi nishpa (1 Corintios 5:11-13, liipangui; 2 Juan 9-11). Chaita pactachinaca familiapa o amigocunapaca shinllimi can. Shinapash chai ratocunapimi, ashtahuanga Jehovata tucuipi cazushcata ricuchina capanchi (nota 8​ta ricupangui).

20, 21. a) ¿Imamandata expulsanaca, juyaita ricuchijui cuenda can? b) ¿Imamandata amigocunataca aliguta ricushpa agllana capanchi?

²⁰ Jehová Diosca, ancianocunamanmi juchamanda na arripintirijcunata congregacionmanda expulsana autoridadta cushca. Shinami congregacionga Jehovata na cazujcunamanda libre, limpio quedan (1 Corintios 5:7; Hebreos 12:15, 16). Ancianocunapash Jehovapa shutita, Jehovapa mandashcacunata alicachishcatami ricuchin. Jehová Dios mandashcashna expulsashcacunata tratashpami ñucanchipash Jehovata, paipa mandashcacunata alicachishcata ricuchipanchi (1 Pedro 1:15, 16). Jehová Diosca na arripintirijta expulsashpami, paitapash juyashcata ricuchin. Chaimi expulsashcapash nalita rurajushcata cuenta japishpa cambiangapaj munanga. Tiempohuanga tauca expulsashcacuna Jehovapaman tigrajpimi, congregacionbipash cushijushpa chasquin (Hebreos 12:11, NM ).

²¹ Amigocuna imata rurajtaca siempremi catingapaj munanchi. Chaimi amigocunataca aliguta ricushpa agllana capanchi. Jehová Dios alicachishca amigocunami ñucanchitaca, Jehovata para siempre sirvichun ayudanga.