1. Cusahuarmicunamanga Jehová Diosca ¿imatata mingashca?

ADANDA, Evataca huahuacunata charina munaihuanmi Jehová Diosca rurarca. Chaimi Bibliapica cashna nin: ‘Huahuacunataca Mandaj Diosmi carashca’ nishpa (Sal. 127:3). Caipi pensaripashunchi. Shuj alipacha amigo ashtaca culquita ñucanchi cuidachun mingashcanman. Shina mingajpica ñucanchipi confiashcatami ricupanchiman. Chai mingashca culquita cuidajushpaca ama shuhuachunmi cuidanchiman. Jehová Diosca ñucanchipa alipacha amigo caimandami chai culquitapash yali huahuacunata cuidachun, ali viñachichun cusahuarmicunamanga mingashca.

2. Cai temapica ¿ima tapuicunatata yachajupashun?

² Huahuacunata imahora charinataca ¿picunata ricuna can? Huahuacuna cushilla viñachunga cusahuarmica ¿imatata rurana can? Chaipaca Testigo cusahuarmicunata Jehová Diospa yachachishcacuna imashna ayudajta ricupashun.

3. a) Huahuacunata charinata o na charinataca ¿picunata ricuna can? b) Chairalla cazarashcapa familiacuna, amigocunapash ¿imatata yaipi charina can?

³ Huaquin llactacunapica cazarai na cazaraimi huahuacunata charina costumbreta charin. Chai llactacunapica familiacunapash, paicunapa amigocunapashmi huahuacunata charinami canguichi nishpa cutin cutin nin. Asia llactamanda Jethro shuti huauquica ninmi: “Congregacionmanda huahuacunata charij huauquipanicunaca, huahuata na charij huauquipanicunataca huahuacunata charinami canguichi nishpami cutin cutin ninata yachan” nishpa. Cutin Asia llactamandallata Jeffrey huauquica ninmi: “Canguna mayoryajpica pita cuidanga. Chaimi huahuacunata charina canguichi ninata yachan” nishpa. Shinapash cada cusahuarmimi huahuata charinata o na charinataca ricuna can.  Chai decisionbica pipash na satirinachu can (Gál. 6:5). Chairalla cazarashcacunapa familia, shuj gentecunapash cushilla causachun nishpami huahuata charinami canguichi ninata yachan. Shinapash huahuata charinataca cazarashca cusahuarmimi ricuna can (1 Tes. 4:11).

4, 5. a) Cazarashca cusahuarmicunaca ¿ima ishcai yuyaicunamandata parlarina can? b) Noviocuna cashpallata ¿imatata ña parlarina can?

⁴ Cazarashca cusahuarmicunaca, huahuacunata charingapaj munanajushpaca cai ishcai minishtirishca yuyaicunamandami parlarina can. Punda yuyai, imahora huahuacunata charinata parlarina. Cati yuyai, mashna huahuacunata charinata parlarina. Shinaca huahuacunata charinamandaca ¿imahorata ña parlarina can? Chaimanda parlarinaca ¿imamandata minishtirishca can?

⁵ Noviocuna cai horasllatami huahuacunata charinata o na charinata parlarina can. Caimanda parlarinaca minishtirishcapachami can. Shina parlarishpami ishcandi imata munashcata ricuita ushan. Shinallata huahuata cuidaitaca ushashunlla nishpa parlarinaca alimi can. Huahuacunaca paicunahuan tiempoguta yalichun, paicunata cuidachunbashmi minishtin. Chaimi huaquin chairalla cazarashca cusahuarmicunaca shuj o ishcai huatacuna jipa huahuacunata charishun nishpa parlarin. Shina parlarinami paicunapura ali rijsirichun ayudan (Efes. 5:33).

6. Tucurimui punllacunapi causanajujta ricushpaca huaquin Testigo cusahuarmicunaca ¿imatata decidishca?

⁶ Noeca quimsa churicunatami charirca. Chai churicunaca cazarashcami carca. Shinapash paicunaca huahuacunataca na ñapash charircachu. Cunanbipash huaquin Testigo cusahuarmicunaca paicunapa ejemplota catimandami huahuacunataca na ñapash charishca (Gén. 6:18; 9:18, 19; 10:1; 2 Ped. 2:5). Jesusca cunan punllacunataca ‘Noé causajui punllacunahuanmi’ chimbapurarca. Tucurimui punllacunapi causanajuimandami jatun llaquicunata ricupanchi (2 Tim. 3:1; Mat. 24:37). Shina punllacunapi causanajujta ricushpami huaquin Testigo cusahuarmicunaca huahuacunata na charingapaj decidishca. Shinami Jehovata ashtahuan sirvingapaj tiempoguta charishca.

7. Lucas 14:28, 29​pi, Proverbios 21:5​pi shimicunaca ¿imashinata cusahuarmicunataca ayudan?

⁷ Cusahuarmicuna huahuata charinata, mashna huahuacunata charinata munashpaca ‘culquigu pactanata, na pactanatami’ ali ali ricuna can (Lucas 14:28, 29, liingui). Huahuacunata cuidangapaj fuerzata, culquita, tiempotapash charina cashcataca huahuacunata  charij taitamamacunaca alimi yachan. Chaimandami cusahuarmicunaca cashna tapurina can: “Huahuacunata mantiningapaca ¿ishcandichu trabajana canchi? Ima minishtirishcaguhuanlla causanataca ¿ishcandichu igual pensanchi? Ishcandi trabajajpica ¿pita huahuacunataca cuidanga? ¿Pipa yachachishcacunatata yachajunga?” nishpa. Cusahuarmicuna cai tapuicunamanda na culirarishpa ishcandi parlarishpaca Proverbios 21:5​pi shimicunatami siempre yarinajun (chai textota liipangui).

8. a) Testigo cusahuarmicunaca ¿imapita pensarina can? b) Huarmiguta juyaj cusaca ¿imatata rurai ushan?

⁸ Huahuacunata ali viñachingapaca taitapash, mamapashmi tiempoguta, fuerzata minishtin. Cati cati huahuagucunata charishpaca cada huahuata ali cuidaitaca taitamamacunaca talvez na ushanllu. Tauca huahuacunata charij huaquin cusahuarmicunaca shaijushca, preocupadomi sintirishca. Huahuacunata cuidaimandami mamacunaca talvez llaquilla, shaijushca sintirin. Shina sintirimandami tandanajuipa prepararingapaj, Jehovata mañangapaj, villachingapapash na fuerzata charin. Shinallata tandanajuipi cashpapash ali uyaitapash na ushanllu. Shinapash huarmiguta juyaj cusaca tandanajuipi huahuata cuidashpa, huasipipashmi ayudaita ushan. Por ejemplo, huarmiguta juyaj cusaca huasipi imaguta rurana cajpipash ayudanmi. Shinallata Familiahuan Adorana Tutapi huahuacunapash, huarmigupash cushilla yachajuchunmi cusaca ayudan. Shinapash huahuacunahuan, huarmiguhuan villachingapami tiempota llujchina can.

9, 10. Huahuacunata ali viñachingapaca ¿imatata taitamamacunaca rurana can?

⁹ Huahuacuna Jehovata juyachunga ¿imatata taitamamacunaca rurana can? Cai nali mundopa ruraicunamanda cuidangapaca ¿imatata taitamamacunaca rurana can? Chaipaca huaquin yuyaicunata yachajupashun.

¹⁰ Huahuacunata ali viñachingapami Jehovata mañana capanchi. Cunanga Manóah jarigumanda, paipa huarmigumanda yachajupashunchi. Paicunaca Sansón shuti huahuagutami charigrinajurca. Chaita yachaj chayashpami Manoahca ali viñachingapaj ayudahuai nishpami Jehovata mañarca.

11. Jueces 13:8​pi nishca shinaca ¿imatata Manoahmandaca taitamamacunaca yachajuita ushan?

¹¹ Paúl y Cristina * cusahuarmica Manoahpa ejemplotami catirca. Paicunaca ninmi: “Manóah runagushnami, ñucanchi huahuaguta ali viñachingapaj ayudahuai nishpa Jehovata mañaparcanchi. Ñucanchi mañashcacunata Jehová Diosca uyarcami. Ñucanchi huahuaguta ali viñachichunga Bibliahuan, publicaciongunahuan, tandanajuicunahuan, jatun tandanajuicunahuanmi Jehová Dios ñucanchita ayudashcata ricuparcanchi” nin (Jueces 13:8, liingui).

12. Josepash, Mariapash ¿imatata paicunapa huahuacunamanga yachachirca?

 ¹² Quiquingunapa ruraicunahuanmi yachachina capanguichi. Huahuacunata imatapash rurachun mandanaca minishtirishcami can. Shinapash taitamamacunaca quiquingunapa ejemplohuanmi yachachina capanguichi. Chaita ricushpami huahuacunaca chaitallata rurangapaj munanga. Punda tiempopica Josepash, Mariapash paicunapa huahuacunapaca alipacha ejemplomi carca. Jesuspapash alipacha ejemplomi carca. Joseca familiata mantiningapaca shinllitami trabajarca. Shina trabajashpapash Jehovata ashtahuan sirvichunmi huahuacunataca yachachirca (Deut. 4:9, 10). “Pascua fiesta chayajpica, cada huatami Jerusalenman” Joseca paipa huahuacunata, paipa huarmi Mariatapash pushashpa rin carca. Shinapash Leypica chaita rurachunga na obliganllu carca (Luc. 2:41, 42). Chai tiempopi caru caruta rina, tucuilla huahuacunahuan rina shinlli cajpimi, huaquin taitamamacunaca talvez na rin cashcanga. Huaquinguna shina rurajpipash Jehovata sirvina ashtahuan minishtirishca cashcatami Joseca paipa huahuacunamanga yachachirca. Cutin María huarmiguca Taita Diospa Shimimandaca alipachami yacharca. Shinaca Mariaca paipa parlocunahuan, ruraicunahuanmi paipa huahuacuna Jehová Diosta juyachun yachachirianga.

13. Josepa, Mariapa ejemplota catingapaca ¿imatata shuj cusahuarmica rurarca?

¹³ Párrafo 11​pi yachajushca Paúl y Cristina cusahuarmicunaca Josepa, Mariapa ejemplota catishpami paicunapa huahua Jehovata juyachun, Jehovata sirvichun ayudarca. Paicunaca ninmi: “Ñucanchi ruraicunahuanmi ñucanchi churigu Jehovapa yachachishcacunata paipa causaipi pactachichun, cushilla causachun yachachinchi” nishpa. Paulca ninmi: “Huahuacuna ali viñachunga ñucanchirami ruraicunahuan ricuchina capanchi” nishpa.

14. ¿Imamandata taitamamacunaca huahuacunapa amigocuna picunalla cajta yachana can?

¹⁴ Ali amigocunata charichunmi ayudana capanguichi. Taitamamacunaca quiquingunapa huahuacuna picunahuanlla llevarijta, imatalla rurajtami ali yachana capanguichi. Shinallata Internetpi, redes sociales nishcapi, celularpi picunahuanlla escribirijta o parlajtami yachana capanguichi. Quiquinba huahua pihuanbash llevarishpaca paicunashnami pensaringa, paicunashna imatapash rurai callaringa (1 Cor. 15:33, NM).

15. Taitamamacuna ¿imatata Jessie shuti taitamandaca yachajupanguichi?

¹⁵ Computadorata, celularta, tabletta taitamamacuna na utilizaita yachashpaca ¿imatata rurana can? Filipinas llactamanda Jessie shuti taitaca ninmi: “Computadorata, celularta, tabletta na utilizaita ushashpapash imamanda peligroso cashcatami huahuacunamanga parlan carcanchi” nishpa. Shinapash chaicunata pai na utilizaita ushaimandallaca, ama utilizaichu nitaca na ninllu carca. Chai taitaca ninbashmi: “Ñuca huahuacunamanga computadorata, celularta, tablettaca shuj idiomacunata yachajungapaj, tandanajuipa ali prepararingapaj, Bibliata cada punlla liingapami chaicunataca utilizana canguichi nishpami yachachircani” nin. Taitamamacuna, quiquingunapa huahuacunahuanga jw.org paginapi celularpi, Internetpi imata escribishpa cachana ali cashcata, na ali cashcata, fotocunata cachanamanda parlaj temacunataca ¿ricupashcanguichichu? ¿Celularpi, tabletpi, computadorapillachu yapata yalingui? nishca videota, Internettaca aligutami utilizana cangui * nishca videotapash quiquingunapa huahuacunahuan ¿ricupashcanguichichu? Cai videota ricunami huahuacuna Internetta ali utilizachun ayudanga (Prov. 13:20).

16. Ashtaca taitamamacunaca ¿imatata rurashca?

 ¹⁶ Ashtaca taitamamacunaca paicunapa huahuacuna Jehovata ali sirvijcunahuan tiempoguta yalichunmi imagutapash ruran. Costa de Marfil llactamanda N’Déni y Bomine cusahuarmica chaitami rurarca. Superintendente de circuito huauquicunatami paicunapa huasigupi siempre mingachin carca. N’Déni huauquica ninmi: “Ñuca huahuapaca shina huauquipanicunahuan tandanajunaca alipachami carca. Paica precursormi tucurca. Cunanga superintendente de circuito sustituto shinami sirvijun” nishpa. Taitamamacuna, ¿nachu quiquingunapash quiquinba huahuacuna Jehovata ali sirvijcunahuan tandanajuchun ayudaita ushapanguichi?

17, 18. ¿Imahoramandata huahuacunataca yachachina can?

¹⁷ Huahuacunataca uchillagumandapacha yachachipaichi. Cunanmandallata huahuacunata yachachishpami alipacha canman (Prov. 22:6). Timoteopa mama Eunice, paipa abuela Loidapash Timoteotaca huahuamandapachami Jehová Diosmanda yachachirca (2 Tim. 1:5; 3:15). Chaimi Timoteo viñashpaca, apóstol Pablota paipa viajecunapi cumbarca.

¹⁸ Costa de Marfil llactamanda, Jean-Claude y Peace shuti cusahuarmicunaca paicunapa sujta huahuacunatami Jehová Diosta juyachun, sirvichunbash yachachirca. Paicunataca ¿imata ayudarca? Paicunaca Eunicepa, Loidapa ejemplota catishpami huahuacunataca yachachirca. Paicunaca ninmi: “Ñucanchi huahuacunataca llullu huahuacuna cashcamandapachami Bibliamandaca yachachin carcanchi” nin (Deut. 6:6, 7).

19. Bibliamanda huahuacunaman “yachachina” nishpaca ¿imatata ningapaj munan?

¹⁹ Bibliamanda huahuacunaman “yachachina” nishpaca ¿imatata ningapaj munan? Yachachina shimica imatapash “cutin cutin yarichina” cashcatami ningapaj munan. Chaipaca taitamamacuna huahuacunahuan yalingapami tiempoguta llujchina can. Huaquinbica cutin cutin yachachimandami talvez taitamamacunaca shaijushca, llaquilla, culirapash sintiri ushan. Shinapash culirajunapa randica huahuacunaman Bibliamanda yachachingapaj, chaipi nishcacunata pactachishpa causachunmi ayudana capanguichi.

20. Salmo 127:4​pi shimicunaca ¿imashinata huahuacunata ali viñachichunga ayudan?

²⁰ Na tucui huahuacunachu igual can. Salmo 127​pica huahuacunaca flechacunashnami can ninmi (Salmo 127:4, liingui). Huaquin flechacunaca  jirruhuan rurashca, caspihuan rurashcami can. Shinallata jatun, uchilla flechacunapashmi tian. Shina cuendami huahuacunapash diferente can. Chaimi taitamamacunaca quiquinba huahuacunapa edadta ricushpa yachachina capanguichi. Israel llactamanda shuj cusahuarmica paicunapa ishcai huahuacuna Jehovata ali sirvishpa causachunmi yachachirca. Paicunataca ¿imata ayudarca? Paicunaca ninmi: “Ñucanchi huahuacunapa edadta ricushpami Bibliamandaca yachachin carcanchi” nishpa. Shinapash taitami huahuacunapa edadta ricushpa yachachita ushan.

21. Huahuacunata ali viñachichunga ¿imashinata Jehová Diosca ayudan?

²¹ Taitamamacunaca, huahuacunata yachachinaca na fácil canllu ninmi. Shinapash Jehová Diosmi huahuacunataca carashca. Chaimandami huahuacunata ali viñachi ushachunga Jehová Diosllata ayudanga. Chaipaca Bibliata, publicaciongunata cushpa, ñucanchi mañaicunata uyashpapashmi ayudan. Shinallata experienciata charij ali taitamamacunapa ejemplohuanbashmi ayudan.

22. Taitamamacunaca ¿imatata huahuacunamandaca rurana can?

²² Huaquin gentecunaca 20 huatacunapimi huahuacunataca ali viñachita usharin nin. Shinapash taitamamacunaca siempremi huahuacunataca yachachishpa catina can. Taitamamacunaca ¿imatata huahuacunamandaca rurana can? Juyaihuan tratana, tiempoguta llujchina, Bibliamandami yachachina can. Cada huahuami Bibliamanda yachachishcataca pactachinata o na pactachinata decidin. Shinapash Jehovata sirvij taitamamacunahuan viñashca tauca huauquipanicunaca Asia llactamanda Joanna Mae panigushnami sintirin. Joannaca ninmi: “Ñuca taitamamacuna ñucata imashina viñachishcata yarishpami paicunataca agradicipani. Paicunaca Jehovata sirvichun, imapipash pandarijpi alita rurachunmi yachachihuarca. Paicunaca ciertopacha cushilla, ali causachunmi yachachihuarca” nishpa (Prov. 23:24, 25). Ashtaca huauquipanicunami Joanna panigushna paicunapa taitamamacuna ali viñachishcamandaca agradicishpa, cushilla sintirin.