1, 2. Diosta juyashpa catingapaca ¿imatata rurana capanchi?

 TUCUICUNAMI shinlli, sano cangapaj munapanchi. Chaimandami ali micunchi, ejerciciocunatapash ruranchi. Chaicunata rurana shinlli cajpipash, ñucanchipallata ali cana cajpimi ruranchi. Shinapash ¿imapita ashtahuan shinlli, sano cangapaj munapanchi?

² Jehová Diosta ña rijsishpapash, paipa ashtahuan ali amigo cangapami esforzarishpa catina capanchi. Discípulo Judasca nircami, ‘Diospa juyaita na cungashpa causangapaca’, ‘cangunapa [feta shinlliyachishpa] catipanguichi’ nishpa (Judas 20, 21). Chaipaca ¿imatata rurana capanchi?

3-5. a) Jehovapa leycunamanda ¿quiquin imata pensachunda Diabloca munan? b) Jehovapa leycunamanda, yachachishcacunamandaca ¿imatata yuyapangui?

³ Jehová Diosta cazuna ali cashcataca, seguromi cana capangui. Diabloca, Jehovata cazunaca shinllimi can, ñucanchillata ima ali cajta, ima nali cajta decidishpami cushilla causai ushanchi nishpa pensachunmi munan. Adán y Evapa punllacunamandapacha cunangamanmi gentecunataca shina pensachingapaj munashca (Génesis 3:1-6).

 ⁴ Shinapash, Jehovapa mandashcacunata pactachinaca na yapa shinllichu can. Chaita ali intindingapaca shuj ejemplota ricupashun. Shuj parqueta ali purijushpa shuj jatun pircata ricushcanguiman. Tal vez pensaripanguipashchari, “¿imapashi cai pircaca caipi tiajun?” nishpa. Shinapash jatun pirca huashaman shuj león huacajujta uyashpaca ¿nachu antsicarin cai jatun pirca caipi tiajurca nipanguiman? Jehovapa yachachishcacunaca chai jatun pircashnami can. Cutin Diabloca chai león cuendami can. Bibliapica ninmi: ‘Cangunata fiñaj Diabloca, león huacashpa, pitapash micungapaj mascajunshnami muyuriajun. Shina cajpimi, rijchariashna causana canguichi’ nishpa (1 Pedro 5:8).

⁵ Jehová Diosca ñucanchicuna cushilla causachunmi munan. Diablo ama pandachichunmi, paipa leycunata, paipa yachachishcacunatapash cushca (Efesios 6:11). Discípulo Santiagoca nircami: ‘Huatashcashna causanajuimanda cacharichij, Diospa mandashca Shimita alicachishpa pactachijca, ninandami cushijunga’ nishpa (Santiago 1:25).

6. Jehovata cazuna ali cashcata seguro cangapaca ¿imatata rurana capanchi?

⁶ Jehovata cazushpami cushilla sintirinchi, paipa ashtahuan ali amigocunapash tucunchi. Por ejemplo. Jehová munashcashna paita cutin cutin mañashpaca cushillami sintirinchi (Mateo 6:5-8; 1 Tesalonicenses 5:17). Shinallata, Jehová mandashcashna paita adorangapaj, shuj huauquipanicunahuan animaringapaj tandanajushpami cushilla sintirinchi. Villachingapaj, yachachingapaj ashtahuan esforzarishpapash cushillami sintirinchi (Mateo 28:19, 20; Gálatas 6:2; Hebreos 10: 24, 25). Jehovata cazuna ñucanchipallata ali cashcata pensarishpami, ñucanchi feta shinlliyachishpa, paita cazuna ali cashcataca ashtahuan seguro caita ushapanchi.

7, 8. ¿Imamandata llaquicuna shamujpica, na aguantai ushashachu nishpaca na preocuparijuna capanchi?

⁷ Huaquinbica, problemacunata na aguantai ushashachu yashpachari preocuparipangui. Shinapash ama preocuparipaichu. Jehová Diosca ninmi: ‘Ñucami, cangunata Mandaj Taita Dios cani. Ñucami, cangunapa ali cachun yachachini. Maijan ñanda rinatapash, ñucami ricuchishpa pushani. ¡Ñuca mandashcacunata canguna cazujpica, jatun yacushnami casilla aliguta causanaca, na tucuringa! [Alita] ruranapash, mama cucha yacu  caiman chaiman cuyurinshnami canga’ nishpa (Isaías 48:17, 18).

⁸ Jehovata cazushpaca, ñucanchipa casilla ali causaica, jatun yacu calpajunshnami siempre tianga. Ñucanchipa ali rurashcacunapash, mama cuchapi yacushnami siempre caiman chaiman cuyurijunshna canga. Ima llaquicuna ricurijpipash, Jehovata cazuitaca ushashunmi. Bibliapica ninmi: ‘Llasha quipishna canba llaquitaca, Mandaj Diosman saquilla. Paica ayudangallami. [Alita] rurajtaca na saquingachu’ nishpa (Salmo 55:22).

9, 10. Jehovata ali catinajujcunaca ¿imashinata can?

⁹ Jehovahuan ashtahuan ali amigo tucushpami, paitaca ‘aliguta cati’ ushapangui (Hebreos 6:1, MTQI). Shina nishpaca ¿imatata nijupanchi?

¹⁰ Tauca huatacuna yalishcamandalla, ñami Jehovata aliguta catijuni nitaca na ushapanchichu. Jehovata ali catijcunaca, Jehovatami paicunapa ashtahuan ali amigotashna ricun, pai yuyashcashnami yuyan (Juan 4:23, NM ). Apóstol Pabloca nircami, paicunapa ‘munaitalla rurashpa causajcunaca [chaitallami] yaria causanajun’. Cutin, ‘Diospa espíritu yachachijujta catijcunaca, Diospa espíritu munashcatami yaria causanajun’ nishpa (Romanos 8:5). Jehovata ali catinajujcunaca, paicunapa munashcata o cosascunata pundapi churanapa randica, Jehovata sirvinata pundapi churashpami, ali decisiongunata agllan (Proverbios 27:11; Santiago 1:2, 3, liipangui). Nalita rurachun shujcuna atichinajujpipash, na pandachi tucunllu. Ima ali cajta seguro cashpami alita ruran.

11, 12. a) Apóstol Pablo nishca shinaca, ‘aliguta yachajushcacunaca’ ¿imatata rurai ushan? b) Jehovata ali catijcuna cangapaca ¿imatata rurana capanchi? Shuj ejemplota churapai.

 ¹¹ Jehovata ali catijcuna cangapaca esforzarinami capanchi. Apóstol Pabloca nircami: ‘Shinlli micunataca [aliguta catijcunallami] micuita ushan. Paicunaca, aliguta yachajushca cashpami alita, nalitapash yachai ushan’ nishpa (Hebreos 5:14). “Aligutami yachajuna” nijta uyashpaca, tal vez ali deportista tucungapaj ali entrenarinatami yuyanchiman.

¹² Ali deportistacunaca na llullu huahuagumandapachachu ali deportistacuna can. Ali deportistacuna tucungapaca tiempota, esfuerzotami minishtin. Llullu huahuagucunaca chaquicunata, maquicunata ali cuyuchitaca na ushanllu. Tiempohuanmi cosascunata japitapash, puritapash yachajun. Entrenashpacarin ali deportistami tucuita ushan. Ñucanchicunapash, Jehovata ali catijcuna cangapaca, tiempota llujchishpami esforzarina capanchi.

13. Jehová Dioshna pensangapaca ¿ima tapuicunapita pensarina capanchi?

¹³ Cai libropica, Jehová Dioshna pensana cashcata, paipa mandashcacunata alicachinatami yachajupashcanchi. Imatapash decidigrijushpaca tapuripashunchi: “Jehovapa leycuna, yachachishcacunaca ¿imatata nijun? ¿Imashinata chaicunata pactachi ushani? Jehová Diosca ¿imata rurachunda munan?” nishpa (Proverbios 3:5, 6; Santiago 1:5, liipangui).

14. Jehovapi ashtahuan cringapaca ¿imatata rurana capanchi?

¹⁴ Ñucanchi feta shinlliyachishpa catingapaca, esforzarishpami catina capanchi. Imashinami micushpaca fuerzata japinchi, shinallatami Jehovamanda yachajushpaca, ñucanchi feta shinlliyachishpa catinajunchi. Bibliata yachajui callarishpaca, minishtirishca cosasgucunatalla,  huaquin mandashcacunatallami yachajuparcanchi. Shinapash tiempohuanga, shinlli cosascunatapashmi yachajuna capanchi. Chaimi apóstol Pabloca nirca: ‘Shinlli micunataca [aliguta catijcunallami] micuita ushan’ nishpa. Imata yachajushcata pactachishpaca, ali yachaita charishcatami ricuchinchi. Bibliapica ninbashmi: ‘Tucuimanda yalica, ali yachaimi ashtahuan ali’ can nishpa (Proverbios 4:5-7; 1 Pedro 2:2).

15. ¿Imamandata Jehovatapash, ñucanchi huauquipanicunatapash juyana capanchi?

¹⁵ Imashinami shinlli, sano cashpa catingapaj cuidarina capanchi, shinallatami Jehovata ali catijcunaca, paipa amigo cashpa catingapaj esforzarina can. Apóstol Pabloca nircami: “¿Ñachu alipacha crij cani, narachu ali crij cani?” nishpami pensarina canguichi nishpa (2 Corintios 13:5). Shinlli feta charishpapash, Jehovatapash, ñucanchi huauquipanicunatapashmi ashtahuan juyashpa catina capanchi. Apóstol Pabloca nircami: ‘Ninanda yachajushca cashpapash, urcucunata shujmanda shujman yalichinata crishpapash juyaita na charishpaca, [na] imapash canichu’ nishpa (1 Corintios 13:1-3).

16. Diabloca ñucanchicuna ¿imashina sintirichunda munan?

¹⁶ Jehovataca nunca na cushichi ushashachu nishpa pensachun, problemacunaca nunca na tucuringachu nishpa desanimarichunmi Diabloca munan. Ñucanchi huauquipanicunapi confiachun, cushilla cachunbash na munanllu (Efesios 2:2). Llaqui pensamientocunata charimanda llaquiyashpa, Jehovamanda caruyai ushanataca, Diabloca alimi yachan. Shinapash, llaqui pensamientocunata mishachunmi Jehová Diosca, shamuj punllacunapi ali causaitami carasha nin.

17. ¿Imamandata Taita Dios carasha nishcata japinataca yaria cana capanchi?

 ¹⁷ 1 Tesalonicenses 5:8​pica ninmi, umapi jirru cascota ‘churajunshnami, quishpirinataca yaria shuyana canchi’ nishpa. Imashinami soldadocuna ama llaquichi tucungapaca, cascota churajun carca, shinallatami Jehová Dios carana bendiciongunata shuyashpaca llaqui pensamientocunata mishai ushashun.

18, 19. Shamuj punllacunapi pensanaca ¿imashina Jesustaca ayudarca?

¹⁸ Último tutataca, Jesusca tauca llaquicunatami aguantarca. Pundapica shuj amigomi traicionarca. Shujca na rijsinichu nircami. Shujcunapash saquishpami pacajungapaj rirca. Paipa llactapuracunapash paipa contra tucushpami, paita macashpa huañuchichun munarca. ¿Imamandata Jesusca chai llaquicunata aguantarca? Bibliapica ninmi: “Cushijushpa causagrinata yachashpami, paica jatun racu caspipi huañunatapash, nalicachishpa rimai tucunatapash  aguantashpa cunanbica Taita Diospa ali ladopi can” nishpa (Hebreos 12:2, NM ).

¹⁹ Jehovata cazushpaca, Jehovata jatunyachishpami Diablotaca llullapi saquisha yashpami Jesusca cushilla sintirirca. Shinallata, ñalla paipa Taitahuan canata yachashpami, llaquicunataca aguantarca. Ñucanchicunapash, Jesuspa chaquita catishpami, jipa punllacunapi imata chasquinataca yaria cana capanchi. Shinami ima llaquicuna ricurijpipash chai llaquicunata aguantai ushashun.

20. Jehová imata caranata yaria causashpa catingapaca ¿imatata rurana capanchi?

²⁰ Jehová Diosca, paipi feta churashpa aguantajujtaca ricujunmi (Isaías 30:18; Malaquías 3:10, liipangui). Bibliapica ninmi: “Paimi, cambaj shungupi imatalla mañashcacunataca caranga” nishpa (Salmo 37:4). Shinaca, imata japinataca yariami causana capanchi. Diabloca,  ñucanchi imata japinata yaria causachun, Jehovapa nishcacuna pactarinata crichunbash na munanllu. Chai pensamientocuna mishachunga ama saquipanguichu. Jehová Dios carasha nishcacunata japinata ñana pundashna shuyajushpaca, Jehovatami ayudahuai nishpa mañana capangui. Yaripai, Filipenses 4:6, 7​pica ninmi: ‘Ima illajpipash na llaquilla causanachu canguichi. Imatapash villashpa, imamandapash pagui nishpa mañaichi. Casilla ali causaitaca, Taita Diosmi caramunga, [paimi] cangunapa shungutapash, yuyaicunatapash, Cristo Jesushuan shujlla tucushcamanda huacaichijunga’ nishpa.

21, 22. a) Shamuj punllacunapica ¿imashinashi causashun? b) ¿Imatata rurangapaj munapangui?

²¹ Ñallami Diablopash, paipa ayacunapash, nali gentecunapash ñana tianga. Ungüicunapash, huañuipash ñana tiangachu. Tucui punllacunami cushilla, animohuan pacarishun. Tucuicunami cai Alpa shuj juyailla paraíso Alpagu tucuchun tandanajushpa trabajashun. Micunapash na faltangachu, maipi causana pushtugutapash charishunmi. Ñallami cai Alpapica tucuicuna Jehovata adorashun (Apocalipsis [Revelación] 7:9, 14). Tiempohuanga tucuicunami ‘Taita Diospa huahuacunashna tucushun’ (Romanos 8:21). Chashna alipacha causai tianataca siempremi pensarijuna capangui.

²² Jehová Diosca quiquinba ashtahuan ali amigo cangapami munan. Chaimandami quiquinbash cada punlla paipa ashtahuan ali amigo tucushpa paita cazushpa catingapaj esforzarina capangui. Shinaca, tucuicuna Jehová Diosta juyashpa catipashunchi (Judas 21).