1-3. a) Jesusca ¿imashinata apostolcunahuan último horascunata pasarca? b) ¿Imatata tapuri ushapanchi?

 CAI última semanacunapica ashtaca cosascunami pasashca. Jesús huañushcamanda llaquilla cashpapash Jesús causarijpimi cushijushcacunapacha can. Cai último 40 punllacunapica, Jesusca tauca viajecunatami animangapaj, yachachingapaj ricurishca. Paicunamanda cashpaca siempremi Jesushuan cangapaj munanman. Pero cai viajeca última vezmi ricurin.

² Apostolcunaca Olivos urcupi tandanajushpami Jesustaca alipacha uyanajun. Horascunaca jaicatami yalishca. Chai jipaca, Jesusca maquita alzashpa paicunata bendiciashpami cieloman ri callarin. Apostolcunaca Jesús fuyupi chingarijpipash cieloman ricuriami quidan (Luc. 24:50; Hech. 1:9, 10).

 ³ Chai punllamandapachami paicunapa causaica cambiarca. Jesús cieloman rishcamandaca ¿imatashi paicunaca ruranga? Jesús callarichishca obratami rurashpa catina can. Chaita pactachingapaca ñami listo can. ¿Ima ayudacunatallata chasquirca? ¿Imashinata chasquirca? ¿Imata caica ñucanchihuan ricunata charin? Hechos capítulo 1​ta yachajunaca ñucanchitaca ninandami ayudanga.

 4. Lucasca Hechos librotaca ¿piman escribishpata callarin?

⁴ Lucasca Hechos librotaca Teofiloman escribishpami callarin. Lucas libropipashmi Teofilomandaca ña parlashcarca. a Lucas libropi escribishcatallatami parlashpa catin. Shinapash cai viajeca diferente palabracunata, mushuj informacionda utilizan.

5, 6. a) Jesuspa catijcunapa fetaca ¿imata shinlliyachirca? b)  Ñucanchi fe shinlli cachunga ¿imamandata pruebacunata charina capanchi?

⁵ Jipamanga Jesús paipa catijcunapa feta imashina shinlliyachishcatami Lucasca parlan. Hechos 1:3​pica ninmi: “Jesusca ninanda sufrishca jipami, pai causajushcata apostolcuna seguro cachun munarca. Chaimi 40 punllacunapica, tauca viajeta paicunamanga ricurirca”. Jesusca ashtaca viajecunatami ricurirca. Huaquinbica shujman o ishcai discipulocunaman, huaquinbicarin tucui apostolcunamanmi ricurirca. Shuj viajecarin 500 yali discipulocunamanmi ricurirca (1 Cor. 15:3-6). Tucui cai pruebacunami paicunapa fetaca shinlliyachirca.

⁶ Cunanbipash ashtaca pruebacuna tiashcamandami ñucanchi feca shinlliyan. Por ejemplo Jesús cai alpapi causashcamanda, ñucanchi juchacunata perdonangapaj huañushcamanda, shinallata Jesús causarishcamandapash ashtaca pruebacunatami charinchi. Bibliata escribijcuna paicuna imatapacha ricushcata escribishcamandami, Bibliapica tucui shunguhuan confianchi. Chaimandami Diosta mañashpa Bibliata estudiajpica, ñucanchipa feca shinlli tucun. Shinlli feta charinaca na yanga crinallachu can. Ashtahuangarin pruebacunahuanmi ricuchina canchi. Para siempre causangapaca shina fetami minishtirin (Juan 3:16).

 7. Villachijushpa, yachachijushpaca, Jesusca ¿ima ejemplotata paipa catijcunamanga saquirca?

 ⁷ Hechos libropica Jesusca paipa catijcunamanga ‘Taita Diospa Gobiernomandapash’ parlashcatami nin. Por ejemplo, Jesús ninanda sufrishpa huañuna cashcatami paica intindichirca (Luc. 24:13-32, 46, 47). Jesusca Taita Diospa Gobiernopi pai mandana cashcata aliguta intindichijushpaca, Taita Diospa Gobiernomandami parlajurca. Jesusca siempremi Diospa Gobiernomanda villachin carca. Ñucanchipash shinallatami rurana canchi (Mat. 24:14; Luc. 4:43).

8, 9. a) Apostolcunaca ¿ima ishcai panda yuyaicunatata charirca? b) Jesusca apostolcunapa panda yuyaicunataca ¿imashinata ali intindichirca? c) Chaita yachanaca ¿imashinata ayudan?

⁸ Olivos urcupi cashpaca apostolcunaca ashtahuan yachajungapaj munashcatami ricuchirca. Caipimi apostolcunaca Jesushuan ultimota tandanajushpa: “Señor Jesús ¿cai tiempopillatachu Taita Diospa Gobiernotaca Israel llactapi mandachun churagringui?” nishpa tapurca (Hech. 1:6). Chashna tapushpaca, ishcai panda yuyaita charishcatami ricuchinajurca. Primeroca, Taita Diospa Gobiernopi Israel llactamanda pipash mandana cashcatami crirca. Segundo, chai gobierno ‘cai tiempopillata’ mandachunmi shuyanajurca. Jesusca ¿imashinata paicunataca ayudarca?

⁹ Jesusca primer panda yuyaitaca na chai rato intindichircachu. Porque 10 punllacuna jipallami, Israel espiritual mushuj llacta tiai callarina carca. Y punda Israel llactataca Taita Diosca ñana chasquinachu carca. Chaita ricushpami punda yuyaitaca ali intindina carca. Shinapash chaishuj panda yuyaitaca, juyaihuanmi Jesusca paicunamanga intindichirca. Paica “chai tucui cosascuna ima hora, ima tiempopi pasanataca, jahua cielopi causajuj Taitallami chaita nina derechotaca charin. Y cangunaca chaicunata yachanataca na minishtinguichichu” nircami (Hech. 1:7). Jehová Diosllami paipa voluntadta ima hora pactachinata yachan. Chaimandami huañungapaj ashalla faltajpica, Jesusllatami “ima punlla, ima hora” tucurimui punlla chayamunataca, “Taitallami yachan” nirca (Mat. 24:36). Cunanbipash tucurimui punlla ima horapacha chayamunapica na yapata preocuparinachu canchi.

10. ¿Imatata apostolcunamandaca yachajuita ushapanchi?

¹⁰ Apostolcuna shina pensashcamandaca na manllarinachu  canchi. Paicunaca shinlli fetami charirca. Chaimandami Jesús aliguta intindichijpica aliman chasquirca. Ashtahuanbash, paicunapa yuyaicuna panda cajpipash yachajuna munaitami ricuchirca. Jesusllatami paicunataca ashtaca viajeta ‘siempremi chaparianshna causana canguichi’ nirca (Mat. 24:42; 25:13; 26:41). Jehová Diospa punlla chayamunamanda señalcunata ricungapaca chaparianshnami causanajurca. Ñucanchipash chashnallatami causana canchi. Porque ‘último punllacunapimi’ causanajunchi (2 Tim. 3:1-5). Chaimandami chaparianshna causanaca importantepacha can.

11, 12. a) ¿Imatata Jesusca paipa catijcunamanga mingarca? b) ¿Imamandata Jesusca chai obrata nara mingashpallata espíritu santopa ayudatami chasquinguichi nirca?

¹¹ Jesusllatami apostolcunamanga ima ashtahuan importante cashcata yarichirca. Paica “Taita Diospa espíritu santota chasquishpami, cangunaca ushaita charinguichi. Chaimi cangunaca Jerusalenbi, tucuilla Judea llactapi, tucuilla Samaria llactapi y mundo entero llactacunapipash ñucamanda villachinguichi” nircami (Hech. 1:8). Imashinami ricunchi, Jesús causarishcamandaca ashtahuan ashtahuanmi villachishpa catina carca. Primeroca, Jesusta huañuchishca Jerusalén llactapi, shinallata Judeapi, jipamanga Samariapi, chai jipaca caru llactacunapipashmi villachina carca.

¹² Jesusca cai obrata paipa catijcunaman nara mingashpallatami, espíritu santopa ayudatata cachamunata yarichirca. Hechos libropica, “espíritu santo” shimica 40 yali viajecunami ricurin. Chaimandami cai libropica Jehová Diospa voluntadta pactachingapaca, espíritu santopa ayuda minishtirishcapacha cashcata cutin cutin parlan. Cada punllami espíritu santota carachun mañana canchi (Luc. 11:13). Cunanbica minishtirishcapachami can.

13. a) ¿Maicamanda villachina capanchi? b) ¿Imashpata villachina capanchi?

¹³ Cunan punllacunapi Jehová Diosta sirvijcunapaca, mundo enteropi “ñucamanda villachinguichi” nishca shimicunata pactachingapaca, primer siglopi mandashcamanda ashtahuan yalitami villachina canchi. Shinapash imashinami chaishuj capitulopi ricurcanchi, Taita Diospa voluntad cashcamandami, tucui laya gentecunaman ali villaicunata villachina responsabilidadta cushijushpa chasquishcanchi (1 Tim. 2:3, 4). ¿Quiquinbashchu cushijushpa apoyajupangui? Caita ruranaca ñucanchillata cushilla ali sintirichunmi ayudan. Ashtahuanbash, chaita pactachichunga Jehová Diosllatami fuerzata cun. Shinallata Hechos libropica, ashtahuan ali villachingapaj imashina villachinata, imata ruranata yachangapami ashtaca ayudajcunata charipanchi.

14, 15. a) Angelcunaca ¿Jesús imashina tigramunatata nirca? b) ¿Imatata intindichingapaj munarca? (Notatapash ricupangui). c) Jesús tigramunataca ¿picunallata intindina carca?

 ¹⁴ Jesuspa 11 apostolcunaca, Jesús cieloman rijpi chingarijpipash jahuata ricunmanmi quidarca. Shinapash ishcai angelcuna chayamushpami paicunataca: “‘Galilea llactamanda runacuna ¿imamandata jahua cielota ricushpa shayanajunguichi? Cangunahuan caipi cashca Jesusca, jahua cielomanmi apai tucurca. Imashinami canguna ricujta jahua cieloman rirca, shinallatami tigramunga’ nircami” (Hech. 1:11). Huaquin religiongunapi yachachishcashnachu ¿Jesusca aichayu, tulluyu cuerpohuan tigramuna carca? Na. ¿Imamandata shina ninchi?

¹⁵ Angelcunaca Jesusca “shinallatami tigramunga” nircami. b Shinaca, Jesusca ¿imashinata jahua cielomanga rirca? Angelcuna cai shimicunata nijpica, Jesustaca ñana ricui usharcachu. Apostolcunallami Jesús cai alpata saquishpa, jahua cieloman paipa Taitapaman tigrashcata intindirca. Jesús cutin tigramunapash shinallatami cana carca. Chaimandami espiritualmente ali cajcunalla Jesús ña Rey shina mandajushcataca intindinga (Luc. 17:20). Chaimi pruebacunata ricushpa Jesús ña mandajushcata cuenta japita ushapanchi. Shinallata, ima tiempocunapi causajushcata shujcunapash intindichunmi ayudana capanchi.

16-18. a) Hechos 1:13, 14​pica ¿imatata tandanajuicunamandaca yachajupanchi? b) ¿Imatata Jesuspa mamamandaca yachajupanchi? c) ¿Imamandata tandanajuicunaca importantepacha can?

¹⁶ Apostolcunaca ‘ninanda cushijushpami Jerusalén llactamanga tigrarca’ (Luc. 24:52). Shinapash apostolcunaca Jesús cushca instrucciongunataca ¿pactachi usharcacha? Hechos 1:13, 14​pica, ‘jahua cuartopi’ tandanajushca cashcatami nin. Chai tiempopica Palestina llactapi huasicunaca jahua cuartoman ringapaca gradascunaca canllamanmi carca. Paicunaca Hechos 12:12​pi nishcashnami Marcospa mamapa huasipi talvez cashcanga. Humilde, sencillo huasigumi cashcanga. Shinapash ¿picunallata chaipica carca? ¿Imatata ruranajurca?

¹⁷ Chai tandanajuipica na solo apostolcunalla, Jesusta catij discípulo jaricunallaca carcachu. Huaquin ‘huarmicunapash’, Jesuspa  mama Mariapashmi carca. Bibliapica cai viajemi última vez Mariataca shutipi parlan. Chaimandami Mariataca Diosta sirvina munaihuan, na jariyashpa, tucuicunahuan tandanajushpa tiajushcata yarinchi. Paipa chuscu churicunapash chaipi tandanajushca cashcamandaca cushijushcami cashcanga. Jesús cai alpapi cajpica, paipa lahuauquicunaca paita catingapaca na munarcachu. Shinapash, Jesús huañushpa causarishca jipaca Jesustami cati callarirca (Mat. 13:55; Juan 7:5; 1 Cor. 15:7).

¹⁸ Paicunaca ‘tucuicuna tandanajushpa shujllashna cutin cutin Taita Diosta mañangapami’ tandanajushca carca (Hech. 1:14). Tandanajuicunaca Jesusta catijcunapaca siempremi minishtirishcapacha cashca. Chaipica caishuj chaishujmi animarinchi. Shinallata instrucciongunata, consejocunatapashmi chasquinchi. Ashtahuanbachaca ñucanchi Jehová Diostami oraciongunahuan, pai alicachishca canticocunahuan adoranchi. Shina rurashpaca ñucanchillatami espiritualmente shinlliyanchi. Chaimandami tandanajuicunataca nunca na saquinachu capanchi (Heb. 10:24, 25).

19-21. a) Jehová Dios Pedrota congregacionbi utilizashpa catishcamandaca ¿imatata yachajupanchi? b) ¿Imamandata Judaspa randi shuj apostolta mascana minishtirirca? c) Imashina agllashcamandaca ¿imatata yachajupanchi?

¹⁹ Jesusta catijcunaca shuj importante decisiondami agllana carca. Chaitaca Pedromi ñaupaman pusharca (Hech. 1:15-26). Pedroca huaquin semanacuna huashamanga, ‘Jesustaca na rijsinichu’ nishpa negashca cashpapash ashtacatami progresarca (Mar. 14:72). Ñucanchicunaca juchayucunami canchi. Shinapash tucui shunguhuan arripintirijpica Jehová Diosca perdonangapaj listo cashcatami yarina capanchi (Sal. 86:5).

²⁰ Jesusta traicionashcamanda Judaspa randi shuj apostolta agllana cashcataca Pedroca alimi intindirca. Shinapash ¿pitata agllana carca? Cai mushuj apostolca Jesushuan predicashca, shinallata Jesús causarijta ricushcami cana carca (Hech. 1:21, 22). Chaipica Jesuspa shimicunami pactarina carca. Jesusca nishcarcami: “Chaipimi cangunaca ñucata catishcamandaca 12 tiarinacunapi tiarishpa, Israel llactapa 12 jatun familiacunata juzganguichi” nishpa (Mat. 19:28). Imashinami ricunchi, Jehová Diospa munaica Mushuj Jerusalenba “muyundi pircacunapa cimientoca 12 rumicunatami” charina carca. Chai 12 rumicunaca Jesús cai alpapi villachijujpi cumbashca 12 apostolcunami cana carca (Apoc. 21:2, 14). Chaimandami Jehovaca Pedrotaca Judaspi cai profecía pactarina cashcata intindichun ayudarca. Chai profeciaca nijurcami: “Pai ruranataca,  shuj runa japichun” nishpa (Sal. 109:8).

²¹ ¿Imashinata apostoltaca agllarca? Suerteta rurashpami agllarca (Prov. 16:33). Chai tiempopica suerteta rurashpa agllanaca shuj costumbremi carca. Shinapash Bibliapica cai viajemi última vez suerteta rurashpa agllashcamandaca parlan. Espíritu santota chasquijpimi cai costumbreca tucurirca. Shinapash imashpa shina rurashcamanda ricupashunchi. Apostolcunaca Jehová Diosta mañashpami cashna ninajurca: ‘Jehová Dioslla, quiquinmi tucuicunapa shungutaca ali ali rijsipangui. Cai ishcai runacunamanda maijanda agllajushcata ricuchihuayari’ nishpa (Hech. 1:23, 24). Shina rurashpaca apostolcunaca Jehová Dios agllachun munashcatami ricuchinajurca. 12 apostolcunapurapi cachunga Matiastami agllarca. Paica Jesús villachichun cachashca 70cunapurapimi cashcanga (Hech. 6:2). c

22, 23. ¿Imamandata congregacionda ñaupaman pushajcunataca cazuna capanchi?

²² Chai tiempopi pasashcacunaca Jehovapa llacta ali organizado cashcatami ricuchin. Cunanbipashmi congregaciongunapica ashtahuan anciano huauquicuna minishtirin. Chaimandami pitapash anciano cachun nara nombrashpallata, cuerpo de ancianosca Jehová Diospa espíritu santopa ayudata mañan, shinallata Bibliapi mandashcashna causajushcatami ricun. Ancianocuna espíritu santohuan agllashcata yachashpami paicunapa autoridadta chasquinchi, paicuna cushca instrucciongunatapash cazunchi. Shinami congregacionbi tranquilo ali causaigu tiachun ayudanchi (Heb. 13:17).

²³ Jesús tauca viajecunata ricurishcamanda, shinallata Jehovapa ayudahuan ali decisiongunata agllashcamandami discipulocunaca animarishpa shinlliyarca. Shinami paicunaca shamuj punllacunapaca preparado carca. Chaitaca cati capitulopimi yachajupashun.