1. Jesusta catijcunaca ¿imatata ali yachana capanchi? ¿Imamandata ali yachana capanchi?

 JESUSCA nircami: ‘Tucui shunguhuanbacha adorajcunaca, espíritu santohuan, cabal yachachishcahuanmi Taita Diostaca adoranga. Taita Diosca shina adorajcunatami mascan’ nishpa (Juan 4:23, NM ; 6:44). Jesusta catijcunaca tucuicunami ‘Taita Diospa munai [ima] cajta yachana’ capanchi (Romanos 12:2). Shinapash huaquinbica na facilchu can. Jehová Dios na alicachishca cosascunata rurachunmi Diabloca, ñucanchita pandachingapaj munan (Apocalipsis [Revelación] 12:9).

2. Sinaí nishca urcupica ¿imata pasarca?

² Diabloca nali cosascunata alitashnalla ricuchishpami pandachingapaj munan. Shinaca, israelitacunata ima pasashcata ricupashun. Israelitacunaca Moisesca Sinaí nishca urcu jahuamanda na ucha shamunllu nishpami, Aarondaca shuj diosta rurapai nirca. Shina nijpimi Aaronga, shicuman rijcha oro imagenda rurarca. Chaimi israelitacunaca, Jehovamanmi fiestata ruranajunchi nishpa, shuj fiestata rurarca, chai yanga diospa ñaupajpipash cumurinajurca, bailanajurcapash. Shinapash Jehová Diosca na alicachircachu. Chai punllaca ashtaca israelitacunami huañurca (Éxodo 32:1-6, 10, 28). Shinaca ¿imatata yachajupanchi?  Na pandachi tucunachu capanchi. Jehová Diosca ninmi: “Imapash mapataca, na tacarinachu canguichi” nishpa. Shina nishpaca panda religionhuanga na imapipash chapurinachu canguichi nijunmi. Ima ali cajta, ima nali cajtaca, Jehová Dios yachachichunmi saquina capanchi (Isaías 52:11; Ezequiel 44:23; Gálatas 5:9).

3, 4. ¿Imamandata fiestacuna imashina tiai callarishcata yachanaca ali can?

³ Jesús cai Alpapi cashpaca, Taita Diosta limpio, aliguta adoranatami paipa apostolcunamanga yachachirca. Jesús huañushca jipapash, Jehová imata pensajtami apostolcunaca, mushuj huauquipanicunaman yachachirca. Shinapash, apostolcuna huañushca jipaca, panda yachachijcunami panda costumbrecunata, yanga dioscunata adorana fiestacunatapash congregacionbica yachachi callarirca. Huaquin nali fiestacunatacarin, Jesusta catijcunapa alishnalla ricurichunmi, shuj shutipi rijsi callarirca (Hechos 20:29, 30; 2 Tesalonicenses 2:7, 10; 2 Juan 6, 7). Huaquin fiestacunaca cunangamanmi tiashpa catin, pandachishpa catinbash. Huaquin fiestacunacarin, ayacunahuanbashmi ricunata charin (Apocalipsis 18:2-4, 23). *

⁴ Mundo enteropica shuj shuj fiestacunami tian. Jehová Dios imata pensajta yachajushpami, tal vez huaquin fiestacunataca ñana alicachishpa ricupangui. Chaita rurana na fácil cajpipash, Jehovapa ayudahuanga ushapanguimi. Shinaca, huaquin fiestacunamanda Jehová Dios imata pensajta yachangapaca, chai fiestacuna imashina tiai callarishcata ricupashun.

5. ¿Imashinata yachapanchi Jesusca na 25 de diciembreta nacirishcata?

⁵ Casi mundo enteropi gentecunami, Jesusca 25 de diciembretami nacirishca yashpa Navidadta ruran. Shinapash Bibliapica, Jesús ima punlla, ima quillapi nacirishcataca na villajunllu, tiempomandallami ashata parlan. Lucas libropica nijunmi, Jesús nacirishca tiempopica, ‘llamacunata michijcunami llamacunata canlla pambacunapi cuidashpa pacarinajurca’ nishpa (Lucas 2:8-11, NM ). Diciembre quillataca, Belén llactapica chiri chiri, tamiajunmi. Huaquinbicarin nievepash urmajunmi. Chashna chiri chiri cajpica, llamacunata michijcunaca na canlla pambacunapi llamacunata cuidashpa pacarinajunmanllu carca. Shinaca Jesusca, na diciembre quillapichu nacirishcanga, ashata cunujlla quillapimi nacirishcanga. Bibliapipash, shuj librocunapipash ricuchinmi, Jesusca tal vez septiembre quilla tucuripi, octubre quilla callaripi nacirishcata.

6, 7. a) Navidadpa costumbrecunaca ¿maimandata tiai callarirca? b) Jesusta catijcunaca ¿imamandata na mitsashpa caranchi?

⁶ Navidad fiestaca, tarpujcunapa Saturno nishca yanga diosta adorana romano fiestamandami shamun. Gran Referencia Anaya nishca libroca ninmi, chai fiestataca diciembre chaupi quillatami ruran carca. Chaipica “velacunata, mechongunatami utilizan carca. Ashtacata micushpami ufian carca, regalocunatapash caran carca. Tiempohuanga chai ruraicunatami Navidadpipash rurai callarirca” nin. Ashtahuangarin, 25 de diciembretami, Persia llactamanda Mitra nishca Indi diospa cumpleañosta ruran carca.

⁷ Ashtaca gentecunaca, familiacunahuan, amigocunahuan,  ali micushpa regalocunata carangapami Navidadtaca ruran. Yanga dioscunata adorana fiestacunamanda Navidad tiai callarishcataca na pensarinajunllu. Jehovata sirvijcunaca, ñucanchi familiacunata, amigocunataca tucui shunguhuanmi juyanchi. 2 Corintios 9:7​pica ninmi: “Taita Diosca, cushijushpa carajtami juyan” nishpa. Jehová Diosca, fiesta punllacunapilla imagutapash carachunga na munanllu. Jehovata sirvijcunaca, ñucanchi familiacunahuan, amigocunahuan yalinatami  alicachinchi, ima punllapash caranatami gushtanchi. Imatapash randi tigrachichunga na caranajunchichu. Juyaimandami na mitsashpa caranchi (Lucas 14:12-14).

8. ¿Jesús llullu huahuagu cajpichu huaquin jaricunaca caranacunahuan chayarca? Intindichipai.

⁸ Navidadpi regalocunata carana ali cashcata crichunmi, ashtaca gentecunaca nin, Jesús llullu huahuagu cajpica quimsa reycunami regalocunata aparca nishpa. Bibliapica huaquin jaricuna Jesusman regalocunata apashcataca nijunmi. Chai tiempocunapica, importante gentecunamanllami regalocunata apan carca (1 Reyes 10:1, 2, 10, 13). Shinapash, Jesusman regalota apashca jaricuna brujocuna, Jehovata na adorajcuna cashcataca ¿yachaparcanguichu? Shinallata, chai jaricuna Jesusta ricungapaj chayajpica, Jesusca ñana animalcuna puñuna ucupichu carca, shuj huasipimi carca. Caru llactamanda Belén llactaman chayangacamanga, tauca quillacunami yalishcanga. Shinaca, paicuna chayashca tiempopica, Jesusca ñana llullu huahuaguchu carca, jatunlla huahuagumi carca (Mateo 2:1, 2, 11).

9. Bibliapica ¿pipa ishcai cumpleañoscunamandata parlan?

⁹ Shuj huahuagu nacirijpica tucuicunami cushijunchi (Salmo 127:3). Shinapash, cumpleañoscunata ruranaca na alichu canman. Bibliapica, Egipto llactamanda faraonba cumpleañosmanda, Herodes Antipas nishca reypa cumpleañosmandallami parlan (Génesis 40:20-22; Marcos 6:21-29, liipangui). Paicunaca na Jehovata adoranllu carca. Bibliapi nishca shinaca, Jehovata sirvijcunaca na cumpleañoscunata ruranllu carca.

10. Jesusta punda catijcunaca ¿imatata cumpleañoscunamandaca yuyan carca?

 ¹⁰ Las cosas nuestras de cada día nishca libropica ninmi, Jesusta punda catijcunaca yanmi carca, “cumpleañoscunataca yanga dioscunata adoraj gentecunami ruran” nishpa. Cumpleañoscunapi costumbrecunaca panda yachachishcacunamandami shamun. Shuj ejemplota ricupashun. Grecia llactapica crinmi carca, shuj espiritumi gentecuna nacirishca punllapillata shuj dioshuan imashinapash tandanajun. Chai espíritu cuidachunga cumpleañoscunatami rurana can nishpa. Ashtahuangarin, cumpleañoscunaca horoscopocunahuan o imapash nali cosascunahuanmi chapurin.

11. Jehová Diosca ¿ima ratocunapillata na mitsashpa carachun munan?

¹¹ Ashtaca gentecunaca paicunapa cumpleaños punllapi imacunatapash carachun, o imashinapash juyashcata ricuchichunmi shuyanajun. Shinapash, familiacunata, amigocunata juyashcataca na shuj punllallachu ricuchita ushapanchi, tucui tiempomi ricuchita ushapanchi. Jehová Diosca ñucanchicuna siempre juyaihuan, na mitsashpa carachunmi munan (Hechos 20:35, liipangui). Causaita carashcataca na cumpleaños punllapillachu agradicina capanchi, tucui punllacunami agradicina capanchi (Salmo 8:3, 4; 1 Timoteo 6:13).

12. ¿Imamandata Bibliapica nin, nacirina punllapa randica, huañuna punllami ashtahuan ali can nishpa?

¹² Eclesiastés 7:1​pica ninmi: ‘[Nacirina] punllapa randica, huañuna punllami ashtahuan ali’ can nishpa. ¿Imamandata shina nin? Nacirishpaca ima alitapash  ima nalitapash nara rurashcanchichu. Shinapash, Jehová Diosta sirvishpa, shuj gentecunata ayudashpa causashpaca, Jehovapa ñaupajpica rijsishcami canchi. Ñucanchi huañujpipash, ñucanchi rurashcacunataca nunca na cungangachu (Job 14:14, 15). Jehovata sirvijcunaca, Jesuspa o ñucanchipa cumpleañoscunataca na rurapanchichu. Jesusca pai huañushca punllatallami  yarichun mandashca (Lucas 22:17-20; Hebreos 1:3, 4).

13, 14. Jesusta catijcunapaca ¿Semana Santata yarinaca alichu canman?

¹³ Panda religiongunaca Jesús causarishcatapash yaringapami, Semana Santataca ruran. Chai punllacunapimi procesiongunata ruran, aichatapash na micun o imacunatapash ruran. Shinapash ¿imashinashi chai costumbrecunaca tiai callarirca? Bibliapica, Jesús huañushcata yarinami canguichi nishpami mandan. Shinapash, Semana Santata ruranataca na imatapash ninllu. Ashtahuangarin, chai semanapi rurashca costumbrecunaca, Bibliapi imata yachachijtami na valichijun.

¹⁴ Jehová Diosca chai costumbrecunahuan chapurichunga na munanllu (2 Corintios 6:17, 18). Ashtahuangarin, Jesús causarishcata yarinami canguichi nishpaca, nunca na mandashcachu.

15. ¿Imamandata Jesusta ali catijcunaca huañushcacunahuan ricunata charij costumbrecunapica na chapuripanchi?

¹⁵ Jesusta catijcunaca, huañushcacunahuan ricunata charij costumbrecunataca na catipanchichu. Huañui tiajpica, huañushca ama llaquilla cachun nishpami imacunatapash ruran. Ña pambagrinajushpapash maqui jundashpami alpataca atahua jahuapi shitan. Quilla o huaquin quillacuna jipapash, huañushcacuna ama sufrinajuchun nishpami imacunatapash rurashpa catin. Shinapash Bibliapica yachachinmi, huañushcacunaca “imatapash na yachanllu” nishpa. Shinapash Jehovata juyashpa catishcata ricuchingapaca, huañushcacunahuan ricunata  charij costumbrecunapica na imapipash chapurinachu capashcanchi (Eclesiastés 9:5, 10).

16, 17. Cazamiento fiestata ruragrinajujcunaca ¿imapita pensarina can?

¹⁶ Cazamiento tiajpica, ninandami cushijunchi. Mundo enteropica shuj shuj cazamiento costumbrecunami tian. Chai costumbrecuna imashina tiai callarishcata na pensarimandami, chai costumbrecuna panda crishcacunamanda shamujtaca tal vez na yachan. Shinapash Jesusta catij noviocuna cazaragrinajushpaca, paicuna ruragrinajushca fiestata Jehová Dios alicachishpa ricunatami seguro cana can. Cazamientopi rurashca costumbrecuna imashina tiai callarishcata yachashpami, ali decisionda agllaita ushan (Marcos 10:6-9).

¹⁷ Huaquin gentecunaca, suertepa nishpa, culqui sobralla, ali causachun nishpami, cazarajpica arrozcunata, culqui monedacunata noviocunamanga shitan, ñavi maillai nishcacunata o shuj cosascunatapash ruran (Isaías 65:11). Shinapash Jesusta ali catijcunaca yanga crishcacunahuan ricunata charij costumbrecunataca na catipanchichu (2 Corintios 6:14-18, liipangui).

18. Cazamiento fiestata rurangapaj munajushpaca ¿maijan textocunapita pensarita ushapanchi?

¹⁸ Jesusta catij noviocunaca, paicunapa cazamiento fiestapi tucui invitadocuna cushilla, ali yalichunmi munan. Invitadocunaca, na imapash shimicunata nishpa pitapash pingaichijunachu can. Shinallata, jarihuan huarmihuan cana chistecunatapash na ruranajunachu  can. Noviocunata, shuj gentecunatapash respetashcatami ricuchina can (Proverbios 26:18, 19; Lucas 6:31; 10:27). Ashtahuangarin, Jesusta ali catijcuna rurashca cazamiento fiestacunaca, ashtaca culquita charishcata ricuchishpa ‘jariyangapaca’, na canllu (1 Juan 2:16). Quiquinba cazamiento fiestata ruragrijushpaca, chai punllata cushijushpa yaringapami rurana capangui (nota 28​ta ricupangui).

19, 20. Brindis nishca costumbreca ¿imashinata tiai callarishca?

¹⁹ Cazamiento fiestacunapipash, shuj fiestacunapipashmi gentecunaca brindis nishcata ruran. Chai ratopica, pitapash ali richun nishpami shujca parlai callarin. Cutin, cumbaj gentecunaca copata alzashpami uyanajun. Shinapash Jesusta catijcunaca ¿chaita ruranachu capanchi?

²⁰ Mundo enteropi tragocunamanda, costumbrecunamanda parlaj libropica ninmi, “punda tiempo gentecunaca paicunapa dioscuna ayudachun nishpami, yahuarta, vinota chai dioscunaman ofrecishpa ‘unai huatacunacaman’ o ‘salud’ nin cashca” nin. Punda tiempocunapica, copacunata alzashpa paicunapa dioscunata ayudahuai nishpa mañana costumbremi tiarca. Shinapash Jehová Dios bendiciachunga, na shinachu mañana capanchi (Juan 14:6; 16:23).

21. ¿Maijan fiestacunapipashta na participana capanchi?

²¹ Shuj fiestapi participanata o na participanata nara decidishpallatami, cai fiestaca ¿imatata yachachigrihuan?  nishpa pensarina capanchi. Inti Raymicunapi, año viejo tutacunapi, shuj fiestacunapica, pinganaitami gentecunaca bailan, machan, shuj jarihuan shuj huarmihuanbash juchapi urman. Chai fiestacunaca, jarihuarmicuna causanata alicachishpa ricunata, llactata ashtahuan alicachinacunatami yachachin. Chaicunapi participashpaca ¿Jehová Dios imata millanayachishcata ñucanchipash millanayachishcatachu ricuchinajupanchiman? (Salmo 1:1, 2; 97:10; 119:37).

22. Shuj fiestapi participanata o na participanata yachangapaca ¿imacunapita pensari ushapanchi?

²² Jesusta catijcunaca, Jehovata pingaichi fiestacunapica na chapuripanchichu. Apóstol Pabloca nircami: ‘Imata micushpa, ufiashpa, imata rurashpapash, Taita Diosca punchapambagumi cangui ni tucuchunmi, tucuita rurana canguichi’ nishpa (1 Corintios 10:31; nota 29​ta ricupangui). Na tucui fiestacunachu jarihuan huarmihuan canata, panda religiongunahuan, o llactata ashtahuan alicachina ruraicunahuan chapurishca can. Jehovapa yachachishcacunata na huashaman saquijujpica, cada unomi chai fiestapi participanata o na participanataca aliguta decidina capanchi. Decidijushpapash shujcunata na nitijachina cashcatami yaipi charina capanchi.

23, 24. Huaquin fiestacunapi na participangapaj munashcataca ¿imashinata ñucanchi familiacunamanga ricuchipashun?

²³ Jehová Dios nalicachishca fiestacunapi ñana participajpichari, quiquinba na Testigo familiacunaca ñana ñucanchitaca yarinllu yuyan. Chai fiestacunaca familiacuna  tandanajungapallami can yanbashchari. Shinapash, shuj ratocunapi paicunahuan cangapaj invitashpami, paicunata juyashcata, paicunapi preocuparishcatapash ricuchita ushapangui (Proverbios 11:25; Eclesiastés 3:12, 13).

²⁴ Huaquin fiestacunapi quiquin imamanda ñana participangapaj munashcata quiquinba familiacuna yachangapaj munajpica, ñucanchi publicaciongunapi, jw.org direccionbimi ashtahuan informacionda mascaita ushapangui. Paicunata mishangapaj, o paicunapash quiquinshna pensachunga na obliganachu capangui. Chai fiestacunapi quiquinllata aliguta pensarishpa ñana participangapaj munashcatami ricuchina capangui. Ama culirashpa, ‘cachihuan mishquiyachishna’ parlapangui (Colosenses 4:6).

25, 26. ¿Imashinata taitamamacunaca, paicunapa huahuacunapash Jehovapa mandashcacunata alicachichun yachachita ushan?

²⁵ Huaquin fiestacunapi imamanda na participashcataca alimi intindina capanchi (Hebreos 5:14). Ashtahuanbachaca Jehovatami cushichingapaj munapanchi. Huahuacunata charishpaca, Jehovapa yachachishcacunata alicachichun intindichingapami tiempota llujchina capanchi. Jehová Dios ciertopacha tiajta yachajushpami, paicunapash Jehovata juyangapaj munanga (Isaías 48:17, 18; 1 Pedro 3:15).

²⁶ Jehová Diosca paita aliguta adorangapaj esforzarijpica cushijunmi. ‘Cabal yachachishcahuanbash’ adorachunmi munan (Juan 4:23, NM ). Ashtacacunaca cai mundopi honrado caitaca na usharinllu yanmi. Shinapash ¿ciertochu can? Chaitaca shamuj capitulopimi yachajupashun.