¿Taita Dioschu tucui cosascunata rurarca? O ¿yangamandachu chaicunaca tiai callarirca? Cai yuyaimanda parlashpa tanto estudiashca gentecunapa yachachishcacuna y Bibliapa yachachishcacunaca diferentemi can. Chaimandami gentecunapash shuj shuj yuyaicunata charin. Huaquingunacarin librocunapi, televisionba programacunapimi paicunapa yuyaicunata o crishcacunataca difindin.

Huaquin gentecunaca paicunapa profesorcuna yachachishcamandallami tucui cosascunaca yangamanda tiai callarirca nishcata crin. Pero shinapash chai cierto cajta o na cajtaca ¿pruebacunahuanllu ricuchishca? Cutin shuj gentecunaca religioso gentecuna yachachijpimi, Taita Dios tucui cosascunata rurashcata crin. Shinapash chaipash cierto cajta o na cierto cajtaca ¿pruebacunahuanllu ricuchishca? O ¿chaitaca crinami cangui nishpallachu yachachishca?

Talvez quiquinga Taita Diospash tiajta o na tiajtaca imashata yachashayari nishpami talvez ña pensaripashcangui. O denoca caicunamanda yachajunaca na minishtirinllu nishpachari talvez pensaripashcangui.

Cai revistapica huaquin pruebacunata ricushpami, Taita Dios tucui cosascunata rurashcata yachajupashun. Shinallata cai alpapi causai imashina tiai callarishcata yachajuna imamanda importante cashcatapashmi yachajupashun.