Ali ñanda ricuchingapaca, imata yachachishcataca pactachinami can. Pipash shamujpi “illanmi ni nishpa” o na llujshingapaj munashpaca, siempremi cabalta parlana cangui nishpa huahuaman yachachitaca na usharingachu.

Davidca ninmi: “Ashtaca gentecunaca ninmi: ‘Ñuca imata rurashcataca ama catinguichu, ñuca imata nijta catingui’ nishpa. Shinapash huahuacunaca, shuj esponja cuendami can. Ñucanchi imata nishcata, imata rurashcataca ratomi catinga. Imata nishcata na pactachijujta ricushpaca, ñapashmi huahuacunaca cuenta japishpa imatapash ningalla” nishpa.

BIBLIAPICA NINMI: “‘Na shuhuanachu’ nishpa villajushpapash, ¿imashpata shuhuanguilla?” nishpa (Romanos 2:21).

Huahuacuna joven cajpica, taitamamacunami cumbacunatapash yali imacunatapash yachachita ushan. Shinaca, huahuacuna ali ñanda catichunga, quiquingunami cangunapa causaihuan ali ñanda ricuchina capanguichi.

Ninaca ninmi: “Cutin cutin nijujpipash huahuacunaca casi na intindinllu. Shinapash, ñucanchi imata nishcata na pactachijujta ricushpaca ratomi imatapash ninga. Na ricujunshnalla cashpapash ñucanchi imata ruranajujtaca alimi ricunajun” nishpa.

BIBLIAPICA NINMI: ‘Jahua pachamanda ali yachaica na nij tucushpalla causanatami yarichimun’ nishpa (Santiago 3:17).

Pensaripai: “Ñuca huarmita, cusata, huahuacunataca ¿imashinata tratani? ¿Ima programacunatata ricuni? ¿Ima laya amigocunatata charini? ¿Shujcunapi pensarinichu?” nishpa. Quiquinba huahuacunapash ¿quiquinshna cachun munapanguimanllu?

Cristinaca ninmi: “Ñucanchicunapash na ali pactachinajushpata, huahuacunatara ali pactachinguichi nishpa rimanataca na yachanchichu” nishpa.

Perdonda mañana. Taitamamacuna juchayucuna cajtaca huahuacunaca yachanmi. Chaimi, pandarishca cashpa huahuacunata, huarmita o cusata perdonahuai nishpaca, honrado, humilde canata huahuacunamanga yachachijupangui.

Raulca ninmi: “Ñucanchicuna pandarishpa perdonda mañajta ricushpami huahuacunapash chaitallata yachajunga” nishpa.