Jehová Diosta juyajcunata, Bibliata alicachijcunatami nipanchi:

Jesusca nircami: ‘Na llullashpa villaitapash rijsinguichimi. Chaimi cangunataca cacharichinga’ nishpa (Juan 8:32). Cai mundopica ashtaca llulla yachachishcacunami tian. Shinapash, Bibliapi cabalta yachajushpaca ¿imashinata sintiriparcangui? ¿Nachu ninanda cushijuparcanchi? (2 Timoteo 3:1).

Jehová Diosca ñucanchicuna cabalta yachajuchunmi munan. Ñucanchicunapash chai yachajushcata shuj gentecunata juyaimanda parlachunmi munan. Shinapash, Jehovata ali sirvingapaca na chaipillachu saquirina capanchi. Jehovapa yachachishcacunata respetaimandaca, Jesusta ali catijcuna cangapami esforzarina capanchi. Jesusca nircami: “Ñuca Taita imata mandashcata pactachijushpami, pai juyajpi causajuni. Cangunapash ñuca mandashca shimicunata pactachijushpaca, ñuca juyajpimi causanguichi” nishpa (Juan 15:10).

Jesusca paipa Taitata ninanda juyashpami tucuipi cazun. Ñucanchicunapash Jesuspa chaquita catijpica, ninandami Jehová Diosca ñucanchita juyanga. Ñucanchipash, Jesús nishca shinami ‘ninanda cushijushun’ (Juan 13:17).

Cai libropa ayudahuan, Bibliapi yachajushcata pactachishpa Taita Diospa amigo tucuchunmi munapanchi. Shinallata, Jehová Diostaca quiquinguna ‘causaita causanata’ yarishpa ‘[paipa] juyaita na cungashpa’, paita ashtahuan juyashpa catichunmi mañanajupanchi (Judas 21).