¿Yachaparcanguichu?
Jesusca ¿pingaichingapaj munashpachu ‘alcugucunahuan’ chimbapurashpa parlarca?
Grecia o Roma llactamanda huahuagutami paipa alcugundi shuj uchilla monumentota rurashca (caica siglo primero a.e.c. huatamanda o siglo segundo e.c. huatamandami can)
Shuj punllaca, Siria-Roma llactapimi Jesusca carca. Chaipimi, Grecia llactamanda shuj huarmiguca, ayudahuai nishpa paipaman quimirirca. Chaimi Jesusca, na judiocuna gentecunata ‘alcugucunahuan’ chimbapurashpa paihuan parlarca. Moisesman Cushca Leypi nishca shinaca, alcucunaca mapa animalcunami carca (Levítico 11:27). Shinaca ¿chai huarmiguta o na judío gentecunata pingaichingapaj munashpachu Jesusca shina nirca?
Na. Jesusca judiocunatara pundapi ayudana cashcata ricuchingapallami shina nirca. Chaimandami chai huarmigutaca nirca: “Huahuacuna micunajujta quichushpa, alcugucunaman caranaca nalichu” can nishpa (Mateo 15:21-26; Marcos 7:26). Grecia, Roma llactacunapica, alcuguta alicachishpami gentecunata cumbachun, huahuacunahuan pugllachun alcucunataca charin carca. Shinaca, alcugucuna ninaca na imapash nalichu carca. Chaimandami, Grecia llactamanda huarmiguca nishcanga: ‘Chashnami capan Apunchi Jesús. Shina cajpipash, huahuacuna micunajushpa jichashcataca, alcucunapash micupanllamari’ nishpa. Jesusca chai huarmigupa shinlli feta alicachishpami, paipa ushiguta jambirca (Mateo 15:27, 28).
Viajajushpaca ¿imamandata apóstol Pabloca shuyashunra nirca?
Cargata apaj barcotami pircapi dibujashca (siglo primero e.c. huatamandami can)
Apóstol Pablo, Italia llactaman barcopi rijujpica, ushashcatami huairajurca. Shuj llactaman chayashpaca, Pabloca shuyashunra nircami (Hechos 27:9-12). Shinapash ¿imamanda shina nirca?
Ñaupa punllacunapica, noviembre chaupi quillamanda, marzo chaupi quillacaman Mar Mediterráneo nishcata barcopi rina nali cashcataca, alimi barcopi purijcunaca yacharca. Shinapash Pabloca septiembre, na cashpaca octubre quillatami barcopica rijushcanga. Casi 400 huatacuna tucujujtami, Flavio Vegecio shuti escritorca, Compendio de técnica militar nishca librota escribirca. Chaipica nircami, Mar Mediterraneota barcopi ringapaca, huaquin quillacunaca ali alimi carca. Cutin shuj quillacunataca ashata nalimi carca. Cutin huaquin quillacunatacarin, nalipachami carca nishpa. Vegecioca nircami, 27 de mayomanda 14 de septiembrecamanga, barcopi ringapaca alipachami can nishpa. Cutin, 15 de septiembremanda 11 de noviembrecamanga, peligrosomi can nircami. 11 de marzomanda 26 de mayocamanbash, peligrosomi can nircami. Chaicunataca Pablopash, barcota manejajpash, barco dueñopash alimi yachashcanga. Shinapash paicunaca, Pablo shuyashunra nijta na uyashpami, barcopi rishpa llaqui aparca (Hechos 27:13-44).
