1. Jehovata sirvijcunaca ¿imatata rurana capanchi?

¿IRQUILLA cashpa, llaquilla, shaijushca cashpaca shuj difícil carrerapi calpangapaj munapanchimanllu? Na, maitashi calpangapaj munapanchiman. Shinapash apóstol Pabloca, Jehovata sirvijcunaca shuj carrerapishna calpanajushcatami nirca (Heb. 12:1). Jehová Diosca para siempre causaiguta carasha ninmi. Chaimi joven o mayorlla cashpa, na yapa fuerzata charishpapash para siempre causaiguta chasquingacaman shuj carrerapi calpajunshna catina capanchi (Mat. 24:13).

2. Apóstol Pabloca 2 Timoteo 4:7, 8​pica ¿imamandata sinpena parlarca?

² Apóstol Pabloca cai carrerata mishashca caimandami, paica sinpena parlarca (2 Timoteo 4:7, 8, liingui). Shinapash paica ¿ima carreramandata parlajurca?

3. Apóstol Pabloca ¿ima carreramandata parlarca?

³ Apóstol Pabloca minishtirishca yuyaicunata yachachingapami punda tiempo Grecia llactapi tiashca carreracunamanda parlarca (1 Cor. 9:25-27; 2 Tim. 2:5). Chaimi Jehová Diospa sirvijcunapa causaitaca shuj carrerahuan chimbapurarca (1 Cor. 9:24; 2 Tim. 4:7). Pipash chai carrerata callaringapaca Jehová Diosta candallami sirvisha nishpa mañana, bautizarinami can (1 Ped. 3:21). Para siempre causaiguta chasquishpami chai carrerata mishashcata ricuchin (Mat. 25:31-34; 25:46, NM ; 2 Tim. 4:8).

4. Cai temapica ¿ima quimsa yuyaicunatata yachajupashun?

⁴ Jehová Diosta sirvijcunapa causaica ¿imamandata caruta rina carrerahuanga igual can? Chaipaca cai quimsa yuyaicunata yachajupashun. Pundapica, calpajcunaca maijan ñanda rina cashcatami ali yachana can. Catipica, mishana yuyaihuanmi calpana can. Ultimopica, ima llaquicuna ricurijpipash calpashpami catina can.

5. Jehovata sirvijcunaca ¿imatata rurana capanchi?

⁵ Pipash shuj carrerata ganangapaj munashpaca maijan ñanda rina cashcatami catina can. Shina cuendami ñucanchicunapash para siempre causaiguta chasquingapaj munashpaca Jehová Dios mandashcashna causana capanchi (Hech. 20:24; 1 Ped. 2:21). Shinapash Diablo, paita catijcunapash Jehovata sirvijcunataca paicunashna cai mundopa nali cosascunata rurashpa catichunmi munan (1 Ped. 4:4). Chaimi ñucanchimanda burlarin, shinallata ñucanchimi cangunataca yali ashtahuan ali causanchi nishpa jariyan. Shinapash paicunaca pandarishcapachami can (2 Ped. 2:19).

6. Huauqui Brianba causaimandaca ¿imatata yachajupanchi?

⁶ Pipash cai nali mundopa ruraicunata rurashpa causajushpaca nalipacha causaitami charin. Chaimi chai nali ruraicunapa esclavoshna tucushcata paicunaca cuenta japin (Rom. 6:16). Cunanga Brian shuti huauquimanda yachajupashunchi. Pai uchillagu cajpica paipa taitacunaca Bibliapa mandashcacunata pactachishpa causachunmi yachachirca. Shinapash ña jatunyashpaca shina causanaca cushilla causachun ayudahuangacha nishpami pensari callarirca. Chaimi paica Diablo alicachishca cosascunatara rurai callarirca. Brianga ninmi: “Cai nali mundopa cosascunata rurashpa causanaca nali cosascunaman apana cashcataca na pensarcanichu” nishpa. Asha ashami chai huauquica drogacunapi, tragota yapata ufianacunapi, huainayana juchacunapipash urmarca. Brianga ninbashmi: “Huatacuna yalijpica shuj shuj drogacunatami fumai callarircani. Chaimi chaicunata rurashpaca shuj esclavo cuenda causan carcani. Shinallata imapash nalicunata rurangapami drogacunata jatui callarircani” nishpa. Tiempohuanga Jehová Diospa mandashcacunata cazushpa causangapami huauqui Brianga esforzarirca. Chaimi huata 2001​pi bautizarirca. Shinami chai huauquica Jehová Diosta sirvishpa, shuj carrerapi calpanshna causajun. Paica cunansi cushilla causan. *

7. Mateo 7:13, 14​pica ¿imatata yachachin?

⁷ Ñucanchicunapash carrerapi calpajcunashnami maijan ñanda rina cashcata ali yachana capanchi. Diabloca ‘causaita causachun’ quichiji ñanda richunga na munanllu. Ashtahuangarin tauca gentecuna rij ancho ñanda richunmi munan. Chai ñanda rij gentecunaca ‘chingaita chingaimanmi’ rinajun (Mateo 7:13, 14, liingui). Quichiji ñanda ringapaca Jehová Diospi confiashpa, paipa nishcacunata cazushpa causangapami esforzarina capanchi.

8. Calpajcuna nitijashpa urmashpapash ¿imatata ruran?

⁸ Caru caruta calpana carrerapi calpajcunaca ama urmangapami siempre ñaupaman ricushpa  calpan. Shina calpajujpipash talvez nitijashpa o pipash tangajpimi urmaita ushan. Urmashpapash, cutin jatarishpami calpashpa catin. ¿Imamandata cutin calpashpa catin? Paicuna carrerata ganangapaj premiota chasquingapaj munaimandami calpashpa catin.

9. Carrerapi calpajcunashna urmashpapash ¿imatata rurana capanchi?

⁹ Jehová Diosta sirvijcunaca tauca viajecunatami pandarita ushapanchi. Talvez nalita rurashcamanda o imatapash nishcamanda. Na cashpaca shuj huauqui o shuj pani ñucanchita nali sintichishcamandami desanimarita ushapanchiman. Juchayucuna cashcata, tucuicunallata para siempre causaiguta chasquingapaj carrerapi calpanajushcataca na cunganachu capanchi. Tucuicunallata chai carrerapi pacta calpanajuimandami huaquinbica shujcunahuan nitijanshna urmaita ushapanchi. Chaimi apóstol Pabloca ñucanchi huauquipanicunamanda nalicachishpa quejari ushanchiman nirca (Col. 3:13, NM ). Shinapash shuj huauqui o pani ñucanchita nali sintichishcapillaca na yuyajunachu capanchi. Chaipa randica, para siempre causaiguta chasquinatami yaria causana capanchi. Carrerapi calpajcunashnami urmashpapash jatarishpa calpana capanchi. Ñucanchi huauquipanicunahuanga na culirashcalla yalinachu capanchi. Chaipa randica para siempre causaiguta chasquinatami yaria causana capanchi. Ñucanchi huauquipanicunahuan culiralla yalishpaca shujcuna Jehová Diosta cushilla sirvishpa catichunga na ayudashunllu.

10. Huauquipanicunata ama estorbangapaca ¿imatata rurana capanchi?

¹⁰ Ñucanchi huauquipanicunahuan calpajushca carrerapi ama estorbangapaca ñucanchi munashcashna imatapash rurachunga na obliganachu capanchi. Shinallata na ñucanchi nishcahuanga yalinachu capanchi (Rom. 14:13, 19-21; 1 Cor. 8:9, 13). Shuj carrerapi calpajcunaca shujlla mishangapami ninanda esforzarin. Paicunaca shujcunata ayudanapica na pensarinllu. Chaimandami premiota ganangapaca paicunara ñaupashpa calpan. Cutin ñucanchicunaca ñucanchi huauquipanicunata mishangapaca na calpanajupanchichu (Gál. 5:26; 6:4). Ñucanchicunaca ñucanchi huauquipanicunapash para siempre causaiguta chasqui ushachunmi ayudana capanchi. Chaimandami apóstol Pablo nishcashnaca “shujcunapajpash ali cachunmi, tucuicunallata” ayudarinchi (Filip. 2:4).

11. Carrerapi calpajcunaca ¿imapi pensarishpata calpanajun?

 ¹¹ Carrerapi calpajcunaca siempremi ñaupaman ricushpa, premiota chasquinata yaria calpanajun. Premiota ña japishcatashna pensarishpami ganangapapacha ninanda esforzarin. Shina pensarinami calpashpa catichun ayudan.

12. Jehová Dios shuj juyaj Dios caimandaca ¿imatata ñucanchimanga carasha nin?

¹² Jehová Diosca shuj juyaj Diosmi can. Chaimi Jehová Diosca cai carrerapi calpajcunamanga para siempre causaiguta carashapacha nin. Huaquingunaca jahua cielopi, shujcunaca cai Alpapi causana premiotami chasquinga. Shinallata para siempre causaigu imashinapacha cashcataca Bibliapimi yachachin. Shina yachajunami cielopi causangapaj munajcuna o cai Alpapi causangapaj munajcunapash para siempre causaiguta chasquinata yaria causachun, imapipash ama pandarichunbash ayudan.

13. Carrerapi calpajcunahuan ricujpica, ñucanchicunataca ¿pita ñaupaman calpanshna catichun ayudan?

¹³ Punda tiempopi Grecia llactapi carrerapi calpajcunaca nanaita aguantashpa, masqui shaijushca cashpapash calpashpami catin carca. Paicunapa entrenador yachachishcacunapi, paicunapa fuerzapipashmi confiashpa calpana carca. Cutin ñucanchicunataca ¿pita ñaupaman calpanshna catichun ayudan? Jehová Diosmi ñucanchicunataca ayudan. Paimi ñucanchimanga fuerzata cushpa ayudan. Ñucanchicuna Jehová Diospi confiashpa catijpica, paillatami ñucanchitaca ali ali yachachishpa, shinllichishpapash catinga (1 Ped. 5:10).

14. ¿Imashinata 2 Corintios 12:9, 10​pi nishca shimicunaca ñucanchitaca ayudan?

¹⁴ Apóstol Pabloca ashtaca llaquicunatami aguantana tucurca. Paitaca shuj gentecunaca nalicachishpa rimarca, shinallata llaquichingapami catirianajurca. Gentecuna shina tratashca jahuapash apóstol Pabloca fuerza illajmi sintirirca. Chaimi cashna nirca: ‘Cashahuan tujsijshna ñuca cuerpota nanachihuajun’ nishpa (2 Cor. 12:7, MTQI ). Shina llaquicunata charishpapash paica Jehová Diosta sirvinataca na saquircachu. Jehovapimi tucui shunguhuan confiarca (2 Corintios 12:9, 10, liingui). Chaimandami Jehová Diosca apóstol Pablotaca ayudarca.

15. Llaquicunahuan cashpapash ¿imatata yaria cana capanchi?

¹⁵ Apóstol Pablotashnami ñucanchicunatapash Jehovata sirvimandaca gentecunaca nalicachishpa, shinallata catiriashpa llaquichingapapash munan. Huaquinbicarin ñucanchi salud nali caimandami llaquilla sintiripanchi. Shina cashpapash apóstol Pablopa ejemplota catina capanchi. Shina llaquicunahuan cashpapash Jehová Dios juyashcata, ñucanchita ayudajushcatami siempre yarina capanchi.

16. Huaquin huauquipanicuna irquilla cashpapash ¿imatata rurashca?

¹⁶ Huaquin huauquipanicunaca silla de ruedaspi, ricuitapash na ushan, puringapaj fuerzatapash ñana charin. Shinallata nali saludta charimandami jovengunashnaca na purita ushan. Shinapash mayorlla o jovenlla cashpapash para siempre causaiguta chasquingapaj carrerapica calpaita ushanmi. ¿Imashinata paicunaca cai carrerapi calpajunshna calpaita ushan? Paicunataca Jehová Diosmi fuerzata cushpa ayudan. Shinallata paicunaca telefonopi, internetpi o celularpi descargashpami tandanajuicunataca uyaita ushan. Paicunaca Jehová Diosmanda villachishpapashmi catita ushan. ¿Imashinata villachishpa catita ushan? Paicunaca familiacunaman, doctorcunaman o enfermeracunamanbashmi villachita ushan.

17. Shuj huauqui o shuj pani irquilla cajta ricushpaca ¿imatata Jehová Diosca rurangapaj munan?

¹⁷ Irquilla o nali saludta charishpapash ama desanimaripashunchichu. Ashtahuangarin para siempre causaiguta chasquina carrerapica ashtahuan calpashpa catipashunchi. Jehová Diosca paipi crishcamanda, paita tucui shunguhuan  sirvishcamandami ñucanchitaca juyan. Llaquicunapi cajpipash Jehová Diosca ñucanchitallaca na saquingachu (Sal. 9:10). Ashtahuangarin Jehová Diosca ñucanchita ayudangapami chapariajun. Cunanga shuj panigupa causaimanda yachajupashun. Paica irquillapachami carca. Paica ninmi: “Ashtahuan ashtahuanmi ñucaca na valishpa catijurcani. Shina na valijuimandami Jehová Diosmanda parlaitapash na ushajurcanichu. Masqui ashaguta paimanda parlajpipash Jehová Dios ñucata alicachishpa ricujujtami pensarini. Shina pensarinami ñucataca cushilla sintirichun ayudahuan” nishpa. Llaquilla sintirijushpapash Jehová Dios ñucanchita ayudanataca seguromi cana capanchi. Shinallata apóstol Pablopa ejemplotapashmi yarina capanchi. Paica cashnami nirca: “Ninan llaquicuna japijpipash, ninandami cushijuni. Ashtahuangarin imata na rurai ushashpapash, ashtahuanmi shinlli” tucuni nishpa (2 Cor. 12:10).

18. Huaquin huauquipanicunaca ¿ima llaquicunatata charin?

¹⁸ Huaquin Jehovata sirvijcunaca shuj shuj llaquicunatami charin. Huaquin huauquipanicunaca imamandapash yapata preocuparishpami irquilla paran. Cutin shujcunaca depresión ungüitami charin. Shina huauquipanicunataca shuj huauquipanicunaca na intindita ushanllu. Caipi pensaripashunchi. Shuj huauqui o shuj pani silla de ruedaspi cajta, maquita quibijpica paicuna nanachijujtaca shuj huauquipanicunaca cuenta japinllami. Chaita ricushpami paicunataca ayudangapapash munan. Cutin depresión ungüita charijcuna o imamandapash yapata preocuparij huauquipanicuna llaquilla yalinajujtaca chai huauquipanicunaca talvez na intindita ushangachu. Paicunaca tullu faquirijpi ninanda nanachijuj cuendami sintirin. Shina sintirijujpipash huauquipanicuna paicunata na intindimandami juyaitapash, paicunata cuidana cashcatapash na intindin.

19. Mefibóset runagupa causaimanda yachajunaca ¿imashinata ñucanchitaca ayudan?

¹⁹ Ñucanchi llaquilla sintirijujpica Mefibóset runagupa causaimanda yachajunami ayudanga (2 Sam. 4:4). Mefibosetca huahuamandapachami suchugu quedashca carca. Shinallata rey Davidpashmi paitaca yangamanda juchachishcarca. Shina juchachichunga Mefibosetca na culpata charircachu. Shinapash cai llaquicuna paita desanimachichunga na saquircachu. Chaipa randica David paita ayudashcatami siempre yarirca (2 Sam. 9:6-10). Chaimi David paita yangamanda juchachijpipash Mefibosetca na culirashpa na resentido causajurcachu. Shinallata David pandarishcata yarishpa, Jehová Diostara culpashpaca na causajurcachu. Chaipa randica Jehová Dios agllashca reyta apoyangapami esforzarirca (2 Sam. 16:1-4; 19:24-30). Ñucanchicuna yachajuchunmi Mefibosetpa causaitaca Jehová Diosca paipa Shimipi escribichishpa saquishca (Rom. 15:4).

20. a) Imamandapash yapata preocuparij huauquipanicunaca ¿imashinata can? b) Shina llaquicunata charijcunaca ¿imatata seguropacha cana can?

 ²⁰ Imamandapash yapata preocuparij huauqui o panica cada punllami pihuanbash parlanataca manllaihuan causan. Shinallata ista gentecunahuan yalinatapash na gushtanllu. Shina manllaita charishpapash tandanajuicunaman, asambleacunamanbash ringapaj esforzarin. Huaquinbicarin na rijsishca gentecunahuan parlana shinlli cajpipash villachingapapashmi llujshin. Quiquin shina sintirijushpaca, na quiquinlla shina yalijupanguichu. Tauca huauquipanicunami shina llaquita charin. Ñucanchi usharishcaguta Jehová Diospa rurajpi pai cushilla sintirijtami siempre yarina capanchi. Cunangaman Jehová Diosta sirvishpa catijuimandami Jehová Dios ayudajushcata, fuerzata cushpa catijushcatapash ricuita ushapanchi * (Filip. 4:6, 7; 1 Ped. 5:7). Masqui salud nali cashpapash, imamandapash yapata preocuparishpa llaquilla sintirijushpapash Jehovata tucui shunguhuan sirvipashunchi. Shina rurajuimanda Jehová Dios cushilla cajtaca seguropachami cana capanchi.

21. Jehovapa ayudahuanga ¿imatata chasquipashun?

²¹ Imashinami ña yachajupashcanchi. Shuj carrerapi calpajcunaca mishashpa, premiota chasquingapapachami calpanajun. Shinapash apóstol Pablo parlashca carreraca shujpachami carca. Apóstol Pablopa punllacunapica shujllami premiotaca ganan carca. Cutin tucui shunguhuan Jehovata sirvijcunaca para siempre causanataca tucuicunami chai premiotaca chasquipashun (Juan 3:16). Carrerapi calpajcunaca paicunapa cuerpopash, saludpash alimi cana carca. Na sanocuna cashpaca carrerata ganaitaca na ushanmanllu carca. Shinapash para siempre causaiguta chasquina carrerapica na shinachu can. Cunanbi ashtaca huauquipanicunaca paicunapa saludhuanbash nalimi can. Shina llaquicunahuan causanajushpapash aguantashpami catinajun (2 Cor. 4:16). Jehová Diospa ayudahuanllami para siempre causaita tucuicunallata chasquingacaman calpashpa catina capanchi.