Ñaupa temapi parlashca Dianaca, yapata llaquirijuimandami ashtahuan ashtahuan ufiashpa machai callarirca. Bibliapi nishca shinaca, ashaguta ufianaca na juchachu can. Shinapash yapata ufiashpa machanami nali can. Chaimandami Bibliapica nin: ‘Ufiashpa causanatapash jichunami canguichi’ nishpa (Romanos 13:13). Machaimandami ashtaca gentecunaca ungun, familiacunahuan fiñanajun o huañuitapash tarin. Bibliapi consejocunata cazushpaca na ashtaca llaquicunata charinmanllu.

Dianaca ninmi: “Ufiashpapash llaquillami catircani. Chaimandami Bibliapa Filipenses 4:6, 7​pi shimicunata pactachircani. Chaipica ninmi. “Ima illajpipash, na chaitalla yariashpa llaquilla causanachu canguichi. Ashtahuangarin Taita Diosmanmi, imatapash villashpa ninanda mañana canguichi” nishpa. Tutacuna imapash pensamientocuna ñuca umaman shamujpica, Jehová Diosmanmi ñuca imashina sintirishcata, llaquirijushcata villashpa, ali sintiringapaj ayudahuai nishpa mañan carcani. Cayandi punllaca llaqui pensamientocunata ama charingapami esforzarin carcani. Jehová Diosta mañashpami imata chingachishcataca ñana pensarishpa chai ratopi imata charishcata pensari usharcani. Shinami, shungu ucupi tranquilo sintirircani. Chaimandami cutinbaca ñana machajushachu yarcani” nin.

Shuj jarihuan o shuj huarmihuan juchapi urmaimandami ashtaca llaquicuna tiashca. Huaquingunaca shuj jarihuan o shuj huarmihuan pugllarishpa, asi rijuimanda o pornografía nishcata ricuimandami jipaman juchapi urmashca. Ama juchapi urmachunmi Bibliaca ali consejocunata cun. Samuel shuti huambraguca ninmi: “Cuitsacunahuan pugllarishpa, asirijunatami gushtan carcani. Huaquinbicarin, shuj cuitsagucuna ñucata alicachishpa ricujpica, chai cuitsagucunata manapash munashpatami yangata parlanchilla carcani” nishpa. Jipamanga, taucacunami nihuan carca, paica cuitsacunata yangata engañashpa pugllanatami gushtan nishpa. Chaimi ñucaca ashtahuan cuitsacunataca molestan carcani. Shinapash nalimi sintirin carcani” ninmi. Cunanbica Samuelca ninmi: “Pugllaimandalla shuj cuitsagucunata parlachinaca nalichu cashca, ñucanchillapi pensarishpa shujcunata llaquichinatami yachin cashca” nishpa.

Samuelca Internetpi jw.org direccionman yaicushpami jovengunapa shuj temata liirca. Shinallata Proverbios 20:11​pimi pensarirca. Chaipica ninmi: “Alita rurajtapash, na mapata rurashpa, aligutalla rurajtapash huambrara cajpillata ricunallami” can nishpa. Samuelca cai textota liishpami cuitsacunahuan asirishpa pugllarijunaca nali cashcata cuenta japirca. Samuelca ninmi: “Cuitsacunahuan asirijushpaca ¿imashinata jipacunaman cazarashpaca ali cusa caita ushasha? Shuj huarmicunahuan asirijujta ricushpaca ¿imashinashi ñuca huarmiguca sintiringa? nishpa. Chaimi cuenta japircani, shujcunahuan pugllarishpa asirijunaca nali cashcata, shujcunata llaquichijushcata” nishpa. Chaicunapi pensarishpami Samuelca cambiarca, cuitsacunahuan jatun juchapipash na urmarca.

Antoniocarin pornografía nishcata ricuna viciotami charirca. Paipa huarmiguta ninanda juyashpapash, pornografiata ricunataca na saqui ushanllu carca. Paica ninmi: “1 Pedro 5:8​pi shimicunata ricushpami cambiai usharcani” nishpa. Chaipica nijunmi: “Cangunata fiñaj diabloca, león huacashpa, pitapash micungapaj mascajunshnami muyuriajun. Shina cajpimi rijchariashpa, aligutapacha yarishpa causana canguichi” nishpa. Antonioca ninmi: “Cunan punllacunapica tucui ladocunapimi pornografiaca ricurin. Ricujpica ñucanchi umapi grabarishca quedanllami. 1 Pedro 5:8​pi shimicunata liishpami cuenta japircani, tentaciongunaca Diablomanda shamujta. Chaimandami, mapa yuyaicuna umaman shamujpica pensarin carcani, cai mapa yuyaicunata charijpica Diabloca alicachishpami ricunga nishpa. Jehová Diosllami ali yuyaicunata charichun ayudaita ushan. Shinallata ñuca umapi, ñuca shungupi ama mapa yuyaicunata charishpa, huarmiguhuan aliguta causai ushachunga Jehová Diosllami ayudaita ushan cashca” nishpa. Antonioca minishtijuj horaspipacha ayudata chasquishpami, pornografiata ricuna viciotaca saquishpa, ashtahuan jatun llaquicunapipash na urmarca.

Imashinami ricupashcanchi, Bibliapi consejocunaca jatun llaquicunapi ama urmachunmi ayudaita ushan. Shinapash, problemacuna ashtahuan mirajpi, imata ruranata na atinajujpica ¿imashinata Bibliapi consejocunaca ayudaita ushan? Huaquin ejemplocunata ricupashun.