1, 2. a) Jesús Huañushcata Yarina Tandanajuiman ashtaca gentecuna rijta ricushpaca ¿imatata Jehová Diosca pensan? (Callari paginapi fotota ricupangui). b) Cai temapica ¿imatata yachajupashun?

MUNDO ENTEROPI Jesús Huañushcata Yarina Tandanajuiman ashtaca gentecuna rijta ricushpaca ¿imatata chai gentecunamandaca Jehová Diosca pensan? Chai gentecuna cada huata rijta ricushpaca cada unotami Jehová Diosca alicachishpa ricun. Huaquingunaca pipash paicunata llaquichingapaj catiriajpipash Jesús Huañushcata Yarina Tandanajuimanmi rishca. Shujcunaca cada semana tandanajuicunaman na rishpapash Jesús Huañushcata Yarina Tandanajuimanmi rin. Huaquingunaca Jesús Huañushcata Yarina Tandanajui imashina cajta yachangapami primera vez rishca. Paicunatapashmi Jehová Diosca alicachishpa ricun.

² Jesús Huañushcata Yarina Tandanajuiman ashtaca gentecuna rijta ricushpaca Jehová Diosca ninandami cushijun (Luc. 22:19). Jehová Diosca chai tandanajuiman mashna gentecuna rishcatallaca na ricunllu. Chaipa randica Jehová Diosca gentecuna imamanda chai tandanajuiman rishcatami ricun. Jesús Huañushcata Yarina Tandanajuiman rishpapash, cada semana tandanajuicunamanga ¿imamandata rina capanchi? Cai temapica cai tapuimandami yachajupashun.

3, 4. a) ¿Imamandata tandanajuicunaman ripanchi? b) Tandanajuicunaman rishpaca ¿imashina cashcatata ricuchipanchi? c) 1 Corintios 11:23-26​pi nishca shinaca ¿imashpata Jesús Huañushcata Yarina Tandanajuiman na faltana capanchi?

³ Jehová Diosta sirvimanda, paimanda ashtahuan yachajungapaj munaimandami tandanajuicunamanga ripanchi. Jariyashca gentecunaca ni pipash ñucataca na yachachinachu can ninmi (3 Juan 9). Shinapash ñucanchicunaca Jehová Diospash, paipa  organizacionbash yachachichunmi munapanchi (Is. 48:17, 18; Juan 6:45).

⁴ Tandanajuicunaman rishpaca Jehová Dios ñucanchita yachachichun saquishpaca humilde cashcatami ricuchipanchi. Jesús Huañushcata Yarina Tandanajuimanga obligacionmandallaca na rinchichu. Humilde caimanda, Jesuspa mandashcata cazuimandami chai tandanajuiman ripanchi. Jesusca nircami: “Ñucata yarishpa, cashnata rurashpa catinguichilla” nishpa (1 Corintios 11:23-26, liingui). Chai tandanajuica shamuj punllacunapi ali causai tianata seguro cachun, Jehová ñucanchita juyashcata yarichunmi ayudan. Shinallata chai tandanajuihuanllaca Jehová Diosca ñucanchitaca na cushichinllu ni animanllu. Ashtahuangarin cada semana tandanajuicunaman richunmi paica munan. Chaita cazungapaca ñucanchicunaca humildemi cana capanchi. Chaimandami cada semana tandanajuicunapa prepararingapaj, tandanajuicunaman ringapaj esforzaripanchi.

5. Ashtaca humilde gentecunaca ¿imatata ruran?

⁵ Jehová Diosca ashtaca gentecuna paimanda yachajuchunmi munan. Chaimi cada huata ashtaca humilde gentecuna Jehovamanda yachajungapaj quimirimun (Is. 50:4). Huaquingunaca Jesús Huañushcata Yarina Tandanajuiman rishca jipami caishuj tandanajuicunamanga ri callarin (Zac. 8:20-23). Ñucanchicunapash, chairalla bautizarishcacunapashmi Jehovapa ayudata, yachachishcacunatapash cushijushpami chasquipanchi. Paimi ñucanchitaca ayudashpa quishpichin (Sal. 40:17). Shinaca Jehovapash, Jesuspash ñucanchita yachachichun munaimandami tandanajuicunamanga rina capanchi. Jehová Diosca paipa Churitaca ninandami juyan (Mat. 17:5; 18:20; 28:20).

6. Shuj jarica ¿imamandata Jesús Huañushcata Yarina Tandanajuiman rirca?

⁶ Huatan huatanmi gentecunataca Jesús Huañushcata Yarina Tandanajuiman shamuchunmi invitapanchi. Chai tandanajuica ashtaca humilde gentecunatami ayudashca. Cunanga shuj experienciamanda ricupashunchi. Huaquin huatacuna huashaman shuj huauquica shuj jarimanmi Jesús Huañushcata Yaringapaj invitacionda curca. Shinapash chai jarica na ri ushapashachu nircami. Jesús Huañushcata Yarina Tandanajui tutapi chai jari tandanajui huasiman yaicumujta ricushpaca, chai huauquica ninandami cushijurca. Chai jarica chai tutapi paita ali chasquishcamandami tucui tandanajuicunaman ri callarirca. Chai jarica huatapi quimsa viajetallami tandanajuimanga na rirca. Shina rurachunga ¿imatata chai jaritaca ayudarca? Chai jarita invitashca huauquica ninmi: “Chai jarica humildemi can” nishpa. Jehová Diosmi chai jaritaca paipa llactaman pushamurca. Cunanbica chai jarica ñami testigo de Jehová can (1 Ped. 5:5; Juan 6:44).

7. Bibliapi imata liishcata, tandanajuicunapi imata yachajushcataca ¿imashinata humilde cachun ayudan?

⁷ Bibliapi imata liishcata, tandanajuicunapi imata yachajushcapash humilde cachunmi ayudan. Jesús Huañushcata Yarina Tandanajuipa prepararingapaca huaquin semanacuna faltajpillatami Jesusmanda, pai huañushpa humilde cashcata ricuchishcatapash tandanajuicunapica yachajupanchi. Shinallata ashalla punllacuna faltajpillatami chai tandanajuipa prepararingapaj Jesús huañushca punllamanda, pai causarishca punllamanda parlaj textocunata Bibliapi liina capanchi. Chaita rurashpaca Jesús ñucanchimanda huañushcata agradicishun, Jesushna humilde cangapapashmi munashun. Ashtahuanbash llaquicunata charishpapash Jehovapa munaita pactachingapami munashun (Luc. 22:41, 42).

8. Jesusca ¿imashinata na manllaj cashcata ricuchirca?

⁸ Jesushna na manllaj cangapami munapanchi. Paipa huañuna punlla ashalla faltajpica Jesusca ¿imashinata na manllaj cashcata ricuchirca? Jesusca paipa contracuna paimanda  burlarinata, llaquinaita macanata, paita huañuchinatapash alimi yacharca (Mat. 20:17-19, NM). Jesusca huañuna cashcata yachashpapash na manllarcachu. Getsemaní shuti pushtupi Jesusca paipa catijcunataca cashnami nirca: “Ricuichi, ñucata japichij runaca, ñami chayamujun. Jatarishpa, ucha jacuchi” nishpa (Mat. 26:36, 46). Ashtaca nali gentecuna Jesusta prezo japingapaj rijpica Jesusca na manllashpami pi cashcata villarca. Shinallata apostolcuna richun saquipaichi nishpami soldadocunataca Jesusca mañarca (Juan 18:3-8). Shinami Jesusca na manllaj cashcata ricuchirca. Cunan punllacunapipash ungidocunapash, shuj llamagucunapash Jesushna na manllaj cangapami ninanda esforzarin. ¿Imashinata na manllaj cashcata ricuchipanchi?

9. a) Tandanajuicunaman ringapaca ¿imamandata huaquinbica na manllaj cana minishtirin? b) Prezo caj huauquipanicunataca ¿imashinata ayudai ushapanchi?

⁹ Huaquinbica imapash jarcaicunamandami tucui tandanajuicunamanga na rita ushanchi. Chaimi na manllaj canaca minishtirishcapacha can. Huaquin huauquipanicunaca saludpi nali caimanda o llaqui llaqui sintirimandami tucui tandanajuicunaman ritaca na ushashca. Cutin shuj huauquipanicunaca paipa familia o gobiernocuna jarcaimandami tucui tandanajuicunaman rita na ushan. Cunan punllacunapica huaquin huaquipanicunaca paicunapa crishcacunamandami prezo can. Paicunataca ¿imashinata ayudai ushapanchi? Ñucanchicuna Jehovata tucui shunguhuan sirvishpami paicunataca ayudai ushapanchi (Heb. 13:3). Ñucanchicuna problemacunata charishca jahuapash Jehovata tucui shunguhuan sirvinajushcata yachaj chayashpaca chai huaquipanicunaca ninanda cushijushpa, Diospi crishpa, na manllashpami catin. Shinallatami apóstol Pablohuanbash pasarca. Paica Roma llactapi paipa propio huasipillatami prezo carca. Huauquipanicuna tucui shunguhuan Jehovata sirvishpa catijushcata yachaj chayashpaca apóstol Pabloca ninandami cushijurca (Filip. 1:3-5, 12-14). Apóstol Pablo libre quedashca jipallami Hebreo huauquipanicunaman shuj cartata escribirca. Chai cartapica Jehovata tucui shunguhuan sirvij huauquipanicunataca tandanajunataca na saquinachu canguichi nishpami mandarca. Shinalla nircami: “Caishuj chaishuj juyarishpa causanaca, cangunamandaca ama anchurishca cachun” nishpa (Heb. 10:24, 25; 13:1).

10, 11. a) Jesús Huañushcata Yarina Tandanajuimanga ¿picunatata invitai ushapanchi? b) Efesios 1:7​pi nishca shinaca ¿imamandata invitapanchi?

¹⁰ Jesús Huañushcata Yarina Tandanajuiman ñucanchi familiacunata, trabajopi cumbacunata, vecinocunata invitashpaca na manllaj cashcatami ricuchipanchi. Cai tandanajuimanga ¿imamandata invitapanchi? Jehovapash, Jesuspash imata ñucanchimanda rurashcata agradicimandami chai tandanajuiman invitapanchi. Shinallata Jehová Dios ñucanchita juyaimanda, paipa Churita ñucanchimanda huañuchun cachamushcata gentecuna yachachunmi ñucanchica munapanchi (Efesios 1:7, liingui; Apoc. 22:17).

¹¹ Juyaita charimandami tandanajuicunamanga ripanchi. Jehová Diospash, Jesuspashmi chai juyaitaca ricuchishca.

12. a) Tandanajuicunapica ¿imatata yachajupanchi? b) 2 Corintios 5:14, 15​pi nishca shinaca ¿imashinata Jesushna cashcata ricuchipanchi?

¹² Jehová Diosta, Jesusta juyaimandami tandanajuicunamanga ripanchi. Jehovatapash, Jesustapash ashtahuan juyanatami tandanajuicunapica yachajupanchi. Shinallata Jehovapash, Jesuspash ñucanchimanda imata rurashcatami yaripanchi (Rom. 5:8). Jesús Huañushcata Yarina Tandanajuipica ñucanchicunata, Jesús huañushcata na agradici gentecunatapash Jehovapash, Jesuspash ninanda juyashcatami yachajupanchi. Ñucanchica, Jesús huañushcata ninanda agradicimandami Jesushna cangapaj esforzaripanchi (2 Corintios 5:14, 15, liingui). Shinallata ñucanchimanda huañuchun Jesusta cachamushcamanda Jehovataca tucui shunguhuan alabangapami munapanchi. Chaipaca tucui shunguhuanmi tandanajuicunapica comentana capanchi.

13. Jehová Diosta, Jesustapash juyashcataca ¿imashinata ricuchi ushapanchi?

¹³ Ñucanchi munaicunata huashaman saquishpa shujcunata ayudashpami Jehovatapash, Jesustapash juyashcata ricuchipanchi. Huaquinbica ñucanchi munaicunata huashaman saquishpami tandanajuicunaman rina tucushcanchi. Por ejemplo, huaquin congregaciongunaca Jesuspa Chaquita Catishpa Causashunchi Yachachishunchi Tandanajuitaca trabajo jipami charin. Huaquingunaca trabajo jipaca shaijushcami sintirin. Cutin fin de semana tandanajuitaca sábado o domingotami charin. Chai punllacunami gentecunaca saman. Shinaca shaijushca cashpapash tandanajuicunaman rijpica ¿imashinata Jehová Diosca sintirin? Shaijushca cashpapash Jehovata juyaimanda tandanajuicunaman rijpica Jehová Diosca ninandami cushijun (Mar. 12:41-44).

14. Jesusca ¿ima ejemplotata saquirca?

¹⁴ Ama ñucanchipillata pensarishpa shujcunata juyaihuan tratanamandaca Jesusmi alipacha ejemplota saquirca. Jesusca paipa catijcunamandallaca na huañurcachu. Ashtahuangarin paica, paipa catijcunapi pensarimandami, paipa munaitapash huashaman saquishpa ayudarca. Jesusca ¿imashinata paipa catijcunata juyashcata ricuchirca? Paica shaijushca cashpapash, ninan llaquihuan cashpapashmi paicunahuan parlangapaj tiempoguta llujchirca (Luc. 22:39-46). Paicunata imashina ayudanapimi siempre pensarin carca. Shinallata paicuna paitapash shinallata ayudachun yashpaca na pensanllu  carca (Mat. 20:28). Shinaca Jehová Diosta, ñucanchi huauquipanicunata tucui shunguhuan juyashpaca Jesús Huañushcata Yarina Punllapi cangapami munashun. Shinallata tucui tandanajuicunaman ringapami munashun.

15. ¿Picunatata ashtahuanbachaca ayudana capanchi?

¹⁵ Jehovata sirvishpa paipa llactapi caimandaca ninandami cushijupanchi. Chaimi shuj gentegucunapash Jehovata rijsishpa paipa llactaman quimirichun paicunamanbash villachipanchi. Shinapash ¿picunata ashtahuanbachaca ayudana capanchi? Tandanajuicunaman, villachinaman ñana llujshij huauquipanicunatami ayudana capanchi. Shinaca Jehovata sirvijcunapurapimi “ashtahuambachaca pactachina” capanchi (Gál. 6:10). Chai huauquipanicunataca tandanajuicunaman shamuchun, ashtahuanbachaca Jesús Huañushcata Yarina Tandanajuiman shamuchunmi animana capanchi. Shinami Jehová Dioshna, Jesushna paicunata juyashcata ricuchishun. Chai huauquipanicuna cutin Jehovapa organizacionman tigramujpica Jehová Diosca ninandami cushijun. Juyaj Jehová Diosman paicuna cutin tigramujpica ninandami cushijunchi (Mat. 18:14).

16. a) Tandanajuicunaca ¿imashinata ayudan? b) Juan 3:16​ta liishpaca ¿imatata yarina capanchi?

¹⁶ Jesús Huañushcata Yarina Tandanajui huaquin semanacuna faltajpillatami, viernes 19 de abrilta tandanajushun nishpa invitacionda saquigrina capanchi (“ Shuj gentecunata invitapashunchi” nishca recuadrota ricupangui). Huatacuna yalijpipash siempremi huauquipanicunahuan tandanajuiman ringapaj animarina capanchi. ¿Imamandata animarina minishtirin? Tucurimui punllacunapi causanajuimanda. Tandanajuicunaman rinaca minishtirishcapachami can. Chaipimi humilde canata, na manllanata, juyaita charinata yachajupanchi (1 Tes. 5:8-11). Shinami Jehová Dios, Jesuspash ñucanchita juyashcata yachashpaca ninanda cushijupanchi (Juan 3:16, liingui).