CASHNACHARI tapuripashcanchi: “¿Pagui nishpa agradicinata yachapanichu?” nishpa. Na agradicij tauca gentecuna tianga nishpami Bibliapica nirca (2 Tim. 3:2). Quiquinga paicunalla tucuita chasquina cashcata yuyaj gentecunata rijsipanguipashchari. Paicunaca shujcunata pagui nishpa agradicinataca na yachanllu. Shina gentecunahuan llevaringapaca pipash na munanllu.

Jehová Diosca paita sirvijcunataca ‘pagui’, ‘imamandapash pagui ninajunallami canguichi’ ninmi (Col. 3:15; 1 Tes. 5:18). Pagui nishpa agradicinaca ñucanchitallatami ayudan. ¿Imamandata shina nipanchi? Huaquin yuyaicunata ricupashunchi.

Pagui nishpa agradicinaca ñucanchillata ali, cushilla sintirichunmi ayudan. Agradicinata yachajcunapash, paicunata ayudaj gentecunapashmi cushilla sintirin. Caita ashtahuan intindingapaca caipi yuyapashunchi. Ñucanchita pipash ayudajpica, paicuna ñucanchimanda preocuparishcatami ricui ushapanchi. Chaimi ñucanchimandallata cushilla, ali sintirinchi. Shinallatami Rutpash sintirishcanga. Boaz runagu paita tucui shunguhuan ayudajushcata ricushpa, paipi preocuparishcata ricushpaca Rutca ninandami cushijurianga (Rut 2:10-13).

Ashtahuanbachaca Jehovatami agradicina capanchi. Jehová Diosca ñucanchita juyaimandami ima minishtishcaguta cun. Espiritualmente ali cachunbashmi tandanajuicunata, shuj cosascunatapash cushpa ayudan (Deut. 8:17, 18; Hech. 14:17). Shinapash Jehová Diosca ñucata llaquimandami caicunataca cuhuashca nishpallaca na pensanachu capanchi. Chaipa randica ñucanchita, ñucanchi familiatapash ayudangapaj, cuidangapaj Jehová Dios imata rurashcatami cutin cutin yarina capanchi. Chaicunapi pensarinami agradicinata yachajuchun, Jehová Dios ñucanchita juyashcapi crichunbash ayudanga (1 Juan 4:9).

Jehová Dios ñucanchita cuidangapaj, bendiciangapaj imacunatalla rurashcapi pensarishpapash, chaicunamanda Jehovata agradicingapami esforzarina capanchi (Sal. 100:4, 5). Huaquingunaca nishcami “agradicinata yachanaca cushilla sintirichunbashmi ayudan” nishpa.

Pagui nishpa agradicinata yachanaca ali amigocunata charichunbashmi ayudan. Tucuicunallatami ali amigocunata charingapaj munapanchi. Pipash ñucanchita imagupipash ayudashcajpi o imagutapash carashcamanda agradicishpaca paihuanga ashtahuan ali amigocunami tucunchi (Rom. 16:3, 4). Shinallata agradicinata yachajcunaca shujcunata ayudangapapashmi munan. Paicunata imashina ayudashcata yarishpami shujcunatapash llaquishpa ali tratan. Chaita ruranami cushilla sintirichunbash ayudan. Chaimi Jesusca: “Carajpi japijcunatapash yalimi carajcunaca, ninanda cushijun” nirca (Hech. 20:35).

Universidad de Californiapi trabajaj, Robert Emmons profesorca, agradicinamandami shuj investigacionda rurarca. Chai investigacionbica nircami: “Ñucanchicuna shujcunapa ayudata minishtishcata intindinami, agradicinata yachajuchunga ayudan. Huaquinbica ñucanchicunami shujcunata ayudanchi, cutin huaquinbica ñucanchicunami shujcuna ayudachun minishtinchi” nishpa. Chaica ciertopachami can, tucuicunami shujcunapa ayudata minishtipanchi. Por ejemplo, huaquingunaca micunata carashpa o doctorpaman apashpami ñucanchitaca ayudan (1  Cor. 12:21). Agradicinata yachajcunaca shujcuna paicunata ayudajtami cuenta japin. Shinaca ayudajta cuenta japishpaca ¿agradicina costumbreta charipanchichu?

Imapash alita rurashcapi pensarinami agradicishca sintirichun ayudan. Cunanga shuj cedazopi pensaripashunchi. Shuj cedazoca imapash nalicunata shushungapami can. Shina cuendami ñucanchi yuyaica imapash nali yuyaicunata ama charichun ayudan. Imagumandapash agradicij gentecunaca paicunapa problemacunata charishcapillaca na pensarijunllu. Chaipa randica imata alita rurashcacunapimi siempre pensarin. Imagumandapash agradicijcunaca paicunapa causaipica tucuimi ali llujshinga. Shinami cushilla sintiringa. Agradicishpaca apóstol Pablo nishcashnami sintirishun. Paica nircami: “Jesushuan shujlla tucushcamandaca, tucui causaipi cushijupaichi” nishpa (Filip. 4:4).

Agradicinata na yachaj gentecunaca shujpa charishca cosascunata ricushpami envidiashpa, shungu ucupipash llaquilla causan. Chaimi na cushilla causan. Cutin agradicishpa pagui nij gentecunaca charishcaguhuanmi cushilla causan. Charijyangapapash na munanllu (Filip. 4:12).

Tucurimui punllacunapi causanajuimandami imapash llaquicunahuan o problemacunahuan causapanchi. Chai llaquicunamanda llaquilla o culira causachunmi Diabloca munan. Chai llaquicunapilla pensarishpa causachun, imamandapash yangata quejarishpa causachunmi Diabloca munan. Shina causanajushpaca Jehovapa Gobiernomandapash cushilla villachitaca na usharingachu. Agradicinaca Diospa espíritu santopa ali cualidadcunata charichunmi ayudan. Chaimi Jehová Dios imaguta carashcamandapash cushilla causaita ushashun. Shinallata shamuj punllacunapi Jehová Dios caranapipash tucui shunguhuan confiachunbashmi ayudan (Gál. 5:22, 23).

Agradicishpa pagui ninataca Jehovata sirvijcunaca alimi yachapanchi. Shinapash juchayu caimandami huaquinbica agradicishpa pagui ninataca cunganchilla. Shinaca agradicinata na yachashpaca ¿imatata rurai ushapanchi? Agradicishpa pagui ningapami esforzarina capanchi. Chaipaca cada punlla imagumandapash Jehovata agradicishpa pagui ningapaj esforzaripashunchi. Shinami agradicinata yachajui ushapashun. Masqui problemacunata charishpapash agradicinataca na cunganachu capanchi. Agradicingapaca imashna Jehová Dios ñucanchita ayudashcata, huauquipanicunapash ñucanchita ayudashcata yarishpaca cushillami sintirishun. Agradicinata cungajlla cashpaca mejor shuj cuadernopi imacunamandalla cada punlla agradicina cashcata anotapashunchi.

Estudiashca gentecunaca agradicishpa pagui nina costumbreta charij gentecunaca, ali yuyaicunata charichun, problemacunata charishpapash cushilla causachun ayudajtami yachaj chayashca. Agradicishpa pagui nij gentecunaca ashtahuan cushillami yalin. Shinallata agradicijcunaca alicunata rurachun ayudashcata yarishpami paicunamandallata cushilla sintirin. Bibliapica ninmi: “Imamandapash Taita Diostaca, pashi ninajunallami canguichi” nishpa (1 Tes. 5:18).