Chugrishpapash, ñucanchi aicha cuerpollata paimanda ali tucuchunmi Taita Diosca rurashca. Imahuanbash cuchurishpa, imapipash aspirijpi, imapash clavarijpica, ñucanchi cuerpollatami ama yahuar llujshishpa catichun, chai chugrishca chaquirichun, ali tucuchun ayudan.

PENSARIPAI: Ñucanchita ruraj Taita Dios ñucanchi aicha cuerpota shina rurashca cashpaca ¿nachu ñucanchi llaqui yuyaicunatapash anchuchinga? Salmo librota escribij runaguca, llaqui yuyaicunata charimanda shungu faquirishcashna cajpi, imaguhuanbash huatachinshna Taita Dios jambinataca seguromi carca (Salmo 147:3). Quiquinbash llaquilla sintirijujpi, ali tucuchun imaguhuanbash ‘huatachinshna’ Taita Dios cunanbipash, shamuj punllacunapipash ayudanataca ¿imashinata seguro caita ushapangui?

Taita Diosca nircami: ‘Na manllanachu canguichi, ñucami cangunahuan cani. Ñucami cangunaman ushaita cuj Taita Dios cani. Tucui causaipimi ayudajushalla’ nishpa (Isaías 41:10). Jehová Dios ñucanchita juyajta yachashpami, shungu ucupi tranquilo, ali sintirinchi, llaquicunata aguantangapapash fuerzata japinchi. Profeta Isaiasca nircapashmi: “Shaijushcacunamambash, paimi ushaita cun. Ima ushai illajcunamambash, ashtaca ushaitami cun” nishpa (Isaías 40:28, 29). Apóstol Pablopash nircami, pipash na yachai ushanalla Taita Dios carashca casilla ali causaimi tranquilo, ali sintirichun ayudanga nishpa (Filipenses 4:4-7, 9).

Bibliami Taita Diospa nishcacunapi crichun ayudan. Por ejemplo, cati paginapi tiajuj Apocalipsis 21:4, 5​pica, Taita Dios imata ruranata, imamanda paipa nishcacunapi confiai ushashcatami ricuchijun.

• ‘Tucuilla viquita fichanga’. Cunanbica ashtaca preocupaciongunatami charinchi, sufrinchipash. Shinapash Jehová Diosca, tucui llaquicunatami tucuchinga.

• ‘Mandangapaj tiarinapi tiarishpami’, Tucuita Ruraj Jehová Diosca paipa autoridadhuan, paipa poderhuan llaquicunata tucuchinga, ñucanchi minishtijuj ratocunapipash ayudanga.

• Jehová Diosca ninmi, ‘ñuca villajushca shimicunaca na llullashpami pactaringa’ nishpa. Ama llullapi quedangapami Jehová Diosca, pai tucui ima nishcata pactachinga.

‘“Taita Diosmi paicunapa ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu. Punda ima tiashcapash illangami”. Mandangapaj tiarinapi tiajujca, ‘Ricui, ñucami imatapash tucuita mushujta rurani’ nishpami, cashnatapash nihuarca: “Ñuca villashca shimicunataca na llullashpa pactachij cajpimi escribina” cangui nishpa’ (Apocalipsis 21:4, 5).

Jehovapa rurashcacunapash, Bibliapash Jehovata ashtahuan ali rijsichunmi ayudan. Jehovapa rurashcacunaca, na parlashpapash Jehovapa amigocuna cachunmi ayudan. Cutin Bibliapica, “Taita Diospajman quimirichi. Shina quimirijpica, paipash cangunapajman quimiringami” ninmi (Santiago 4:8). Hechos 17:27​picarin nijunmi, Taita Diosca “ñucanchimandaca na carupi canllu” nishpa.

Jehovata ashtahuan rijsishpaca, pai quiquinmanda preocuparijtaca ashtahuanmi seguro caita ushapangui (1 Pedro 5:7). Jehovapi confianaca ¿imamandata ali can?

Japón llactamanda Toru shuti runagupa ejemplota ricupashun. Paipa mamaca Jesusmanda yachachishpami viñachirca. Shinapash jipamanga huañuchij, shuhuaj gentecunahuanmi puri callarirca. Paica yuyanmi carca: “Taita Diosca na ricunayachihuanllu. Ñucata castigajpimi ñuca rijsicunapash huañun” nishpa. Paica millai millai gentecunapurapi viñaimandami, “nali carca”. Paica ninbashmi: “Joven cashpallata huañungapami munarcani. Ñucatapash yali nalicunata huañuchishpa famoso tucungapami munarcani” nishpa.

 Shinapash Toru, paipa huarmi Hannahpashmi Bibliata yachajui callarirca. Toruca paipa churajunacunapipash, paipa causaipipashmi cambiarca. Hannahca ninmi: “Ñuca cusaca ninandami cambiarca” nishpa. Torupash ninmi: “Taita Dios tiajtaca crinimi. Paica cada unomandami preocuparin cashca. Paica shuj gentegullapash huañuchunga na munashcachu. Tucui shunguhuan arripintirijpica, tucui shunguhuanmi perdonangapaj munan. Shuj gentecuna na intindi ushana cosascunatapashmi paimanga tucuita villai ushanchi. Ñallami Jehová Diosca tucui llaquicunata, nanaicunata, problemacunatapash tucuchinga. Cunanbipashmi paica ninanda ayudajun. Ñucanchimanda ninanda preocuparishpami ninanda llaquilla sintirijuj ratocunapipash ayudan” nin (Salmo 136:23).

Imashinami Torupa ejemplopi ricupanchi, tucui llaquicunata Taita Dios ñalla tucuchinata yachashpami, ali causai tianata crishpa cushilla causai ushanchi. Cunanbi ashtaca llaquicuna tiajpipash, Taita Dios juyashcamandami tauca bendiciongunata chari ushapanchi.