HUAQUINGUNACA NA NINMI. Shuj doctorca nircami, Biblia ayudachun munashpaca, 1920 huatapi llujshishca librohuan Química nishcata yachachijuj cuendami canman nishpa. Shujcunacarin tapunmi, cunanbi mushuj computadoracuna imashina funcionajta yachangapaca ¿punda tiempo computadoracunapa manualta ricunguichimanllu? nishpa. Shinaca tauca gentecunami yuyan cashca, Bibliaca punda tiempopi escribishca librollami can nishpa.

Cunan punllacunapica, imata yachangapaj munashpapash Internetman yaicushpa ricunallami can. Chaipica ashtaca consejocunami tian. Televisionbi, radiopipash ashtaca escritorcunacuna, psicologocunami paicuna imata yuyashcata, imashina ali causanatapash parlan. Ali sintirichun ayudan nishca librocunapash ashtacami tian. Chaicunahuanmi ashtaca gentecunaca charijyashca.

Cunan punllacunapi ashtaca información tiajpimi, ashtaca gentecunaca yuyan, Bibliapi consejocunaca cunan punllacunapaca na sirvingachu. Bibliaca casi 2 mil huatacuna huashaman escribishca librollami can nishpa. Shinapash ¿ciertochu can? ¿Ciertochu Quimicata yachachingapaj punda tiempo libroshna, o punda tiempo computadoracunapa manualshna can? Na. Ciencia nishcapash, mushuj aparatocunapash cada ratomi cambian. Shinapash gentecunaca na cambiashcachu. Punda tiempomanda cunangamanmi cushilla, ali causangapaj, familiata, amigocunata charingapaj munan.

Bibliaca punda tiempo libro cashpapash gentecuna cushilla ali causachunmi ayudan. Shinallata, Taita Dios escribichishca libromi can. Tucuipi ayudangapami ali consejocunata charin. Jatun llaquicunatapash aguantachunmi ayudan (2 Timoteo 3:16, 17). Ashtahuangarin Bibliapi consejocunaca, mashna huatacuna yalijpipash siempremi ali can. Bibliapillatami nin: ‘Taita Diospa shimica causajmi can’ nishpa (Hebreos 4:12).

Shinaca ¿ciertochu Bibliaca punda tiempo escribishca librolla can? ¿O ali consejocunata charij librochu can? Chai tapuicunata yachachunmi, cai Villajun revistaca ayudanga.