CADA huatami 6 millón yali gentecuna, Shima (Japón) llactapi cedro quirucuna tiashca bosqueman caruta purishpa rin. Chai bosque ucupica Gran Santuario de Ise nishcami tian. Chaipica, casi 2 mil huatacunamandallatami diosa sintoísta del Sol, Amaterasu Omikami diosta adoran. Chaiman chayashpaca gentecunaca cuerpota limpiaringapaj nishpami maquicunata, shimita maillarin. Chai jipaca, haiden nishca ucuman rishpami chai diospa ñaupajpi uraicumurin, maquicunata huactan, rezanbash. * Sintoísmo religionda catijcunaca shuj religiongunapa costumbrecunatapash ruranllami. Chaimandami, chai santuariomanga budistacuna, Jesusta catinchi nijcuna, shuj religionmanda gentecunapash rinlla.

Ashtaca religiongunami santuariocunata charin. * Chaicunamanga ashtaca ashtaca gentecunami rin. Jesusta catinchi nij llactacunapica ashtaca iglesiacuna, virgen Mariaman, Jesusman, shuj santocunaman rurashca ashtaca capillacunapashmi tian. Shinallata, santo nishca gentecunapa cosascunata alichishca pushtucunapi, Bibliapa cosascuna pactarishca o chairalla ricurishca “milagrocuna” nishca pushtucunapipashmi santuariocuna tian. Chai santo pushtucunapi mañajpimi Diosca uyan nishpami ashtaca gentecunaca santuariocunaman rin. Cutin shujcunaca, feta charishcata ricuchingapami caru caruta purishpa shuj santuarioman rin.

Shinaca, Taita Dios ñucanchita uyachunga ¿shuj santuarioman rina minishtirinllu? ¿Caru caruta purishpa santuariocunaman richun Taita Diosca munangacha? Jesusta catijcunaca Taita Diosta adorangapaca ¿santuariocunata minishtinllu? Cai tapuicunata yachajunami santuariocunaman rishpa Taita Diosta adorana ali o nali cashcata, Taita Dios imashina adorachun munashcata intindichun ayudanga.

Taita Diosca ¿santo nishca pushtucunapi o santuariocunapi paita adorachun munanllu? Chaita yachangapaca, samaritana huarmiguman Jesús imata nishcata ricupashun. Samaria llactata yalijushpaca, Jesusca shuj pozo ladogupimi samangapaj tiarirca. Chaipimi, Jesusca samaritana huarmigu yacuta llujchingapaj shamujpi paihuan parlai callarirca. Chai huarmica, judiocuna samaritanocunahuan imamanda shican cashcata parlashpami nirca: “Ñucanchi ñaupa taitacunaca cai urcupimi, Taita Diostaca ninanda alicachin cashca. Ashtahuangarin cangunaca: ‘Jerusalenbillami Taita Diostaca punchapambagumi cangui nina’ ninguichimi” nishpa (Juan 4:5-9, 20).

 Samaritana huarmiguca Guerizim shuti urcumandami parlajurca. Chai urcuca Jerusalenmanda 50 kilometrocuna carupimi carca. Samaritanocunaca chai urcupi paicunapa templo cajpimi Pascua fiestata, shuj fiestacunatapash chaipi ruran carca. Jesusca chai huarmitaca nircami: “Canga, ñuca villashcataca crinapachami cangui. Na cai urcupilla, na Jerusalenbilla Taita Diostaca punchapambagumi cangui nina punllacunami chayamugrin” nishpa (Juan 4:21). Chai shimicunata shuj judío nijujta uyashpaca, samaritana huarmiguca ninandami manllarishcanga. Shinapash ¿imamandata Taita Diostaca paipa templopillata ñana adorashpa catina carca?

Jesusca nircapashmi: ‘Na nij tucushpalla tucui shunguhuanbacha Taita Diosta ninanda alicachina, Diospa espíritu yuyaita cujpi ninanda alicachina punllacunami chayamuna can. Chai punllami cunanga ña chayamushca. Chashna ninanda alicachijcunatami Taita Diosca mascan’ nishpa (Juan 4:23). Judiocunaca ashtaca huatacunatami Jerusalén templopi Taita Diostaca adoran carca. Chaimandami, huatapi quimsa viajeta chaiman rishpa Jehová Diosman sacrificiocunata ruran carca (Éxodo 23:14-17). Shinapash, Jesusca nircami chaica tucuringami, Taita Diosta ali sirvijcunaca ‘espíritu yuyaita cujpimi na nij tucushpalla’ adoranga nishpa.

Jerusalenbi temploca ricunalla pushtupimi carca. Shinapash, ‘espíritu yuyaita cujpi na nij tucushpalla’ adoranataca na ricui usharinllu, shuj pushtupash na canllu. Chaimandami, Jesusca intindichirca Taita Diosta ali adorangapaca, Guerizim shuti urcupash, Jerusalenbi templo o santo nishca shuj pushtucunapash na minishtirishca cashcata.

Samaritana huarmiguhuan parlajushpaca Jesusca nircami, Taita Diosta ali adorana ‘punllacunami chayamunga’ nishpa. Chai shimicunaca, Jesús huañushpa Moisesman cushca Leypi mandashcashna Taita Diosta adorana tucurijpimi pactarirca (Romanos 10:4). Shinaca ¿imamandata Jesusca nirca, “chai punllami cunanga ña chayamushca” nishpa? Jesusca Mesías cashcamandaca pai nishcata cazuj catijcunatami ña agllajurca. Paica nircami: ‘Taita Diosca espiritumi. Chashna cajpimi paipa espíritu yuyaita cujpi ninanda alicachijcunaca, na nij tucushpalla alicachina’ can nishpa (Juan 4:24). Shinaca, ‘espíritu yuyaita cujpi na nij tucushpalla’ adoranaca ¿imata can?

Diospa espíritu yuyaita cujpi nishpaca, cushijuimandalla adoranapa randica, Diospa espíritu ayudachun saquina cashcatami Jesusca intindichijurca. Diospa espiritumi Bibliata aliguta intindichun ayudan (1 Corintios 2:9-12). Cutin, na nij tucushpalla  nishpaca, Bibliapa nishcacunata cabalta yachajunatami Jesusca parlajurca. Imashinami ricunchi, Taita Diosta adorangapaca shuj pushtuca na minishtirinllu. Taita Diosca Bibliapi nishcashna adorachun, paipa espíritu santopa ayudata chasquichunmi munan.

Jesusta catijcunaca ¿santuariocunaman caruta rishpa chaipi dioscunata adoranachu can? Jesusta ali catijcunaca, Jesús yachachishcashnami Taita Diostaca ‘espíritu yuyaita cujpi na nij tucushpalla’ adorana can. Chaimandami, paicunaca shuj santuarioman o santo nishca pushtucunamanga na rin. Ashtahuanbash, shuj dioscunata adoranamandaca Bibliapica ninmi: “Yanga dioscunata mañanamandaca anchurichi” nishpa (1 Corintios 10:14; 1 Juan 5:21). Imashinami ricunchi, Jesusta ali catijcunaca Taita Diosta adorangapaca santo nishca pushtucunamanga na rinachu can. Shuj dioscunatapash na adoranachu can. Chaimandami, Jesusta ali catijcunaca santuariocunamanga na rin.

Shinapash, Bibliapica na ninllu Diosta mañangapaj, yachajungapaj o pensaringapaj shuj pushtuta charinaca juchami can nishpa. Shuj tranquilo pushtugupi tandanajunaca ali yachajuchun, Diosmanda parlachunmi ayudan. Shinallata, ñucanchi familiata yaringapaj shuj lápida nishca pircaguta churanaca na juchachu can. Huaquingunaca juyashcata ricuchingapaj, yaringapami ruran. Shinapash, chai pushtucunata santo pushtutashna o adorana pushtutashna ricushpaca, Jesús mandashcataca na cazunajunchimanllu.

Imashinami yachajushcanchi, Taita Dios ñucanchi mañaicunata uyachunga shuj santuarioman rinaca na minishtirinllu. Shinallata, shuj santuarioman caru caruta purishpa rijpipash Taita Diosca na bendiciangachu. Bibliapi nishca shinaca, Jehová Diosca ‘jahua pachata, cai pachata Mandaj cashpami gentecuna yaringapaj rurashca huasicunapica na tiajun’. Shinapash, na pensanachu canchi Taita Diosca carupimi can, na uyangachu nishpa. Taita Diosca ñucanchicuna maipi cashpapash mañajpica uyanllami. Paica ‘ñucanchimandaca na carupi canllu’ (Hechos 17:24-27).