1, 2. Angelitopa experienciamandaca ¿imatata yachajupanchi?

¿TESTIGO taitamamacunatachu charipangui? Testigo taitamamacunata charimandallaca na quiquinbash Jehovapa amigoca capanguichu. Cada unomi Jehovapa amigocuna cangapaca esforzarina capanchi.

² Cunanga Angelito huauquimanda yachajupashunchi. Paica testigo familiapimi viñarca. Pai joven cashpaca Jehovataca paipa amigotashnaca na ricunllu carca. Huauqui Angelitoca: “Ñuca familia Jehovata sirvijushcamandallami, ñucapash Jehovataca sirvin carcani” nin. Shinapash paimandallatami Bibliata liingapaj, liishcapi pensaringapaj, Jehovata ashtahuan mañangapaj esforzarirca. Chaita ruranaca ¿imapita huauquitaca ayudarca? Angelitoca ninmi: “Jehovata ali rijsishpalla, paita ñuca alipacha amigotashna ricui ushashcatami yachajurcani” nin. Angelitopa experienciamandami ñucanchicunapash cashna tapurina capanchi: ¿Jehovamanda yachana, paita rijsinahuanga igualchu can? ¿Imashinata Jehovataca rijsi ushapanchi? nishpa.

3. Jehovamanda yachaimandallachu ¿Jehovataca alimi rijsini nita ushapanchi?

³ Diospa shutita, pai imacunatalla rurashcata ricuimanda o pai imatalla nishcata yachaimandallachu ¿Jehovataca alimi rijsini nita ushapanchi? Jehovata ali rijsingapaca paimanda yachajungapaj, pai imashna cashcata yachajungapami tiempota llujchina capanchi. Shinallami Jehová Dios imamanda shina nijta, imatapash rurajta ali intindi ushapashun. Shinami ñucanchi ruraicunata Jehová Dios alicachijta o na alicachijta yachajupashun. Jehová Dios imata rurachun munashcata ña yachashpaca, uchallami pactachingapaj esforzarina capanchi.

4. Moisespa, rey Davidpa ejemploca ¿imatata ricuchin?

 ⁴ Huaquin gentecunaca ñucanchicuna Jehovata sirvingapaj munajpi, o tandanajuicunaman ri callarijpimi burlarishpa ricunga. Shina pasajpipash Jehová Diosca siempremi ñucanchitaca cuidanga. Jehovata sirvingapaj munashpa, tandanajuicunaman rishpami ñucanchicunaca Jehovapa ali amigocuna tucui ushashun. Shinapash ¿ciertopachachu Jehovataca rijsi ushapanchi? Ari, rijsi ushapanchimi. Moisespash, rey Davidpash ñucanchishnallata juchayucunami carca. Paicunapa ejemplomi Jehovata rijsi ushashcata ricuchin. Cunanga paicuna imacunatalla rurashcata, imashina Jehovata rijsi ushashcata, ñucanchicuna paicunamanda imata yachajui ushashcatapashmi yachajupashun.

5. Moisesca ¿imata rurarca?

⁵ Moisesca Jehovata sirvinatami agllarca. Moisés casi 40 huatacunata charishpaca Jehovapa llactapa ladomi tucurca. “Faraonbaj ushipaj churimi cangui” nichunga Moisesca na munarcachu (Heb. 11:24). Moisesca gentecunapa ñaupajpi rijsishca rijsishca cangapaca na munarcachu. Moisés israelitacunapa lado tucujpi faraón paihuan ninanda culiranataca alimi yacharca. Egipciocunaca faraondaca shuj diostashnami ricun carca. Israelitacunapa lado tucushpaca Jehová Diospi crishcata, pai ayudanapi confiashcatami Moisesca ricuchirca. Shina confianami Moisestaca Jehovapa alipacha amigo tucuchun ayudarca (Prov. 3:5).

6. Moisesmandaca ¿imatata yachajupanchi?

⁶ Moisesmandaca ¿imatata yachajupanchi? Moisés shinami tucuicunallata Jehovata sirvinata, paipa sirvijcunahuan tandanajushpa paita sirvinata o na sirvinata agllana capanchi. Jehovata sirvingapaca, ashtaca cosascunatami huashaman saquina capanchi. Shinallata Jehovata sirvijpica shujcunaca contrashpami ricunga. Shinapash tucui shunguhuan Jehovapi confiajpica, Jehovallatami ñucanchitaca ayudanga.

7, 8. Moisesca ¿imatata Jehovamanda yachajushpa catirca?

⁷ Moisesca Jehovapa munaita ruranata, Jehová imashna cajtapash yachajushpami catirca. Por ejemplo, Jehová Dios Egiptomanda israelitacunata llujchinami cangui nijpica Moisesca cutin cutinmi na ushashachu nirca. Moisés imashina sintirijujta ricuimandami Jehová Diosca, Moisesta llaquishpa ayudarca (Éx. 4:10-16). Jehová Dios ayudajpimi Moisesca, na manllashpa faraonmanga Jehová llaquichigrinmi nishpa villarca. Moisesca, Jehová Dios israelitacunata salvangapaj paipa ninan ushaihuan faraonda paipa soldadocunatapash mar Rojopi tucuchijtami ricurca (Éx. 14:26-31; Sal. 136:15).

⁸ Egiptomanda israelitacunata Moisés llujchishca jipaca, israelitacuna cutin cutin quejarinajujtami Moisesca ricurca. Shina quejarishpalla causanajujpipash, Jehová Dios israelitacunata pacienciahuan tratajtami Moisesca ricurca (Sal. 78:40-43). Jehová Dios paipa nishcata cambiashpa, humilde cajtapashmi Moisesca ricurca (Éx. 32:9-14).

9. Hebreos 11:27​pica Moisesmandaca ¿imatata nin?

⁹ Egiptomanda llujshishca jipaca Moisesca, Diosta ricujunshnami causan carca. Shinami Jehovapa alipacha amigo carca (Hebreos 11:27, liingui). Bibliapica: “Maijan cashpapash, paipaj cumbahuan imashna parlanshnallatami Mandaj Diosca, Moiseshuan ñavi ñavi parlan carca” ninmi (Éx. 33:11).

10. Jehovata ali rijsingapaca ¿imatata rurana capanchi?

¹⁰ Caimandaca ¿imatata yachajupanchi? Jehová Diosta ali rijsingapaca, pai imashna cajta rijsishpapash, paipa munaitami rurashpa causana capanchi. Jehovapa munai maijan  cashcataca Bibliapimi ricuchijun. Bibliapica ninmi: “Paica, tucuicuna quishpirichunmi munan. Paimanda na llullashpa villajuj Shimitapash yachachunmi munan” nishpa (1 Tim. 2:3, 4). Shujcunaman Jehovamanda yachachishpami Jehovapa munaita pactachinajupanchi.

11. Shujcunaman Jehovamanda yachachishpaca ¿imatata cuenta japipanchi?

¹¹ Shuj gentecunaman Jehová Diosmanda yachachishpami Jehová Diostaca ashtahuan rijsipanchi. Por ejemplo, Jehová Dios, paimanda yachajungapaj munaj gentecunapaman chayachun ayudajta ricushpami, llaquij Dios cashcataca cuenta japipanchi (Juan 6:44). Bibliamanda yachajujcuna nali costumbrecunata saquijpi, Bibliapa nishcacunata pactachishpa causai callarijpimi Jehová Dios paipa ushaihuan paicunata ayudajujtaca cuenta japipanchi (Col. 3:9, 10). Paica gentecuna paimanda yachajuchun, na huañushpa causaiguta chari ushachunbashmi ñucanchicunataca cutin cutin paicunapaman cachan. Shinami Jehová Dios pacienciata charijta ricui ushapanchi (Rom. 10:13-15).

12. Éxodo 33:13​pica ¿imatata Moisesca mañarca?

¹² Moisesca Jehovapa amigo canatami alicachirca. Jehovapa ayudahuan tauca milagrocunata rurashca cashpapash Moisesca, ashtahuan canda rijsingapaj ayudahuai nishpami Jehovataca mañarca (Éxodo 33:13, liingui). Chai tiempopica Moisesca 80 yali huatacunatami charirca. Shinapash Jehovamanda ashtahuan yachajushpa catina cashcataca alimi yacharca.

13. Jehovapa amigocuna cashcataca ¿imashinata ricuna capanchi?

¹³ ¿Imatata yachajupanchi? Mashna huatacunata Jehová Diosta sirvijushpapash, paipa amigocuna cashcataca shuj bendiciondashnami ricuna capanchi. Chaimandami Jehovataca cutin cutin mañariana capanchi.

14. ¿Imamandata Jehovata mañanaca minishtirishcapacha can?

¹⁴ Pihuanbash ali amigocuna tucungapaca paihuanga cutin cutinmi parlana capanchi. Jehovapa amigocuna tucungapaca, cutin cutinmi paita mañajushpaca imashina sintirijushcata, imata pensashcatapash na manllashpa villanalla capanchi (Efes. 6:18). Turquía llactamanda Krista shuti paniguca: “Jehová Diosmanga tucui ñuca imata pensashcatami parlanilla. Ñuca mañaicunata uyashcata ricuimandami Jehovataca ñucapa alipacha amigotashna, ñuca taitatashna ricuni” nin.

15. Jehová Diosca ¿imatata rey Davidmandaca nirca?

¹⁵ Rey Davidpa taitamamacuna, shuj gentecunapash Jehovatami sirvin carca. Jehovata sirvij llactapimi rey Davidca nacirirca. Rey Davidca paipa taitamamacunashnami Jehovata sirvirca. Paica paillatami Jehovapa amigo tucurca. Chaimi Jehová Diosca Davidtaca shuj ali amigotashna ricun carca. Jehová Diosca rey Davidmandaca cashnami nirca: ‘Paimi, ñuca munashcashna imatapash rurajun’ nishpa (Hech. 13:22, NM). Rey Davidca ¿imashinata Jehová Dioshuan alipacha amigo tucurca?

16. Jehovapa rurashcacunata ricushpaca ¿imatata Davidca yachajurca?

¹⁶ Rey Davidca Jehovapa rurashcacunata ricushpami Jehovataca ali rijsirca. David joven cai horasca paipa taitapa llamagucunata pambapi michishpami purin carca. Pambapi llamagucunata michishpa purijushpami Jehovapa rurashcacunata ricushpa pensarijun cashcanga. Por ejemplo, tutapi estrellacunata o luzerocunatami ricun carianga. Chaicunata ricushpapashmi Jehová Dios imashnapacha cashcata cuenta japin carca. Chaimi Davidca: “Jahua pachaca, Taita Dios punchapamba cajtami villajun. Chaipi imalla tiajcunapash, paipaj  maquihuan rurashcatami villajun” nirca (Sal. 19:1, 2). Shinallata gentecuna imashina rurashca cashcata ricushpapashmi Davidca Taita Dios alipacha yachaj cashcata cuenta japirca (Sal. 139:14). Tucuita Jehová Dios rurashcata ricushpaca Davidca nimapa na sirvij cuendami sintirirca (Sal. 139:6).

17. Jehová Diospa rurashcacunapi pensarinaca ¿imamandata ali can?

¹⁷ ¿Imatata yachajupanchi? David cuendami ñucanchicunapash Jehovapa rurashcacunata ricuna capanchi. Cai alpapi causana cashcamandallaca ama causapashunchichu. Ashtahuangarin Jehovapa rurashcacunata ricushpami paimanda yachajuna capanchi. Cada punlla imaguta ruranajushpapash plantagucunata ricushpa, animalgucunata ricushpa, gentecunata Jehová Dios imashna rurashcacunapi pensaripashunchi. Shina pensarinami Jehová Dios shuj juyaj Taita Dios cajta rijsichun ayudanga (Rom. 1:20). Shinami Jehovataca cada punlla ashtahuan juyapashun.

18. Salmo capitulo 18​pi nishca shinaca Davidca ¿imatata ali intindirca?

¹⁸ Davidca siempremi Jehová Dios paita ayudashcata ricurca. Por ejemplo leonda, osota huañuchishpaca Jehová Dios ayudajpimi huañuchi ushashcani ninmi carca. Shinallata jatun jatun Goliat jarita huañuchishpapash Jehová Dios ayudashcatami Davidca nirca (1 Sam. 17:37). Rey Saúl, Davidta huañuchingapaj munajujpipash Jehová Dios paita cuidashcatami Davidca cuenta japirca (Sal. 18, callaringapaj shimicunata ricupangui). Shuj gentecunashna cashpaca Davidca jariyashcami sintiri ushanman carca. Shinapash Davidca humildemi carca. Humilde caimandami Jehová Dios paipa causaipi ayudashcata ricurca (Sal. 138:6).

19. Davidmandaca ¿imatata yachajupanchi?

¹⁹ Davidmandaca ¿imatata yachajupanchi? Ñucanchicunapash Davidshnami Jehovata ayudahuai nishpa mañai ushapanchi. Shina mañashpapash imashna, imahora ayudajtami cuenta japina capanchi. Humilde cashpaca ñucanchicuna imatalla rurai ushashcata, imata na rurai ushashcatami cuenta japipashun. Shinami Jehová Dios ñucanchicunata tucuipi ayudajta ricupashun. Jehová Dios ñucanchita siempre ayudajushcata ricushpaca Jehovahuanmi alipacha amigocuna tucupashun. Cunanga Fiyi llactamanda Isaac huauquimanda yachajupashunchi. Isaac huauquica ashtaca huatacunatami Jehovata sirvin. Paica ninmi: “Bibliata yachajushca punllamandapacha Jehová Dios ñuca causaipi ayudashcata ricushpaca ninandami cushijupani. Cunanga Jehová Dios ciertopacha tiajtami cuenta japipashcani” nishpa.

20. Jehovapa alipacha amigo canaca ¿imashinata Davidtaca ayudarca? Ñucanchica ¿imatata yachajupanchi?

²⁰ Davidca Jehová Dios imashna cajta ricushpami Jehovashna cangapaj munarca. Jehová Diosca tucuilla gentecunataca paiman rijchajtami rurashca (Gén. 1:26). Jehová Dios imashnapacha cajta rijsishpaca paishna cangapami ñucanchicunapash munashun. Jehová Diosca gentecunataca juyaihuanmi tratan. Shinallatami Davidpash shuj gentecunataca juyaihuan tratarca. Cunanga rey Davidpa causaimanda yachajupashunchi. Rey Davidca Bat-Seba huarmihuanmi huainayana juchapi urmarca. Chai jipaca Bat-Seba huarmipa cusata huañuchichunbashmi cacharca. David tauca juchacunata rurajpipash Jehová Diosca Davidtaca llaquishpami tratarca (2 Sam. 11:1-4, 15). Shinapash ¿imamandata Jehová Diosca Davidtaca llaquishpa tratarca? Rey Davidca Jehová Dioshnami carca. Shinallata shuj gentecunatapash llaquishpami tratan carca. Davidca Jehová Diospa alipacha amigomi carca. Chaimi Jehová Diosca Davidtaca ninanda juyarca. Shinallata rey Davidshnaca shuj reyca na tianllu nircapashmi (1 Rey. 15:11; 2 Rey. 14:1-3).

21. Efesios 4:24; 5:1​pi nishcata pactachishpaca ¿imashinata caita ushapanchi?

 ²¹ ¿Imatata yachajupanchi? Ñucanchicunaca Jehová Dioshna cangapami esforzarina capanchi. Jehová Dioshna cangapaj esforzarishpaca Jehovatami ashtahuan ali rijsita ushapashun. Jehovashna cangapaj esforzarishpaca Jehovapa huahuacuna cuendami tucushun (Efesios 4:24; 5:1, liingui).

22, 23. Jehovamanda yachajushcata ñucanchi causaipi pactachishpaca Jehovahuanga ¿imashinata cashun?

²² Jehová Diospa tucui rurashcacunata ricushpa, Bibliata liishpami Jehovataca alipacha rijsita ushapanchi. Tucui shunguhuan Jehovata sirvij Moisespa, Davidpa, shuj sirvijcunapa alipacha ejemplocunamandami Bibliapica yachajui ushapanchi. Shinami paita rijsichun Jehová Diosca ayudashca. Shinaca Jehovata ashtahuan rijsingapami esforzarina capanchi.

²³ Jehová Diosmandaca siempremi yachajushpa catipashun (Ecl. 3:11). Jehovata rijsini nishpallaca na quedanachu capanchi. Chaipa randica imata yachajushcatami ñucanchi causaipi pactachina capanchi. Shina pactachishpa causajujpica Jehová Diosca ñucanchipa alipacha amigomi tucunga (Sant. 4:8). Bibliapica ninmi, Jehová Diosta rijsingapaj munaj gentecunataca, Jehová Diosca nimahora na saquingachu nishpa.