1. Ashtaca gentecunaca ¿imatata trabajanamandaca yuyan?

ÑUCANCHI causajushca llactacunapica ¿imatata trabajashpalla yalinamandaca yuyan? Ashtaca llactacunapica gentecunaca trabajashpallami yalin. Chaimi samangapaj, paicunapa familiacunahuan cangapaj, Taita Diosmanda yachajungapapash na tiempota charin (Ecl. 2:23). Cutin shuj gentecunaca na trabajangapaj munaimandami imapash pretextocunata churan (Prov. 26:13, 14).

2, 3. Jehovamanda, Jesusmandapash ¿imatata yachajui ushapanchi?

² Cai mundopi ashtaca gentecunaca trabajashpallami yalin. Cutin shujcunaca na trabajangapaj munaimandami samashpalla yalin. Shinapash trabajanamandaca ¿imatata Jehová Diospash, Jesuspash yuyan? Jehová Diosca trabajanataca gushtanmi. Chaimi Jesusca: “Ñuca Taitaca, cunangaman imagutapash rurajunllami. Chaimandami, ñucapash rurajunilla” nirca (Juan 5:17). Caipi yuyapai. Jehová Diosca angelcunata, estrellacunata, planetacunatapashmi rurarca. Cai alpapipashmi ashtaca cosascunata rurashca. Chaimi Salmo librota escribij runaguca nirca: “¡Mandaj Dioslla, can rurashcacunaca, na cuentai ushanallamari! Tucui chaicunataca, cambaj ali yachaihuanmi rurashcangui. Cai pachaca, can carashca alicunahuan jundami” (Sal. 104:24).

³ Jehová Dios ‘jahua pachata rurajujpica’ Jesusca cushijushpami ayudarca (Prov. 8:27-31). Ashtaca huatacuna jipapash, cai Alpapi cashpaca ashtacatami rurarca. Jehová Diospa munaita ruranaca Jesuspaca shuj micunagushnami carca. Cai Alpapi cashpa Jesús imacunatalla rurashcaca Jehová Dios paita cachamushcatami  ricuchijurca (Juan 4:34; 5:36; 14:10).

4. Samanamandaca ¿imatata Jehovamanda, Jesusmandapash yachajupanchi?

⁴ Jehovapash, Jesuspash shinllita trabajajcuna cashcamandaca ¿ñucanchicunapash trabajajunalla cashcatachu ningapaj munan? Na, na chaitaca ninajupanchichu. Jehová Diosca imahorapash na shaijunllu, chaimi samanataca na minishtin. Cutin ñucanchicunaca shaijunchillami. Bibliapica Jehová Dios na shaijujlla cashpapash jahua pachata, cai Alpata, ‘tucuita rurashca’ jipaca ‘samarca’ ninmi (Éx. 31:17). Cai shimicunaca tucui tiashca cosascunata rurashca jipa, chai cosascunata paipash ricungapaj samashcatami ricuchin. Jesuspashmi cai Alpapi cashpaca shinllita trabajarca. Shinapash paipa amigocunahuan cangapaj, micungapaj, samangapapash tiempota llujchinmi carca (Mat. 14:13; Luc. 7:34).

5. Tauca huauquipanicunapaca ¿imata na fácil can?

⁵ Bibliapica ninmi, Jesusta ali catijcunaca na quillanayachishpami imagutapash uchalla rurana can nishpa (Prov. 15:19). Ñucanchi familiata mantiningapami trabajana capanchi. Shinapash tucuicunallatami Diospa Reinomanda ali villaigucunata villachingapaj llujshinapacha capanchi. Chaicunata rurashca jahuapash samanami capanchi. Tauca huauquipanicunapaca trabajangapapash, villachingapapash, samangapapash tiempoguta llujchinaca na facilchu can. Shinaca ama trabajashpalla o samashpa yalichunga ¿imata ayudanga?

6. Marcos 6:30-34​pi nishca shinaca ¿imatata Jesusca trabajanamanda, samanamandapash yuyan carca?

⁶ Na trabajashpalla yalinachu capanchi. Taita Dios yarichijpimi rey Salomonga escribirca: ‘Tucuipami chai punllaca chayamun’ nishpa. Shinallata ‘tarpungapaj, imatapash shayachingapaj, huacangapaj, asingapaj, bailangapapash chai punllami chayamun’ nishpa (Ecl. 3:1-8). Trabajana, samanapash minishtirishcapachami can. Jesusca trabajangapapash, samangapapashmi tiempota llujchin carca. Shuj punllaca Jesuspa catijcunaca villachishpa ocupado caimandami ‘micuitapash na’ micushca carca. Chaimi Jesusca cashna nirca: “Ashaguta samangapaj, ñucanchilla jacuchi” nishpa (Marcos 6:30-34, liingui). Jesuspash paipa catijcunapash paicuna munashcashnaca na samai ushanllu carca. Jesuspa catijcuna samana cashcataca Jesusca alimi yacharca.

7. Moisesman cushca Leypi samana punllamandaca ¿imatata yachajupanchi?

⁷ Huaquinbica samana o shuj cosascunata ruranaca minishtirinmi. Chaimi Jehová Diosca Moisesman cushca Leypica israelitacunataca sábado o samana punllataca samanapachami canguichi nirca. Ñucanchicunaca Moisesman cushca Leytaca na catinajupanchichu. Shinapash samana punllamanda yachajunaca alimi can. Caicunami ama trabajashpalla yalichun, samanapash minishtirishca cashcata intindichun ayudanga.

8. Éxodo 31:12-15​pi nishca shinaca ¿imatata israelita cunaca samana punllapica rurana carca?

⁸ Bibliapica Jehová Dios cai Alpapi ‘sujta’ punllacunapi tucui ruranacunata tucuchishcata, ‘canchis punllapi samashcatami’ ricuchijun (Gén. 2:2). Shina cashpapash trabajanata alicachimandaca Jehová Diosca cunangamanmi imagutapash rurashpa catishca (Juan 5:17). Jehová Diosca sujta ‘punllacunata’ trabajashca jipami, canchis ‘punllapica’ samarca. Shinallatami israelitacunatapash canchis punllapica samanami canguichi nishpa mandarca. Samana punllaca paitalla sirvichun agllashca punllami carca. Chai punllaca “Mandaj Dios ñucapajlla  shicanyachishca samana punllami” can nircami (Éxodo 31:12-15, liingui). Chai punllaca nipipash na trabajanachu carca. Animalcunahuanbash na trabajanachu carca (Éx. 20:10). Caita ruranami israelitacunataca Jehovata ashtahuan alabangapaj tiempota charichun ayudarca.

9. Jesuspa tiempopica ¿ima panda yuyaitata huaquingunaca charirca?

⁹ Sábado samana punllaca Jehovata sirvijcunapaca alipacha punllami carca. Shinapash Jesús cai Alpapi cashca tiempopica judiocunata ñaupaman pushajcunaca judiocunataca na pactachi ushanalla leycunatami mandan carca. Paicunaca samana punllapica trigo umatapash na japina, shuj ungushca runata jambitapash na usharinllu ninmi carca (Mar. 2:23-27; 3:2-5). Shinapash Jehová Diosca judiocunata ñaupaman pushajcunashnaca na pensanllu carca. Chaimi Jesusca paita uyajcunataca Jehová imata pensashcata intindichirca.

10. Mateo 12:9-12​pica ¿imatata Jesusmandaca yachachin?

¹⁰ Jesuspash, paipa catijcunapash Moisesman cushca Leyta catimandami sábado o samana punllataca saman carca. * Shinapash Jesusca paipa nishcacunahuan, rurashcacunahuanmi chai punllapi alita rurana cashcata ricuchirca. Chaimi nirca: “Samana punlla cajpipash, aliguta ruranaca alimi” can nishpa (Mateo 12:9-12, liingui). Jesusca Samana punllapi imapash alita ruraimanda Moisesman cushca Leyta na cazujushcataca na yuyanllu carca. Jesusca  paipa ruraicunahuanmi samana punllapica na trabajana cashcata ricuchirca. Jesuspa familiaca sábado o samana punllataca Jehovata ashtahuan sirvingapaj, alabangapami aprovechan carca. Chaitaca Nazaret llactapi ima pasashcata ricushpami yachapanchi. Bibliapica Jesusca: ‘Samana punllapi, tandanajuna huasiman rinata yachashpami, chai huasiman yaicurca. Chaipica, Diospa Shimita liingapami shayarirca’ ninmi (Luc. 4:15-19).

11. Trabajanamandaca ¿pita Jesusmanga ali ejemplota curca?

¹¹ Jesusman carpinteriata yachachijushpaca Joseca, Jehová Dios trabajomanda imata yuyajtami yachachishcanga (Mat. 13:55, 56). José paipa familiata mantiningapaj shinllita trabajajtami Jesusca ricun cashcanga. Jesusca paipa catijcunataca cashnami yarichirca: “Imaguta rurashpapash pagota japinataca charinmi” nishpa (Luc. 10:7, MTQI). Shinaca shinllita trabajana cashcataca Jesusca alimi yacharca.

12. ¿Maijan textocunata shinllita trabajanamandaca parlan?

¹² Apóstol Pablopashmi shinllita trabajana tucurca. Shinallata Jesús imata yachachishcata, Jesús imashna cashcata yachachinami apóstol Pablopaca ashtahuan minishtirishca carca. Paica paillata mantiniringapami shinllita trabajan carca. Apóstol Pablo ‘ama yanga micungapaj, pitapash ama mañangapaj, tutapash punllapash na samashpa imagutapash rurashpa’ trabajaj cashcataca tesalonicenses huauquipanicunaca alimi yacharca (2 Tes. 3:8; Hech. 20:34, 35). Cai shimicunaca apóstol Pablo Corinto llactapi imata rurashcatami yarichin. Apóstol Pabloca Áquila, Priscila cusahuarmipa huasipi quedashpami ‘carpacunata rurashpa’ trabajarca. Pabloca ‘punllapash, tutapash’ trabajashpapash samanmi carca. Por ejemplo, judiocunaman villachingapami sabadocunata llujshin carca. Chai punllaca Pablopash, judiocunapash na trabajanllu carca (Hech. 13:14-16, 42-44; 16:13; 18:1-4).

13. Apóstol Pablomandaca ¿imatata yachajupanchi?

¹³ Apóstol Pabloca alipacha ejemplotami curca. Shinllita trabajana cashpapash paica ‘Taita Diospa ali villaita villachishpami’ ashtahuan ocupado yalin carca (Rom. 15:16; 2 Cor. 11:23). Shujcunatapash paishnallata rurachunmi animarca. Chaimi Áquila, Priscila cusahuarmica apóstol Pablotaca ‘Jesuspajta ruranapi ayudanajurca’ (Rom. 12:11; 16:3). Apóstol Pabloca Corinto llactamanda huauquipanicunataca cashnami consejarca: ‘Jesús imata rurachun pai mingashcatapash ashtahuanmi rurashpa catina canguichi’ nishpa (1 Cor. 15:58; 2 Cor. 9:8). Shinallata nircami: “Maijambash imata ruranatapash na munashpaca, micuitapash ama micuchun” nishpa (2 Tes. 3:10).

14. Juan 14:12​pi shimicunahuanga Jesusca ¿imatata ningapaj munarca?

¹⁴ Tucurimui punllacunapi causanajuimandaca villachina, gentecuna Jesuspa ali catijcuna tucuchun yachachinapimi ashtahuanbachaca ocuparina capanchi. Jesús cai Alpapi cashpaca nircami, ñucata ali catijcunaca ñucatapash ashtahuan yalimi villachinga nishpa (Juan 14:12, liingui). Chai shimicunata nishpaca ¿imatata ningapaj munarca? Paishna milagrocunata ruranataca na nircachu. Ashtahuangarin shuj shuj llactacunapi, shuj shuj gentecunaman villachinamanda, paita yali villachinamandami Jesusca parlajurca.

15. ¿Imatata tapurina capanchi?

¹⁵ Shuj trabajota charishpaca cashna tapuripashunchi: “¿Ali trabajador cajtachu rijsihuan? Trabajanata yachashpapash ¿alipachachu pactachijuni? ¿Trabajana horas tucurijpichu alsarijuni?” nishpa. Caicunata ali pactachijujpica ñucanchita trabajachij dueñopash ñucanchipimi confianga. Shinallata cumbacunaman villachijpipash  paicunaca uyangapami munanga. Cunanga ali villachijushcata, ali yachachijushcata yachangapaca cashna tapuripashunchi: “¿Villachingapaj munashcatachu shujcunaca ricuhuan? ¿Primera vez visitangapaca alichu prepararini? Pipash Bibliamanda yachajungapaj munajta ricushpaca ¿uchashpachu tigrani? ¿Siemprechu villachingapaj llujshini?” nishpa. Cai tapuicunata pactachijushpaca quiquinllatami cushilla sintiripangui.

16. a) Jesuspash, paipa apostolcunapash samanamandaca ¿imatata ali yacharca? b) Samanamandaca cunanbi ashtaca gentecunaca ¿imatata yuyan?

¹⁶ Jesuspash, paipa apostolcunapash huaquinbillapash samana minishtirishca cashcataca alimi yacharca. Shinapash Jesuspa chimbapuraimanda parlashca charij charij runapa yuyaitami chai tiempopi gentecunaca charirca. Cunanbipashmi ashtaca gentecunaca chai yuyaitallata charin. Chai charij charij runaca: ‘Cunanga samajusha, ninanda micushpa, ufiashpa’ cushijushpa causajushalla nishpami nirijurca (Luc. 12:19; 2 Tim. 3:4). Chai charij charij runapaca paipa munashcata rurashpa causana, samanami ashtahuan yali ali carca. Cutin Jesuspapash, paipa apostolcunapapash paicunapa munaitalla rurashpa causanaca na minishtirishca carcachu.

17. Ñucanchi tiempohuanga ¿imatata rurana capanchi?

¹⁷ Ñucanchicunapash Jesús cuendami samangapaj shuj tiempoguta llujchina capanchi. Shinapash villachingapaj, tandanajuicunaman ringapami tiempoguta ashtahuan llujchina capanchi. Villachinaman llujshina, tandanajuicunaman rinami ashtahuanbacha minishtirishca can. Caicunata pactachingapami esforzarina capanchi (Heb. 10:24, 25). Maimanbash puringapaj rishpapash tandanajuicunaman ringapaj, villachingapapash tiempoguta llujchinami capanchi (2 Tim. 4:2).

18. Jesusca ¿imata rurachunda munan?

¹⁸ Jesús ñucanchita ali intindijta yachashpaca cushillami sintiripanchi. Jesusca samanata, trabajana minishtishca cashcataca alimi yacharca (Heb. 4:15). Jesusca ama trabajashpalla yalichun, samangapapash tiempoguta llujchichunmi munan. Shinallata familiata mantiningapaj trabajachun, Diospa Reinomanda ali villaigucunata villachichunbashmi munan. Cati temapica ñucanchita salvangapaj Jesús imashina ayudashcatami yachajupashun.