1, 2. a) ¿Imata rurachunda Jesusca mandarca? b) Jesusmandaca ¿imatata yachajupashun?

JESÚS Huañushcata Yarina Tandanajuipi ¿imacunatalla ruran cashcata cuenta japipashcanguichu? Cai tandanajuipica na ashtaca cosascunata ruranllu. Chaita ricushpami huaquinguna cashna tapurishca: “Jesús Huañushcata Yarina Tandanajui importante cashpapash ¿imamandata na ashtaca cosascunata ruran?” nishpa.

² Jesús cai alpapi cashpaca intindirinalla shimicunahuanmi gentecunata yachachin carca (Mat. 7:28, 29). Shinallata Jesusca asha cosascunata rurashpami pai huañuna punllata imashina yarina cashcata yachachirca. Shinapash Jesús Huañushcata Yarina Tandanajuica importantepachami can. Chai tandanajuimanda ashtahuan yachajungapaca Jesús imata rurashcata, imata nishcata ricupashunchi. Shinami Jesús humilde, na manllaj cashcata, gentecunata juyashcata ali intindishun. Shinallata Jesushna cangapaj imata rurana cashcatami yachajupashun.

3. a) Mateo 26:26-28​pi nishca shimicunamandaca ¿imatata yachajupanchi? b) Levadura illaj tandapash, vinopash ¿imatata ricuchin?

³ Jesusca 11 apostolcunahuan cashpami pai huañushcata imashi yarina cashcata yachachirca. Pai huañushcata imashi yarinata yachachingapaca pascua fiestapi puchushca levadura illaj tandata, vinotapash utilizarca (Mateo 26:26-28, liingui). Jesusca 11 apostolcunamanga nircami, tandaca ñuca jucha illaj cuerpotami ricuchi. Shinallata vinoca ñuca yahuartami ricunchin nishpa. Chaica ricuchinmi paicunamanda huañugrijushcata. Jesusca  ashalla micunata rurashpami pai huañushcata imashi yarinata yachachirca. Chaita ricushpaca Apostolcunaca na manllarishcangachu. Paicunaca ¿imamandata na manllarirca?

4. Jesusca ¿ima consejotata Martamanga curca? Martaman nishcashnaca ¿imatata Jesuspash rurarca?

⁴ Huaquin quillacuna huashaman ima tucushcata ricupashunchi. Jesusca ñami quimsa huatacunata villajushcarca. Jesusca Lazarota, Martata, Mariata visitajushpaca paicunatami yachachi callarirca. Shinapash Martaca Jesusman micunata carangapaj munashpami, ali micunata yanushpa caita chaita rurashpa musparijurca. Chaimi Jesusca juyaihuan Martataca cashna consejarca, ashtaca micunata ruranaca na minishtirinllu nishpa (Luc. 10:40-42). Martaman shina nishcaca ña unaillami yalishca carca. Jesús huañungapaj asha horascunalla faltajujpimi Martaman nishca shina, Jesusca pai huañuna punllata imashina yarinata yachachingapaj asha micunaguta rurarca. Jesús shina rurashcamandaca ¿imatata yachajupanchi?

5. a) Chai tuta ashalla micunata rurashcamandaca ¿imatata Jesusmandaca yachajupanchi? b) Filipenses 2:5-8​pi shimicunaca ¿imatata yachachin?

⁵ Jesusca paipa ruraicunahuan, parlocunahuanmi humilde cashcata ricuchirca. Jesusca pai huañuna tuta faltajpimi humilde cashcata ricuchirca (Mat. 11:29). Jesusca tucui gentecunamanda huañuna cashcata, Jehová Dios paita causachinata, jahua cielopi mandaj cachun churagrijushcataca alimi yacharca. Shinapash chai tutaca Jesusca pai huañuna punllata yarinata yachachijushpaca na ashtaca micunata rurarcachu. Chaipa randica pai huañushca punllata huatapi shuj viajella yarichunmi paipa catijcunataca mandarca. Ashtahuanbash ashalla cosascunata rurachunmi mandarca (Juan 13:15; 1 Cor. 11:23-25). Shinami Jesusca humilde cashcata ricuchirca. Jesús humilde cashcata yachashpaca ninandami cushijupanchi (Filipenses 2:5-8, liingui).

6. Jesusmandaca ¿imatata yachajupanchi?

⁶ Jesushna humilde cangapaca ñucanchi munaicunata huashaman saquishpami shujcunata ayudana capanchi (Filip. 2:3, 4). Jesusca pai huañungapaj shuj tuta faltajujpi imata rurashcata ricupashunchi. Jesusca llaquinaita huañunata ali yachashpapash paipa catijcuna sufrinamandami ninanda preocuparirca. Chaimandami chai tutaca paicunata yachachishpa, ama yapata preocuparichun paicunataca ayudarca (Juan 14:25-31). Shina rurashpaca shujcunapi preocuparishcata, na paipilla pensarishcatami ricuchirca. ¿Imatata yachajupanchi? Jesús humilde cashcatami yachajupanchi.

7. Jesusca ¿imashinata na manllaj cashcata ricuchirca?

⁷ Pai huañuna punllata imashina yarinata yachachishca jipaca Jesusca na manllaj cashcatami ricuchirca. Jesusca ¿imashinata na manllaj cashcata ricuchirca? Taita Diosta nalicachishpa rimarca nishpami yangata juchachishpa huañuchinataca Jesusca alimi yacharca. Shina llaquinaita huañunata yachashpapash Jehová Diospa munaita pactachingapami Jesusca munarca (Mat. 26:65, 66; Lucas 22:41, 42). Jesusca tucui shunguhuan Jehovata cazushcata, Diospa shutitapash jatunyachishcata, Jehová Dioslla mandana derechota charishcatami ricuchirca. Shinallata nalicunamanda arripintirij gentecuna para siempre causachunmi paicunamanda huañurca. Ashtahuanbash paita catijcuna llaquicunata aguantai ushachunmi Jesusca yachachirca.

8. a) Apostolcunamanga ¿imatata Jesusca mandarca? b) Jesús huañushca jipaca Jesusta catijcunaca ¿imashinata Jesushna na manllaj cashcata ricuchinajurca?

⁸ Jesusca na manllashpami paipa apostolcunapa minishtirishcacunapi preocuparishcata, na paipilla pensarishcata ricuchirca. Judasta shujchishca jipallami, Jesusca asha micunaguta rurarca. Chai tuta ungidocunahuanbash mushuj pactota Jesús rurashcata, paicuna shuj bendiciongunata chasquinatapashmi chai micunaca yarichigrijurca (1 Cor. 10:16, 17). Shinallata jahua cieloman ringapaj Jehová Diosta tucui shunguhuan sirvina minishtirishca cashcata ricuchunmi ayudarca. Ashtahuanbash Jehovapash, Jesuspash ungidocunamanda imata yuyashcata ricuchirca (Juan 15:12-15). Chai tutaca ima llaquicunata aguantana cashcatami Jesusca paita catijcunamanga parlarca. Chai jipaca Jesusca paita catijcunataca nircami, ñuca shinami quiquingunapash na manllajcuna cana canguichi nishpa (Juan 16:1-4a, 33).  Ashtaca huatacuna jipaca Jesusta catijcunaca Jesushnami na manllashpa Jehovata sirvishpa catinajurca. Shinallata paicunaca llaquicunata charina cashpapash paicunapura ayudarinajurca (Heb. 10:33, 34).

9. ¿Imashinata Jesushna na manllaj cashcata ricuchi ushapanchi?

⁹ Ñucanchicunapashmi Jesushna na manllaj cashcata ricuchina capanchi. Huaquin huauquipanicunataca paicunapa crishcacunamandami catiriashpa llaquichishca. Huaquingunatacarin yangamandami prezo churashca. Paicunataca ¿imashinata ayudai ushapanchi? Paicunamanda mañana capanchi. Shinallata gobiernota mandajcunapa o tribunalcunapa ñaupapi ñucanchi huauquipanicunata difindishpami ayudaita ushapanchi (Filip. 1:14; Heb. 13:19). Shinallata ñucanchicunapash na manllaj cashcata ricuchingapaca ‘na manllashpami’ villachishpa catina capanchi (Hech. 14:3). Jesushnami ñucanchicunaca, jarcaicunata charishpa o pipash llaquichingapaj catiriajpipash Diospa Reinomanda tucui shunguhuan villachingapaj munapanchi. Shinapash na manllaj cangapaca ¿imatata rurana capanchi?

10. Jesús Huañushcata Yarina Tandanajui punllata nara chayajpillata ¿imatata rurana capanchi? ¿Imashpata chaitaca rurana capanchi?

¹⁰ Ama manllashpa catingapaca ¿imatata yarina capanchi? Jesús ñucanchimanda huañushpa, para siempre causana esperanzata charinami na manllashpa catichun ayudan (Juan 3:16; Efes. 1:7). Chaipaca Jesús Huañushcata Yarina Tandanajuipa punllacuna faltajpillatami Jesús imata rurashcata yaringapaj tiempoguta llujchina capanchi. Chaipaca Jesús Huañushcata Yarina tandanajuipa Bibliapa textocunata liina, liishcapi pensarina, imashina sufrishpa huañuchi tucunatami yarina capanchi. Ña chai tuta tandanajushca cashpaca tanda, vino imata ningapaj munajtami ali intindi ushashun. Shinallata Jesús imamanda huañushcatapashmi ali intindishun.  Chaicunata ali intindishpaca Jesuspash, Jehová Diospash ñucanchita, ñucanchi juyashca familiacunata ninanda juyashcatami ricupashun. Shina ali intindishpaca cai tucuri punllacunapi causanajushpapash para siempre causanata yarishpaca na manllashpami ñaupaman cati ushashun (Heb. 12:3).

11, 12. Jesusmandaca ¿imatata yachajupashcanchi?

¹¹ Jesús Huañushcata Yarina Tandanajuica Jesús ñucanchi salvangapaj huañushcatami ricuchin. Shinallata Jesús humilde, na manllaj cashcatami ricuchi. Cunanga Jesusca jahua cielopi Sumo Sacerdotemi can. Jesús humilde, na manllaj cashcata yachashpaca ninandami agradicipanchi (Heb. 7:24, 25). Shinapash ¿imashinata agradicishcata ricuchi ushapanchi? Jesús Huañushcata Yarina Tandanajuiman na faltashpami agradicishcata ricuchishun (Luc. 22:19, 20). Jesús huañushcataca cada huatami punda judiocunapa calendariota catishpa 14 de nisán nishca punllapi yaripanchi.

¹² Tandanajushpa ashalla micunata rurashcamandaca ¿imatata Jesusmanda ashtahuan yachajupanchi? Jesús juyaj cashcatami yachajupanchi. Gentecunata juyaimandami paica huañungapaj munarca. Shinaca Jesús cai alpapi cashpaca gentecunata imashina juyashcata ricupashunchi.

13. a) Juan 15:9, 1 Juan 4:8-10​pi textocunaca ¿imashinata Jehovapa, Jesuspa juyaita ricuchin? b) Chai juyaitaca ¿picunallata chasqui ushan?

¹³ Imata rurashpapash Jesusca juyaita charishcatami ricuchirca. Jesusca Jehová Dioshna ñucanchita juyaj cashcatami ricuchirca (Juan 15:9; 1 Juan 4:8-10, liingui). Juyaimandami ñucanchimanda huañungapaj munarca. Chaimi ungidocuna cashpa, ‘shuj llamagucunamanda’ cashpapash Jehovapash, Jesuspash ñucanchita juyashcata ricupanchi (Juan 10:16; 1 Juan 2:2). Shinallata Jesusca ¿imashinata juyashcata ricuchirca? Paica chai tuta paipa catijcunahuan ashalla micunata rurashpami paicunata juyashcata ricuchirca.

14. Jesusca ¿imatata ungidocunataca mandarca?

¹⁴ Imashinami yachajupashcanchi ungidocunataca, pai huañuna punllata yarichun ashtaca cosascunata rurana canguichi nishpaca Jesusca na mandarcachu. Chaipa randica ashalla micunata rurachunmi mandarca. Cai tucui huatacunapica ungidocunaca Jesús huañushca punllataca cada huata tandanajushpami yarin. Huaquingunacarin carcelpi cashpapashmi shina yarishca (Apoc. 2:10). Paicunaca Jesuspa mandashcata cazuimandami shina rurashca.

15, 16. Llaquicunata charishpapash huaquin huauquipanicunaca ¿imashinata Jesús huañushca punllata yari ushashca?

¹⁵ Jesusta catijcunaca tandanajuita na ushashpapash Jesús huañushca punllataca cada huata yaringapami esforzarishca. Paicunaca Jesús pai huañuna punllata imashina yachachishcata catingapami esforzarin. Cunanga Harold King huauquimanda ricupashunchi. Paica China llactamanda carcelpi prezo carca. Pihuambash na parlai usharcachu. Chaimi paica Jesús huañuna punllata imashina yarinata ali ricuna carca. Chaipica Harold King huauquica pacallami ima charishcaguhuan tandatapash, vinotapash ruran carca. Shinallata Jesús huañushcata yaringapaj ima punlla urmanatami ricun carca. Ña Jesús huañushcata yarina punlla chayajpica paillami carcelpica candashpa, Jehovata mañashpa callarin carca. Bibliamanda shuj discursotapashmi cun carca.

¹⁶ Cunanga shuj panigucunamanda ricupashunchi. Segunda Guerra Mundialpica shuj panigucunaca campo de concentración nishcapimi prezu carca. Chai panigucunaca paipa causaita peligropi churashpapash Jesús Huañushca Yarina Tandanajuitami ruran carca. Ashalla cosascunata rurana cashcamandami Jesús Huañushca Yarina Tandanajuita pacalla  rurai usharca. Chai panigucunaca ninmi: “Shuj mesagupimi shuj yura finduguta churashpa tandata, vinotapash churarcanchi. Tucuicunami chai mesa muyundipi shayarircanchi. Micha ama punchayachichunmi espermagutalla cindircanchi. Ama shujcuna cuenta japichunmi shina rurarcanchi. [...] Chaipimi Jehová Diostalla sirvisha nishcata yarishpa cutin shinallata nircanchi” nishpa. Chai panigucunaca Jehovapi tucui shunguhuan crishcatami ricuchirca. Ñucanchicunapash llaquicunata charishpapash Jesús huañushca punllata yari ushashcamandaca Jesús ñucanchita juyashcatami ricunchi.

17. ¿Imatata tapurina capanchi?

¹⁷ Jesús huañushcata yarina punlla ña chayamujujpimi cashna tapurina capanchi: “Jesushna shujcunata juyashcataca ¿imashinata ricuchi ushani? ¿Ñucapi pensarinapa randica shujcunata imashina ayudanapichu pensarini? ¿Huauquipanicuna imata rurai ushashcagutaca valichijunichu?” nishpa. Shinaca Jesushna cangapaj, shujcunapi pensaringapapashmi esforzarina capanchi (1 Ped. 3:8).

18, 19. a) Jesús huañushca punllata yaringapaj ñana tandanajushpapash ¿imatata yaripashun? b) ¿Imatata quiquinga ruragripangui?

¹⁸ Shamuj punllacunapica Jesús huañushca punllata yarinaca ñana minishtiringachu. Jesusca Ninan Manllanai Llaqui Punllacunapimi cai alpapi causaj ‘agllashca’ ungidocunata jahua cieloman apanga. Chai punllamanda vichaimanga Jesús huañushca punllata yaringapaca ñana tandanajushunllu (1 Cor. 11:26; Mat. 24:31).

¹⁹ Shamuj punllacunapi Jesús huañushca punllata yaringapaj ñana tandanajushpapash chai punllata ninan valishca cashcatami yarishun. Shinallata Jesús humilde, na manllaj, juyaj cashcatami yarishun. Shamuj punllacunapi causaj gentecunaman Jesús huañushca punllata imashina ruran cashcatami parlai ushashun. Chaita uyanaca chai gentecunataca ninandami ayudanga. Shinaca Jesús huañuna punllata yarina ñucanchitapash ayudachunga, Jesushnami shujcunata juyana, humilde, na manllaj cana capanchi. Shinami Jehová Diosca ashtacata bendicianga (2 Ped. 1:10, 11).