Apocalipsis 4:2, 3​pica ninmi: ‘Jahua pachapica mandangapaj tiarinami tiajurca. Chai mandangapaj tiarinapica shujllami tiajurca. Chai tiajujca jaspe shuti, cornalina shuti juyailla rumicunashna punchapambami ricurijurca. Pai tiajuj tiarina muyundipica, shuj cuichimi punchapamba shitajuj esmeralda shuti rumishna muyushca tiajurca’.

Ezequiel 1:27, 28​pica ninmi: ‘Cinturasmanda vichaimanbash, cinturasmanda uraimanbash ninashna muyundi punchapamba cajtami ricurcani. Imashinami tamia punllacuna fuyupi cuichi ricurin, chashnami chai punchapambapash muyundi ricurirca. Mandaj Diospa punchapambaguman rijchami carca’.

Apóstol Juanbash, profeta Ezequielpash mandangapaj tiarinata, punchapamba brillajuj juyailla rumicunata, cuichitapashmi muscuipishna ricurca. Chai cosascuna punchapamba cajtaca tucuicunami ali yachanchi. Punchapamba brillajuj cosascunamanda Bibliapi parlajpimi Jehová Dios punchapamba cajtaca intindi ushanchi. Ashtahuangarin, Jehová Dios ninan punchapamba cajta yachashpami tranquilo sintiri ushanchi.

Salmo librota escribij runagupash nircami: “Mandaj Diosca jatunmari. Paica, tucuita yalishpa alicachi tucunamari. Tucui dioscunatapash ashtahuan yali manllana Diosmari. Shuj gentecunapaj tucui dioscunaca, yanga dioscunami. Ashtahuangarin Mandaj Diosmi, jahua pachataca rurarca. Paipaj ñaupajpica alicachinajuipash, juyaillagupacha canapashmi tian. Paipajlla huasipica, ninan ushaipash, punchapambapashmi tian” nishpa (Salmo 96:4-6).

Jehová Diosca Tucui Autoridadta Charij Dios cashpapash paiman quimirishpa paita mañachunmi munan. Paica uyasha ninmi (Salmo 65:2). Jehová Diosca ñucanchita ashtacata juyashpami ñucanchimanda preocuparin. Chaimandami apóstol Juanga nirca: “Taita Diosca, ninandapacha juyajmi” can nishpa (1 Juan 4:8).

Jesusta catij “Esteban runaguca, Diospaj jucha illaj Espíritu junda cashpami, jahua pachata vichai ricushpaca Taita Diospaj punchapambagutapash, Taita Diospaj ali ladoman Jesús tiajujtapash ricujurca. Shina ricushpami Estebanga, cashna nirca: ‘Ricuichi, jahua pacha pascariajtami ricuni. Chaipica, Taita Diospaj ali ladomanmi, Runa Aichayu tucushcapash tiajun’” nishpa (Hechos 7:55, 56).

Esteban nara shina nijpillatami judiocunata yachachijcunaca Jesusta huañuchichun cachashcarca. Chaimandami Esteban parlajuj horaspica, Jesusca causarishpa, ashtaca autoridadta charirca. Apóstol Pabloca nircami, Jehová Diosca ‘Cristotaca huañushcacunapa chaupimandami causachirca. Shina causachishpami jahua pachaman pushashpaca, paipa ali ladoman tiachirca. Cristoca mandajcunatapash, ushaita charijcunatapash, jatun mandajcunata, cati mandajcunatapash tucuita mandangapami chashna tiarirca. Shamuj punllacunapipashmi tucuita mandajunga’ nishpa (Efesios 1:20, 21).

 Bibliapi nishca shinaca, Jesusca ashtaca autoridadta charishca jahuapash, ñucanchitaca Jehovashnallatami ashtacata juyan. Jesús cai Alpapi villachijushpaca, ungushcacunata jambirca, huañushcacunatapashmi causachirca. Paipa causaitapash cushpami Jehová Diostapash gentecunatapash ashtacata juyashcata ricuchirca (Efesios 2:4, 5). Cunanbica Taita Diospa ali ladopimi Jesusca tiajun. Jesusca ñallami Taita Diosta cazujcunata maipi cajpipash tucuicunata ayudanga.

Profeta Danielca Jehová Diosmanda parlashpami nirca: ‘Ñuca ricujujpillatami mandangapaj tiarinacunata churanajurca. Chaipica, unai unai huatacunata charij shuj Rucugumi tiarirca. Huaranga huarangacunami paitaca sirvinajurca. Ashtahuan huaranga huarangacunami paipa ñaupajpi shayanajurca’ nishpa (Daniel 7:9, 10).

Profeta Danielca ashtaca ashtaca angelcunatami jahua pachapica ricurca. Angelcunaca ashtaca ushaitami charin, alipacha yachajushcacunami can. Ñucanchishna cuerpotaca na charinllu. Angelcunapurapica serafín nishcacuna, querubín nishcacunami tian. Bibliapica 250 yalitami angelcunamanda parlan.

Angelcunaca cai Alpapi causashca jipa jahua pachapi causangapaj rishca gentecunaca na canllu. Jehová Diosca gentecunata nara rurashpallatami angelcunata rurarca. Cai Alpata Jehová Dios rurajujpica ashtacata cushijushpami angelcunaca ricunajurca (Job 38:4-7).

Cunan punllacunapica Diospa Reinomanda ali villaicunata villachichun ayudashpami angelcunaca Jehová Diosta sirvinajun (Mateo 24:14). Villachinapi ayudanajushcataca ¿imashinata yachanchi? Apóstol Juanga shuj muscuipishna ricushpami nirca: ‘Jahua pacha chaupita cutin shuj ángel rijujtami ricurcani. Chai angelca cai pachapi causajcuna, tucui llactacunapi causajcuna, aillucuna, shuj rimaita parlajcuna, shuj shuj gentecunapash causaita causaicaman quishpirichunmi villajurca’ nishpa (Apocalipsis 14:6). Punda tiempocunapimi angelcunaca gentecunahuan parlan carca. Gentecunahuan cunanbi ñana parlashpapash ali shungu gentecunata tarichunmi villachishpa purinajujcunataca ayudan.

Bibliapica ninmi: ‘Jahua pachapica jatun macanajuimi tiarca. Miguel shuti angelca [Jesusca], paipa angelcunandimi dragonhuan macanajurca. Shinallatami dragonbash, paipa angelcunandi macanajurca. Shina macanajushpapash, chai dragonga na unaicaman macanajui usharcachu.  Jahua pachapipash paicuna causanaca na tiarcachu. Chai dragonga jahua pachamandami shitai tucurca. Paica pundamandapacha causajuj culebrami. Paillatami diablo shutipash. Satanás shutipash. Paica tucui cai pachapi causajcunatami umachin. Paica paipa angelcunandimi alpaman shitai tucurca’ nishpa (Apocalipsis 12:7-9).

Jahua pachapica na siemprechu ali causai tiarca. Gentecuna cai Alpapi tiai callarishca tiempopica shuj nali angelmi jahua pachapica tiarca. Paica paita adorachun munashpami Jehová Diosta na cazushpa Satanás tucurca. Satanás nishpaca Taita Diospa contra nijunmi. Jipamanga shuj angelcunapashmi Taita Diosta na cazurca. Paicunataca ayacuna o demoniocuna ninmi. Paicunaca jatun nalicunami can. Taita Diosta cazungapaca na munanllu. Gentecunapash Taita Diosta ama cazuchunmi pandachinajun.

Satanaspash demoniocunapash jatun nalicunami can, na pitapash juyanllu. Gentecunataca na ricunayachinllu. Paicunapa culpamandami cai Alpapica ashtaca llaquicuna tian. Shuj ejemplota ricupashun. Satanás Diablomi ñaupa punllacunapica Jehovata ali sirvij Job runagupa tucuilla huagracunatapash, sirvijcunatapash huañuchirca. Jipamanga shuj ‘ninan acapanata’ cachashpami Job runagupa 10 churicuna tianajushca huasita urmachishpa tucuillata huañuchirca. Jipamangarin ‘Job runagutaca chaqui pundamanda, uma coronacaman jatun nali caracha’ ungüihuanmi llaquichirca (Job 1:7-19; 2:7).

Shinapash ñallami Diabloca tucuchi tucunga. Jahua pachamanda shitai tucushca punllamandami Diabloca ñalla tucuchi tucunataca ali yachan (Apocalipsis 12:12). Chaita yachashpami ñucanchipash cushijunchi.

Bibliapica Jesustaca ninmi: ‘Canba yahuarhuanmi ñucanchitaca tucui aillupuracunamanda, shuj shuj shimita rimaj puracunamanda, llactacunamandapash Taita Diospa causachun randircangui. Shina randishpami jatun mandajcuna cachun, curacuna cachunbash rurashcangui. Shina cashpami cai pachapi causajcunataca tucuicunata mandanajushun’ nishpa (Apocalipsis 5:9, 10).

Huaquin gentecunapashmi causarishpaca jahua pachaman ringa. Jesusca paipa apostolcunataca nircami: ‘Canguna chaipi causachunmi alichingapaj rigrijuni. Chai jipami, ñuca causajuj llactapi ñucahuan causachun, cangunataca pushangapaj tigramusha’ nishpa (Juan 14:2, 3).

Jahua pachaman rijcunaca, cai Alpapi gentecunatami Jesushuan jahua pachamanda igual mandanga. Paicuna mandajpica cai Alpapi causajcunaca ashtaca bendiciongunatami charinga. Chai mandanamanda parlashpami Jesusca paipa catijcunataca cashna mañanguichi nishpa yachachirca: “Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun. Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman” nishpa (Mateo 6:9, 10).

Apóstol Juanga nircami: ‘Jahua pachamandaca cashna nishpa ninanda caparijtami uyarcani: “Ricuichi, Taita Diospa jatun carpa huasiguca gentecunahuanmi. Taita Diosmi paicunapa ñavimandaca tucuilla viquita fichanga. Huañuipash, huacaipash, llaquipash, nanaipash na ashtahuan tiangachu. Punda ima tiashcapash illangami”’ nishpa (Apocalipsis 21:3, 4).

Chai shimicunaca Diospa Reinopi Jesuspash, paihuan mandana gentecunapash jahua pachapi causarijpimi pactaringa. Paicuna mandashpami Diablotapash tucuchishpa, cai Alpataca shuj paraíso Alpaguta ruranga. Cunan punllacunapi tucuilla llaquicunaca tucuringami. Huañuipash ñana tiangachu.

Cutin ashtaca ashtaca huañushca gentecunaca ¿imashi tucunga? ¿Jahua cielomanllu ringa? Paicunaca cai Alpapi cutin causangapami causaringa. Shuj juyailla paraíso Alpagupimi cushilla causanga (Mateo 5:5).