1-3. a) ¿Imamandashi Evodiapash Sintiquepash culirarishcanga? (Callari dibujota ricupangui). b) Shujcunahuan ama culiraringapaca ¿imatata rurana capanchi?

BIBLIATACA Diospa Shimi cajpimi ashtacata alicachinchi. Bibliapica ashtaca consejocunami tian. Problemacunata charijpi o pandarijpica Bibliapi consejocunami ayudan. Shinaca, Bibliamanda shuj consejota uyashpaca ¿imatata ruranchi? Apostolcunapa punllacunapi causashca ishcai huarmigucunapa ejemplota ricupashun. Paicunaca Evodia, Síntique shuticunami can, ungida panicunami carca. Bibliapi nishca shinaca, paicunapurami culirarirca. Shinapash paicuna imamanda culirarishcataca Bibliapica na ninllu. Shinaca paicuna tal vez imamanda culirarishcata pensaripashun.

² Evodiaca huaquin huauquipanicunatami paipa huasipi micuchun invitashcanga. Shinapash Sintiquetaca na invitarcachu. Jipamanga Evodiapa huasipi micungapaj rishcacunaca cushijushpami Evodiapaman rishcataca parlanajun. Chaita uyashpami Sintiqueca ashtacata culiran. Sintiqueca pensashcangami: “Evodiaca ñuca ali amigami can yarcanimi, chaishujcunata invitashpapash ñucataca na invitahuashcachu” nishpa. Shinallata pensashcangami, Evodiataca nara ali rijsishcanichu, ñucamanda caruyangapami munajun nishpa. Shina pensashpami paipash Evodia invitashca huauquipanicunatallata paipa huasipi micungapaj richun invitashcanga. Shinapash Evodiataca na invitanllu. Evodiahuan, Sintiquehuan nali  llevarijta ricushpami congregacionbi shuj huauquipanicunapash tranquilo caitaca na ushashcanga. Bibliapi nishca shinaca, chai panigucuna cutin ali tucuchunmi apóstol Pabloca shuj consejota paicunaman curca. Chai consejota uyashpami, paicunaca Jehovata cushilla sirvishpa catishcanga (Filipenses 4:2, 3).

³ Cunanbipashmi huaquinbica shuj huauquipanicunahuan imapash problemacunata charinchi. Shinapash Bibliapi consejocunata cazushpaca chai problemata arreglai ushashunmi. Ashtahuangarin, Bibliapi consejocunata cazushpaca ashtaca problemacunamanda, llaquicunamandami jarcarita ushanchi. Bibliapi consejocunata cazushpaca Taita Diospa Shimi Bibliata alicachishcatami ricuchinajunchi (Salmo 27:11).

4, 5. Ama llaquilla sintirichun o ama culira sintirichunga ¿Bibliapi ima consejocunata ayudai ushan?

⁴ Huaquinbica ñucanchi costumbrecunamanda, llactamanda, o ñucanchi imashina cashcata ricushpa shuj gentecuna imatapash nijpi o rurajpimi llaquilla sintirinchi o culira sintirinchi. Shuj huauqui o shuj pani imatapash nijpi o rurajpicarin ashtahuanmi llaquilla sintirinchi o culira sintirinchi. Chai ratocunapi jarcarinaca shinllipachami can. Shinaca ¿Bibliapi ima consejocunata ama llaquilla o culira sintirichun ayudan?

⁵ Jehová Diosca gentecuna na jarcarijpi ima pasajtaca alimi yachan. ¿Nachu ñucanchicuna culira sintirishpaca imatapash ninchi o ruranchi, cutin jipamanga arripintirishca purinajunchi? Chaimandami Bibliapica jarcarinami canguichi nishpa cashna nin: “Cambaj yuyaipica, ama ñapash fiñaringuichu” nishpa. Pensaripashun, Bibliapi chai consejota cazushpaca ¿nachu ashtaca problemacunamanda caruyanchiman? (Eclesiastés 7:9; Proverbios 16:32, liingui). Bibliapica ninbashmi, shujcunata perdonanami canguichi nishpa. Jesuscarin nircami, shujcunata canguna na perdonajpica Jehová Diospash cangunataca na perdonangachu nishpa (Mateo 6:14, 15). Shinaca pensaripai ¿ama ñapash fiñaringapaj, shujcunata tucui shunguhuan perdonangapaj esforzarinachu cani? nishpa.

6. Pipash imatapash nijpi o rurajpi na jarcarishpaca ¿imata tucunchiman?

⁶ Pipash imatapash nijpi o rurajpi na jarcarishpaca, llaquilla catishpa o culiralla catishpami paitaca na ricunayachi callarishpa millanayachinchiman. Huaquinbicarin, shujcunapash ñucanchishnallata sintirichunmi shuj huauquipanicunaman parlai callarinchiman. Pihuanbash culirarishcata pacangapaj munajpipash tiempohuanga shujcunapashmi cuenta japinga. Ashtahuangarin ñucanchimanda caruyangami (Proverbios 26:24-26). Ancianocunaca ñucanchicuna ama culirarishca cachun, ñucanchi shungupi pitapash ama millanayachishpa ricuchun, perdonachunmi Bibliapi huaquin consejocunahuan ayudanga (Levítico 19:17, 18; Romanos 3:11-18). Ancianocuna Bibliamanda shuj consejota cujpica ¿chai consejota cazushunlla?

7, 8. a) ¿Imashinata Jehová Diosca cai Alpapi paipa organizacionda ñaupaman pushajun? b) Bibliapica ¿imacunatallata mandan? c) ¿Imamandata chai mandashcacunataca cazuna capanchi?

⁷ Jehová Diosca cai Alpapi paipa organizacionda charinmi. Paimi chai organizaciondaca ñaupaman pushajun, yachachijunbash. Shinapash ¿imashinata chaitaca rurajun? Jehová Diosca Jesustami congregaciongunata ‘umashna mandachun’ churashca. Chaimandami Jesusca, Jehovata sirvijcunaman yachachichunbash, paicunata ñaupaman pushachunbash ‘aliguta cazushpa, aliguta yarishpa sirvij’ esclavota churashca (Efesios 5:23; Mateo 24:45-47). ‘Aliguta cazushpa, aliguta yarishpa sirvij’ esclavoca apostolcunapa punllacunapi cuerpo gobernantepa ejemplota catishpami, Bibliataca Taita Diospa Shimi cashcamanda ninanda alicachin (1 Tesalonicenses 2:13, liingui). Shinaca ¿imacunatalla Bibliapica mandan?

⁸ Bibliapica, tandanajunataca na saquinachu canguichi nishpami mandan (Hebreos 10:24, 25). Tandanajuicunapimi, tucui huauquipanicunahuan Bibliata igual yachajushpa chaitallata crinchi (1 Corintios 1:10). Shinallata Bibliapica ninmi, Diospa Reinotami pundapica “mascana canguichi” nishpa (Mateo 6:33). Bibliapica ninbashmi, huasin huasin rishpa, plazacunapi, gentecuna tiashca pushtucunapimi villachina canguichi nishpa (Mateo 28:19, 20; Hechos 5:42; 17:17; 20:20). Ancianocunatapash Bibliapica mandanmi, congregación limpio cachunmi ricuriana  canguichi nishpa (1 Corintios 5:1-5, 13; 1 Timoteo 5:19-21). Shinallata Bibliapica ninmi, cangunapa cuerpopipash limpiomi cana canguichi, Jehová Dios millanayachishca yuyaicunata, ruraicunatapash saquinami canguichi nishpa (2 Corintios 7:1).

9. Bibliapi yachachishcacunata ñucanchiman intindichingapaca ¿imatata Jesusca rurarca?

⁹ Huaquingunaca pensanbashchari, Bibliata intindichichunga na pitapash minishtinchichu nishpa. Shinapash 1919 huatamandami Jesusca, Jehovata sirvijcunaman Bibliata intindichishpa yachachichun, Bibliapi ima nishcata cazuchunga ‘aliguta cazushpa, aliguta yarishpa sirvij’ esclavota churashca. Bibliapi ima nishcata cazushpami congregacionguna limpio, tranquilo, shujllashna tandanajushca cachun ayudanchi. Shinaca pensaripashunchi: “¿Jesustapash cazushpachu, ‘aliguta cazushpa, aliguta yarishpa sirvij’ esclavopa instrucciongunata catini?” nishpa.

10. Jahua pachapi Jehovapa organizacionmandaca ¿imatata Ezequiel libropica yachajunchi?

¹⁰ Bibliapimi ñucanchicunaca yachajushcanchi, Jehová Diosca jahua pachapipash paipa organizacionda charishcata. Shuj ejemplota ricupashun. Profeta Ezequielca, shuj muscuipishnami ricurca, Jehová Diosca shuj jatun carropishna tiajujta. Chai carroca maiman Jehová Dios munashcamanmi ñapash cuyurijurca (Ezequiel 1:4-28). Muscuipishna ricushca carroca jahua pachapi Jehovapa organizacionmi can. Chai organizacionga Jehovapa munashcata rurashpami ñapash cuyurin. Jahua pachapi Jehovapa organizacionmi cai Alpapi Jehovapa organizaciondaca ñaupaman pushajun. Yaripashun, cai último 10 huatacunapica ashtaca cambiocunami cai Alpapi Jehovapa organizacionbica tiashca. Na cunganachu capanchi, chai cambiocuna tiachunga Jehová Diosmi ricuriajun. Ñallami Jesusca paipa angelcunandi tandanajushpa cai Alpapi tucuilla nali ruraicunata tucuchinga. Chaipica Jehovatapash paipa shutitapash na respetajcuna, Jehovapa mandashcata nalicachishpa rimajcunaca na tiangachu.

11, 12.Cai tucuri punllacunapica ¿imatallata Jehovapa organizacionga rurajushca?

¹¹ Cai tucuri punllacunapi Jehovapa organización imata rurashcata ricupashun. Construcción. Testigo de Jehovacunapa ashtahuan jatun Betel huasita Warwick, New York llactapi rurangapaca ashtaca huaranga voluntario huauquipanicunami ayudashca. Cutin mundo enteropi shuj ashtaca huaranga voluntario huauquipanicunaca Tandanajui Huasicunata, sucursalcunata rurashpami ayudashca. Chai tucuilla voluntario huauquipanicunataca Departamento Mundial de Diseño y Construcción nishcami ñaupaman pushajun. Chai tucuilla huauquipanicuna shinllita trabajashpa ayudashcamandaca ashtacatami agradicinchi. Shinallata, mundo enteropi shuj huauquipanicuna paicunapa munai culquita cushpa ayudashcamandapashmi chai tucuilla huasicunataca rurai ushashcanchi. Jehová Diosca paipa sirvijcuna humilde cashcamanda, cazushcamandami paicunataca ashtacata bendiciajun (Lucas 21:1-4).

¹² Yachachina. Jehová Diosca paita sirvijcunaman yachachinataca ninandami alicachin (Isaías 2:2, 3). Yachajungapaj ima escuelacunalla tiashcata ricupashun. Ñucanchica Precursorcunapa Escuela, Diospa Reinomanda Villachijcunapa Escuela, Galaad Escuela, Mushuj Betelitacunapa Escuela, shinallata Superintendente de Circuitocuna paicunapa huarmindi rina Escuela, Comité de Sucursalmanda huauquicuna paicunapa huarmindi rina Escuela, Ancianocunapa Escuela, Escuela del Ministerio del Reino nishcacunatami charinchi. Ashtahuangarin Internetpi jw.org direcciondapashmi charinchi. Chaipica Bibliapash, Bibliamanda ashtaca publicaciongunapashmi shuj shuj idiomacunapi tian. Ashtahuangarin huahuacuna, familiacuna ricuna informacionbashmi jw.org direccionbica tian. Shinaca pensaripai ¿villachijushpapash Familiahuan Adorana Tutapipash jw.org direccionda utilizajunichu? nishpa.

13. Jehovata sirvijcunaca ¿ima obligaciondata charipanchi?

¹³ Jehovapa organizacionbi cana, Jehová imata ñucanchiman mandajujta yachanaca shuj jatun bendicionmi can. Jehová Dios imata alicachishcata yachaimandami paita cazuna, pai imata alicachishcata  rurana obligacionda charinchi. Ashtaca gentecuna nalita ruranata alicachijpipash Jehová Diospa ejemplota catishpami ‘nalita ruranataca millanayachina’ canchi (Salmo 97:10). Ñucanchicunaca shuj gentecunashna ‘nalitara alimi nishpa, alitara nalichu’ can nishpaca na purinachu canchi (Isaías 5:20). Ñucanchicunaca Jehovata cushichingapaj munashpami tucuipi limpio cangapaj munana canchi (1 Corintios 6:9-11). Jehová Diosca ñucanchicunallata ali causachun munashpami Bibliapica huaquin cosascunata mandashca. Ñucanchipash paita juyaimandami paita cazungapaj munanchi. Chaimandami huasipi cashpa, trabajo cashpa, escuelapi o colegiopi cashpa o maipi cashpapash Jehová Dios Bibliapi imata mandashcata cazuna canchi (Proverbios 15:3). Shinaca imacunapilla Jehovata cazuna cashcata ricupashun.

14. ¿Imashinata taitacunaca Jehovata cazushcata ricuchita ushan?

¹⁴ Huahuacunata yachachina. Bibliapica taitacunatami Jehová Diosca huahuacunaman imashina yachachinata mandajun. Shinapash Jesusta catij taitacunaca cai mundopi yuyaicunata ama catingapami esforzarina can (Efesios 2:2). Shuj ejemplota ricupashun. Huaquin llactacunapi taitacunaca pensanbashchari: “Mamacunami huahuacunaman yachachina can” nishpa. Shinapash Bibliapica na chaita nijunllu. Bibliapica ninmi, taitacunami huahuacunamanga Jehovamanda yachachina can nishpa (Efesios 6:4, NM). Jehovata juyaj taitacuna, mamacunaca paicunapa huahuacunapash profeta Samuel uchillagu cashpa Jehovata juyashca shina juyachunmi munan (1 Samuel 3:19).

15. Imapash jatun decisionda agllagrijushpaca ¿imashinata Jehová Diosta cazushcata ricuchi ushapanchi?

¹⁵ Decisiongunata agllana. Jehovata cazungapaj munashpami ñucanchicunaca jatun decisiongunata nara agllashpallata Jehová Dios imata pensajta yachana canchi. Ali decisiongunata agllachunga Bibliapash, Jehovapa organizacionbashmi ayudan. Shuj ejemplota ricupashun. Shuj llactacunapi  causangapaj rishca taitamamacuna shuj huahuaguta charishpaca, chai llullu huahuagutaca paicunapa familiacunamanmi cachangapaj munan. Shinami taitamamacunaca tranquilo trabajashpa, culquitapash mirachi ushashun nin. Shinapash cada taitamamacuna decisionda agllana cashpapash taitamamacunami pensarina can ¿imatashi Jehová Diosca yuyan? nishpa (Romanos 14:12, liingui). Ñucanchi familiamanda o trabajomanda imatapash nara decidishpallatami Biblia imata nijta pundapica ricuna canchi. Ñucanchillata ali ñanda agllaitaca na ushanchichu, siempremi Jehová Dios ayudachun minishtinchi (Jeremías 10:23).

16. Huahuata charishpaca ¿imatata shuj huarmiguca rurangapaj munarca? Ali decisionda agllachunga ¿imata ayudarca?

¹⁶ Shuj cusahuarmica caru llactapi causanajushpami shuj huahuaguta charirca. Chaimandami paicunaca, abuelocunahuan causachun huahuata cachangapaj parlarinajurca. Shinapash chai punllacunapillatami chai huahuagupa mamaca testigo de Jehovacunahuan Bibliata yachajui callarirca. Shinami chai huarmiguca, paipa huahuaman Jehovamanda yachachina responsabilidadta charishcata yachajurca (Salmo 127:3; Proverbios 22:6). Chaimandami chai huarmiguca, Bibliapi yachachishca shina Jehovataca tucui shunguhuan mañarca, alita ruranata agllangapaj ayudahuai nishpa (Salmo 62:7, 8). Shinallata, paiman yachachijuj paniguhuan, congregacionmanda shuj huauquipanicunahuanbashmi paipa problemamanda parlarca. Cutin, paipa familiacunapash, rijsicunapash abuelocunapaman huahuaguta cachai nishpami chai huarmigutaca rimanajurca. Shinapash paica alita rurangapaj munashpami huahuataca na cacharca. Congregacionbi huauquipanicunaca chai huarmigutapash, paipa huahuatapash ricuriashpami cuidanajurca. Chaita ricushpami chai huarmigupa cusaca paipash Bibliata yachajui callarishpa, tandanajuicunamanbash paipa familiahuan igual ri callarirca. Huahuata na cachashca huarmiguca, Jehová Dios paipa oracionda uyashcata cuenta japishpaca ashtacami cushijurianga.

17. Bibliata pimanbash yachachijushpaca ¿ima instrucciongunatata catina capashcanchi?

¹⁷ Instrucciongunata catina. Jehovata cazungapaj munashpaca, Jehovapa organización cushca instrucciongunatapash catinami canchi. Shuj ejemplota ricupashun. ¿Imatata Bibliaca Yachachin? librota gentecunaman yachachi callarishcandica ¿imatata rurana capanchi? Jehovapa organizacionga nishcami, cada yachachishca jipami huaquin minutocunapica Jehovapa organizacionmandapash yachachina can nishpa. Jehovapa organizacionmanda yachachingapaca Ñucanchi tandanajuicunaca ¿imashinata can? videota, shinallata ¿Picunata Jehová Diospa munaita ruranajun? folletotami charinchi. ¿Imatata Bibliaca Yachachin? librota tucuchishca jipaca, yachajujcuna ashtahuan ‘aliguta crishpa’ catichunmi, ña bautizarishca cajpipash Manténganse en el amor de Dios librota yachachina canchi (Colosenses 2:7). Shinaca ¿Jehová Diospa organización cushca instrucciongunataca catinajupanchichu?

18, 19.¿Imacunamandallata Jehová Diostaca agradicina capanchi?

¹⁸ ¿Imacunamandallata Jehová Diostaca agradicina canchi? Ricupashun. Jehovamandami “causanchi, purinajunchi, imatapash ruranchi” (Hechos 17:27, 28). Shinallata, Jehová Diosmi paipa Shimi Bibliatapash cushca. Ñucanchicunaca Tesalónica llactamanda huauquipanicunashnami Bibliataca Taita Diospa Shimi cashcamanda tucui shunguhuan alicachina canchi (1 Tesalonicenses 2:13).

¹⁹ Bibliami ñucanchitaca Jehová Diosman quimirichun ayudashca. Paiman quimirijpimi Jehová Diospash ñucanchiman quimirishca (Santiago 4:8). Paipa organizacionbi cachun saquishcamandaca ashtacatami cushijunchi. Ñucanchica Salmo capítulo 136​ta escribij runagu cuendami sintirinchi. Paica nircami: “Mandaj Diosta alicachinguichi paica aligumari. Pai llaquinaca causaita causaicamanmi” nishpa (Salmo 136:1). Chai capitulopa cada versopimi nijun, “pai llaquinaca causaita causaicamanmi” canga nishpa. Shinaca, ñucanchicuna Jehovata cazushpaca Jehovapa organizacionbi cushca instrucciongunatapash pactachinami canchi. Shina rurajpimi Jehová Diosca causaita causaicaman ñucanchita llaquishpa, para siempre causana bendiciondapash caranga.