1, 2. Jehová Diosta sirvijcunaca ¿imacunahuanda shinllita macanajuna capanchi?

JEHOVÁ DIOSTA sirvijcunaca Abelmanda callarishpa cunangamanmi ñucanchi feta shinlliyachingapaj shinllita macanajunshna esforzarishcanchi. Apóstol Pabloca hebreo huauquicunataca nircami, ashtaca llaquicunata aguantashpa, macanajunshna shinllita esforzarishpami Jehová Diospa ñaupajpi ali ricurishpa paipa bendiciondapash japi ushashcanchi nirca (Hebreos 10:32-34). Apóstol Pabloca Jesusta catijcuna esforzarishcata parlangapami, chai tiempopi Grecia llactamanda calpajcunahuan, boxeadorcunahuan, macanajujcunahuan chimbapurarca (Hebreos 12:1, 4). Ñucanchicunapashmi shamuj punllacunapi para siempre causai ushangapaca shinllita calpanshna Jehovata sirvinajunchi. Shinapash ashtaca contracunami ñucanchitaca desanimachishpa llaquilla sintirichun, shamuj punllacunapi ali causai tianata ama crichun pandachingapaj munan.

² Ñucanchica Diablohuan, cai mundopa ruraicunahuanmi shinllita macanajunshna causana canchi (Efesios 6:12). Chaimandami cai mundopash, panda yachachishcacunapash, yanga yuyaicunapash pandachichunga  na saquina canchi. Shinallata shuj jarihuan o shuj huarmihuan juchapi urmanamanda, yapata ufianamanda, tabacota, drogacunata chupanamandapash caruyanami canchi. Ashtahuangarin ama desanimaringapaj, ñucanchi nali munaicuna ama mishachunmi shinllita esforzarina canchi (2 Corintios 10:3-6; Colosenses 3:5-9).

3. Contracunata mishachunga ¿imashinata Jehová Diosca ñucanchita yachachishpa ayudan?

³ ¿Ciertopachachu chashna shinlli contracunata mishai ushanchi? Ari ushanchimi. Shinapash na facilchu canga. Apóstol Pabloca paillata shuj boxeadorhuan chimbapurarishpami nirca: “Macanajushpapash, na yanga huairata huactanshna macanajunichu” nishpa (1 Corintios 9:26). Imashinami ricunchi, nali ruraicunata mishangapaca boxeador macanajuj cuendami shinllita macanajuna canchi. Chaipaca Jehová Diosllatami ñucanchitaca imata ruranata yachachishpa ayudan. ¿Imashinata yachachishpa ayudan? Bibliahuan, ñucanchi publicaciongunahuan, tandanajuicunapi, jatun tandanajuicunapi yachachishcacunahuanmi ñucanchitaca yachachin. Shinaca ¿ñucanchita yachachingapaj Jehová cushca tucuilla ayudatachu aprovechanajunchi? Chai ayudacunata na aprovechashpaca, contracunata mishangapaca na listo cashunllu. Ashtahuangarin huairata huactajuj cuendami huactanajunchiman.

4. Nali ruraicuna ama mishachunga ¿imatata rurai ushapanchi?

⁴ Tucui tiempomi rijchariashna causana canchi. Ñucanchi contracunaca na yashcapi o espiritualmente irquilla cajpimi jaicata llaquichi ushan. Bibliapica cai shimicunahuanmi ñucanchita advirtishpa animajun: Nali ruraicuna mishachunga na saquinachu cangui, “ashtahuangarin aliguta rurashpami, chai nalitaca mishana cangui” nishpa (Romanos 12:21). Caipi nishca shinaca, macanajunshna esforzarishpaca nali munaicunata, nali yuyaicunata mishai ushashunmi. Shinapash macanajunata saquishpa ñana esforzarijpica, Diablopash, cai mundopash, ñucanchi nali munaicunapashmi ñucanchitaca mishanga. Shinaca na desanimarishpami esforzarishpa catina canchi (1 Pedro 5:9).

5. a) Jehová Diospa ñaupajpi ali ricuringapaca ¿imatata yaipi charina capanchi? b) ¿Picunapa ejemplomandata yachajupashun?

⁵ Mishangapaj munashpaca, Jehová Diospa ñaupajpi ali ricuringapaj esforzarijushcatami yaipi charina canchi. Hebreos 11:6​pica ninmi: ‘Taita Diospaman quimiringapaj pipash munashpaca, pai tiajtaca crinapachami. Paita mascashpa causajcunaman aliguta caranatapash crinapachami’ can nishpa. Caipi nishca shinaca, Jehová Dios ñucanchita bendiciachunga shinllitami esforzarina canchi (Hechos 15:17). Bibliapica tauca jaricuna, huarmicuna tucui shunguhuan esforzarishcatami parlan. Huaquingunaca Jacob, Raquel, José, apóstol Pablomi can. Paicunaca shungupipash ninandami llaquirirca, shuj llaquicunatapashmi charirca. Shinapash shinllita esforzarijpimi Jehová Diosca paicunata bendiciarca. Ñucanchicunapash esforzarishpa catijpica ñucanchicunatapashmi Jehová Diosca bendicianga. Shinaca paicunapa ali ejemplota imashina catinata ricupashun.

6. a) ¿Imamandata Jacobca macanajunshna esforzarishpa catirca? b) ¿Ima bendiciongunatata Jacobca chasquirca? (Callari dibujota ricupangui).

⁶ Jacobca Jehová Diosta na saquishpami tucuipi cazurca. Paica macanajunshna esforzarishpa catinataca nunca na shaijurcachu. ¿Imamandata Jacobca na shaijurca? Jehová Diosta juyaimanda, paihuan ali amigo cangapaj munaimandami Jacobca na shaijurca. Paipa miraicunata Jehová Dios bendiciasha nishca shimicunataca ciertopachami pactachinga yashpami Jacobca Jehovapi confiarca (Génesis 28:3, 4). Casi 100 huatacunata charishpaca, Jacobca Jehová Diospa bendicionda chasquingapami shuj angelhuan macanajurca (Génesis 32:24-28, liingui). Jacobca ¿imamandata shuj angelhuan macanajui usharca? Jacobca Jehová Diospa bendicionda charingapaj  munashpami shinllita esforzarirca. Shina esforzarishcamandami Jehová Diosca paita bendiciarca. Chaimandami Jacobtaca Israel shutita churarca. Israel shutica Taita Dioshuan ‘macanajushca’ o Diospa bendicionda chasquingapaj aguantashcatami nisha nin. Chaimandami, Jacobca Jehová Diospa ñaupajpi ali ricurirca, paipa bendiciondapash chasquirca. Ñucanchicunapashmi chai bendiciongunatallata charingapami munanchi.

7. a) ¿Ima llaquitata Raquelca charirca? b) ¿Imatata Raquelca rurarca? ¿Ima bendiciondata chasquirca?

⁷ Raquelca Jacobpa juyashca huarmimi carca. Paipashmi paipa cusa Jacobman Jehová Dios nishca shimicuna imashina pactarinata ricungapaj munarca. Shinapash Raquelca na huahuacunata chari usharcachu. Chai tiempocunapica huahuacunata na charinaca jatun llaquimi carca. Chashna llaquita apajushpaca ¿imatata Raquelca rurarca? Ñana imatapash rurai ushanichu nishpaca na pensarijurcachu. Ashtahuangarin aguantashpa catingapami Jehová Diosta cutin cutin mañarca. Shinami Jehová Dios uyajpi Raquelca huahuacunata charirca. Chaimandami Raquelca shuj viajeca nirca, tucui fuerzahuan macanajunshna esforzarishpami ‘misharcani’ nishpa (Génesis 30:8, 20-24).

8. a) ¿Ima llaquicunatata Joseca charirca? b) ¿Imatata Josepa ejemplomandaca yachajui ushapanchi?

⁸ Jacobpa, Raquelpa ejemplomi paipa churi Josetaca problemacunata aguantachun ashtacata ayudashcanga. Joseca 17 huatacunata charishpami shinlli llaquicunata charirca. Paipa huauquicunaca  envidiashpami Josetaca esclavoshna causagrichun jaturca. Jipamanga Joseca yangamandami Egipto llactapica ashtaca huatacunata prezo causarca (Génesis 37:23-28; 39:7-9, 20, 21). Shinapash Joseca na ninanda llaquirircachu, paicunata randi llaquichingapapash na munarcachu. ¿Imamandata na munarca? Paica Jehová Dioshuan ali amigo canata ninanda alicachimandami paipa huauquicunata randi llaquichingapaca na munarca (Levítico 19:18; Romanos 12:17-21). Josepa ejemploca ñucanchicunatapashmi ayudan. Huahuacuna cashpa llaquicunata charishca cashpa o cunanbi shinlli problemacunata charishpapash macanajunshnami esforzarishpa catina canchi. Shina rurashpaca Jehová Dios bendicianatami seguro caita ushanchi (Génesis 39:21-23, liingui).

9. ¿Imashinata Jacobpa, Raquelpa, Josepa ejemplota cati ushapanchi?

⁹ Ñucanchipashmi jatun llaquicunata aguantana canchi. Huaquinbica ñucanchita nalicachishpami gentecunaca ricun, burlarin, envidiamanda o yangamanda llaquichin. Shinapash na desanimarinachu canchi. Imashinami Jehová Diosca Jacobta, Raquelta, Joseta cushilla sirvichun ayudarca shinallatami ñucanchitapash ayudanga. Shina ayudanataca siempremi yarina canchi. Paicunaca Jehová Dioshuan ali amigo canatami ninanda alicachirca. Chaimandami Jehová Diosca paicunata shinlliyachirca, bendiciarcapash. Paicunaca macanajunshna esforzarishpami catirca, paicunapa oraciongunapi nishcatapash pactachingapami esforzarirca. Ñucanchicunapash tucuri punllacunapi causajushcamandaca, jipa punllacunapi shuj juyailla causai tianataca ashtahuanmi crishpa causana canchi. Shinaca ¿Jehová Diospa bendicionda chasquingapaca macanajunshnachu shinllita esforzarinajunchi?

10, 11. a) ¿Imamandata Jehová Diospa bendicionda chasquingapaca shinllita esforzarina capanchi? b) ¿Imata ali decisiongunata japichun ayudanga?

¹⁰ ¿Imamandata Jehová Diospa bendicionda chasquingapaca shinllita esforzarina canchi? Juchayucuna cashcamandami huaquingunaca nali munaicunamanda jarcaringapaj esforzarina can. Cutin huaquingunaca na desanimarishpa, cushijushpa villachingapami esforzarina can. Cutin shujcunaca ungüicunata aguantangapaj, ama sololla sintiringapaj, shujcunata perdonangapami shinllita esforzarina can. Mashna huatacunata Jehová Diosta sirvijushpapash, tucuicunallatami Jehovata ali sirvingapaca shinllita macanajunshna esforzarina canchi. Na cunganachu canchi, Taita Diosca paita juyashpa tucuipi cazujcunataca ashtacatami bendicianga.

¹¹ Huaquinbica Jehová Diosta sirvina ali decisiongunata agllanaca na fácil canllu. Nali munaicunata mishangapaj esforzarijujpicarin ashtahuan shinllimi can (Jeremías 17:9). Shina sintirijushpaca espíritu santota cuchunmi Jehová Diosta mañana canchi. Jehovapa espíritu santopash, oraciongunapashmi alita rurachun ayudanga. Shinami Jehovapa bendicionda chasquishun. Ñucanchi oraciongunapi imata nishcata pactachingapapash esforzarinami canchi. Shinallata Bibliata cada punlla liingapaj, estudio personalta, Familiahuan Adorana Tutata charingapapash esforzarinami canchi (Salmo 119:33, liingui).

12, 13. Nali munaicunata mishachunga ¿imata shuj huauquitapash, shuj panitapash ayudarca?

¹² Ashtaca huauquipanicunaca espíritu santopa, Bibliapa, ñucanchi publicaciongunapa ayudahuanmi paicunapa nali munaicunata mishai ushashca. Shuj ejemplota ricupashun. Shuj jovenga, ¡Despertad! del 8 de diciembre de 2003 revistapimi “¿Cómo puede usted resistirse a los malos deseos?” temata liirca. Chaita liishpaca ¿imashinata sintirirca? Paica ninmi: “Nali yuyaicunata mishangapami shinllita esforzarijuni. Nali munaicunata mishanaca shujcunapapash shinlli cashcatami chai temapica liircani. Chaita liishpami na ñucalla cashcata, tauca huauquipanicunapash shinllita esforzarinajushcata cuenda japircani” nin. Chai jovenga ¡Despertad! del 8 de octubre  de 2003 revistapipashmi “¿Aprueba Dios los estilos de vida alternativos?” temata liirca. Chai temata liishpami, huaquinguna cuerpopi ‘cashahuan tujsijpishna’ shinllita esforzarinajushcata cuenta japirca (2 Corintios 12:7, Mushuj Testamento Quichua Imbabura). Shinallata paicunaca cunangaman alita rurangapaj, jipa punllacunapi ali causai tianata cringapaj esforzarijushcatami ricurca. Cai jovenga ninbashmi: “Paicuna esforzarinajujta ricushpami, ñucapash cada punlla Jehová Diosta cazushpa paiman ashtahuan quimiri ushani. Cai nali mundopi causashpapash ñaupaman catichun paipa organizacionhuan Jehová Dios ayudajushcamandaca ashtacatami agradicini” nin.

¹³ Shinallata Estados Unidosmanda shuj paniguca escribircami: “Ñucanchi minishtijushca horaspi yachachishcamandami quiquingunata agradicingapaj munapani. Tauca viajetami chai temacunataca ñucapa escribishcatashna sintishcani. Ñucaca ashtaca huatacunatami Jehová Dios millanayachishca ruraicunata saquingapaj esforzarijushcani. Shinapash huaquinbica ñana esforzarishpa, tucuita chaipi saquingapami munashcani. Jehová Dios llaquij, perdonaj cashcataca alimi yachani. Shinapash cai nali munaicunata charishcamanda, chai munaicunata ñuca shungupi na millanachishcamandaca Jehová Diospa ayudataca na chasquinachu cani yashcanimi. Chai munaicunata mishangapaj macanajunshna esforzarinaca shinllipachami cashca” nin. Shinapash chai paniguca La Atalaya del 15 de marzo de 2013 revistapimi “¿Está su corazón dispuesto a conocer a Jehová?” temata liirca. Chai temata liishca jipaca ¿imashinata sintirirca? Paica nircami: “Jehová Dios, ciertopacha ñucata ayudangapaj munashcatami sintircani” nishpa.

14. a) ¿Imatata apóstol Pabloca ali yacharca? b) ¿Imashinata ñucanchi nali munaicunataca mishai ushapanchi?

¹⁴ (Romanos 7:21-25, liingui). Apóstol Pabloca alimi yacharca, nali munaicunata mishangapaj, juchapi ama urmangapaca shinllita esforzarina cashcata. Shinapash Jehová Diosta mañashpa, paipa ayudata chasquishpa, Jesuspi feta churashpaca chai nali munaicunata mishai ushanalla cashcatami ali yacharca. Cutin ¿ñucanchicunaca? ¿Nali munaicunata mishai ushanchichu? Ari. Apóstol Pablopa ejemplota catishpa, Jesuspi feta charishpami ñucanchipi confianapa randica Jehová Diospi tucui shunguhuan confiashpa mishai ushashun.

15. Llaquicunata aguantashpa, paita na saquishpa catichunga ¿imashinata Jehová Diosca ñucanchita ayudan?

¹⁵ Huaquinbica shuj problemamanda mashnata preocuparishcata ricuchichunmi Jehová Diosca saquin. Pensaripashun. Ñucanchi familiacuna shuj millai ungüita charijpi o yangamanda llaquichi tucujpica ¿imatashi rurashun? Cutin ñucanchicunallata chai llaquicunata charishpaca ¿imatashi rurashun? Jehová Diospi tucui shunguhuan confiashpaca paipa ayudatami mascana canchi. Paita na saquishpa, cushijushpa catingapaj, paihuan ali amigo cangapaj fuerzata cuchunmi mañana canchi (Isaías 40:29). Ñaupa punllacunapipash, cunan punllacunapipash Diosta ali sirvijcunapa ashtaca ejemplocunata ricushpami yachanchi, paita mañajpica Jehová Diosca llaquicunata aguantashpa catichun ayudajta.

16, 17. ¿Ima decisiondata japina capanchi?

¹⁶ Diabloca ñucanchicuna llaquirishpa, ñana ashtahuan catingapaj munajta ricushpaca, ninandami cushijunman. Chaimandami ‘imatapash aliguta’ rurashpa catina canchi (1 Tesalonicenses 5:21). Shinaca Diablotapash, paipa nali mundotapash, ñucanchi nali munaicunatapash mishai ushanchimi. Chaipaca Jehová Dios ñucanchita shinlliyachishpa ayudajtami crina canchi (2 Corintios 4:7-9; Gálatas 6:9).

¹⁷ Shinaca macanajunshna shinllita esforzarishpa catinataca nunca na saquinachu canchi. Shinami Jehová Dios ‘ashtacatapacha bendicianataca’ seguro caita ushashun (Malaquías 3:10).