1-3. a) ¿Imamandata taitamamacunaca huahuacuna limpio cachun munan? b) ¿Imamandata Jehová Diosca paita sirvijcuna limpio cachun munan?

 MAMACUNACA, armachishpa limpio, alillata ropaguhuanmi huahuacunataca escuelaman cachan. Chaimi huahuacunapash sano caita ushan, taitamamacuna aliguta cuidajushcatapash ricuchin.

² Ñucanchi Taita Jehová Diospash, ñucanchipallata ali cana cajpimi jucha illaj, limpio cachun munan (Salmo 18:26). Ashtahuangarin, limpio cashpami Jehová Diosta alabanchi (Ezequiel 36:22; 1 Pedro 2:12, liipangui).

 ³ Shinapash limpio canaca ¿imata can? ¿Imamandata ñucanchipallata ali can? Chai tapuicunata yachajushpami, imacunapi cambiana cashcata cuenta japishun.

4, 5. a) ¿Imamandata limpio cana capanchi? b) ¿Imashinata Jehová Diosca limpio canata alicachishcata ricuchin?

⁴ Jehová Diospa ali ejemplota catishpami, ñucanchipash ‘paishnalla’ limpio, jucha illaj cangapaj munapanchi (Levítico 11:44, 45; Efesios 5:1).

⁵ Jehovapa rurashcacunaca, Jehová Dios limpio cajtami yachachin. Paica gentecuna causachunmi, cai Alpataca paimandallata limpio cachun rurarca. Shuj ejemplota ricupashun. Tamiashca jipa Indi llujshijpica, samai cushnishna alpamanda llujshishpami jahuaman rin. Chai jipaca fuyu tucushpami cutin tamian. Siempremi shina pasan. Alpapipash uchilla microbio jurucunami basurataca abonoman tigrachin (Jeremías 10:12; Romanos 1:20).

6, 7. Moisesman Cushca Leyca ¿imashinata limpio canata yachachirca?

⁶ Moisesman Cushca Leypipashmi Jehová Diosca, limpio canata alicachishcata ricuchirca. Shuj ejemplota ricupashun. Israelitacuna paicunapa cuerpopi limpio cajpillami, Jehová Diosca paita adorachun saquin carca. Sumo sacerdote nishcapash, Jehovapa shicanyachishca ucuman yaicuna punllapica, ishcai viajeta armashpami yaicuna carca (Levítico 16:4, 23, 24). Sacerdotecunapash, sacrificiocunata rurangapaca maquicunatapash, chaquicunatapash maillanami carca (Éxodo 30:17-21; 2 Crónicas 4:6). Limpio cana leyta na pactachijcunaca huañuchi tucunallami carca (Levítico 15:31; Números 19:17-20).

 ⁷ Moisesman Cushca Leymanda yachajushpami, Jehová Dios imata pensashcata cunanbipash intindi ushapanchi. Cunangamanmi Jehová Diosca paita sirvijcuna limpio cachun munan, paica na cambiashcachu (Malaquías 3:6; Santiago 1:27).

8. ¿Imacunapillata limpio cana capanchi?

⁸ Jehová Diospa ñaupajpi limpio ricuringapaca, ñucanchi cuerpopi, ropapi, huasipi limpio cashca jahuapash, Jehovata adoranapipash, causaipipash, pensamientocunapipashmi limpio cana capanchi.

9, 10. Jehová Diosta limpio, aliguta adorai ushangapaca ¿imatata rurana capanchi?

⁹ Limpio, aliguta adorana. Panda religiongunahuanga na imapipash chapurinachu capanchi. Israelitacunata Babilonia llactaman prezo apashca tiempopica, paicunapa dioscunata adoranchi nishpami babiloniocunaca, chai dioscunapa ñaupajpi jaricunahuan huarmicunahuan mapayan carca. Chashna gentecunapurapi causanajujpimi, profeta Isaiasca israelitacunataca nirca, cangunapa llactaman tigrashpami Jehovata cutin ali adoranguichi nishpa. Jehová Diosca nircami: ‘Babiloniamanda llujshichi. Imapash mapataca, na tacarinachu canguichi. Chai llacta chaupimanda llujshichi. Mapa illaj tucuichi’ nishpa. Jehovata ali adorangapaj munashpaca, panda religiongunapa yachachishcacunahuan, costumbrecunahuanga na chapurinachu carca (Isaías 52:11).

¹⁰ Cunanbi Jesusta ali catijcunapash, panda religiongunahuanga na chapurinchichu (1 Corintios 10: 21, liipangui) *. Mundo enteropi gentecunami panda religiongunapa yachachishcacunata catishpa huaquin cosascunata crin, huaquin costumbrecunata charin. Shuj ejemplota ricupashun. Ashtaca gentecunaca alma na huañujta crishpami, almacunaman micunata apashpa rezachin, misacunata pagan, o imacunatapash ruran (Eclesiastés 9:5, 6, 10). Jesusta catijcunaca na chai costumbrecunapi chapurinachu capanchi. Huaquinbica familiacunapashmi chai costumbrecunata catichun atichin. Shinapash, Jehová Diospa ñaupajpi limpio ricuringapaca, na chaicunataca ruranachu capanchi (Hechos 5:29).

11. Limpio causaita charingapaca ¿imatata rurana capanchi?

¹¹ Limpio causaita charina. Jehovapa ñaupajpi limpio ricuringapaca, huainayana juchapica na urmanachu capanchi (Efesios 5:5, liipangui). Jehová Diosca ninmi: “Huainayamandaca anchurichi” nishpa. Jehová Diosca intindirijtami nin, huainayana juchapi urmashpa na arripintirijcunaca ‘Taita Dios mandajuj llactapica, napacha imatapash japingachu’ nishpa (1 Corintios 6:9, 10, 18; nota 22​ta ricupangui).

12, 13. ¿Imamandata limpio pensamientocunata charina capanchi?

¹² Limpio pensamientocuna. Gentecunaca imata yuyashcatami ruranata yachanchi (Mateo 5:28; 15:18, 19). Limpio pensamientocunata charishpaca limpio, ali cosascunatami rurashun. Juchayucuna nacirimandami huaquinbica nali pensamientocunata charinchi.  Nali pensamientocuna umaman shamujpica, uchami llujchina capanchi. Na ucha llujchijpica, ñucanchi shungupash mapayajpimi tiempohuanga imata pensajushcatallata tal vez rurangapaj munashun. Ama chashna pasangapajmi ñucanchi umapica limpio pensamientocunata charina capanchi (Filipenses 4:8, liipangui). Shinaca, jarihuan huarmihuan mapayanajujcunata, macanajuicunata ricuchij, uyachij cosascunamandaca caruyanami capanchi. Imata liigrijushcata, ricugrijushcata, parlagrijushcataca aligutami agllana capanchi (Salmo 19:8, 9).

¹³ Taita Diosta juyashpa catingapaca, aligutami adorana capanchi. Causaipipash, pensamientocunapipash limpiomi cana capanchi. Jehová Diosca ñucanchi cuerpopipash limpio cachunmi munan.

14. ¿Imamandata cuerpopipash limpio cana capanchi?

¹⁴ Ñucanchi cuerpopi limpio cashpa o ñucanchi cosascunata limpiota charishpaca, ñucanchillatami ali sintirinchi, shujcunapash ñucanchihuan canata alicachinmi. Ashtahuanbachaca, shuj gentecuna Jehovata alicachichunmi limpio cana capanchi. Pensaripai: ¿Nachu shuj huahuagu siempre mapa cajpica, taitamamacunaca na cuidanllu yashpa ricunchiman? Shinallata, ñucanchicuna na limpio cajpi, na aliguta arreglarijpica, Jehovatami gentecunaca na alicachinga. Apóstol Pabloca nircami, pipash ‘ama nitijachun, Diospajta ñucanchi ruranajushcata ama nalicachishpa rimachunmi, aliguta cuidarinchi. Imaguta rurashpapash, Taita Diospajta rurajcuna’ cashcatami ricuchinchi nishpa (2 Corintios 6:3, 4).

15, 16. Limpio cashpa catingapaca ¿imatata rurana capanchi?

¹⁵ Ropapash, cuerpopash. Cada punllami limpio  cana capanchi. Usharijpicarin cada punllami armana capanchi. Ashtahuanbachaca yanugrijushpa, micugrijushpa, bañomanda llujshishpa, o mapa cosascunata tacarishpami, maquitaca yacuhuan jabonhuan maillana capanchi. Huaquinbica pensanchipashchari, maquita na maillashpapash puririnllami nishpa. Shinapash, maquita na maillajpimi ungüicunaca chimbanlla. Huaquinbicarin maquita maillaimandami huañunatapash salvarinchi. Bañota na charishpaca, punda tiempo israelitacunatami yarita ushapanchi. Paicunaca huasimanda, o yacu llujshij pushtucunamanda carullaguta rishpami, paicuna lugariashcataca tapan carca (Deuteronomio 23:12, 13).

¹⁶ Valishca, mushuj moda ropacunata churajunaca na minishtirinllu. Shinapash limpio, alimi cana can  (1 Timoteo 2:9, 10, liipangui). Ñucanchi churajushcahuanmi Jehovataca siempre alabangapaj munapanchi (Tito 2:10).

17. ¿Imamandata ñucanchi huasitapash, cosascunatapash limpio charina capanchi?

¹⁷ Huasipash, cosascunapash. Maipi causashpapash ñucanchi huasitaca limpiomi charina capanchi. Carrota, bicicletata, motota o imata charishpapash limpiotami charina capanchi. Ashtahuanbachaca tandanajuicunaman, o villachingapaj rijushpami limpiota charina capanchi. Villachishpaca, limpio paraíso Alpagu tianatami parlanajupanchi (Lucas 23:43, NM ; Apocalipsis [Revelación] 11:18). Ñucanchi huasitapash, cosascunatapash limpiota charishpaca, chaipi causangapaj prepararinajushcatami ricuchipanchi.

18. ¿Imamandata Jehovata adorana pushtucunataca limpio charina capanchi?

¹⁸ Jehovata adorana pushtucuna. Tandanajui Huasicunata, o jatun tandanajuicunata rurana pushtucunata limpio charishpami, limpio canata alicachishcata ricuchipanchi. Primera vez shamujcunaca, taucacunami ñucanchi Tandanajui Huasi limpio cajta alicachishpa ricun. Shinami Jehová Diospash alabai tucun. Congregacionbica tucuicunami ñucanchi Tandanajui Huasita limpiaita, ama huaglichun cuidaitapash ushapanchi (2 Crónicas 34:10).

19. ¿Maijan viciocunatata saquina capanchi?

¹⁹ Bibliapica, maijan ruraicunalla nali cashcata ninapa randica, Jehová Dios imata pensajtami huaquin textocunapi intindichin. Jehová Diosca ñucanchicuna  tabacota chupachun, yapata ufiachun, drogarichunga na munanllu. Jehová Diospa amigo cashpaca, pai carashca causaita respetaimandami chaicunataca na rurashun. Viciocunamandami gentecunaca ungun, ñapash huañun, shujcunatapash llaquichin. Ashtacacunaca sano cangapaj munaimandami chai viciocunataca saquishca. Shinapash Jehová Diospa amigocunaca, paita juyaimandami chai viciocunataca saquina capanchi. Shuj joven huarmiguca nircami: “Jehová Dios ayudajpimi, limpio causangapaj munashpa viciocunata saqui usharcani. Ñuca fuerzahuanlla cambiaitaca nunca na ushaimanllu carcani” nishpa. Shinaca, viciocunata saquingapaj picha textocunata ricupashun.

20, 21. ¿Maijan viciocunatata Jehová Diosca saquichun munan?

²⁰ “Juyashca huauquipanicuna, Taita Dios chashna nishcamandami, ñucanchi cuerpotapash, yuyaicunatapash na imacunahuanbash mapayachina capanchi. Paita manllashpami, paipalla causana capanchi” (2 Corintios 7:1, NM ). Jehová Diosca ñucanchi cuerpota, yuyaicunata mapayachij tucui viciocunata saquichunmi munan.

²¹ ¿Imamandata ñucanchi cuerpota, yuyaicunataca na imacunahuanbash mapayachina capanchi? 2 Corintios 6:17, 18​pica Jehová Diosca nircami: ‘Ima mapatapash, pactara tacaringuichiman’. Alita rurajpimi ‘cangunapa Taita casha. Cangunapash ñuca churicuna, ñuca ushicuna canguichi’ nishpa. Shinaca, paipa ñaupajpi nali ricurijuj viciocunata saquijpica, ñucanchi taita cuendami Jehová Diosca juyanga.

22-25. Viciocunamanda caruyangapaca ¿maijan textocunapita pensarita ushapanchi?

 ²² “Cambaj Taita Diostaca, tucui shunguhuan, tucui almahuan, tucui yuyaihuan juyangui” (Mateo 22:37). Tucui mandamientocunamandaca chaimi ashtahuan importante can (Mateo 22:38). Jehová Diostaca ñucanchi tucui causaihuan, tucui yuyaihuanmi juyana capanchi. Ñucanchi causaita peligropi churashpa, o ñucanchi yuyaita mapayachishpaca, paita tucui shunguhuan juyashcataca na ricuchinajupanchimanllu. Jehovata tucui shunguhuan juyashpaca, pai carashca causaita respetashcatami ricuchina capanchi.

²³ ‘[Jehová Diosca] causaita, samaitami tucuicunaman caran’ (Hechos 17:24, 25). Shuj ali amigo imapash juyailla regalota carajpica ¿faquinguimanllu o basuraman shitanguimanllu? Jehová carashca causaita ninanda alicachimandami, ñucanchi causaihuanga Jehovata alabangapaj munapanchi (1 Timoteo 6:13).

²⁴ “Camba cumba runagutaca, imashna can juyarinshnallata juyangui” (Mateo 22:39). Viciocunamandami ñucanchi juyashca familiatapash llaquichinchi. Shuj ejemplota ricupashun. Tabacota chupadorhuan causajcunaca, paicuna tabacota na chupashpapash, chai cushnitallata cutin cutin respiraimandami paicunapash ungun. Viciocunata saquishpami shujcunatapash juyashcata ricuchipanchi (1 Juan 4:20, 21).

²⁵ ‘Llactata mandajcunata, pueblopi mandajcunatapash cazuchun yarichipangui’ (Tito 3:1). Ashtaca llactacunapica huaquin drogacunata na charinachu, na chupanachu can nishca leycunami tian. Gobiernocunata  cazuchun nishpa Jehová Dios mandashcamandami, chai leycunata cazupanchi (Romanos 13:1).

26. a) Jehová Diospa amigo cangapaca ¿imatata tal vez rurana capanchi? b) ¿Imamandata Jehová Diospa ñaupajpi limpio, ali ricurinaca ali can?

²⁶ Jehovapa amigo cangapaj huaquin cosascunapi cambiana cashcata cuenta japishpaca, uchalla cambiapashunchi. Viciocunata saquina na fácil cajpipash, Jehovapa ayudahuanga ushashunmi. Paica ninmi: ‘Ñucami, cangunata Mandaj Taita Dios cani. Ñucami, cangunapa ali cachun yachachini. Maijan ñanda rinatapash, ñucami ricuchishpa pushani’ nishpa (Isaías 48:17). Ima pandapash illaj, limpio cangapaj esforzarishpaca Jehovatami alabashun.