1, 2. a) Yoshiko panigutaca ¿imashinata Isaías 41:10​ca ayudarca? b) Isaiaspi shimicunaca ¿picunatata ayudai ushan?

YOSHIKO paniguca tucui shunguhuanmi Jehová Diosta sirvin carca. Shuj punllaca paipa doctoraca nircami, huaquin quillacunatallami canga causagringui nishpa. Chaita uyashpaca ¿imatata chai paniguca rurarca? Chaita uyai na uyaimi Isaías libropi liishca shimicunata ñapash yarirca (Isaías 41:10, liingui). Chai shimicunata yarishpami na yapata manllarishpa doctorataca cashna nirca, Jehová Diosmi ñucataca ayudahuanga nishpa. * Isaiaspi liishca textomi chai panigutaca ama yapata llaquirichun, Jehová Diospi tucui shunguhuan confiachun ayudarca. Shinallatami chai textoca imapash llaquicunata charijpica ñucanchicunatapash ayudanga. ¿Imashinata ayudan? Chaipaca Isaiasta imamanda Jehová Dios chai shimicunata escribichishcatami ali intindina capanchi.

² Babilonia llactaman prezu apai tucushca israelitacuna ama yapata llaquirichunmi Isaiasmanga chai shimicunata escribichun Jehová Diosca mandarca. Isaiasman nishca shimicunaca chai punllamandapacha cunangamanmi Jehovata sirvijcunataca ayudashpa catijun (Is. 40:8; Rom. 15:4). “Tucurimui punllacunapica, jatun llaquicunami shamunga” nishca tiempopimi causanajupanchi. Chaimi Isaiaspa shimicuna ñucanchita ayudachun minishtipanchi (2 Tim. 3:1).

3. a) Isaías 41:10​pi shimicunamandaca ¿ima yuyaicunatata yachajugripanchi? b) ¿Chai yuyaicunata yachajunaca minishtirishcachu can?

³ Cai 2019 huatapa textoca Isaías 41:10​manda shimicunami can. Chai shimicunatami Jehová Dios Isaiasman nirca. Chai textomandami cai temapica quimsa yuyaicunata yachajupashun.  Punda yuyai. Jehovami ñucanchihuan can. Cati yuyai. Jehová Diosmi ñucanchi Dios can. Último yuyai. Jehová Diosmi ñucanchita ayudan. Cai nishcacunapi ¿confiaita ushapanchichu? * Huaquinbica Yoshiko panigu cuendami na yashcapi llaquicunata chari ushanchi. Shinallata cai mundomanda gentecunapa imapash nishcacunata aguantana tucunchi. Huaquingunacarin gobiernocuna llaquichij pushtucunapimi causanajun.

4. a) ¿Jehová Dios nishcamandaca maijan punda yuyaitata yachajugripanchi? (Notata ricupangui). b) Jehová Diosca ñucanchita juyashcataca ¿imashinata ricuchin? c) Chai shimicunamandaca ¿imatata yachajui ushapanchi?

⁴ Punda yuyaita ricupashunchi. Ñucanchicuna ama yapata llaquirichunmi Jehová Diosca cashna nin: Na manllanachu cangui, ñucami canhuan cani nishpa. * Jehová Diosca ¿imashinata ñucanchihuan caita ushan? Ñucanchita cuidashpa, juyaihuan tratashpami ñucanchihuan cashcata ricuchin. Jehová Diosca ñucanchita juyashcata ricuchingapami cashna nin: “Cangunaca, ñuca ricuipica ninan valishcami carcanguichi. Ñucapi alicachi tucushcacuna cajpimi, cangunata juyani” nishpa (Is. 43:4). Paita sirvijcunata juyaihuan tratachunga nima nima paitaca na jarcaita ushangachu. Jehová Diosca siempremi juyanga (Is. 54:10). Jehová Dios ñucanchi amigo, juyahuan tratajta yachashpaca ninandami cushijunchi. Imashinami punda tiempopi Abrahán runaguta cuidarca, shinallatami ñucanchicunatapash cuidanga. Jehová Diosca nircami: Abrahán “ama manllaichu. Ñucami, can jarcarina escudoshna cani” nishpa (Gén. 15:1).

5, 6. a) Isaías 43:2​pi shimicunaca ¿imatata Jehovamandaca yachachin? b) Yoshiko panigumandaca ¿imatata yachajupanchi?

⁵ Ñucanchi problemacunata charijpipash Jehová Diosca ayudasha ninmi. Chaimandami cashna nin: “Yacuta yalinajujpipash, cangunahuanmi casha. Jatun yacuta yalinajushpapash, na huashajunguichica. Nina jahuata purinajushpapash, na rupanguichica. Nina rupajushpapash, cangunataca na rupachingachu” nishpa (Is. 43:2). Cai shimicunaca ¿imatata ningapaj munan?

 ⁶ Yacu o ninaca gentecunataca ninandami llaquichi ushan. Shinallatami llaquicunaca ñucanchi causaipi ninanda llaquichi ushan. Llaquicunata na tucuchishpapash chai llaquicunata aguantachunmi Jehová Diosca ayudanga. Shinaca huañugringuimi nijpipash, Jehovata tucui shunguhuan sirvishpa catichun, tranquilo sintirichunmi paica ayudanga (Is. 41:13). Yoshiko paniguhuan ima pasashcatami callaripica ricuparcanchi. Yoshiko panigupa ushiguca ninmi: “Ñuca mamaca huañunata yachashpapash tranquilomi carca. Ñuca mamata Jehová Dios ayudajushcataca ricunallami carca. Ña huañuna punllapashmi enfermeracunaman, shuj gentecunamanbash Jehová Dios cusha nishcacunamanda parlarca” nishpa. Yoshiko panigumandaca ¿imatata yachajupanchi? “Cangunahuanmi casha” nishca shimicunapi ñucanchipash confiashpaca, problemacunata aguantashpami cati ushashun.

7, 8. a) ¿Ima cati yuyaitata yachajupashun? Llaquirinaca ¿imatata nisha nin? b) Jehová Diosca israelitacunamanga ¿imamandata na llaquirinachu canguichi nirca? c) Israelitacuna ama manllachunga ¿imatata Isaías 46:3, 4​pica Jehová Diosca nirca?

⁷ Cunanga cati yuyaita ricupashun. Isaías libropica ninmi: Na llaquirinachu cangui, ñucami canba Taita Dios cani nishpa. Llaquirina nishpaca “manllaimanda tigrashpa ricujuna” o “manllaimanda caita chaita ricujunatami” ningapaj munan.

⁸ Israelitacunata Babilonia llactaman prezu apai tucushcacunataca ¿imamandata Jehová Diosca “na llaquirinachu” canguichi? nirca. Chai llactamanda gentecuna manllaihuan cajtaca Jehová Diosca alimi yacharca. ¿Imamandata chai gentecunaca manllaihuan carca? Medopersia llactamanda soldadocuna Babilonia llactata llaquichinata yachashpami ninanda manllanajurca. 70 huatacuna ña tucurinallapimi shina tucugrijurca. Medopersia llactamanda soldadocunata utilizashpami, israelitacuna prezu apai tucushcacunata ama prezu cachun Jehová Diosca ayudagrijurca (Is. 41:2-4). Babilonia llactamanda gentecunapash, shuj llactamanda gentecunapashmi paipa contracuna llaquichingapaj shamunajujta yachaj chayarca. Chaimi paicunata salvachun yashpa yanga dioscunata rurai callarirca. Shinallata paicunaca “shinlli tucuichi” nishpami ninajurca (Is. 41:5-7). Shinapash israelitacuna ama manllachunmi Jehová Diosca paicunataca cashna nirca: “Israelcunalla, [shuj llactacunashnaca na canguichichu]. Cangunaca ñucata servijcunami canguichi” nishpa. Cashnami cutin nirca: ‘Canba Taita Diosmi cani’ nishpa (Is. 41:8-10). Israelitacunata na cungashcata yachachun, paipa llacta cashcata ricuchingapami Jehová Diosca ‘canba Taita Diosmi cani’ nirca. Chai llactamanda llujshichunbashmi ayudasha nirca. Shina nishpami israelitacunataca Jehová Diosca shinllichirca (Isaías 46:3, 4, liingui).

9, 10. ¿Imamandata na yapata llaquirina capanchi? Shuj chimbapuraimanda parlapai.

⁹ Cunanbi gentecunaca, cai mundoca ashtahuan nali tucun nishpami yapata llaquirin. Ñucanchipashmi huaquinbica chai gentecunashna sintiripanchi. Shinapash na yapata llaquirinachu capanchi. Jehová Diosca ñucanchitapashmi cashna nin: ‘Canba Taita Diosmi cani’ nishpa. Chai shimicunaca ñucanchitaca ninandami shinllichin. ¿Imamandata shina nipanchi?

¹⁰ Caipi pensaripashunchi, Juanbash, Brunopash shuj avionbi rijushcaman. Na yashcapi ninanda huairajuimandami caiman chaiman avionga cuyuri callarin. Chaimi avionda manejajca parlantepi cashna nin: “Ninan huaira, fuyu jundatami yaligripanchi. Cinturongunata ajushtaripaichi ama manllaripaichichu”  nishpa. Shinapash Juanga manllarishcami can. Bruno chaita ricushpami Juandaca nin, ama manllarichu nishpa. Chaimi Juanga nin: “quiquinga ¿imamandata na manllarishca cangui?” nishpa. Brunoca cashnami nin: “Ama manllaichu. Avionda manejmanda ashaguta parlapasha. Avionda manejajtaca alimi rijsini. Paica ñuca taitami can. Paica alipachami aviondaca manejan” nishpa.

11. Chai chimbapuraimandaca ¿imatata yachajupanchi?

¹¹ Chai chimbapuraimandaca ¿imatata yachajupanchi? Bruno cuendami ñucanchicunapash Jehová Diosta ali rijsimanda tranquilo sintiripanchi. Cai tucurimui punllacunapi, llaquicunata o problemacunata aguantachun Jehová Dios ayudanataca alimi yachapanchi (Is. 35:4). Cai mundopi gentecuna yapata llaquirijpipash, ñucanchica Jehovapi confiaimandami na yapata llaquiripanchi (Is. 30:15). Shinallata Brunoshnami ñucanchi Taita Diospi imamanda confiashcata shuj gentecunaman parlapanchi. Shinami chai gentecunaca llaquicunata charishpapash Jehová Dios ayudanapi tucui shunguhuan confianga.

12. a) ¿Ima yuyaimandata yachajupashun? b) Bibliapi “maqui” nishpaca ¿imatata ningapaj munan?

¹² Cunanga último yuyaita yachajupashun. Jehová Diosca nircami: Ñucami canman ushaita cuj Taita Dios cani. Canba tucui causaipimi ayudajushalla nishpa. Profeta Isaiasca israelitacunata Jehová Dios imashina ayudashcatami parlarca. Paica nircami: “Mandaj Jatun Diosca, ninan ushaihuan shamushpami, paipaj maquihuan mandanga” nishpa (Is. 40:10). Bibliapica maqui nishpaca ushaita ricuchingapami nisha nijun. Shinaca Isaiaspa shimicunaca Jehová Dios ushaita charij cashcatami yarichin. Punda tiempopica Jehová Diosca paita sirvijcunata ayudangapaj, salvangapami paipa ushaita utilizarca. Shinallatami  cunanbipash Jehová Diosca paipi confiajcunataca shinllichishpa ayudajun (Deut. 1:30, 31; Is. 43:10).

13. a) ¿Ima horata Jehová Diosca ñucanchiman fuerzata cunga? b) ¿Ima shimicunata ñucanchita shinllichishpa Jehovapi ashtahuan confiachun ayudan?

¹³ Pipash ñucanchita llaquichingapaj munajujpipash Jehová Diosca fuerzata cushpami ayudanga. Shuj shuj llactacunapica villachichunmi na saquishca. O ñucanchi organizacionda prohibishca. Shina jarcaicunata charishpapash na yapata llaquirishcanchichu. Jehová Diosca ninmi: “Maijan shinlli macanajunacunahuan shayarishpapash, candaca pipash na mishangachu” nishpa. Cai shimicuna shinllichishpa Jehovapi ashtahuan confiachunmi ñucanchitaca ayudan (Is. 54:17). Cunanga Jehovapa nishcacunamanda quimsa yuyaicunata yachajupashunchi.

14. Jehovapa contracuna ñucanchita llaquichinataca ¿imamandata na manllapanchi?

¹⁴ Primero, cai mundomanda gentecunaca ñucanchicuna Jesusta ali catijcuna cajpimi na ricunayachinga (Mat. 10:22). Jesusca tucurimui punllacunapi paipa catijcunata nali tratanatami villarca (Mat. 24:9; Juan 15:20). Segundo, Jehovata sirvijcunataca Jehovapa contracuna imatapash llullacunata nishpa, umachishpa, catiriashpa llaquichinatapashmi profeta Isaiasca villarca (Mat. 5:11). Chaicunahuan llaquichishpa catichunga Jehová Diosca na saquingachu (Efes. 6:12; Apoc. 12:17). Shinaca na manllanachu capanchi.

15, 16. a) ¿Imatata yarina capanchi? b) Isaías 25:4, 5​pi shimicunamandaca ¿imatata yachajupanchi? c) Isaías 41:11, 12​pi nishca shinaca ¿imata Jehovapa contracunahuanga pasanga?

¹⁵ Tercero, ñucanchita imacunahuanbash llaquichingapaj munashpapash “pipash na mishangachu” nishcatami yarina capanchi. Jehová Diosca “shinlli huairahuan tamia shamushpa, patapi huactarinshnami” nalicunamanda ñucanchitaca cuidanga (Isaías 25:4, 5, liingui). Jehovapa contracuna ñucanchita llaquichishpa catitaca na ushangachu (Is. 65:17).

 ¹⁶ Ñucanchi ‘fiñajcunahuan’ o contracunahuan ima tucunata villashpami Jehová Diosca paipi ashtahuan confiachun ayudan (Isaías 41:11, 12, liingui). Jehová Diospa contracuna llaquichingapaj imata rurashpapash Jehová Diostaca na mishaita ushangachu. Bibliapica ninmi: “Cangunahuan fiñanajushpa rimarijcunaca tucuringami. Imapash na tiashcashnami” canga nishpa.

17, 18. a) Jehová Diospi ashtahuan confiachunga ¿imata ayudanga? b) Cai huata 2019​pa textopi pensarinaca ¿imashinata ayudanga?

¹⁷ Jehovapi ashtahuan confiangapaca paitami ali ali rijsina capanchi. Chaipaca Bibliata cada punlla liina, liishcapi pensarinami paipi ashtahuan confiachun ayudanga. Imashina punda tiempopi paita tucui shunguhuan sirvijcunata cuidarca. Shinallatami cunanbipash ñucanchicunataca cuidashpa ayudanga. Chaita yachanami Jehovapi ashtahuan confiachun ayudan.

¹⁸ Cunanga caipi pensaripashunchi. Isaiasca shuj llamata michijhuanmi Jehová Diostaca chimbapuran. Shuj llamata michijca ali alimi paipa llamagucunataca cuidan. Shinallatami Jehová Diosca ñucanchita cuidan. Bibliapica ninmi: “Huahua llamagucunatapash, paipaj rigrapi churashpami, marcashpa apanga” nishpa (Is. 40:11). Jehová Dios paipa rigrapi marcashpa, cuidajujta yachashpaca tranquilomi sintiripanchi. Shinami ñucanchi llaquicunapi o problemacunapi ama yapata preocuparichun ayudan. Shinallata cai huata 2019​pa textopashmi tranquilo sintirichun ayudan. Isaías 41:10​pica ninmi: ‘Na manllanachu cangui, ñucami canba Taita Dios cani’ nishpa. “Aliguta cazushpa, aliguta yarishpa sirvij” esclavomi ñucanchicuna ama yapata llaquirichun chai textotaca agllashca. Chai textopi pensarinaca cunanbi ima llaquicunata charishpapash chai llaquicunata aguantashpa, tranquilo catichunmi ayudan.