BIBLIACA CIENCIAMANDA NA PARLAJ LIBRO CASHPAPASH CHAI TIEMPOCUNAPI NA YACHASHCA COSASCUNATAMI NIRCA. HUAQUIN EJEMPLOCUNATA RICUPASHUN.

¿Universoca shuj callarita charircachu?

Ñaupa huatacunapi cientificocunaca ninmi carca, universoca siempremi tiashca nishpa. Shinapash cunanbi ashtaca cientificocunaca ninmi, universoca shuj callarita charircami nishpa. Bibliapash pundamandallatami chaita yachachijurca (Génesis 1:1).

Alpaca ¿imashinata can?

Punda punda tiempopi gentecunaca ninmi carca, cai Alpaca plano, rectomi can nishpa. Shinapash 2.500 yali huatacuna huashamanmi griego cientificocunaca ni callarirca, cai Alpaca redondomi can nishpa. Cutin Bibliaca 2.800 yali huatacuna huashamanllatami ña nijurca cai ‘muyundi Alpaca’ nishpa. Shinaca cai Alpa redondo cashcataca Bibliaca pundamandapachami ña villajushca (Isaías 40:22).

Huatacuna yalijpica ¿estrellacunapash, planetacunapash huaglinllu?

Aristóteles nishca cientificoca 2.400 yali huatacuna huashamanmi yachachirca, estrellacuna, planetacunaca na huaglishpa tucurinllu, cai Alpallami huaglin nishpa. Shinapash chaira casi 200 huatacuna huashamanmi cientificocunaca ni callarirca, cai Alpapash, estrellacunapash, planetacunapash huaglishpa tucurinllami nishpa. Lord Kelvin nishca cientificocarin, Bibliapi nishca shina, jahua pachapi tiashcacunapash, cai pachapi tiashcacunapash churajuna ropashna maucayajtami cuenta japirca (Salmo 102:25, 26). Ashtahuangarin crircami, Bibliapi nishca shinaca, Taita Diosca paipa rurashcacuna ama tucurichun, mushujyachi ushanata (Eclesiastés 1:4).

Planetacunaca ¿imapipash charirinllu?

Aristotelesca yachachircami, estrellacuna, planetacunaca imapash aire bola ucupishnami charirita ushan. Ñucanchi Alpaca chaupipimi can nishpa. Shinapash chaira casi 300 huatacuna huashamanmi cientificocunaca cuenta japirca, tucui planetacunaca na imapipash charirijushcata. Cutin Job libropica 3.500 yali huatacuna huashamanllatami Tucuita Ruraj Taita Diosca nijurca, Alpaca ‘na imapipash huarcuriajunllu’ nishpa (Job 26:7).

BIBLIACA UNGÜICUNAMANDA PARLAJ LIBRO NA CASHPAPASH UNGUICUNAMANDA IMASHINA CUIDARINATAMI ÑA VILLAJURCA.

Ungushcacunata separana

Moisesman cushca Leypica ninmi carca, lepra ungüihuan gentecunataca sano gentecunamanda separadomi charina can nishpa. Chaita ruranaca cunangamanmi ali can. Ñaupa huatacunapica lepra ungüihuan gentecunata na separaimandami ashtaca gentecuna huañurca (Levítico capítulo 13 y 14).

Huañushcacunata tacarishpaca maillarinami carca

100 yali huatacuna huashamanga, doctorcunaca huañushcacunata tacarishca jipa, maquicunatapash na maillashpa gentecunataca atindinllami carca. Chaimandami ashtaca gentecunaca huañurca. Shinapash Moisesman Cushca Leypica nijurcami, huañushcacunata tacarishpaca, limpio ricuringapaca tauca punllacunatami maillarina can, gentecunamandapash caruyana can nishpa. Chaicunata rurashpami sano caita usharca (Números 19:11, 19).

Lugariashcataca tapanami carca

Cada huatami medio millón yali huahuacuna diarreahuan huañun. Huaquinbica lugariashca pushtucunahuan na cuidadota charimandami contagiarin carca. Moisesman Cushca Leypica mandajurcami, caruman rishpami lugariana can, lugariashcatapash alpahuan tapanami can nishpa (Deuteronomio 23:13).

Circuncisión nishcata rurangapaca ¿mashna tiempotata shuyana carca?

Diospa Leypica mandajurcami, llullu huahuataca 8 punllacunata charijpimi circuncisiondaca rurana can nishpa (Levítico 12:3). Llullu huahuacunapaca semana jipami yahuarca ashaguta sanguyan. Chaimi chugrishpapash yahuarca na llujshishpa catijunlla. Bibliata escribishca punllacunapi, na cunanbishna mushuj aparatocuna tiashcajpipash, Diospa Leypi nishca shina, shuj semanata shuyashpa circuncisionda ruraimandami jari huahuacunaca na imapash pasan carca.

Ali sintirishpami sano caitapash ushan

Doctorcunapash cientificocunapash nishcami, cushilla cana, agradicina, ali causai tianata confiana, perdonana munaita charinami sano cachun ayudan nishpa. Bibliapica ninmi: “Cushilla shunguhuan causanaca, cuerpopajpash ali jambigumi. Ashtahuangarin llaquilla shunguhuan causashpaca, tullucamanmi chaquichijun” nishpa (Proverbios 17:22).