Huaquin gentecunaca, internetpilla yalij jovengunaca huaquin problemacunatami charita ushan nishcami. Por ejemplo:

• Aparatocunapilla yalingapaj munan.

• Internetpi o celularpi llullacunata nin. Chaitaca ciberacoso nishpami rijsin.

• Pornografiata ricui callarin.

INTERNETPILLA YALINA

Internetpica ashtaca juegocunami tian. Chaicunaca gentecuna chaipilla yalichun rurashcami can. Caimanda parlashpami En defensa de la conversación nishca libropica cashna nin: “Internetpi aplicaciongunaca gentecuna chaicunapilla yalichun rurashcami can” nishpa. Internetpi, aplicaciongunapi llujshishca anunciocunata ricujushpaca, chai anunciocunata ruraj empresacuna culquita ganachunmi ayudanajunchi.

CAIPI YUYAPAI: ¿Quiquinba huahuacunaca, aparatocunapillachu yalin? Ama chaicunapilla yalichunga ¿imashinata ayudaita ushapangui? (EFESIOS 5:15, 16).

CIBERACOSO

Huaquin gentecunaca internetpilla yalimandami, shujcunatapash nali tratashpa, mal educado portarin. Shinami shujcunamandapash burlarishpa shujcunataca nali tratai callarin.

Shina portarijcunaca shujcuna paicunata alicachishpa ricuchun o rijsishca cangapaj munaimandami shina portarin. Cutin shujcunaca, ñucataca ni pipash na juyahuanllu, siempremi nali tratahuan nishpami pensan. Talvez shuj fiestaman na invitashcamandallami huaquinbica shina pensaita ushanman.

CAIPI YUYAPAI: Quiquinba huahuacuna internetta utilizanajushpaca ¿gentecunataca respetohuanllu tratan? (Efesios 4:31). Quiquinba huahuacunaca paicunata imagumanbash na invitajpica ¿imashinata sintirin?

PORNOGRAFÍA

Cunan punllacunapica, internetpi pornografiata ricunaca ashtahuan facilmi tucushca. Shinapash, huaquin gentecunaca huahuacuna computadorapi ama chaicunata ricuchunmi huaquin filtro nishcacunata o chaicuna ama ricurichun chai programacunata bloqueashpa saquishca. Shinapash chai programacunaca na siemprechu ali funcionashca.

Celularpi lluchulla fotocunata cachana o chasquinaca, nalipacha shuj delitomi can. Chaimandami depende de cada llactacunapi tiashca leycuna, y shinallata chai lluchulla fotocunata, videocunata ruraj gentecunapa edadta ricushpa chaicunataca denunciaita usharin. Chaitaca pornografía infantil nishpami rijsin.

CAIPI YUYAPAI: Huahuacuna lluchulla fotocunata, videocunata o imapash pinganai mensajecunata internetpi ama ricuchunga ¿imashinata paicunataca cuidai ushapangui? (EFESIOS 5:3, 4).

HUAHUACUNATA ALIGUTA YACHACHIPAI

Huahuacunaca celularcunata, tabletcunata alipacha utilizaita ushashpapash, siempremi guiata minishtin. Shuj libropica “huahuacuna internetta na ali utilizaita yachashpata paicunaman chaicunata cunaca peligrosomi can” ninmi.

Imata pactachingapaj munashcata señalapai o denoca quiquin imata rurangapaj munashcata escribipai:

• Internetta utilizanajushpa, imashina portarina cashcata huahuacunahuan parlana.

• Quiquinba huahuata pipash na invitajpi imamanda na risintirina cashcata intindichina.

• Internetpi nali paginacunata bloqueashpa saquina.

• Quiquinba huahuapa celularta ricuriana.

• Aparatocunapi ama yapa tiempota yalingapaj, tiempota ricuriana.

• Quiquinba huahua paipa cuartopi tutacuna aparatocunata ama utilizachun prohibina.

• Micuna horas ama aparatocunata utilizachun ricuna.