Shamuj punllacunapi ali causaigu tiachunga ¿imahorapash tucui llaquicunata gentecuna tucuchi ushangacha? Caipi pensaripashun. Pipash huañujushpa ali tucungapaca, jambitaca na ufiana cashcamandallachu ufiana can. Imamanda huañujushcatarami ali yachana can.

Caita ali intindingapaca caipi yuyapashun. Tomás jarica, shuj ungüi japijpimi huañurca. Tomás nara huañujpillata atendishca doctorca nircami: “Ima ungüitapacha charishcata yachachunga callaripi atendishca doctorcunamandaca nipi na ayudashcachu” nishpa. Callaripi atendishca doctorcunaca nanaita samachichunllami jambicunataca cushca yarin.

Cai Alpapi tiashca llaquicunahuanbash shinallatami pasajun. Chaimandami gobiernocunaca shuhuacuna ama tiachun nishpa ashtaca leycunata llujchin, camaracunata churan o ashtaca policiacunatapash churan. Chaicunata rurashpapash, gentecunapa llaquicunata, nali munaicunata, nali ruraicunata, nali crishcacunata tucuchitaca na ushashcachu. Chaimandami gentecunaca paicuna munashcata ruranlla.

Daniel jarica, Sudamérica nishca llactacunamandami can. Paica nircami: “Pundacunaca tranquilo, alimi causan carcanchi. Shinapash cunanbica maipipash tranquilo puritaca ñana usharinllu, tucui ladocunapimi shuhuacunaca tian. Cai llactapica culqui faltajlla causanajushcamandami ashtaca problemacuna ricurishca. Chaimandami gentecunaca culquimanda pitapash huañuchinlla. Shujcuna charishca cosasgucunatapash quichunlla” nin.

Oriente Medio nishca llactacunapica ashtaca macanajuicunami tian. Cai llactacunamanda pacajushpa llujshishca shuj jarica nircami: “Ñuca llactapica, familiacunapash, gobiernopa partecunapash, religiongunata pushajcunapashmi, jovengunataca guerraman richun animan carca. Gobiernopa contracunapashmi paicunapa parte tucushca jovengunataca shinallata nin carca. Chaicunata ricushpami gentecunapa gobiernocunapi confianaca yanga cashcata cuenta japircani” nishpa. Cai jariguca paipa llactamanda pacajushpa llujshishca jipami Bibliamanda yachajui callarirca.

Cai yuyaimanda parlashpaca, Bibliapica cashnami nin:

• “Runaca, chairalla viñaimandapachami nalitalla ruranata, shungupi yarishpa causan” (Génesis 8:21).

• “Runapaj shunguca, tucui imatapash yali umachijlla, jatun nalimi. ¿Chaitaca pipash rijsingachu?” (Jeremías 17:9).

• ‘Shungumandami, nalicunata rurana yuyaicunaca llujshin. Chaimandami huañuchinajun, cazarashca jahua shujcunahuan causanajun, shuhuanajun, llullanajun, imatapash nalitalla rimanajun’ (Mateo 15:19).

Gentecunaca nalita rurana munaicunataca na tucuchi ushashcanchichu. Chaishuj temapi ricushca llaquicunamandami, cai nali munaicunaca ashtahuan mirashpa catijushca (2 Timoteo 3:1-5). Cunanbi computadoracuna, aparatocuna, radio, tele nishcacuna tiashpapash, llaquicunataca na tucuchishcachu. Shinaca ¿imashpata tranquilo, ali causaitaca na ushapanchi? Shina causaiguta munanaca ¿nalichu can? ¿Imashinata chai causaigutaca chari ushapanchi?

Tucui gentecunapa nalita rurana munaicuna tucurijpipashmi, cai mundopica ashtaca llaquicuna tiashpa catinman. ¿Imashpata shina nipanchi? Gentecunaca imatapash alipacha ruraitaca na ushapanchichu, imapipash pandarinchilla.

 “Pipash quiquin causaitaca, na mandai ushanllu” nishca shimicunaca ciertopachami can (Jeremías 10:23). Gentecunaca, ñucanchimandallata mandaringapaca na rurai tucushcacunachu capanchi. Imashinami yacu ucupi causangapaca na rurashcacuna capanchi, shinallatami gentepurallata mandarishpa causangapaca na rurashcacuna capanchi.

Gentecunaca pipash paicuna imashina causana cashcata, ima ali o nali cashcata, huahuacunata imashina viñachina cashcata nichunga na gushtanllu. Shinallata pipash, paicunaman abortanaca nalimi can nichunbash na gushtanllu. Gentecunaca cashna cosascunamanda, shican yuyaicunata charimandami problemacunaman chayashca. Chaimandami Bibliapica nin gentecunaca paicunapura mandarishpa tranquilo, ali causaitaca na ushanllu nishpa. Shinaca ¿pita ayudai ushan?

Huaquingunaca, Taita Diosca ñucanchimandaca na preocuparinllu ninmi. Shinapash ñucanchita rurashcamanda, juyashcamandaca Taita Diosca tranquilo, ali causaitami cungapaj munan. Bibliapa ali consejocunaca, Taita Dios ñucanchimanda preocuparishcatami ricuchin. Bibliata liishpami gentecuna imatalla na rurai ushashcata, imamanda ashtaca llaquicunahuan causajushcata intindipanchi. Alemaniamanda shuj estudiashca jarica nircami: “Gentecunapash, gobiernocunapash pundacunapi ima pasashcataca na yachajushcachu. Imatapash yachajushpapash, yachajushcashnaca na causanllu” nishpa.

Rey Salomonga nircami: “Cai ali shimicunaca, canda alichingami. Cai ali yuyaicunaca, imamandapash cuidangami” (Proverbios 2:11). Bibliapi tiashca ali yuyaicunaca ashtacatami ayudan. Por ejemplo Salmo 146:3​pica: “Mandajcunatapash, huañuna aichayu runatapash, na yariashpa causanachu canguichi” ninmi. Cai ali consejoca ama imapash pandacunata yuyajuchun, imatapash ama yangamanda shuyajuchunmi ayudan. Kenneth shuti jarica Norteamérica llactapimi causan. Paica ashtaca shuhuacuna tiaj pushtupimi causan. Paica “tucui politicocunami, llaquicunataca tucuchishun nin. Shinapash chaitaca na pactachi ushashcachu. Chaicunata ricushpami Bibliapi nishca shimicunaca ciertopacha cashcata cuenta japini” ninmi.

Chaishuj parrafocunapi parlashca Danielca “gentecunapurallata na mandai ushashcataca cada punllami cierto cashcata ricupani. Bancopi culquita charina, jubilarishpa culquita japinapash tranquilo ali causaigutaca na cui ushanllu. Shina yuyashcamandami huaquingunaca llaqui apajta ricushcani” nin.

Bibliaca imatapash ama yangamanda shuyanajuchun ayudashca jahuapash, jipacunaman ali causaigu tianamandami parlan. Chaitaca cati temacunapimi ricupashun.