1. Cunan punllacunamanda parlashpaca ¿imatata Jehová Diosca nirca?

JEHOVÁ DIOSCA cunan punllacunamanda parlashpaca nircami: “Shuj llactacunamanda shuj shuj rimaita rimaj chunga runacunami, Judá llactamanda runapaj jahualla churajushcapi charirishpa, cashna ninajunga: ‘Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi’ ninajungami” nishpa (Zac. 8:23). ‘Judá llactamanda runaca’, Jehová Dios paipa espirituhuan agllashca ungidocunatami ricuchijun. Bibliapica paicunataca ‘mushuj Israel llacta’ nishpapashmi rijsin (Gál. 6:16). Cutin, ‘chunga runacunaca’ cai Alpapi para siempre causana esperanzata charij gentecunatami ricuchijun. Chai gentecunaca, ungidocuna Jehovapa ñaupajpi ali ricurishcata yachashpa, paicunahuan Jehovata sirvina shuj jatun bendición cashcata yachashpami ungidocunata ayudangapaj munan.

2. ¿Imamandata shuj llamagucunaca, ‘cangunahuanmi ringapaj munanchi’ nin?

² Ñucanchica cunanbi cai Alpapi causajushca tucui ungidocunapa shutita yachaitaca na ushapanchichu. * Shinapash cai Alpapi causana esperanzata charijcuna o shuj llamagucunaca paicunahuan ‘rita’ ushapanchimi. ¿Imamandata shina nipanchi? Bibliapica ‘chunga runacunaca Judá llactamanda runapa jahualla churajushcapi charirishpami nin: “Ñucanchipashmi, cangunahuan ringapaj munapanchi. Taita Diosca, cangunahuan cajtami yachapanchi”’ nishpa. Cai textopica, ‘Judá  llactamanda shuj runamandami’ parlajun. Chai ‘chunga runacunaca’ paihuan parlashpaca ‘canguna’ ninmi. Shinaca ‘Judá llactamanda runaca’ tucui ungidocunatami ricuchijun. Chaita ali intindishpami shuj llamagucunaca, ungidocunata catijuj cuenda paicunahuan tandanajushpa Jehovata sirvinajun. Shinapash ungidocunataca paicunata mandajcunatashnaca na ricunllu. Bibliapi nishca shinaca, tucuicunami Jesustalla catina capanchi (Mat. 23:10).

3. Cai temapica ¿maijan tapuicunatata yachajugripanchi?

³ Cunan punllacunapica huaquin ungidocunaca cai Alpapi causanajunrami. Chaimandami talvez cashna tapuripashcanchi: Ungidocunaca ¿imashinata cana can?, Jesús Huañushcata Yarina Tandanajuipi pipash tandata micujta, vinota ufiajta ricushpaca ¿imashinata tratana capanchi? Ungidocuna ashtahuan miranajujta ricushpaca ¿preocuparinachu capanchi? Cai temapimi cai tapuicunamanda yachajupashun.

4. a) ¿Ima shimicunatata ungidocunaca na cungana can? b) ¿Imamandata 1 Corintios 11:27-29​pi shimicunataca cazunapacha can?

⁴ Ungidocunaca 1 Corintios 11:27-29​pi shimicunataca na cunganachu can (cai textota liingui). Ungido cashpapash Jehovapa ñaupajpi nali cashca jahua, Jesús Huañushcata  Yarina Tandanajuipi tandata micushpa, vinota ufiashpaca ‘Jesuspa cuerpota, yahuarta nalicachishpami juchata ruranman’ (Heb. 6:4-6; 10:26-29). ‘Jesushuan shujlla tucushcamanda, jahua pachapi aliguta carajpi japigrinata’ chasquingapaca Jehová Diostalla cazuna cashcatami ungidocunaca ali yachan (Filip. 3:13-16).

5. Ungidocunaca ¿imashinata cana can?

⁵ Jehová Diospa espíritu santoca gentecuna humildecuna cachunmi ayudan (Efes. 4:1-3; Col. 3:10, 12). Chaimandami ungidocunaca na nin: “Ñucami shujcunatapash ashtahuan yali cani. Ñucami shujcunatapash yali espíritu santota charini” nishpa. Shinallata, ñucami shujcunatapash ashtahuan yali Bibliata ali intindini nishpaca na jariyanllu. Ashtahuanbash, ungidocunaca pipash ungidomi cani yarin nijpica, tandata micuna, vinota ufianami cangui nishpaca na ninllu. Ungidocunaca cieloman picuna rinata Jehová Dioslla agllana cashcatami yachan.

6. ¿Imashinata 1 Corintios 4:7, 8​pi nishca shinaca ungidocunaca cana can?

⁶ Cielopi causangapaj rina shuj bendición cashcata ali yachashpapash ungidocunaca shujcuna paicunata ninanda alicachishpa tratachunga na shuyanllu (Filip. 2:2, 3). Ungidocunaca Jehová Dios paicunata agllashcata na tucui gentecuna yachashcataca alimi yachan. Chaimi, ciertopachachu cielopi causachun Jehová Diosca candaca agllashca nijpipash na resintirin. Bibliapi nishca shinaca, ungidomi cani nijpi, gentecuna na ñapash crinataca paicunaca alimi yachan (Apoc. 2:2). Ashtahuanbash, ungidocunaca shuj huauquita o shuj panita rijsishcandica, ungidomi cani nishpaca na villajunllu. Paicunaca ungido cashcamandalla paicunata ali tratachunga na munanllu. Ashtahuanbash, ñucaca ungidomi cani nishpaca na jariyajunllu (1 Corintios 4:7, 8, liingui).

7. Ungidocunaca ¿imacunatata na ruran?

⁷ Ungidocunaca, ungidopuralla agllarishpami tandanajuna canchi nishpaca na pensarinllu. Shinallata ungidocuna cachun agllashcamanda parlangapapash na tandanajunllu. Paicunapuralla Bibliata yachajungapapash na tandanajunllu (Gál. 1:15-17). Ungidopuralla tandanajushpaca, congregacionbi shujllashna Jehovata sirvichunga na ayudanmanllu. Ashtahuanbash, espíritu santo munashcashna tucuicunapura tranquilo, shujllashna tandanajushpa causanajushcataca na ricuchinajunmanllu (Rom. 16:17, 18).

8. ¿Imamandata ungidocunataca na yapata alicachina capanchi? (Notatapash ricupangui).

⁸ Ungidocuna cajpipash na yapata alicachinachu capanchi (Mat. 23:8-12). Bibliapica  anciano huauquicunapa fe imashina cashcata ricushpa, paicunapa ejemplota catichunmi animan. Shinapash gentecunata catijcuna tucuchunga Bibliapica na yachachinllu (Heb. 13:7). Huaquin huauquicunaca ‘ashtahuan alicachi tucuna’ cashcatami Bibliapica nin. Huaquingunaca na ungidocuna cashpapash congregaciongunapi ayudangapaj, yachachingapaj, villachingapami ninanda esforzarin (1 Tim. 5:17). Ungido cashcamandalla yapata alicachijpica paicunaca nalimi sintiringa, * jariyashcami tucunga (Rom. 12:3). Ñucanchicuna paicunata yapata alicachimanda, ungidocuna imapash nalicunata rurachunga na munapanchichu (Luc. 17:2).

9. Ungidocunata respetashcata ricuchingapaca ¿imatata rurana capanchi?

⁹ Cieloman richun Jehová agllashca ungidocunata respetashcata ricuchingapaca ¿imatata rurana capanchi? Ñucanchica na tapujunachu canchi, imashinata ungido cashcataca yachaj chayarcangui nishpa. Chaitaca paillami yachan, ñucanchica imatapash na ricunata charinchichu (1 Tes. 4:11; 2 Tes. 3:11). Ungidopa huarmi, taitamamacuna o familiacunapash ungidocunami canga nishpaca na pensajunachu capanchi. Ungido cana bendiciondaca na pimanbash herenciata cuenda saquita ushanllu (1 Tes. 2:12). Imapash tapuicunahuan nali sintichingapaca na munapanchichu. Chaimi quiquinba cusa cieloman rijpi, quiquinlla cai Alpapi quedanata yachashpaca, imashinata sintiripangui nishpaca na tapuchijunachu capanchi. Paraíso Alpagupi cajpi Jehová Dios tucui ñucanchi minishtirishcaguta cunataca alimi yachapanchi (Sal. 145:16).

10. ¿Imamandata ungidocunataca igual tratana capanchi?

¹⁰ Ungido o na ungido cajpipash tucui huauquipanicunata igual tratanaca, ñucanchipash ali cachunmi ayudan. ¿Imamandata shina nipanchi? Bibliapica huaquin ungidocunaca Jehovata sirvinata saquita ushanmi ninmi (Mat. 25:10-12; 2 Ped. 2:20, 21). Ungido cashcamandalla, ashtaca huauquipanicunapa rijsi cashcamandalla o Jehovata ashtaca huatacunata sirvijushcamandalla, ‘imatapash aliguta japingapajlla’ yapata alicachijunaca na alichu can (Jud. 16). Shinami Jehovamanda paicuna caruyajpipash, ñucanchicunaca Jehovapi feta charishpa, Jehovata sirvishpa catita ushashun.

11. Jesús Huañushcata Yarina Tandanajuipica ¿imata pasajushca?

¹¹ Ashtaca huatacunatami Jesús Huañushcata Yarina Tandanajuipi tandata micujcuna, vinota ufiajcunaca ashallacuna carca. Shinapash, cai tucurimui punllacunapica ashtahuanmi mirajushca. Chaita ricushpaca ¿preocuparinachu capanchi? Na. Chaita intindingapaca cai yuyaicunata ricupashun.

12. Jesús Huañushcata Yarina Tandanajuipi ungidocuna ashtahuan miranajujta ricushpaca ¿preocuparinachu capanchi?

¹² “Jehová Diosca paipa agllashcacunataca rijsinmi” (2 Tim. 2:19, NM ). Jehová Diosca pi ungido cashcata o na ungido cashcataca alimi yachan. Shinapash, Jesús Huañushcata Yarina Tandanajuipi picuna tandata micujta, vinota ufiajta cuentaj huauquicunaca, pi ciertopacha ungido cashcataca na yachanllu. Chaimandami, ungidomi cani yarin nij huauquicunapash cuentashca can. Huaquingunaca tauca huatacunata tandata micushpa, vinota ufiashpapash jipamanga saquinmi. Cutin shujcunaca, paicunapa yuyaipi na sano caimanda o nali sintirijuimandami ungidomi cani nishpa cri callarin. Shinaca cunanbi mashna ungidocuna tiashcataca na cabalta yachai usharinllu.

13. Ninan Manllanai Llaqui Punllacuna callarijpi, mashna ungidocuna cai Alpapi causajunamandaca ¿imatata Bibliapica nin?

 ¹³ Cieloman apangapaj Jesús shamujpica, ungidocunaca shuj shuj llactacunapimi canga (Mat. 24:31). Bibliapica ninmi, cai tucurimui punllacunapica ashalla ungidocunami cai Alpapica tianga nishpa (Apoc. 12:17). Shinapash Ninan Manllanai Llaqui Punllacuna callarijpi mashna ungidocuna cai Alpapi causajunataca Bibliapica na imatapash ninllu.

14. Romanos 9:11, 16​pica ¿imatata ungidocunata agllanamandaca parlan?

¹⁴ Ungidocunata imahora agllanataca Jehovallami yachan (Rom. 8:28-30). Jehová Diosca Jesús causarishca jipami, huaquin ungidocunataca agllai callarirca. Apostolcunapa punllacunapica Jesusta tucui ali catijcunami ungidocuna carca. Cutin tauca huatacuna jipamanga ashtaca gentecunami, Jesusta ali catijcunami canchi ninajurca. Shinapash, ashacunallami Jesustaca ali catinajurca. Chai huatacunapipashmi Jehová Diosca paipa espirituhuan huaquin ungidocunata agllarca. Jesús nishca shinaca, chai ungidocunaca ashtaca nali jihua chaupipi trigo viñashcashnami carca (Mat. 13:24-30). Jehová Diosca cai tucurimui punllacunapipashmi, 144 milpurapi * cachun ungidocunata agllashpa catijushca. Tucuri punlla chayamungapaj ashalla faltajujpi Jehová Dios huaquingunata ungido cachun agllajujpica, ñucanchica na imatapash ninajunachu capanchi (Romanos 9:11, 16, liingui). * Ñucanchica shuj chimbapuraipi Jesús parlashca  trabajadorcuna cuendaca na canachu capanchi. Chai trabajadorcunaca, punlla tucurijujpi trabajangapaj shamujcunata amo ali tratajta ricushpaca, amota nalicachishpami rimai callarirca (Mat. 20:8-15).

15. Mateo 24:45-47​pi nishca shinaca ¿tucuilla ungidocunachu ‘aliguta cazushpa aliguta yarishpa sirvij’ esclavo can?

¹⁵ Na tucui ungidocunachu ‘aliguta cazushpa aliguta yarishpa sirvij’ esclavopura can (Mateo 24:45-47, liingui). Apostolcunapa punllacunapishnami, cunanbipash ashtacacunaman micunata caranshna Bibliamanda yachachingapaca, huaquin huauqui ungidocunatalla Jehovapash, Jesuspash utilizajun. Apostolcunapa punllacunapica, huaquin ungidocunallami Escrituras Griegas Cristianas nishca librocunata escribirca. Cunanbipash, huaquin ungidocunallami ‘micuna horas chayajpi, micunaguta caranshna’ Jehovata sirvijcunamanga yachachishpa catijun.

16. Cai temapica ¿imatata yachajupashcanchi?

¹⁶ Cai temapica ¿imatata yachajupashcanchi? Jehová Dios munashcashnami cai Alpapica ashtaca gentecuna causanga. Cutin huaquingunaca, cielomanda Jesushuan mandangapami ringa. Jehová Diosca ‘chunga runacunapura’ cajpipash, ‘Judá llactamanda runapura’ cajpipash paipa tucui sirvijcunatami bendician. Chaimandami, Jehová Diosca tucuicunallata paipa leycunata cazuchun, tucui shunguhuan paita sirvichun munan. Ashtahuanbash, tucuicunallatami humildecuna cana capanchi. Shinallata Jehovatalla sirvishpa, congregacionbipash shujllashna ali cangapaj esforzarina capanchi. Tucuri punlla chayamungacamanga, Jehovata sirvishpa ‘shujlla corralshna’ Jesusta catipashunchi (Juan 10:16).