CAPÍTULO 6
Diversiongunataca ali ricushpa agllapashunchi
‘Taita Diosca punchapambagumi ni tucuchunmi tucuita rurana canguichi’ (1 CORINTIOS 10:31).
1, 2. ¿Imamandata diversiongunataca aliguta ricushpa agllana capanchi?
SHUJ frutaguta ña micugrijushpa, ashata huaglishcata ricushpaca ¿imatashi rurapanguiman? ¿Micunguimanllachu? ¿Basuraman shitanguimanllachu? ¿O huaglishca pushtuta anchuchishpachu ali ladotalla micunguiman?
2 Diversiongunapash huaquingunaca alimi can. Cutin ashtacacunaca jarihuan huarmihuan mapayanajujcunata, macanajuicunata o imapash brujería cosascunatami charin. Shinaca, diversiongunata agllajushpaca ¿cada unomi agllana can yashpachu quiquin alicachishca diversionda agllangapaj munapangui? ¿Tucui diversiongunami nali can yuyapanguichu? ¿O maijan ali cajta nali cajta ricushpachu aliguta agllapangui?
3. Imapash diversionda agllagrijushpaca ¿imapita pensarina capanchi?
3 Huaquinbica tucuicunallatami samangapaj cushilla yalingapaj munapanchi. Shinapash pensarinami capanchi, cai diversionda agllashpaca ¿Jehová Diosta ali adorashpa catita ushagrinichu? nishpa.
‘TAITA DIOSCA PUNCHAPAMBAGUMI NI TUCUCHUNMI TUCUITA RURANA’ CAPANCHI
4. Diversiongunata agllagrijushpaca ¿maijan textopita pensarita ushapanchi?
4 Jehovaman mingarishpaca, ñucanchi tucui causaipi paitalla sirvingapami mingarinchi (Eclesiastés 5:4, liipangui). Shinallata, ‘Taita Diosca punchapambagumi’ can ni tucuchun tucuita rurangapami paiman mingarinchi (1 Corintios 10:31). Shinaca, tandanajuicunapi cashpapash, villachinajushpapash, samanajushpapash, pugllanajushpapash alita rurangapami Jehová Diosmanga mingarircanchi.
5. ¿Imashinata Jehovataca adorana capanchi?
5 Imata rurajushpapash, Jehovata ali adorajushcata o nali adorajushcatami ricuchinchi. Apóstol Pabloca nircami: ‘Cangunapa cuerpotaca, animalta Diosman caranshnami, paipajlla causashpa Taita Diosta cushichina canguichi’ nishpa (Romanos 12:1). Jesusca nircami: ‘Canba Taita Diostaca, tucui shunguhuan, tucui almahuan, tucui yuyaihuan, tucui ushaihuan juyangui’ nishpa (Marcos 12:30). Jehová Diosmanga alitallami cungapaj munapanchi. Ñaupa punllacunapi israelitacunaca, shuj sano animalta huañuchishpami Jehovaman cuna carca. Chai animal suchu, ñausa o imapash cajpica Jehová Diosca na chasquinllu carca (Levítico 22:18-20). Cunanbipash ¿imamandata Jehová Diosca ñucanchicuna paita adorachunga na saquinman?
6, 7. ¿Imamandata diversiongunata aliguta ricushpa agllanaca ali can?
6 Jehová Diosca mandanmi: ‘Ñucaca, jucha illajmi cani. Cangunapash, jucha illajmi causana canguichi’ nishpa (1 Pedro 1:14-16; 2 Pedro 3:11). Alita rurashpa, aliguta adorajpillami Jehová Diosca ñucanchicuna paita adorachun saquinman (Deuteronomio 15:21). Ali adorangapaca, Jehová Dios millanayachishca cosascunata na rurashpami jarihuan huarmihuan mapayanacunamandapash, macanajuicunamandapash, imapash brujería cosascunamandapash caruyana capanchi (Romanos 6:12-14; 8:13). Chashna cosascunata ricuchij o rurachij diversiongunata agllajpica, nalicachishpami Jehová Diosca ricunga. Ashtahuangarin, Jehovata ali adoraitaca na ushashunllu. Jehovapash paita adorachunga na munangachu. Paipa amigo cashpa catitapash na ushashunllu.
7 Shinaca ¿imashinata diversiongunataca aliguta agllana capanchi? Maijan diversionguna ali cajta, nali cajta yachachunga Bibliapa ¿maijan textocunata ayudan?
NALI RURAICUNATACA MILLANAYACHISHUNCHI
8, 9. ¿Maijan diversiongunatata na agllanchi? ¿Imamandata na agllanchi?
8 Cunanbica ashtaca diversiongunami tian. Huaquingunaca Jesusta catijcunapaca alimi can. Cutin shujcunaca nalichu can. Shinaca, maijanguna nali cashcata pundapica ricupashun.
9 Ashtaca peliculacuna, Internetpi paginacuna, videojuegocuna, musicacunaca jarihuan huarmihuan mapayanajujcunata, macanajuicunata, imapash brujería cosascunatami alitashna, asinaitashna ricuchin. Shinapash Jesusta ali catijcunaca, aliguta pensarishpami diversiongunataca agllanchi. Jehová nalicachishca diversiongunataca na agllanchichu (Hechos 15:28, 29; 1 Corintios 6:9, 10). Shinami, Jehová Diosmanga nali cosascunata millanayachishcata ricuchinchi (Salmo 34:14; Romanos 12:9).
10. Nali diversiongunata agllashpaca ¿imashi tucunchiman?
10 Huaquin gentecunaca pensanmi, jarihuan huarmihuan mapayanajujcunata, macanajuicunata, imapash brujería cosascunata charij diversiongunata agllanaca na juchachu can nishpa. Paicunaca ninmi: “Na imapash pasanllu. Ñucaca nunca na chaicunataca rurashachu” nishpa. Ñucanchicunapash shina pensashpaca, ñucanchillatami pandarinajunchiman. Bibliapica ninmi: “Runapaj shunguca, tucui imatapash yali umachijlla” can nishpa (Jeremías 17:9). Jehová nalicachishca cosascunahuan diversiongunata agllashpaca, nalita millanayachishcataca na ricuchinajunchimanllu. Chashna diversiongunata cutin cutin agllashpaca alitashnami ricui callarinchiman. Ñucanchi concienciapash ashata huaglirishpami, nali decisiongunata agllagrijujtaca ñana cuenta japichun ayudanga (Salmo 119:70; Efesios 4:19).
11. Gálatas 6:7ca ¿imashinata ali diversiongunata agllachun ayudan?
11 Bibliapica ninmi: “Imata tarpushpapash, chaitallatami japinga” nishpa (Gálatas 6:7). Nali cosascunata ricushpa, uyashpa, liishpaca tal vez nalitallatami rurangapaj munashun. Huaquin huauquipanicunaca jarihuan huarmihuan mapayanajujcunata ricushpa, uyashpami, paicunapash chaicunatallata rurashca. Shinapash Jehová Diosca, ali diversiongunata agllachunmi ayudan. Imashina ayudajta ricupashun.
IMATAPASH DECIDIGRIJUSHPACA JEHOVÁ IMATA PENSAJTAMI INTINDINA CAPANCHI
12. Ali diversiongunata agllangapaca ¿imatata rurana capanchi?
12 Huaquinbica maijan diversiongunata Jehová Dios nalicachishcata intindishpami chai diversiongunataca na agllanchi. Cutin huaquinbica maijan diversionguna nali cashcataca, na ucha intindi ushanchichu. Shinaca ¿imatata rurashun? Jehová Diosca, ñucanchicuna imata liinata, ricunata, uyanata agllachunga na tucuipachu shuj leyta cushca. Chaipaca randica, pai imata pensashcata intindishpa, concienciapi ali sintirishpa decidichunmi munan (Gálatas 6:5, liipangui). Jehová imata pensajta cuenta japishpaca, pai ‘imata munajtapash’ intindishpami, pai alicachishca decisiongunata agllashun (Efesios 5:17, NM ).
Jehová imata pensajta intindishpami ali diversiongunata agllai ushashun.
13. a) ¿Imamandata shican shican diversiongunata agllanchi? b) ¿Imatata tucuicuna rurana capanchi?
13 Tucuicunallata shuj shuj gustocunata charimandami, shican shican diversiongunata alicachishpa agllanchi. Shinallata, huaquin cosascunaca shujcunapaca alimi can, cutin shujcunapaca nalishnallami can. Shinapash tucuicunami, Bibliapi textocuna imata yachachijujta intindishpa ali decisiongunata agllana capanchi (Filipenses 1:9). Shinami Jehová Dios alicachishca decisiongunata agllai ushashun (Salmo 119:11, 129; 1 Pedro 2:16).
14. a) Diversiongunata agllashpaca ¿imapipashta pensarina capanchi? b) Apóstol Pabloca ¿ima consejotata curca?
14 Ñucanchipa ima ashtahuan importante cashcata ricuchingapaca, diversiongunapi mashna tiempota yalijushcatapash pensarinami capanchi. Ñucanchipaca Jehovata sirvinami ashtahuan importante can (Mateo 6:33, liipangui). Huaquinbica na cuenta japishpami, diversiongunapica ashtaca tiempota yalinchi. Apóstol Pabloca nircami: ‘Juizu illanshnaca, na causanachu canguichi. Alipacha yachajushcashnami causana canguichi. Cunan punllacunapillata aliguta yarishpa [o tiempota ali ocupashpami] causana’ canguichi nishpa (Efesios 5:15, 16). Shinaca, Jehová Diosta sirvinata pundapi churangapaca, na ashtaca tiempotachu diversiongunapica yalina capashcanchi (Filipenses 1:10).
15. Jehová Diospa amigo cashpa catingapaca ¿imatata rurana capanchi?
15 Jehová nalicachishca diversiongunamanda caruyana cashcataca alimi yachapanchi. Shinapash, shuj diversión nalishnalla ricurijpica ¿imatata rurana capanchi? ¿Chai diversionmandapash caruyanachu capanchi? Pensaripai. Shuj urcuman vichai rijushpaca ¿jaca manñata rijupanguimanllu? Causangapaj munashpaca, jaca manñataca na rijupanguimanllu. Diversiongunapipash shinallatami can. Bibliapica ninmi: “Cambaj chaquitaca, ima nalimandapash anchuchingui” nishpa (Proverbios 4:25-27). Chaimandami, nali diversiongunata na agllana cashcata ali yachashpapash, Jehová Diospa amigo cashpa catingapaca nalishnalla ricurinajuj diversiongunamandapash caruyana capanchi.
JEHOVÁ IMATA YUYASHCATA YUYAPASHUNCHI
16. a) ¿Imacunatata Jehová Diosca millanayachin? b) Jehová Dios millanayachishca cosascunata ñucanchipash millanayachishcataca ¿imashinata ricuchinchi?
16 Bibliapica ninmi: ‘Mandaj Diosta juyajcuna, nalita ruranataca millanayachinami canguichi’ nishpa (Salmo 97:10). Bibliapimi Jehová Dios imata yuyajta, imashina sintirijta yachachin. Tapuripai: “Bibliapi imatapash yachajunaca ¿imashinata Jehová imata pensajta intindichun ayudahuan?” nishpa. Huaquin ejemplocunata ricupashun. ‘Llullashpa parlajta, huañuchijta, nalita ruranatalla yarishpa purijta, nalita rurangapaj calpajtaca’ Taita Dios ninanda millanayachijtami yachajushcanchi (Proverbios 6:16-19). Shinallata cazarashca jahua shujhuan causana, huainayana, yanga dioscunata mañana, brujurishpa causana, celana, fiñanajuna, envidiana, machana, maipash cachun fiestacunata rurana cosascunamanda caruyana cashcatapashmi yachajushcanchi (Gálatas 5:19-21). Ricupai, chai textocunami diversiongunata ali agllachun ayudaita ushan. Gentecunapa ñaupajpi cashpa, o ñucanchilla cashpapash Jehovataca siempremi tucuipi cazuna capanchi (Hebreos 4:13). Ñucanchilla cashpaca ¿ima decisiongunatata agllanchi? Chai decisiongunami ñucanchi shungu imashina cashcata ricuchin (Salmo 11:4; 16:8).
17. Diversiongunata agllajushpaca ¿imatata tapurina capanchi?
17 Tapurinami capanchi: “Cai diversionda agllashpaca ¿Jehová Diospa amigo cashpa catita ushashachu? ¿Imashinata ñuca concienciapica sintirisha?” nishpa. Aliguta pensarishpa, diversiongunata agllangapaca, shuj textocunatapash ricupashun.
18, 19. a) ¿Ima consejotata apóstol Pabloca curca? b) Diversiongunata aliguta ricushpa agllachunga ¿maijan textocunata ayudaita ushan?
18 Ima diversionda agllashpapash, chaipi imata ricushcata, uyashcatami ñucanchi umapi churanajunchi. Apóstol Pabloca nircami: ‘Na llullashpa, aliguta causashpa, [alita] rurashpa, tucuipi mapa illaj canata, tucuicunata juyanata, tucuicuna juyashca canata, alicachishca canatami yarina canguichi’ nishpa (Filipenses 4:8). Chai ali cosascunata umapi charishpaca, ñucanchipashmi nishun: ‘Ñuca Dioslla, ñuca shimihuan nishcacunapash, ñuca shungupi yarijushcapash canba ñaupajpica chasqui ushanalla cachun’ nishpa (Salmo 19:14).
19 Tapuripai: “Televisionda o shuj peliculata ricushca jipaca ¿ali yuyaicunachu umaman shamuhuan? ¿Concienciapi ali sintirinichu?” nishpa (Efesios 5:5; 1 Timoteo 1:5, 19). Shinallata tapuripai: “Jehovata mañajushpaca ¿tranquilochu sintirini, o concienciapi nalichu sintirini? Televisionda o peliculata ricushca jipaca ¿mapa yuyaicunapi, o macanajunapichu pensarijuni? Ñuca agllashca diversiongunaca ¿‘cai pachapa’ causaita catijushcatachu ricuchin?” nishpa (Romanos 12:2; Mateo 12:33; Marcos 7:20-23). Chai tapuicunapi aliguta pensarishpaca, Jehovapa amigo cashpa catingapaj imapi cambiana cashcatami cuenta japishun. Salmo librota escribij runagushnami Jehová Diostaca nishun: “Ñuca ñavitapash, imapash yangacunatara ricunamandaca anchuchihuayari” nishpa (Salmo 119:37). *
DECISIONGUNATA AGLLAJUSHPACA SHUJCUNAPIPASH PENSARIPASHUNCHI
20, 21. Diversiongunata agllajushpaca ¿imamandata shujcunapa concienciapipash pensarina capanchi?
20 Bibliapica ninbashmi: ‘Tucuita rurai ushanalla’ cashpapash, ‘na tucuillachu shinllichita ushan. Pipash na quiquinballa ali cachun, imatapash ruranachu. Shujpapash ali cachunmi imatapash rurana’ can nishpa (1 Corintios 10:23, 24). Imata rurana derechota charishpapash, shuj huauquipanicunapi pensarishpami decisiongunataca agllana capanchi.
21 Shican shican concienciata charimandami huaquingunaca, concienciapi ali sintirishpa shuj peliculata ricunlla, cutin shujcunaca na. Shina pasajpica ¿imatashi quiquinga rurapanguiman? Concienciapi ali sintirimanda chai peliculata ricunalla cashpapash, ñuca huauquita nitijachishpaca juchatami rurajuiman, ‘Cristotapash fiñachishpami juchata rurajuiman’ yashpami chai peliculataca na ricunguiman (1 Corintios 8:12). Shuj huauquitaca nimamanda na nitijachinachu capanchi (Romanos 14:1; 15:1; 1 Corintios 10:32).
22. ¿Imashinata shuj huauquipanicunapi yuyashcata, paicunapa decisiongunata respetashcatapash ricuchipanchi?
22 Shuj huauqui, paipa concienciapi ali sintirishpa imatapash liijujpi, rurajujpi quiquin nalicachijushpaca ¿imatata rurana capangui? Quiquinba huauquita juyaimanda, respetaimandaca quiquin imata agllashcata paipash agllachunga, na obliganachu capangui. Pensaripai: Chofercunaca, shuj chofercuna ashtahuan ñapash, o alimanda manejajtaca alimi yachan. Shinapash ¿ñapash o alimanda manejaimandachu nali chofercuna can? Na. Diversiongunamanda shican shican yuyaita charishpapash, ishcandillatami Jehová imata pensajtaca pactachinajupanguichi (Eclesiastés 7:16; Proverbios 13:16).
23. Aliguta ricushpa diversiongunata agllangapaca ¿imatata rurana capanchi?
23 Ali diversiongunata agllangapaca, Jehová imata pensashcata pactachijushcatami concienciapica seguro cana capanchi. Shinallata ñucanchi huauquipanicunapipash pensarinami capanchi. Shinami ‘Taita Diosca punchapambagumi ni tucuchunmi tucuita rurajuni’ yashpa cushijushun.
^ Diversiongunata ali ricushpa agllachunga cai textocunapashmi ayudaita ushan: Proverbios 3:31; 13:20, Efesios 5:3, 4; Colosenses 3:5, 8, 20.