1, 2. a) Jubileoca ¿imata can? ( Jubileoca ¿imata can? nishca recuadrota ricupangui). b) Lucas 4:16-18​pica ¿imamandata Jesusca parlarca?

HUAQUIN llactacunapica pipash rey shina 50 huatacunata mandajushcata yaringapami shuj jatun fiestata ruran. Cai fiestataca jubileo nishpami rijsin. Cai fiestaca shuj punllata, shuj semanata o ashtahuan punllacunatapashmi paran. Shinapash cai fiesta tucurijpica gentecunaca cunganllami.

² Israel llactapica cada 50 huatacunapimi shuj jatun fiestata ruran carca. Cai temapica gentecunapa fiestacunatapash yali, israelitacunapa fiestacunatapash yali shuj alipacha fiestamandami yachajugripanchi. Israelitacunaca Cacharirina huatata o Jubileo nishca fiestataca shuj huata enterotami yarin carca. Chai huatapica israelitacunaca huaquin cosascunamandami cacharirin carca. Shinapash caimanda yachanaca ¿imapita ñucanchitaca ayudan? Israel llactapi Cacharirina huata o Jubileo nishca jatun fiestaca Jehová Dios ñucanchicunata para siempre quishpichingapaj imata rurashcata yarichunmi ayudan. Cai cacharichishcamandami Jesusca parlarca (Lucas 4:16-18, liingui).

3. Levítico 25:8-12​pi nishca shinaca Jubileoca ¿imacunapillata israelitacunataca ayudan carca?

³ Jesús imata nishcata ali intindingapaca Jehová Dios israelitacunaman Cacharina huata o Jubileo nishca jatun fiestapi imata rurachun mandashcatami yachana capanchi. Jehová Diosca nircami: Ña 50 huata tucujpimi, ‘chai huatataca Diospajlla cachun shicanyachina canguichi. Shinallata Israel llactapi causajcunapaca, tucui imamandapash cacharirina huata nishpami, chai llactapi villana canguichi. Chai huatapica, cutin tigrachina huatami. Shinami, tucuicuna cangunapa alpacunaman tigranguichi. Shinallata tucuicunami, paicunapa familiacunapaman tigranajunga’ nishpa (Levítico 25:8-12, liingui). Chaishuj temapica israelitacuna semanapi samana punllata charishcamanda ima bendiciongunatalla charishcatami yachajuparcanchi. Cunanga Jubileo nishca jatun fiesta tiashcamanda ima bendiciongunatalla  israelitacuna chasquishcatami yachajupashun. Caipi yuyapai, shuj israelita dibi tucushcamanda, chai dibita pagangapaj shuj alpaguta jatuna tucushcanman. Jubileo fiesta chayamujpica israelitamanga cutinmi paipa alpata tigrachina carca. Shinami paipa huahuacunapa herencia alpataca chari usharca. Shinallata culquigu illaimanda shuj dibita pagangapaca shuj israelitaca paipa shuj huahuata jatushpa o paillatapashmi esclavoshna rina carca. Shinapash Jubileo fiesta chayamujpica cai esclavoca cutinmi ‘paipa familiacunapaman tigran’ carca. Jubileo tiashcamandami tucui esclavocunaca ima punllapash libre quedana cashcata yacharca. Caita yachashpaca Jehová Dios paipa sirvijcunapi ninanda preocuparij cashcatami ricupanchi.

4, 5. ¿Imata yachajunata ñucanchitaca cushilla sintirichun ayudan?

⁴ Jubileoca ¿imapipashta ayudan carca? Jehová Diosca israelitacunataca nircami: ‘Cangunapurapica, mañashpa purij runa ama tiachunmi’ ricuna canguichi. ‘Canguna japishpa causana llactapimi’ ñucaca ‘ninanda bendiciasha’ nishpa (Deut. 15:4). Shinapash cunan punllacunapica charij gentecunaca ashtahuan charijyangapaj munajta, cutin pobre gentecunaca ashtahuan pobreyashpa catijtami ricupanchi.

⁵ Moisesman cushca Leypica esclavocunata libre saquichi, paicunapa alpacunata tigrachichi nishpami mandajurca. Shinapash ñucanchicunaca Moisesman cushca Leytaca na catipanchichu (Rom. 7:4; 10:4; Efes. 2:15). Shinapash israelitacunata cacharichingapaj Jehová Dios imata rurashcata, imata rurachun mandashcata yachanami ñucanchicunatapash cushilla sintirichun ayudan.

6. ¿Imamandata salvachun minishtinchi?

⁶ Tucui gentecunami juchayucuna caimandaca mayor tucun, irquiyan, huañuitapash huañun. Ñucanchillatapash juchayucuna caimandami shina llaquicunata charimanda imapash nanaita o ungüicunatapash charinchi. Imapash nalita rurashpapash ninanda llaquiyanchi. Chaimi tucuicunallata juchamanda salvachun minishtinchi. Apóstol Pabloca nircami: “Ñuca cuerpopi tiajcunata juchata rurachun mandajujmi, ñucataca prezushcatashna charijun”. ‘¡Imapajpash na valij, aij ñucalla! Huañuchun charijuj cai cuerpomandaca, ¿pita ñucataca cacharichihuangayari?’ nishpa (Rom. 7:23, 24).

7. ¿Imatata profeta Isaiasca nirca?

 ⁷ Jehová Diosca juchamanda salvangapami Jesusta cai Alpaman cachamurca. Jesús cai Alpaman shamungapaj 700 yali huatacuna faltajpillatami profeta Isaiasca jipa punllacunapi juchamanda cacharichina tianata villarca. Caica Jubileo jatun fiestapi esclavocuna libre cashcatapash yalimi cagrijurca. Isaiasca nircami: ‘Jatun Diospa espiritumi ñucapica causajun. Mandaj Diosmi ñucataca, aceiteta talishpa javihuarca. Ñucataca, llaquilla causajcunaman ali villaita villachun, shungu faquirinshna llaquirijcunata ayudachun, prezu causajcuna cacharichi tucunata villachun, prezo tianajujcunamambash, paicuna ña Ilujshina chayamushcata villachunmi cachamuhuarca’ nishpa (Is. 61:1). Caipica ¿pimandata parlajurca?

8. Profeta Isaías nishca profeciapica ¿pimandata parlajurca?

⁸ Cacharichinamanda parlaj profeciaca Jesús villachi callarijpimi pactari callarirca. Jesusca Nazaret llactapimi viñarca. Nazaretpi tiashca sinagogaman yaicushpaca profeta Isaías escribishca shimicunatami Jesusca liirca. Cai shimicunaca paipillata pactarijushcatami intindichirca. Jesusca: ‘Diospa espiritumi ñucapi causajun. Imagutapash na charijcunaman ali villaita villachunmi, Taita Diosca aceiteta talishpa javihuashca. Shungu faquirinshna llaquirishpa causajcunatapash cushichichunmi cachamuhuashca. Prezocunamambash ñami cachari tucugringuichi nishpa villachunmi cachamuhuashca. Ñausacunatapash alichijuchunmi cachamuhuashca. Ninanda llaquichijpi causajcunatapash cacharichunmi cachamuhuashca. Jatun Dios quishpichina huata chayamushcata villachumbashmi cachamuhuashca’ nircami (Luc. 4:16-19). Jesusca ¿imashinata cai profeciataca pactachirca?

9. Jesuspa punllacunapi gentecunaca ¿ima pasachunda shuyanajurca?

⁹ Profeta Isaías cacharichinamanda parlaj profeciaca punda siglopimi pactari callarirca. Cai profeciatami Jesusca liirca. Paica nircami: ‘Dios escribichishca Shimipi chashna nijushca shimicunaca, cunanllatami canguna uyanajujpi pactarimushca’ nishpa (Luc. 4:21). Jesusta uyashca tauca judiocunaca romanocuna paicunata mandashpa catichunga na munarcachu. Paicunaca ishcai jaricuna cuendami ‘paimi israelcunata quishpichinga yashpa shuyanajurcanchi’ nishpa pensanajushcanga (Luc. 24:13, 21). Shinapash Jesusca ima punllapash paipa catijcunataca, romanocunataca na cazunachu canguichi nishpaca na mandarcachu. Chaipa randica “Cesarpaj cajpica, Cesarmanllatami cuna canguichi” nishpami mandarca (Mat. 22:21). Shinaca ¿imashinata Jesusca paipa tiempopi causaj gentecunataca salvarca?

10. Jesusca ¿imamandata gentecunataca cacharichirca?

 ¹⁰ Jehová Diosca gentecunata caicunamanda cacharichichunmi Jesustaca cachamurca. Primero, panda yachachishcacunamanda. Judiocunata ñaupaman pushajcunaca pandacunatami gentecunamanga yachachin carca. Chaimi judiocunaca gentecunapa yanga costumbrecunata, panda yachachishcacunataca esclavocunashna catin carca (Mat. 5:31-37; 15:1-11). Judiocunata ñaupaman pushajcunaca, Taita Diosta ali sirvichunmi gentecunataca yachachinajunchi ninmi carca. Shinapash paicunallatapash Jehová Dios munashcashnaca na sirvinajurcachu. Jesús Mesías cajta negashpa, paipa yachachishcacunatapash na catishpaca Jehovatami na cazunajurca. Shinami paicunaca juchamandapash na salvarirca (Juan 9:1, 14-16, 35-41). Jehovamanda cabalguta yachachishpami Jesusca humilde gentecunataca panda yachachishcacunamanda cacharichirca (Mar. 1:22; 2:23–3:5).

11. Jesusca ¿imata rurashpata gentecunataca salvarca?

¹¹ Segundo, Jesusca pai huañushpami gentecunataca juchamanda salvarca. Jehová Diosca Jesús huañushcapi feta charijpi, Jesuspi crishcata ricuchijpimi gentecunapa juchacunataca perdonan (Heb. 10:12-18). Jesusca nircami: ‘Diospa Churi cashpa, canguna gañan [o esclavo] causanajujmanda ñuca cacharichijpimi, cachari tucushcapacha canguichi’ nishpa (Juan 8:36). Jesús cacharichishcaca, israelitacuna Jubileo nishca fiestapi cachari tucushpa cushichishcatapash yalimi cushichin. Por ejemplo, Jubileo nishca fiestapi libre quedashca esclavoca libre quedashpapash cutinmi esclavo tucushpa huañuitapash huañuna carca. Cutin Jesús paipa causaita cushpaca juchamanda esclavoshna causaimandaca para siempremi salvagrijurca.

12. Jesús liishca profeciamandaca ¿picunata callaripica beneficiarirca?

¹² Huata 33 Pentecostés punllapimi Jehová Diosca paipa espiritu santohuan Jesuspa apostolcunata, shuj gentecunatapash paipa huahuacunatashna agllarca. Chaimi paicuna huañujpipash shuj tiempo jipaca, Jehová Dios paicunata causachishpa Jesushuan cielopi mandachun churana carca (Rom. 8:2, 15-17). Paicunami Nazaret sinagogapi Jesús nishca profeciamandaca beneficiarirca. Chaimi paicunaca judiocunapa yanga costumbrecunamanda, panda yachachishcacunamandapash ñana esclavocunashna carca. Paicunatami Jehová Diosca paipa espiritu santohuan paipa huahuacunatashna agllarca. Chaimi paicunaca juchamanda libre quedashpa, huañuitapash na huañuna carca. Huata 33​pimi Jesuspa catijcunapaca shuj Jubileo fiestashna tiai callarirca. Chai huatapimi Jehová Diosca paipa huahuacuna cachun agllai callarirca. Cai fiestaca Jesús ña mil huatacunata mandai tucuchijpimi tucuringa. Jesús ña mil  huatacunata mandai tucuchingacamanga ¿imata pasanga?

13, 14. ¿Picunapashta cacharichi tucunga?

¹³ Cunanbica ‘shuj llamagucunaca’ shuj shuj llactacunamanda, ashtaca ashtaca humilde gentecunami can (Juan 10:16). Jehová Diosca paicunata Jesushuan jahua cielopi mandachunga na agllarcachu. Ashtahuangarin Bibliapi nishcashnami paicunaca cai Alpapi para siempre causanga. ¿Quiquinga cai Alpapi causanatachu shuyajupangui?

¹⁴ Jahua cielopi Jesushuan mandangapaj rijcunashnami ñucanchicunapash huaquin bendiciongunata chasquinajupanchi. Por ejemplo, Jesús ñucanchimanda huañushca cajpimi paipi feta charinchi. Chaimi Jehová Diosca ñucanchicunapa juchacunatapash perdonaita ushashca. Shinallata Jehovapa ñaupajpi ali caita ushanchi, ali concienciatapash chari ushapanchi (Efes. 1:7; Apoc. 7:14, 15). Ashtaca huatacunatami panda yachachishcacunata crishpa causarcanchi. Chai panda crishcacunamandami Jesusca ñucanchita cacharichishca. Jesusca nircami: “Na llullashpa villashcami, cangunataca cacharichinga” nishpa (Juan 8:32). Panda crishcacunamanda ña cacharichishca cashpaca cushillami sintiripanchi.

15. a) Shamuj punllacunapica ¿imashina causaitata charipashun? b) ¿Ima bendiciongunatata chasquipashun?

¹⁵ Shamuj punllacunapica imapash panda yachachishcacunamandaca ña cacharichishcapachami causashun. Ñallapachami Jesusca panda  religiongunata, cai Alpamanda gobiernocunatapash tucuchinga. ‘Pipash na cuentai ushanalla ashtaca gentecunataca’ Jehová Diosca cuidashpami catinga. Shinallata cai Alpa shuj paraíso tucujpica, chaipi causachunmi bendicianga (Apoc. 7:9, 14). Adanba juchamanda gentecunata perdonashpami huañushca gentecunata Jehová Diosca causachinga (Hech. 24:15).

16. Jesús ña mil huatacunata mandajujpica ¿imashinata gentecunaca canga?

¹⁶ Jehovapa Reinopi Jesús ña mil huatacunata mandajushpaca, gentecuna alipacha saludta charichun, Jehová Diosta tucuilla gentecuna sirvichunmi Jesuspash, ungidocunapash ayudanga. Shinaca punda tiempopi israelitacunashnami Cacharirina huata o Jubileo fiestashna canga. Chaipimi Jehovata tucui shunguhuan sirvijcunaca jucha illajcuna tucunga.

17. Isaías 65:21-23​pi nishca shinaca ¿imashina causaitata charipashun? (Callari paginapi fotota ricupangui).

¹⁷ Isaías 65:21-23 (chai textota liingui). Cai textopimi cai Alpa shuj paraíso tucujpi imashina causai tianata ricuchijun. Jehovata sirvijcunaca ¿imatashi ruranga? Jehovata sirvijcunamanda Bibliapi parlashpaca paicuna imata rurashpa, imata trabajashpapash paicunapallata trabajashpami cushilla sintiringa ninmi. Shinallata Jesús mil huatacunata ña mandai tucuchijpimi ‘Dios rurashca ima tiajcunapash, yanga yanga ismushpa tucurinamandaca, paillata cacharichinga. Paipa huahuacuna punchapambapi causagrichun, Taita Diosllata cacharijpimi, chaicunapash cachariringa’ (Rom. 8:21).

18. Shamuj punllacunapi cushilla causanataca ¿imamandata seguro caita ushapanchi?

¹⁸ Punda tiempopica trabajachun, samangapaj tiempota charichunmi Jehová Diosca israelitacunataca ayudarca. Shinallatami Jesús ña mil huatacunata mandajujpica paita sirvijcunatapash ayudanga. Chai punllacunapica Jehovata sirvingapami tiempota charipashun. Cunanbipash, shamuj punllacunapipash Jehovatalla sirvishpami, ciertopacha cushilla causapashun. Tucuilla Jehovata sirvij gentecunami paraisopica cushilla trabajashpa, Jehovatalla sirvishpa causanajushun.