1, 2. Pedropash, Juanbash ¿ima milagrotata rurarca?

 CHISHI indi ninanda rupachijujpipash ashtaca ashtaca gentemi purinajun. Judío religionda catijcunapash, Jesusta catijcunapash ña casi “Taita Diosta mañana horaspimi” templo huasiman rinajun (Hech. 2:46; 3:1). a Chai ashtaca ashtaca gentecunapa chaupita rishpami Pedropash, Juanbash templopa juyailla pungu nishcaman chayan. Bulla bulla cajpipash, gentecuna shinllita purinajujpipash suchu nacirishca runagu caridadta ninanda caparishpa mañajmi uyarin (Hech. 3:2; 4:22).

² Cai ishcai apostolcuna paipaman ashtahuan quimirimujpica, suchu runaguca cutin cutin chaitallata nishpami caridadta mañashpa catin. Paipa ñaupapi shayarijpicarin culquitami caragrin yashpami cushijun. Shinapash Pedroca: “Ñucaca ni culquita, ni orotapash na charipanichu. Pero ñuca ima charishcagutami canmanga caragrini. Quiquindaca Nazaret llactamanda Jesuspa shutipimi jatarishpa puri nishpa mandani” nirca. Pedro maquimanda japishpa shayachijpi, primera vez chai runagu shayarijta ricushpaca gentecunaca ninandami manllarirca (Hech. 3:6, 7). Chai runaguca paipa chaquicuna sano cashcata ricushpa, primera vez pasoi ushashpaca manllarishcami quedashcanga. Shinaca ¿nachu paica ninanda cushijushpa, caparishpa Diosta alabanga?

3. Pedroca ¿ima regalotata jambishca runamanbash, shuj gentecunamanbash curca?

³ Gentecunaca cushijushcapachami Pedropaman, Juanbaman calpan. Pedropash, Juanbash Salomonba Corredor nishca pushtupimi can. Chaipimi Pedroca imashpa jambishcata parlai callarin. Chai pushtupillatami Jesuspash shuj punllaca yachachirca (Juan 10:23). Pedroca orotapash, culquitapash, ima unguimandapash  jambishcatapash yali valishca shuj jatun regalotami chai gentecunaman, jambishca runagumanbash cun. Chaica arripintirina, pundapi rurashca juchacunata anchuchina, Jesusta catijcuna tucuna oportunidadmi can. Jesustami Jehová Diosca “Causaiman Apaj” cachun nombrashca (Hech. 3:15).

4. a) Cai milagrota ricushpaca ¿imata pasana carca? b) ¿Ima ishcai tapuitata yachajugripanchi?

⁴ Chai punllaca shuj suchu runagumi puri callarishca. Shinallata ashtaca gentecunami espiritualmente jambirinshna Jehovapa ñaupapi ali ricuri callarishca (Col. 1:9, 10). Shinapash cai ali ruraicunata ricushpa, Jesusta catijcuna paicunaman mingashcata pactachishpa catichunga autoridadcunaca jarcagrinajurcami (Hech. 1:8). Pedropash Juanbash ‘na estudiashca yangalla gentecuna cashpapash’, Taita Diospa Gobiernomanda ali yachachijcuna cashcata ricushpaca ¿imatata paicunamandaca yachajunchi? (Hech. 4:13). b Shinallata Pedropash, Juanbash, Jesusta shuj catijcunapash jarcaicuna ricurijpi imacunatalla rurashcamandaca ¿imatata yachajunchi?

5. Ashtaca gentecunapa chaupipi Pedro imashina yachachishcamandaca ¿imatata yachajupanchi?

⁵ Cai ishcai apostolcunaca ashtaca gentecunapa chaupipimi parlarca. Paicunapurapica Jesusta huañuchichun munashca gentecunapashmi carca (Mar. 15:8-15; Hech. 3:13-15). Pedroca suchu runaguta Jesuspa shutipi jambishcatami na manllashpa parlarca. Paica cangunapashmi Jesuspa huañuimandaca culpablemi canguichi nircami. Shina nishpaca paicunata juchachingapaca na munarcachu. Pedroca ‘na yachaimanda’ paicuna shina rurashcataca alimi yacharca (Hech. 3:17). Chaimandami paicunataca huauquicuna nishpa ali villaigucunatapash ashtahuan parlarca. Paicuna arripintirishpa Jesuspi feta churajpica, Jehová Diosca ‘tranquilo cana tiempogutami’ caramuna carca (Hech. 3:19). Ñucanchicunapash juicio punlla chayamunataca na manllashpami villachina canchi. Shinapash ñapash culirashpa, paicunata juzgashpa cuenda villachinapa randica, shuj punllaca ñucanchi huauquimi canga yashpami Pedroshna ali villaicunataca ashtahuan villachina canchi.

6. Pedropash, Juanbash humilde cashcataca ¿imashinata ricuchirca?

⁶ Apostolcunaca humildecunami carca. Chai milagrota rurashcamanda paicunata alicachichunga na munarcachu. Chaimandami  Pedroca: “¿Imashpata shinapacha manllarinajunguichi? ¿Ñucanchi ushaihuanlla o Taita Diosta ñucanchi catimandalla chai runaguta purichishca yashpachu ricunajunguichi?” nirca (Hech. 3:12). Pedropash, chaishuj apostolcunapash alimi yacharca na paicunapa ushaimandalla sino Taita Diospa podermanda ali villachi ushashcata. Shinami paicunaca Jehová Dioslla, Jesuslla alicachi tucuna cashcata ricuchirca.

7, 8. a) ¿Imashinata gentecunata ayudai ushanchi? b) ‘Tucuita mushujta rurasha’ nishca shimicunaca ¿imashinata pactarijun?

⁷ Cunanbipash villachijushpaca humilde cashcatami ricuchina canchi. Espíritu santopa ayudahuan pitapash jambitaca na ushanchichu. Shinapash gentecunataca Jehovapi, Jesuspi feta charichunmi ayudaita ushanchi. Ñucanchicunapashmi Pedroshna Jehová Dios perdonachun, paipa ñaupapi ali cachun gentecunata ayudana oportunidadta charinchi. Tucui huatacunami ashtaca ashtaca gentecuna cai oportunidadta chasquishpa Jesuspa discípulo shina bautizarin.

⁸ ‘Tucuita mushujta rurasha’ nishca tiempopimi causanajunchi. ‘Taita Dios pundamandallata paipa ali profetacunaman’ nishca pactarichunmi, Taita Diospa Gobiernoca 1914 huatamanda jahua cielopi mandai callarirca (Hech. 3:21; Sal. 110:1-3; Dan. 4:16, 17). Chai jipallami Jesusca espiritualmente cai alpataca mushujta rurai callarirca. Chai punllamandapachami ashtaca ashtaca Jesusta catijcunaca Taita Diospa Gobiernopi Jesús ña mandajujpi shuj paraíso espiritualpi causanajun. Paicunaca punda nali causaita saquishpami ‘mushuj ropata churajunshna Taita Dios munashcashna’ causanajun (Efes. 4:22-24). Suchu runaguta jambishcashnami espíritu santo ayudajpi cai obrataca ruranchi na ñucanchimandallaca. Ñucanchicunatapash Pedrotashna Jehová utilizajpimi na manllashpa Bibliataca aliguta utilizanchi. Jehovapa ayudahuanllami gentecunataca Jesuspa discípulo tucuchun ayudanchi.

9-11. a) Pedropash, Juanbash villachijujpica judiocunata mandajcunaca ¿imatata rurarca? b) Apostolcunaca ¿ima decisiondata japirca?

⁹ Pedropa discursota uyashpa, shinallata jambi tucushca runagu caparijujpica gentecunaca ninandami bullayai callarirca. Chaimandami templota cuidaj guardiaca ima pasajujta ricungapaj calpashpa llujshirca. Paica templopi tucuilla tranquilo, ali cachun ricuna responsabilidadtami charirca. Chai guardiahuanga principal sacerdotecuna, saduceo religionda catij charij  charij gentecunapashmi llujshirca. Paicunaca Roma llactatami apoyan carca. Fariseocunahuan ricujpica paicunaca Diospa Leytaca na cazunllu carca. Resurreccionbipash na crinllu carca. c Shinaca Pedropash, Juanbash na manllashpa Jesusca causarishcami nishpa santuariopi yachachijujta ricushpaca ninandami culirashcanga.

¹⁰ Contracunaca ninanda culirashpami Pedrotapash, Juandapash carcelpi churarca. Cayandi punllaca paicunataca judiocunata mandajcunapa ñaupamanmi aparca. Paicunapaca Pedropash, Juanbash ‘na estudiashca yangalla gentecunami’ carca. Shinallata religionda yachachij rijsishca escuelacunapi na estudiashcamandami, templopi yachachina derechotaca na charinllu yan carca. Shinapash juezcunaca Pedropash, Juanbash na manllashpa tucui shunguhuan parlajta ricushpa, ali yachachijcuna cashcata ricushpaca manllarishcami quidarca. ¿Imashpata ali yachachijcuna carca? Paicunaca Jesushuan purimandami ashtacata yachajurca (Hech. 4:13). Jesusca na Leyta yachachijcunashna yachachircachu paica alipachami yachachirca (Mat. 7:28, 29).

¹¹ Juezcunaca cai ratomi villachinataca saquina canguichi nishpami apostolcunataca mandarca. Chai tiempopica Leytaca cazunapachami carca. Yaripashunchi huaquin semanacuna huashamanllami chai importante autoridadcunallata Jesustaca “paica huañunami can” nishcarca (Mat. 26:59-66). Shinapash Pedro y Juanga na manllarcachu. Paicunaca importante, estudiashca, charij gentecunapa ñaupapimi na manllashpa respetohuan nirca: “¿Taita Diosta cazunapa randica cangunata cazunami Taita Diospa ñaupapica ashtahuan ali can yashpachu pensanguichi? Pero ñucanchicunaca imata uyashcata, imata ricushcata parlanataca nimamanda na saquita ushanchichu” nircami (Hech. 4:19, 20).

12. Tucui shunguhuan, na manllashpa villachichunga ¿imata ayudanga?

¹² Ñucanchicunapash ¿shinallatachu villachinajupanchi? Por ejemplo estudiashca, importante o charij gentecunaman villachijushpa, shinallata escuelapi, colegiopi, trabajopi compañerocuna o familiacuna ñucanchi crishcacunamanda burlarijpica ¿imashinata sintiripanchi? ¿Manllanchichu? Manllashpapash manllaitaca mishai ushanchimi. Jesús cai alpapi cashpaca paipa 12 apostolcunataca na manllashpa, respetohuan paicunapa feta difindina cashcatami yachachirca (Mat. 10:11-18). Ashtahuanbash causarishca jipaca, Jesusca paipa catijcunataca “nali gentecuna tucuchi  tucuna tiempocamanmi tucui punllacuna cangunahuan casha” nircami (Mat. 28:20). Cunanbica Jesús ñaupaman pushajujpimi ‘aliguta cazushpa, aliguta pensarishpa sirvij esclavoca’ ñucanchipa crishcacunata imashina difindinata yachachin (Mat. 24:45-47; 1 Ped. 3:15). Chaipaca chaupi semana tandanajuicuna y jw.org paginapi Bibliapa tapuicuna nishca partepi temacunatami utilizan. Caicunataca alimi aprovechana capanchi. Shinami ñucanchi crishcacunahuan seguro, cushilla cashun. Shinallami apostolcunashna espiritualmente imata yachajushcata, uyashcata villachinataca pipash o imapash jarcachunga na saquishunllu.

13, 14. Jarcaicuna ricurijpica ¿imatata rurana capanchi? ¿Imamanda?

¹³ Carcelmanda llujshishcandimi Pedropash, Juanbash huauquipanicunahuan tucuillacuna tandanajushpa, villachishpa catingapaj fuerzata cuchun Taita Diosta mañanajurca (Hech. 4:24). Pedroca paipa ushaihuanlla Jehová Diospa munaita na pactachi ushashcataca alimi yacharca. Huaquin semanacuna huashamanllami Pedroca paipillata yapata confiarishpa pandarirca. Jesustaca “tucuicuna quiquinda saquijpipash, ñucaca nunca na quiquindaca saquishachu” nircami. Shinapash Jesusca gentecunata manllaimanda Pedro paita negana cashcataca ñami nishcarca. Shina pasashcamandaca Pedroca ashtacatami yachajurca (Mat. 26:33, 34, 69-75).

¹⁴ Shinaca tucuipi cazushpa Jesusta ali catij cana decisionda japishpapash, ñucanchi contracuna ñucanchipa feta chiriyachingapaj, villachichun jarcangapaj munajpipash Pedropa, Juanba ejemplotami catina capanchi. Shinallata fuerzata cuchunmi Jehovata mañana canchi, congregacionbipashmi apoyarina canchi, ancianocunaman o espiritualmente shinlli caj huauquipanicunamanmi ñucanchipa problemacunata parlana capanchi. Huauquipanicuna ñucanchimanda mañajpica Jehovaca uyangami (Efes. 6:18; Sant. 5:16).

15. Villachinata saquishca cashpapash ¿imamandata na desanimarina capanchi?

 ¹⁵ Huaquinbica imapash jarcaimanda o problemamanda villachinata saquishca cashpapash na desanimarinachu canchi. Apostolcunapashmi Jesús huañushca jipaca villachinataca saquirca. Shinapash jipamanga villachishpami catirca (Mat. 26:56; 28:10, 16-20). Punda pandarishcacunamanda llaquirijunapa randica chaicunamandami yachajuna capanchi. Shinallata chai experienciacunahuanmi shujcunata animaita ushapanchi.

16, 17. Jesusta catijcuna mañashcamandaca ¿imatata yachajupanchi?

¹⁶ Autoridadcuna llaquichijpica Taita Diostaca ¿imatata mañana capanchi? Apostolcunaca chai llaquicunata anchuchichunga na mañanajurcachu. Paicunaca alimi yacharca: “Ñucata catiriashpa llaquichishca cashpaca, cangunatapashmi catiriashpa llaquichinga” nishpa Jesusllata nishcata (Juan 15:20). Chaimandami “Jehová Dioslla paicuna ñucanchita imashina amenazajujtaca uyapayari” nishpa mañarca (Hech. 4:29). Apostolcunaca paicunata imamanda catiriashpa llaquichijushcata, Bibliapa profeciacuna pactarijushcatapashmi ali intindirca. Shinallata Jesús mañashcashnaca gobiernocuna jarcajpipash Diospa munai ‘cai alpapica pactarina’ cashcataca paicunaca alimi intindirca (Mat. 6:9, 10).

¹⁷ Jesusta catijcunaca Jehovapa munai pactarichun munashpami: “Quiquinba esclavocunataca, na manllashpa quiquinba shimita predicashpa catichun ayudapayari” nishpa mañarca. Chai mañaitaca Taita Diosca uyarcami. Chaimandami mañashca jipalla “paicuna tandanajushca huasica chujchurca. Y tucuillacunami Taita Diospa espíritu santota chasquishpa Taita Diospa shimitaca na manllashpa predicanajurca” (Hech. 4:29-31). Imashinami ricunchi Jehovapa munai pactarichunga imapash na jarcai ushanllu (Is. 55:11). Pipash o imapash jarcangapaj munajpipash Jehovata mañajpica paica ali villaicunata tucui shunguhuan villachishpa catichunmi fuerzata cunga.

18. Jerusalenbi huauquipanicunaca ¿imashinata paicunapura ayudarin carca?

¹⁸ Jerusalenbi chairalla callarishca congregacionbica ñapashmi 5 mil yali huauquipanicuna mirarca. d Shuj shuj llactacunamanda cashpapash tucuicunami “shujlla yuyai, shujlla shungu” carca. Paicunaca shujllashna unidosmi carca (Hech. 4:32; 1 Cor. 1:10). Jehová Diospa bendicionda mañashpapash paicunapurami caishuj chaishuj espiritualmente ayudarin carca. Huaquinbicarin minishtirishca cosasgucunahuanbashmi ayudarin carca (1 Juan 3:16-18). Chaitami discípulo Joseca rurarca. Paitaca apostolcunaca Bernabé nishpami shutichirca. Huaquin huauquicunaca caru llactamanda shamushpami paicunapa feta shinlliyachingapaj huaquin tiempota Jerusalenbi quidana tucurca. Paicunata ayudangapami Bernabeca paipa alpata jatushpa tucuilla culquiguta curca.

19. Jehová Diosca ¿imamandata Ananías y Safirataca huañuchirca?

¹⁹ Ananías y Safira cusahuarmica paicunapa alpata jatushpami huauquipanicunata ayudangapaj culquiguta curca. Paicunaca jatushca tucui culquitami cunajunchi nircami. Pero na ciertochu carca. Paicunaca ‘alpa jatushca culquimandaca ashata pacashpami’ curca (Hech. 5:2). Chaimandami Jehovaca paicunataca huañuchirca. Shinapash na culquimandallachu shina pasarca. Llullashpa pacashcamandami paicunaca huañuchi tucurca. Paicunaca ‘gentecunataca na llullarcachu. Sino Taita Diostami llullarca’ (Hech. 5:4). Jesusta catinchi nij tucushca gentecunaca Diospa ñaupapi ali ricurinapa randica gentecuna alicachichunllami munarca. Shina gentecunataca Jesusca na ricunayachinllu (Mat. 6:1-3).

20. Jehová Diosman imagutapash caranamandaca ¿imatata yachajupanchi?

²⁰ Cunanbipash ashtaca millón testigo de Jehovacunami primer siglopi huauquipanicunashna mundo enteropi ali villaicunata villachichun contribuciongunahuan apoyanajun. Ñucanchi tiempota, culquigutaca ñucanchipa munaimi carapanchi. Jehová Diosca pipash obligado o munai na munai cuchunga na munanllu (2 Cor. 9:7). Shinallata mashna culquita carajujtaca na ricujunllu. Ima munaihuan carajujtami ricujun (Mar. 12:41-44). Chaimandami Ananías y Safirapa ejemplotaca na catina canchi. Shujcuna ricuchunllapash na villachijunachu canchi. Pedro, Juan y Bernabé cuendami Taita Diosta, ñucanchi projimota juyaimanda imagutapash rurana capanchi (Mat. 22:37-40).