Maher Nasser shuti jarica Crónica ONU nishca revistapica escribircami: “Ashtaca shuhuacunami miranajun, yapatami indijun, yapatami tamiajun. Nali ruraicuna, macanajuicuna, guerracunapash ninandami mirajun, tauca tauca gentecunami paipa llactacunapi problemacuna tiashcamanda shuj ladocunaman pacajushpa rinajun, millai ungüicunapashmi ashtahuan ricurinajun. Chai llaquicunaca tucui ladopipachami tian” nishpa. Mundo enteropi llaquicuna tiashcamandami Organización de la Naciones Unidasca nishca: “Tucui gentecunami randimanda ayudarina, respetarina cai Alpatapash cuidana can” nishpa.

Huaquingunaca mundo enteropica shuj ali gobiernotami minishtinchi ninmi. Italia llactamanda estudiashca, político Dante shuti runa, Albert Einstein runapash chaitallatami nishca. Danteca, mundo enteropi politicamanda shuj shuj yuyaicuna tiashcamandami, tranquilo ali causaitaca na usharingachu nirca. Lucas 11:17​pi Jesús nishca shimicunata japishpami cashna nirca: “Shuj llactapi mandajcuna, paicunapura fiñanajushpa shicanyarishpaca, chai llactaca llaquinayaitami tucurinman” nishpa.

Segunda Guerra Mundialpi, ishcai bomba atómica nishcacuna tugyashca jipallami Albert Einsteinga Asamblea General de las Naciones Unidasmanga shuj cartata cashna nishpa cacharca: “Organización de las Naciones Unidasca mundo enteropi shuj ali gobierno tiachun, tucui gentecuna tranquilo ali causai ushachunga uchallami imatapash rurana can” nishpa.

Shinapash mundo enteropi shuj gobiernolla mandai callarishpaca ¿nacha cunanbi politicocunashna shujcunata mandangapalla, shuhuangapalla mandai callaringa? ¿Nacha paicunapash cunanbi mandajcunashna tucunga? Mandajcunamanda parlashpaca, Inglaterramanda estudiashca lord Acton shuti runaca, pipash huaquin gentecunata mandai callarishpaca jariyai callarinmi, tucuicunata mandashpacarin jariyashcapachami tigran nircami.

Tranquilo, ali causaigu tiachunga tucui gentecunami shujlla shina tandanajushca cana can. Shinapash ¿shina causaiguca tiangacha? ¿Chai causaiguta ricui ushashunlla? Bibliapica shina causaigu tianatami yachachin. Chaipaca Taita Dios mandajushca shuj gobiernomi tiana can. Chai gobiernoca Taita Dioslla cai Alpapi ali mandai ushashcatami ricuchin. Bibliapica chai gobiernotaca ‘Taita Dios mandana’ nishpami churashca (Lucas 4:43).

Padrenuestro oracionbi: ‘Can mandanaca, ucha chayamuchunmi munanchi. Cai pachapi can munashcashna ruranajushpami ali canman’ nishpaca, Jesusca Diospa gobiernomandami parlajurca (Mateo 6:9, 10). Diospa munai cai Alpapi pactarichunga, juchayuj mandajcunaca na pactachingachu. Diospa Reinolla o gobiernollami, pactachinga.

Diospa Reinotaca ‘jahua pachamanda shamuj mandana’ nishpapashmi rijsin (Mateo 5:3). Cai Alpataca, jahua pachamandami mandagrin. Cai gobierno mandajujpica, gentecuna culquita paganaca ñana minishtiringachu. Chaica alipachami canga.

Cai gobiernopica pipash mandachunmi minishtirin. Chaimandami Diospa Reinopi mandachunga, Taita Diosca Jesusta agllashca. Jesusmanda parlashpaca Bibliapica ninmi:

• ‘Mandanataca, paipaj maquipimi churashca. Pai mandajujpica, casilla ali causanapash na tucuringachu. Tucuicunapa alita rurashpa, tucui imatapash cashcatapacha rurashpami mandajunga’ (Isaías 9:6, 7).

•   ‘Tucui gentecuna, tucui llactacuna, shuj shuj rimaita rimajcuna paita servinajuchunmi, mandai ushanatapash, ninanda alicachi tucunatapash, mandana llactatapash paiman curca’ (Daniel 7:14).

• “Ñucanchipaj Jatun Diospash, pai cachamushca Quishpichij Cristopash, cai pachapi tiaj tucui llactacunata mandajuna punllami pactashca. Paimi, causaita causaicaman mandajunga” (Apocalipsis [Revelación] 11:15).

Taita Diospa munai cai Alpapi pactarichunga, Diospa Reinomi ayudanga. Chaimi padrenuestro oracionbi shimicunaca pactaringa. Gentecuna cai Alpata cuidanata yachajujpimi, cai Alpaca juyaillagu tucunga.

Ashtahuangarin, Diospa Reino mandajujpi causajujcunaca, mandashcacunata ali cazunata, pactachinatami yachajunga. Chaipica fiñanajuicuna, macanajuicunapash ñana tiangachu. Tucuicunami shujlla shina tandanajushca canga. Isaías 11:9​pica: “Ima nalitapash, ima llaquitapash na ruranajungachu. Imashnami mama cuchaca yacu jundashca tiajun, chashnallatami tucui cai pachaca, Mandaj Diosta rijsina yuyaihuan junda canga” nin.

Cai Alpapi causajcunaca shujlla shina tandanajushca, tranquilo, cushillami causashun. Organización de las Naciones Unidaspash chaitaca na pactachi ushashcachu. Salmo 37:11​pica: “Casilla ali causaihuanmi, ninanda cushijunajunga” ninmi. Shamuj punllacunapica shuhuacuna, cai Alpata mapayachijcuna, pobre gentecuna, guerracunapash ñana tiangachu. Chaica ¿imahorata pactaringa? ¿Imahorata Diospa Reinoca cai Alpata mandai callaringa? ¿Imashinata mandanga? Chaipi cangapaca ¿imatata rurana capanchi? Cai tapuicunamandaca cati temapimi yachajupashun.