Bibliapica yachachinmi, angelcunaca na tucuipi ayudanajushpapash, huaquinbica Taita Diosta sirvijcunata cuidarianajunmi nishpa (Salmo 34:7). ¿Imashina cuidanajushca? Ricupashun.

• Sodoma, Gomorra nishca nali llactacunata Jehová Dios tucuchigrijujpica, angelcunami Lot shuti ali runagutapash, paipa familiatapash salvashpa ayudarca (Génesis 19:1, 15-26).

• Ñaupa Babilonia llactapica, quimsa hebreo huambragucuna jornopi ama rupachi tucushpa huañuchunmi, Taita Diosca shuj angelta cachashpa paicunata salvarca (Daniel 3:19-28).

• Yarjachijuj leongunahuan tuta enterota pacarishca jipami, Jehová Diosta sirvijuj Daniel shuti runaguca nirca: ‘Taita Diosmi paipa angelta cachamushpa, leonguna ñucata ama imatapash rurachun shimita vicharca’ nishpa (Daniel 6:16, 22).

Angelcunaca Jehová Diospa munaita pactachingapami, apostolcunapa punllacunapi congregaciongunapa ruraicunapi ayudarca. ¿Imashinata ayudarca? Ricupashun.

• Apostolcuna prezo cajpica, shuj angelmi cárcel punguta pascashpa, Taita Diospa huasipi villachigrichi nishpa cacharca (Hechos 5:17-21).

• Villachishpa purij Felipe shuti runagutaca shuj angelmi nirca, Jerusalenmanda Gaza llactaman rina chaquishca ñanman rishpa, Etiopía llactamanda runaguman villachigri nishpa. Chai runaguca, Taita Diosta adorangapami Jerusalén llactaman rishcarca (Hechos 8:26-33).

• Na judiocunapash Jesusta catijcuna tucunalla tiempo chayajpimi, shuj angelca shuj muscuipishna ricurishpa Corneliotaca nirca, apóstol Pedrotaca canba huasiman invitai nishpa (Hechos 10:3-5).

• Shuj ángel ricurishpami apóstol Pedrotaca carcelmanda llujchirca (Hechos 12:1-11).

Bibliata escribishca punllacunapica, angelcunata cachashpami Taita Diosca gentecunata ayudan carca. Cunanbipash shina cajtaca, na nita ushapanchichu. Shinapash, ñucanchi punllacunamanda parlashpami Jesusca nirca: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga” nishpa (Mateo 24:14). Shinaca, ali villaicunata villachichunga angelcunami ricurianajushca.

Apocalipsis o Revelación libropi nishca shinaca, muyundi Alpapi gentecuna Jehová Diosta rijsichun, paipa munai ima cajta yachachunmi angelcunaca ayudanajun. Apóstol Juanga nircami: “Chai jipallami, jahua pacha chaupita cutin shuj ángel rijujta ricurcani. Chai angelca, cai pachapi causajcuna, tucui llactacunapi causajcuna, aillucuna, shuj rimaita parlajcuna, shuj shuj gentecunapash, causaita causaicaman quishpirichun villajungapajmi shamushca carca. Chai angelmi, cashna nishpa ninanda caparijurca: ‘Taita Diosta manllashpami, punchapambagumi cangui nina canguichi. Pai llaquichina punllacunami ña pactamushca. Chaimandami, jahua pachata, cai pachata, mama cuchata, pugyu yacucunata ruraj Diostaca, ninanda alicachina canguichi’” nishpa (Apocalipsis 14:6, 7). Mundo enteropi villachichun angelcuna ayudajushcataca, ashtaca experienciacunapimi uyashcanchi. Ashtahuangarin, juchata ruraj runa arripintirishpa Jehová Diosman tigrajpica, ninandami angelcunaca cushijun (Lucas 15:10).

Villachina tiempo tucurijpica ¿imatashi angelcunaca ruranga? Bibliapica, ‘Tucui Ushaita Charij Taita Dios ninanda llaquichimui punllatami’ Armagedón nin. Chaipimi angelcunaca, jatun mandaj Jesushuan tandanajushpa contracunahuan macanajunga (Apocalipsis 16:14-16; 19:14-16). Ninan ushaita charij angelcunaca, Jehová Dios munashca shinami, Jesushuan igual shayarishpa ‘ali villaita na cazujcunataca llaquichinga’ (2 Tesalonicenses 1:7, 8).

Shinaca, angelcunaca quiquinmanda preocuparinmi. Taita Diosta sirvijcuna ali cachunbash ricurianajunmi. Imashinami yachajupashcanchi, Jehová Diosca angelcunahuanmi paita sirvijcunataca cutin cutin cuidajushca, animajushca (Hebreos 1:14).

Chaimandami cada uno tapurina capanchi ¿muyundi Alpapi villachinajuj ali villaicunata uyashpa chasquigrinichu? nishpa. Testigo de Jehovacunaca Taita Diospa ali angelcunapa ayudata imashina chasquinataca cushijushpami yachachinga.